Ez da prezipitaziorik espero asteburuan Durangaldean
EGURALDIA | Azken euriteen ondoren, datozen ordu eta egunetan udaberriko giroa izango dugu berriro. Eguraldi eguzkitsua eta hego haizea larunbat eta iganderako. Tenperaturak nabarmen igoko dira, eta bihar eta etzi 25 edo 26 gradura iritsiko dira.
Ostirala, eguzkitsua
Ostirala eguzkitsua izango da nagusiki, baina zerua ez da erabat garbi egongo. Egunaren lehen partean behe-hodeiak eta behe-lainoa agertuko dira barnealdean; arratsaldetik aurrera erdi mailako hodeiak eta goi-hodeiak ugarituko dira. Ipar-ekialdeko haizea arratsaldean; ziertzo bolada gogorrak Ebroko haranean. Tenperatura minimo hotzak barnealdean, maximoak gradu pare bat igo daitezke.
Larunbata, hego haizea
Larunbaterako hodeiak eta ostarteak; erdi mailako hodeiak eta goi-hodeiak nagusituko dira, baina kostaldean ere tarteka behe-hodei batzuk agertuko dira, batez ere arratsaldetik aurrera. Ez da prezipitaziorik espero. Haizea hegoaldekoa izango da; ez du indar handirik izango eguneko orduetan, eta baliteke arratsaldean haizetea sartzea kostaldean, baina areagotu egingo da amaieran. Tenperatura minimoak ez dira gehiegi aldatuko, hotzak izango dira barnealdean; maximoek igoera nabarmena izango dute hego-haizearen ondorioz, eta udaberriko ukitua emango diote egunari.
