Eskabideak aurkezteko epea azaroaren 19ra arte egongo da zabalik
GERNIKA | Kultur Etxeak dirulaguntzen deialdi berria ireki du, musika-sorkuntza sustatzeko eta tokiko talde eta elkarteen proiektuak babesteko. Ekimenak 5.000 euroko zuzkidura du guztira, eta oinarrietan jasotako baldintzak betetzen dituzten proposamen guztien artean banatuko da.
Dirulaguntza horiek musikarekin lotutako jarduerak egiten dituzten eta Gernika-Lumon eragina duten elkarte, musika-talde eta banakako musikarientzat dira. Laguntza jaso dezaketen proiektuen artean daude musika-lanak grabatzea, ekoiztea edo editatzea, formatu fisikoan zein digitalean, bai eta proiektuei lotutako komunikazio- eta hedapen- materialak ere.
Laguntzak jasotzeko baldintzak
Deialdian parte hartu ahal izateko, eskatzaileek udalerrian erroldatuta egon beharko dute. Musika-talde edo -elkarteen kasuan, gutxienez kideen % 50ek udalerrian erroldatuta egon beharko du. Gainera, beren ohiko jarduera herriko musika-espazioetako batekin lotuta egon beharko da.
Zuzkidura osoa eskakizunak betetzen dituzten eskabideen artean banatuko da, eta proiektu bakoitzari esleitutako zenbatekoa egin duten gastuaren proportzionala izango da. Laguntzak bateragarriak izango dira beste dirulaguntza publiko edo pribatu batzuekin, baldin eta aldez aurretik komunikatzen badira eta laguntza guztiek ez badute gainditzen jardueraren justifikatutako guztizko kostua.
Eskaerak eta Arbolapean proiektuan parte hartzea
Interesa duten taldeek, elkarteek eta musikariek azaroaren 19ra arte aurkeztu ahal izango dituzte eskabideak. Inprimaki ofiziala eskuragarri egongo da Gernika-Lumoko Kultur Etxeko bulegoetan eta haren webgunean: www.kulturagernika-lumo.eus. Dokumentazioa bete ondoren, eskabideak Kultur Etxean bertan erregistratu beharko dira, aurrez aurre edo posta elektronikoz.
Inprimaki ofizialarekin batera, honako hauek aurkeztu beharko dira: arduradunaren edo eskatzailearen NANaren kopia, musika-proiektua deskribatzen duen memoria – taldearen ibilbideari, estiloari eta historiari buruzko informazioa jasotzen duena –, jardueraren aurrekontua edo memoria ekonomikoa eta laguntza jasotzeko banku-kontuaren zenbakia. Pertsona eta talde onuradunek, gainera, konpromisoa hartu beharko dute Arbolapean musika-programaren esparruan antolatutako kontzertu batean parte hartzeko laguntza eman eta hurrengo urtean, Kultur Etxeak ezarritako baldintzetan.
Deialdiak tokiko musika babesten jarraitzen du. Iaz, laguntzak zazpi musika-talderi eman zitzaizkien.
