Urtia faseko lanak urte amaieran hasiko dira, 20,7 milioi euroko aurrekontuarekin
ERMUA | Ermuko etorkizuneko Mendebaldeko Saihesbidea eraikuntzarako bidean da, I. fasearen (Urtia) aurkezpenaren ostean. Proiektu horren behin betiko dokumentua ostegun honetan, maiatzak 7, onartuko du Bizkaiko Foru Aldundiko Gobernu Kontseiluak. Urrats honi esker, obrak hasi aurreko administrazio-prozesua aktibatuko da; aurreikuspenen arabera, lanak urte honen amaieran hasiko dira, behin izapideak amaituta. Prozesuan ez da herritarren alegaziorik jaso, baina erakundeen ekarpenak barne hartu dira.
Carlos Alzaga foru aldundiko diputatuak eta Beatriz Gamiz alkateak gaur goizean aurkeztu dute jarduketa: 20,7 milioi euroko aurrekontua izango du eta obrak egiteko epea 36 hilabetekoa izango da. Lehen tarte honek BI-3302 eta BI-2301 errepideak lotuko ditu Mallumenditik barna, herriguneko trafiko astuna murrizteko asmoz. Alzagak nabarmendu duenez, “zirkulazioa hobetzeko jarduketa estrategikoa” da, bide-segurtasunean aurrera egiteko.
Azpiegitura
Ibilbideak hiru errotonda izango ditu —Urtia, Izarra eta Zearreko—, bi erreiko bidea eta hiru egitura nagusi, horien artean Urtiako bidezubia. Gainera, proiektuak ingurumen-neurriak jasotzen ditu Zubitegi erreka ingururako, baita paisaia integratzeko ekintzak ere.
Gamiz alkateak aurrerapen gisa baloratu du iragarpena, baina metatutako atzerapenetan jarri du arreta: “Argi dagoena onartuz hasi nahi dut: Mendebaldeko Saihesbidearen lehen fase honen behin betiko proiektua onartzea berri ona da”. Hala ere, ohartarazi duenez, “Ermuko jendeak iragarpen asko entzun ditu eta orain ziurtasunak nahi ditu”.
