36 urte betetzen dituen beka honek, aurten, euskaraz argitaratzea erabaki zuten lehen emakumeei buruzko ikerketa bat saritu du
AMOREBIETA- ETXANO| Amorebieta-Etxanoko Udalak jardunaldi bereziak egingo ditu otsailean Santiago Onaindia ikerketa bekari ikusgarritasuna emateko. Aurtengo ekitaldiak Lourdes Iriondo izango du ardatz, XVIII. edizioko lan sarituaren protagonista: “Lourdes Iriondo, Bide-urratzaile. Literatura eta kantagintza aztergai”, Alex Gurrutxaga eta Lorea Jainagak egindako ikerketa.
Ikerketa horrek Lourdes Iriondoren lana balioan jartzen du; euskal musika modernoaren aitzindarietako bat izan zen, eta diktadura garaian euskarazko haur literaturako lehen egileetako bat. Lanak ikuspegi feminista eta kulturala erabilita berreskuratzen du bere ibilbidea eta nabarmendu egiten du emakume sortzaileentzat eta euskararentzat garai historikoki gogor batean egindako ekarpena.
Horregatik guztiagatik, jardunaldi hauek modu pluralean eta inklusiboan diseinatu dira, haur, gazte eta helduentzako proposamenekin:
● 4 eta 10 urte bitarteko umeei zuzendutako ipuin kontalari musikala, Lourdes Iriondoren abesti eta istorioetan oinarritua, bere figurara hurbiltzeko eta txikitatik euskarazko irakurzaletasuna eta musikarako zaletasuna sustatzeko. Otsailaren 7an izango da, larunbata, 12:00etan, haur liburutegian.
● “Lourdes Iriondo, bide urratzaile” hitzaldia, Alex Gurrutxaga ikertzaile eta bekari esker argitaratutako liburuaren egilekidearen eskutik. Bertan, Iriondok euskal musika modernoaren aitzindari eta euskarazko haur literaturaren aitzindari gisa izan zuen papera aztertuko da. Otsailaren 10ean izango da, larunbatean, 19:00etan, Zelaietako auditorioan, Santiago Onaindiaren heriotzaren 30. urteurrenean, eta omenaldiaren ekitaldi nagusia izango da.
● “Lurdes Iriondo, ez gera alferrik pasako” dokumentalaren proiekzioa, Zinemaldian estreinatu berri dena. Dokumentalak Lourdes Iriondok musikari, kulturari eta memoria historikoari ikuspegi feministatik eta sozialetik egindako ekarpena nabarmentzen du. Saioa otsailaren 11n izango da, igandean, 19:00etan, Zelaietako auditorioan.
Horrez gain, otsailean zehar, liburutegiak Santiago Onaindia Bekaren bidez argitaratutako liburuak bilduko dituen erakusketa berezi bat hartuko du, Berbalapiko programaren baitan, “Santiago Onaindia beka, 36 urte euskal literatura ikertzen” goiburupean.
Udalak jardunaldi hauekin bat egitera deitu ditu herritarrak, Santiago Onaindiaren ondarea bizirik mantentzea eta aldi berean euskal kultura indartzen. Bekak, 1989tik, euskarazko ikasketa eta sorkuntza intelektuala bultzatzen ditu. Ekimen honekin, Santiago Onaindia zornotzar idazle eta ikertzaileari omenaldia egiten dio Udalak, bere heriotzaren 30. urteurrenean, eta kultura kritiko, sortzaile eta konprometituaren aldeko apustua indartzen du.
