Lehenengo saioa azaroaren 21ean izango da 18:00etan, “Ni tradición ni cultura: La mutilación genital femenina como violencia de género” izeneko hitzaldiarekin
DURANGO | Durangoko Udalak, Immigrazio Sailaren bidez eta Bizenta Mogel Bibliotekarekin lankidetzan, “Bideak Gurutzatuz: gure komunitatea osatzen duten bizitza migratzaileen istorioak” programaren edizio berri bat jarri du abian. Programa hau Kulturarteko Liburutegiaren ekimenaren baitan kokatzen da, eta jatorri desberdinetako pertsonen arteko elkarrizketa, topaketa eta esperientzien trukea sustatzea du helburu.
Bederatzigarren edizio honetan, Afrikako emakumeen ahotsak eta bizipenak izango dira ardatz, haien inguruan oraindik ere gizartean errotuta dauden estereotipo negatiboak (pobrezia, sufrimendua edo pasibotasuna, besteak beste) deseraikitzeko asmoz. Horren ordez, beren lidergo gaitasuna, aldaketa eragile gisa duten zeregina eta erronkei aurre egiteko duten indarra azpimarratuko dira.
Programazioa azaroaren eta abenduaren lehen astean zehar garatuko da, eta herritar guztientzako irekitako hainbat jarduera jasoko ditu. Ekitaldi guztiak Bizenta Mogel Liburutegian izango dira, sarrera librea izango dute eta lekua bete arte sartzeko aukera izango da.
Lehenengo saioa azaroaren 21ean izango da 18:00etan, “Ni tradición ni cultura: La mutilación genital femenina como violencia de género” izeneko hitzaldiarekin. Hizlaria izango da Hadja Idrissa Bah aktibista ginearra, Ginean emakumeen eskubideen aldeko borrokalari eta genitalen mutilazioaren aurkako erreferentea.
Azaroaren 26an, arratsaldeko 18:30ean, Giza Liburutegiaren edizio berri bat egingo da Bizenta Mogel Liburutegian. Formatu parte-hartzailea da hau, non pertsona gonbidatuak “liburu bizi” bihurtzen diren eta beren bizitzako ibilbideak, bizipenak eta ikaskuntzak lehen pertsonan partekatzen dituzten. Oraingoan, bost emakume afrikarrek hartuko dute parte: Aminata Sambou (Senegal), Judith Merveille Ngouana Maffo (Kamerun), Fatoumata Goundo (Mali), Awa Clementine Diatta (Senegal) eta Anita Hichaicoto (Ekuatore Ginea). Haien testigantzek aukera emango dute euren ibilbide pertsonalak ezagutzeko eta migrazio-prozesuek dakartzaten erronkez, indarrez eta ekarpenez hausnartzeko.
Azaroaren 27an 18:30ean, hitzaldi berria izango da “Cartografías de Resistencia: activismos de mujeres africanas” izenburupean. Bertan Gabriella Nuru soziologo eta aktibista afrofeministak eta Anita Hichaicoto, ikertzaile eta idazle feminista Afrikarrak parte hartuko dute. Biek emakume afrikarrek kontinentean zein diasporan abian jarritako erresistentzia eta aldaketa prozesuei buruzko gogoetak partekatuko dituzte.
Azkenik, programa abenduaren 3an, asteazkena, 19:00etan amaituko da, Ana Griott narratzailearen ahozko saio batekin. “El hombre cebú y la hermana pequeña… y otros cuentos de mujeres africanas que tienen mucho que contar” izenburupean, Afrikako emakumeak protagonista dituzten kontakizun tradizional eta garaikideak eskainiko dira.
“Bideak Gurutzatuz” ekimenaren edizio honek Bizkaiko Foru Aldundiaren eta Eusko Jaurlaritzako Migratzaileen Harrera eta Integrazio Zuzendaritzaren babesa du, baita Haaly Pular elkartearen laguntza ere. Horrela, Durangoko Udalak gizarte askotariko, ireki eta inklusibo baten alde duen konpromisoa indartzen du, non ahots guztiak entzunak eta baloratuak izan daitezkeen.
