Eraikin berria egungoaren inguruan egongo da eta DBHko eta Batxilergoko etapak hartuko ditu.
![Egungo eraikinaren inguruetan egongo da.](https://dot.eus/wp-content/uploads/2024/02/Urritxe-1-500x300-1.jpeg)
AMOREBIETA-ETXANO | Zornotzako herriak institutu berri bat izango du udalerrian, egungo eraikinaren inguruan, Urritxe auzoan. Proiektuak eraikin berri bat aurreikusten du, DBHko eta Batxilergoko etapak hartuko dituena. Hezkuntza Saila institutu berria eraikitzeko proiektua garatuko duen arkitektura-azterlana kontratatzeko pleguen idazketan murgilduta dago.
Institutu berriaren eraikuntza egungo eraikinaren ondoko lursailean egongo da, eta espazio hori Amorebieta-Etxanoko Udalak lagako du. Egungo eraikina martxan egongo da obrek irauten duten bitartean, eta, ondoren, eraitsi egingo da. Lanbide Heziketako zikloek gaur egun duten kokalekuari eutsiko diote.
“Amorebieta-Etxanon institutu berri bat eraikitzea albiste bikaina da. Zornotzako familiak dira gure lehentasuna eta hezkuntza gune berri bat izatea, berriztatua eta hezkuntza behar berrietara egokitua, funtsezkoa da gure herriko eta inguruko gazteentzat “, azaldu du Ainhoa Salterain Amorebieta-Etxanoko alkateak.