Proiektuaren helburua aireztapen-instalazioak, suteen aurkako babes-sistemak eta instalazio elektrikoak berritzea da
DURANGO | Durangoko Udalak lizitaziora atera du Obrako Brigadaren eraikinean egin beharreko lanak, instalazioak egokitzeko asmoz. Proiektu honen bidez, aireztapen-sistemak, suteen aurkako babes-instalazioa eta instalazio elektrikoa berrituko dira, guztira 258.880,03 euroko aurrekontuarekin (BEZa barne) eta 5 hilabeteko exekuzio-epearekin.
Lanaren atal garrantzitsuenetako bat instalazio elektrikoaren egokitzapena izango da, non ibilgailu elektrikoentzako karga-sistema bat jarriko den, eta egungo sare elektrikoa moldatuko den eraikinaren behar berriei erantzuteko. Horrez gain, larrialdi-argiztapena berrituko da, seguruagoa eta eraginkorragoa izango den ingurune bat bermatuz.
Aireztapenaren kasuan, ibilgailuak gordetzeko espazioetan hobekuntzak egingo dira, eta baita bestelako gela batzuetan ere, izan ere egungo sistema zaharkituta dago eta ez dabil behar bezala.
Bestetik, suteen aurkako babes-instalazioa ere berrituko da, hautemate-sistema zabalduz eta itzalketa-sistema berriak instalatuz, eraikineko segurtasuna hobetzeko helburuarekin.
Lizitazioan parte hartu nahi duten enpresek maiatzaren 5era arte aurkeztu ahal izango dituzte beren eskaerak. Informazio gehiago eta proiektuaren xehetasunak Durangoko Udalaren Kontratatzailearen Profilean daude eskuragarri.
