Durangoko Udalak eta STOP Indarkeria Bideko Elkarteak bultzatutako ekimenak Lehen eta Bigarren Hezkuntzako ikasleak ez ezik, helduak ere inplikatu ditu
DURANGO | Durangoko Udalak, STOP Indarkeria Bideko Elkartearekin elkarlanean, arrakastaz amaitu du 2024-2025 ikasturteari dagokion Mugikortasun Segurua Programa. Herrian dagoeneko sendotuta dagoen ekimen honek seguruagoa, errespetutsuagoa eta kontzienteagoa den mugikortasunaren alde egiten jarraitzen du, hezkuntza-komunitatea zein herritar oro inplikatuz.
Edizio honetan, programak 3.231 herritar hartu ditu bere baitan, horietatik 2.886 Durangoko ikastetxeetako ikasleak izan direlarik: 1.859 Lehen Hezkuntzakoak eta 1.027 Bigarren Hezkuntzakoak. Parte-hartze honi esker, ikasleek funtsezko ezagutzak eta jarrerak eskuratu dituzte ingurune urbanoan segurtasunez mugitzeko.
Horrez gain, programak helduentzako gizarte-ekimenak ere jaso ditu, eta 345 pertsona heldu inguratu dira horietara. Burututako ekintzen artean, umeentzako segurtasun-sistemak jasotzen dituen informazio-gida bat sortu da, haurdun dauden eta etorkizuneko gurasoentzako bereziki pentsatua. Halaber, Udalaren webgunean zabaltzeko eduki informatiboak prestatu dira, baita bizikidetza bide-segurtasunean hobetzeko sentsibilizazio-kanpaina bat ere.
Udalak eta STOP Indarkeria Bideko Elkarteak azpimarratu dute bide-hezkuntza prebentziorako eta gizarte-eraldaketarako tresna eraginkorra dela. Elkarteak berak adierazi bezala: “Bide-hezkuntzan inbertitzea da gaur egungo eta etorkizuneko belaunaldietan kontzientzia, errespetua eta erantzukizuna ereitea.”
Beste behin, Durangok konpromiso sendoa erakutsi du mugikortasun seguruarekin, ikastetxeen, familien eta herritarren inplikazio aktiboarekin. Udalak eskerrak eman nahi dizkie parte hartu duten pertsona eta eragile guztiei, eta guztiontzat herri seguruago eta errespetutsuagoa eraikitzen jarraitzera bultzatzen du.
