Plazak herritarren eskura izango dira Zelaietako aparkalekuko lehen solairuan, astelehenetik igandera, 07:00etatik 22:00etara
AMOREBIETA-ETXANO | Amorebieta-Etxanoko Udalak doako txandakako 150 plaza ireki ditu astelehen honetan herritarren erabilerarako, Zelaietako aparkalekuko lehen solairuan. Ekimena udalerriaren erdigunean mugikortasuna hobetu eta sarbidea errazteko premia gero eta handiagoari erantzuteko sortu da, eta konponbide praktikoa da bai zornotzarrentzat, bai lanera, erosketak egitera, jarduera kulturaletan parte hartzera edo bestelako gestioak egitera Amorebieta-Etxanora etortzen diren inguruko herrietako pertsonentzat.
Plazak asteko egun guztietan egongo dira erabilgarri, 07:00etatik 22:00etara, eta gehienez 3 orduz erabili ahal izango dira ibilgailu bakoitzeko, erabilera txandakakoa eta espazioaren aprobetxamendu handiagoa bermatzeko. Gaueko orduetan ezingo dira erabili, eskaera handiena dagoen ordutegia lehenetsiz.
Plaza hauek gaitzeaz gain, Udalak hainbat hobekuntza egin ditu aparkalekuan: sarbide-sistema tradizionala matrikula-irakurgailu batekin ordezkatu da, argiztapena eta seinaleztapena hobetu dira, eta bideozaintza-sistema bat jarri da gunearen segurtasuna bermatzeko.
Ainhoa Salterain alkateak azpimarratu duenez, “neurri honek ez die soilik gure bizilagunen beharrei erantzuten, baizik eta gure merkataritza eta ostalaritzaren bizitasuna indartzea eta udalerriaren erdiguneko bizi-kalitatea hobetzea ere bilatzen du”.
Irekiera honekin, Udalak Amorebieta-Etxano irisgarriago, erosoago eta erakargarriago baterantz beste urrats bat ematen du, bai herritarrentzat, bai herria bisitatzen dutenentzat. Tokiko ekonomia dinamizatzeko eta hiri-espazioaren kudeaketa adimentsuago baten aldeko apustu argia da hau.
