Sarrera-probak maiatzaren 22an eta 26an egingo dira
AMOREBIETA-ETXANO | Zornotza Udal Euskaltegiak udako euskara ikastaro trinkoa jarriko du martxan, HABEren C1 mailako azterketa prestatu nahi dutenentzat. Ikastaroa ekainaren 2tik 27ra egingo da, astelehenetik ostiralera, goizeko 8:30etik 13:30era, eta egunero 4,5 orduko saioak eskainiko dira. Jarduera honek euskarako azterketa ofizialari aurre egiteko beharrezko ezagutzak ematea du xede.
Ikastaroaren helburu nagusia da ikasleen hizkuntza gaitasunak hobetzea, C1 mailako titulua lortzeko. Eguneroko saioetan, ikasleek azterketarako beharrezko edukietan sakonduko dute, metodologia trinkoa eta ikasle bakoitzaren beharretara egokitua erabiliz.
Izen-ematea maiatzaren 12tik 21era egongo da zabalik. Interesdunek sarrera-proba bat egin beharko dute maiatzaren 22an edo 26an, arratsaldeko 16:00etan. Plaza kopurua mugatua izango da eta lehentasuna aurre-matrikularen zenbakiaren araberakoa izango da.
Izen-ematea osatu ondoren, matrikula formalki burutu beharko da maiatzaren 28 eta 29an, matrikula-orria eta dagokion ordainketa aurkeztuta. Matrikularen kostua 130,50€ izango da. Behin matrikula eginda, ez da itzulketarik egingo.
Horrez gain, euskara hobetzen jarraitu nahi dutenentzat, irailean 30 orduko ikastaro osagarri bat eskainiko du Udalak, HABE azterketa prestatzeko. Ikastaro horrek bi orduko eguneroko iraupena izango du.
Informazio gehiagorako edo izena emateko 946732026 telefono zenbakira deitu edo euskaltegia@amorebieta.eus helbidera mezu elektroniko bat bidali dezakete interesdunek.
