«Udalerriko espazio komunen erabilera arautzeko eta hobetzeko urrats esanguratsua», ziurtatu dute udal iturriek
AMOREBIETA-ETXANO | Zornotzako herriak oporraldiaren aurreko azken osoko bilkura egin du astelehen honetan. Espazio publikoaren eta kaleko salmentaren ordenantza onartzea zen bilkurako puntu garrantzitsuenetako bat. Arau-esparru berri bat da, «espazio komunaren erabilera arduratsua bermatu nahi duena, espazio publikoen erabilera modu eraginkorragoan arautuz eta bide publikoan elkarbizitzarako oinarriak ezarriz, zornotzar guztientzako bizikidetza eta irisgarritasuna errazteko», udal-iturrien arabera.
Izan ere, aurreko araudia 2007. urtekoa zen, eta, beraz, Udalak dokumentu hori eguneratu du, egungo ordenantzak udalerriaren egungo errealitateari eta beharrei erantzun diezaien.
Horrela, ordenantzaren ezaugarri nagusiak honako hauek dira:
- Udalaren jardueren bermea: Kultura- eta gizarte-jardueren jarraipena ziurtatzen da, eta udalaren baimena behar da gatazkak saihesteko eta espazioaren erabilera behar bezala antolatzeko.
- Terrazak erregulatzea: Ostalaritzako terrazen espazioa berrantolatzen da, pandemia osteko aldaketetara egokituz eta ordutegi sinplifikatuak ezarriz, bi alditan funtzionatzeko: urritik maiatzera eta ekainetik irailera.
- Herritarren parte-hartzea: Ordenantza egiteko, auzokideek eta ostalaritzako profesionalek parte hartu dute, bizikidetza hobetzeko konpromiso komunitarioa islatuz.
“Oso garrantzitsua da oreka bilatzea udalerriko jardueraren eta bizilagunen bizikidetzaren eta atsedenaren artean, eta, horretarako, beharrezkoa da espazio publikoaren erabilera arautzea. Horregatik, onespen honekin, Udalak oreka horri eusteko funtsezko araudia eguneratu du, espazio publikoaren erabilera optimoa eta ekitaldiak eta jarduerak behar bezala egitea ziurtatuz “, adierazi du Esther Torvisco Agenda 2030erako zinegotziak.
«Amorebieta-Etxano herri bizia da, jardueraz betea, eta horrela izaten jarraituko du. Bide publikoan jarduerak egitea bermatuta dago ordenantza honen onarpenarekin; izan ere, espazio publikoaren erabilera arautzea ez da, inolaz ere, debekatzearen sinonimoa “, argitu du.
