Udalak arrakastaz itxi du prozesuaren lehen fasea; online inkestan 2000 ekarpen baino gehiago jaso ditu
AMOREBIETA-ETXANO | Ametsetatik Herrira proiektuak arrakasta handiz itxi du lehen fasea, herritarren parte-hartze zabalarekin. Amorebieta-Etxanoko Udalak bultzatutako proiektu estrategiko honek helburu du udalerriaren etorkizuna 10-15 urte barru irudikatzea eta horretarako espazio ireki eta parte-hartzailea eskaintzen du, herritarrekin elkarlanean etorkizuneko Amorebieta-Etxano eraikitzeko aukera izateko.
Lehen fase honetan, online inkesta bat eta aurrez-aurreko saioak egin dira eta horien bitartez, zornotzarrek euren ideiak, ametsak eta beharrei buruzko ekarpenak egiteko aukera izan dute. Guztira, 250 pertsona baino gehiagok hartu dute parte saio presentzialetan zein online inkestaren bitartez. Horrek, zornotzarrek Amorebieta-Etxanoren etorkizunarekiko duten interes handia islatzen du eta era berean, prozesu honen bitartez jasotako proposamenek aurrera jarraitzeko balioko dute.
Erabateko babesa eraldaketari
Jasotako parte-hartze handiaz gain, emaitzek herritarrek udalerriarekiko eta honen balioekiko duten konpromisoa erakusten dute.
Amorebieta-Etxano deskribatzeko orduan, parte-hartzaileek “berde” hitzarekin definitu dute udalerriarentzat nahi duten etorkizuna ( % 30,2), “lasaia” hitzaz jarraituta, zornotzarrek ingurune naturala, lasaia eta guztiontzat eskuragarri izateko nahia islatuz.
Lehentasunei dagokienez, emaitzek etxebizitzaren sarbidea zornotzarren lehentasun nagusietako bat dela erakusten dute (52,7%), eta, ondoren, ingurune berdea ( % 46,7) eta enplegu-aukerak ( % 36,7) izan dira aipatuenak.
Era berean, zornotzarrek aldatu nahiko ez luketen alderdietako bat, zalantzarik gabe, beren udalerriaren ingurune berdea eta naturala da. Ingurunearekiko atxikimendu handi horrek, Amorebieta-Etxanorekiko errotze sentimenduarekin bat eginda —parte-hartzaileen %84,6ek adierazi dute beren udalerriarekin sakonki konektatuta daudela—, udalerriaren esentzia eta berezko izaera mantentzearen aldeko borondate argia islatzen du.
Ainhoa Salterain alkateak emaitza hauek duten garrantzia azpimarratu du:“Amorebieta-Etxanoren etorkizuna ezin da bertako bizilagunen ahotsa kontuan hartu gabe definitu. Parte-hartze prozesu honek argi erakusten du elkarrekin, Arkalaz, etorkizuna eraiki dezakegula, eta oso pozik gaude jasotako erantzunarekin. Une zirraragarrian gaude, aurrera jarraitzeko proposamen eta nahien oinarri sendoa dugula ikusita”.
Etorkizunari begiratzen jarraitzeko lau lan-ardatz
Jasotako proposamenen arabera, Udalak lau lan-ardatz nagusi definitu ditu proiektuaren hurrengo fasera aurrera egiteko. Ardatz hauek Amorebieta-Etxanoren hurrengo urteetako eraldaketa gidatuko duten ardatz estrategikoak adierazten dituzte:
1. Amorebieta-Etxano irisgarria, jasangarria eta segurua
Ardatz honetan udalerriko mugikortasuna hobetzean jarriko da arreta, oinezkoak lehenetsiz eta bizikleta- eta bidegorri-sarearen hedapena landuz. Gainera, tokiko merkaturatzea bultzatzeko lan egingo da, eta ekintzaileentzako proiektu berritzaileen sustapenean sakonduko da.
2. Amorebieta-Etxano anitza eta auzoekin konektatuta
Ardatz honen baitan auzoen arteko loturak eta segurtasuna hobetzeko ekimenetan sakonduko da, argiztapena eta hiriko baratzeak bereziki kontuan hartuz, adin eta interes desberdinetako pertsonak konektatzen dituzten belaunaldien arteko proiektu adierazgarri gisa.
3. Amorebieta-Etxano, mugitzeko, bizikidetzan aritzeko eta zaintzeko eremu partekatua
Ardatz honek kirola eta aisialdiko jarduerak sustatzeari ematen dio lehentasuna, jolaserako, kirolerako eta ekitaldietarako espazio publiko berriak sortuz eta, aldi berean, dauden ekipamenduen balioa handituz, erabilera integralagoa emateko.
4. Amorebieta-Etxano pertsonen alde
Udalerrira etorri berri diren herritarrentzat ongietorri protokolo bat garatzea da helburua, eta komunitateak bere ingurunearekin duen parte-hartzea eta lotura sustatuko dituen kaleko kultur ekintzen lanketan eta sakonduko da. Horrez gain, haurrentzako eta familientzako espazioak sortzen jarraitzea da lan-ardatz honen jarrai-lerroa.
“Orain jasotako amets eta proposamen guztietan sakontzeko eta errealitate bihurtzeko fasea dator. Hurrengo hilabeteak garrantzitsuak izango dira udalerri irisgarri, jasangarri eta kohesionatu bat sortzeko, gure nortasun berezia mantenduz eta aldi berean etorkizunera begira proiektatuz”.
Amorebieta-Etxano, beraz, herritarrek markatutako bidean konpromisoz eta indarrez aurrera egiteko prestatzen ari da. Herritar guztien parte-hartzea eta konpromisoa izango dira aurrerantzean ere udalerriaren etorkizuna eraikitzen duten prozesu honen zutabe nagusiak.
