MAÑARIA | Mañariko Udalak jakinarazi nahi du Agustin Sarrionandia alkateordeak eta zinegotziak bere kargua utzi duela, trafikoko arau-hauste baten harira. Udalak errespetatu egiten du Sarrionandiak hartutako erabakia, eta bereziki nabarmendu nahi du egoeraren aurrean erakutsi duen ardura kargu publikoa uzteko erabakia hartuta, gertatutakoaren erantzukizuna bere gain hartuz.

Mañariko Udalaren ustez, erakunde publikoen eta bertako ordezkari politikoen jardunak herritarren konfiantza izan behar du oinarri.

Horregatik, zintzotasunez eta erantzukizunez jokatzearen garrantzia azpimarratu nahi du. Era berean, udalak eskerrak eman nahi dizkio Agustin Sarrionandiari orain arte Mañariko herriaren alde egindako lanagatik.

The post Mañariko alkateordeak bere kargua utzi du trafikoko arau-hauste baten harira first appeared on DOT Durangaldea.

MAÑARIA | Urkiola Landa Garapenak (ULG) Damarena jaialdia aurkeztu du, Durangaldeko landa-lurraldea eta bertako baliabide turistikoak ezagutaraztea helburu duen ekimen berria. Lehen edizio hau irailaren 20an, igandez, egingo da Mañariko Angurreta Harrobia Arte Espazioan. Sarrera doakoa izango da eta udazkeneko ekinozioarekin bat eginez ospatuko da.

Jaialdiaren izenak lotura zuzena du eskualdearekin: kondairak dionez, Anbotoko Damak urtean bitan begiratzen dio haranari, eta egun horietako batean kokatuko da jai hau. ULGko presidente Erramun Osaren hitzetan, «Damarena lurraldeari begiratzeko beste modu bat da. Turismoa landa-garapenarekin lotu nahi dugu, eta Angurreta bezalako lekuak horretarako aukera paregabea dira».

Eguneko egitaraua

• 12:00 — Bisita gidatua: ‘LITOLOGIKA’ Iratxe Jaio eta Klaas Van Gorkum artisten instalazio berria estreinatuko da. Artistek beraiek egingo dute bisita gidatua, eta Victor Arrizabalaga Angurretako bultzatzaileak nabarmendu duenez, harrobiaren historia eta artea uztartuko dira.

  (Parte hartzeko ezinbestekoa da aurrez izena ematea angurretaharrobia.com webgunean).

• 19:00 — Haize Arrosa taldearen kontzertua Berrizko taldeak ikuskizun berezia eskainiko du, sorpresaz eta eskualdeko zein herrialde mailako gonbidatuz betea. EITBk grabatuko du emanaldia. Eneritz Gorritxategi abeslariaren esanetan, «Angurretak eskaintzen duen paisaia eta giroa ez dira ohiko eszenatoki baten modukoak».

Gastronomia eta busa

Egun osoan zehar, bertaratzen direnek eskualdeko produktuak eta edariak dastatzeko aukera izango dute. Antolakuntzak garraio zerbitzua ere erraztuko du: etengabeko autobus doakoa egongo da Mañariko plazatik Angurretaraino joan-etorria egiteko.

Ekimenak Mañariko Udalaren eta Bizkaiko Foru Aldundiko Turismo Sailaren babesa du.

The post Urkiola Landa Garapenak Damarena aurkeztu du, Durangaldeko jaialdi berria first appeared on DOT Durangaldea.

MAÑARIA |  “Argazki batek mila hitzek baino gehiago balio omen du”. Eredu horri jarraituz, Mañariko Ursula Donea adinekoen elkarteak proiektu berezi eta hunkigarri bati ekin dio herriko ondare historiko eta kulturala kontserbatzeko eta zabaltzeko helburuarekin. Datorren urtean elkarteak 40. urteurrena ospatuko duela eta, Gerediaga Elkartearekin elkarlanean, herriko argazki zaharrak bildu eta digitalizatzeko kanpaina jarriko dute abian uztail osoan zehar.

Deialdia Mañariko herritar guztiei zuzenduta dago, eta XX. mendeko argazkiak biltzea du helburu. “Pertsonen, familien, auzoen, eskolen, lanen, jaien, gertakarien… irudiak bilatzen ditugu, baita gure herriaren bizitza islatzen duen beste edozein une ere”, adierazi dute ekimenean lanean ibiliko diren elkarteko kideek.

Segurtasun osoa bermatzeko, argazkiak Gerediaga Elkartean digitalizatuko dira eta, lana amaitutakoan, jabeei bere horretan itzuliko zaizkie. “40 urte hauek etorkizunera begira ospatu nahi ditugu, baina gaur egun ezagutzen dugun Mañaria eraiki zutenen aztarnak ahaztu gabe”, nabarmendu dute elkarteko ordezkariek.

Bilketa uztailaren 1etik 29ra bitartean egingo da, asteazken eta ostiraletan, Ursula Donea Elkartearen lokalean. Hauek dira ordutegiak:

• Asteazkenetan (uztailak 1, 8, 15, 22 eta 29): 11:00etatik 13:00etara.

• Ostiraletan (uztailak 3, 10, 17 eta 24): 17:00etatik 19:00etara.

The post Mañariko argazki zaharrak bildu eta digitalizatzeko kanpaina abiatuko dute first appeared on DOT Durangaldea.

MAÑARIA | Mañariko Udalak Errekondo jatetxearen kudeaketa esleitzeko lizitazio publikoa abiatu du. Interesdunek abuztuaren 3ra arte izango dute euren proposamenak aurkezteko aukera.

Lizitazio honen bidez, Udalaren helburua da herriko jatetxe enblematiko honen kudeaketa esleitzea, herritarrei zein bisitariei ostalaritza zerbitzua bermatzen jarraitzeko. “Errekondo herriko eguneroko bizitzaren parte izan da urte askoan. Lizitazio honen bidez, kalitatezko zerbitzua eta kudeaketa egonkorra bermatzea da gure helburua”, adierazi du Aitziber Areitio alkateak.

Baldintzak

Deialdiak kudeatzaile berriari egonkortasuna eskaintzea du helburu, eta baldintza ekonomiko oso eskuragarriekin abiatu da:

• Iraupena: Kontratuaren hasierako iraupena bi urtekoa da. Ondoren, urtez urte luzatu ahal izango da, gehienez zortzi aldiz (guztira 10 urteko epea osatuz).

• Kanona: Gutxieneko kanona hilean 363 eurokoa izango da (BEZa barne). Lizitatzaileek kopuru hori gorantz hobetu ahal izango dute euren eskaintzetan.

Lizitazioari buruzko informazio osoa, xehetasunak eta baldintza administratiboen plegua eskuragarri daude dagoeneko Mañariko udaletxean eta Euskadiko Kontratazio Plataforman.

The post Mañariko Udalak Errekondo jatetxearen kudeaketa lizitazio publikora atera du first appeared on DOT Durangaldea.

MAÑARIA – Pasa den asteburuan, maiatzaren 30ean eta 31n, Lurraren Zientzietako Entitateen IX. Topaketa Nazionala burutu da Mañarian. Topaketa hauen funtsa geologia eta paleontologia gaietan interesa duten entitateak elkartzea da, partaideek elkar ezagutu dezaten, harremanak estutzeko, lankidetzak abiatzeko eta, oro har, Lurrak eskaintzen dituen altxorretaz gozatzeko.

Aurtengo edizioa Hontza Museoa Fundazioaren eta Aranzadi Zientzia Elkartearen artean antolatu da, Bizkaiko Foru Aldundiko Kultura Sailaren eta Mañariako Udalaren babesarekin. Bertara, Espainiako estatuan sakabanatuta dauden eta Lurraren Zientziekiko interesa duten hainbat elkarte gerturatu dira; besteak beste, Katalunia, Alacant, Aragoi, Madril eta Murtziatik etorritako 60 bat lagun. Azpimarratzekoa izan da Euskal Autonomia Erkidegoko MUFOMI, Luberri eta Harridunak elkarteen parte-hartze zabala.

Hitzaldiak eta historia

Larunbat goizean goizetik eman zitzaion hasiera topaketari, akreditazioen banaketarekin. Ondoren, ongietorria egin zuten Aitziber Areitio Mañariko alkateak, Leire Huerta Hontza Museoa Fundazioko zuzendariak eta Joxeba Larrañaga Aranzadi Zientzia Elkarteko kideak. Jarraian, Enrike Huerta Hontza Museoa Fundazioko presidenteak hitzaldia eskaini zuen, Hontza museoaren hastapenei eta bere bilakaerari buruz.

Ondoren, Asier Gomez eta Monika Villalba doktoreek “Neandertalak Euskal Herrian” eta “Durangaldea hartzen lurra” hitzaldiak eskaini zituzten, Durangaldean aurkitu diren Ursus spelaeus (kobazuloetako hartza) espeziearen aztarna ugariei erreferentzia eginez.

Bazkalosteko solasaldi aberasgarriaren ondoren, egitarauak Hontza Museora eta Angurreta harrobira egindako bisita gidatuekin jarraitu zuen. Bisitak Victor Arrizabalaga doktore eta harrobiko arduradunaren, eta Aranzadi Zientzia Elkarteko Arantza Aranburu eta Laura Damas geologoen eskutik egin ziren.

Irteera honek arratsaldearen zatirik handiena hartu zuen arren, partaideek indarrak gorde zituzten bilera bat egiteko. Bertan, hurrengo urteko topaketaren nondik norakoez eztabaidatu zuten, baita Lurraren Zientzien inguruan biltzen diren elkarteen kezkak eta erronkak partekatu ere.

Amaiera borobila

Biharamunean, topaketei amaiera bikaina emateko, ibilaldi gidatua egin zuten Urkiolako Parke Naturalean barrena, Aranzadi Zientzia Elkarteko geologia saileko Arantxa Bodego doktorearekin batera. Bertan, inguruko geologiaren bitxikeriak faunarekin eta paisaiarekin lotzeko aukera izan zuten. Jardunaldiei amaiera borobila emateko, mokadutxo bat egin zuten guztiek elkarrekin Urkiolan, datorren urtera arte agurtu baino lehen.

The post Lurraren Zientzietako Mañariko topaketak harremanak sendotzeko balio izan du first appeared on DOT Durangaldea.

MAÑARIA – Mañariko Udalak balorazio oso positiboa egin du aurtengo Maiatza Kulturalaren inguruan. Antolatzaileek azpimarratu dutenez, hilabete osoan zehar garatu den egitarauak herritarren erantzun bikaina jaso du, eta parte-hartzea handia izan da prestaturiko jarduera gehien-gehienetan. Gainera, herria dinamizatzeaz gain, eskualdeko beste udalerri batzuetako bisitariak erakartzeko balio izan du ekimenak.

Adin eta gustu guztietarako proposamenak uztartu ditu aurtengo programazioak. Astez aste, kulturak, musika emanaldiak, dantzak eta bestelako ekimenek giro bikaina ziurtatu dute Mañariko kaleetan.

Udalak eskerrak eman nahi izan dizkie modu batera edo bestera Maiatza Kulturalaren antolakuntzan zein jardueretan parte hartu duten eragile, elkarte eta herritar guztiei. Tokiko gobernuaren esanetan, boluntario eta talde hauen guztien inplikazioa ezinbestekoa izan da egitasmoa arrakastaz aurrera eraman ahal izateko.

Udalaren hitzetan, Maiatza Kulturala “herria dinamizatzeko eta kulturaz elkarrekin gozatzeko aukera paregabea” izan da beste behin ere, komunitate sentsazioa indartuz.

Ekitaldi ziklo honek utzitako zapore profesional eta herrikoiari esker, Mañariko Udalak kultur jarduerak sustatzen jarraitzeko asmo irmoa berretsi du datozen hilabeteetarako. Izan ere, mota honetako programek “herritarren arteko harremanak indartzen eta herriko dinamika soziala aberasten” laguntzen dutela defendatzen du udal taldeak, eta ildo horretatik lanean jarraituko dutela aurreratu dute.

The post Mañariko Udalak balorazio “oso positiboa” egin du Maiatza Kulturalaz first appeared on DOT Durangaldea.

MAÑARIA | Arri proiektuaren baitan, formatu txikiko lanak ikusi ahal izango dira larunbatean herriko hainbat gunetan. Igandean, berriz, Oreka TX taldearen kontzertua izango da Angurretan; antolakuntzak herrigunetik oinez igotzeko deia egin du.

Mañariako Maiatza Kulturalak aurrera jarraituko du datozen egunetan. Arri proiektua eta Oreka TX taldearen emanaldia izango dira egitarauaren ardatz nagusiak, astean zehar aurreikusitako beste hainbat jarduerarekin batera.

Maiatzaren 16an, Arri proiektuaren barruan, formatu txikiko pieza artistikoak ikusi ahal izango dira udalerriko gune desberdinetan. Korrala Sormen Guneak antolatutako ekimen hau “ginkana teatral” gisa definitu dute arduradunek.

Ikusleek ibilbide bat osatu beharko dute pieza guztiak ezagutzeko. Doako txartelak 17:00etan banatuko dira plazan, eta emanaldiak non izango diren sekretupean gordeko da hasiera ordura arte.

Proposamenen artean, Ibawa kolektiboaren dantza garaikidea, Karrika Antzerki Taldearen lan bat eta soka finkoa zein clowna uztartzen dituen pieza bat egongo dira. Amaiera 20:00etan izango da plazan, Swingtronics taldearen kontzertuarekin. Maiatzaren 17an, 12:00etan, Oreka TX taldeak kontzertua eskainiko du Angurreta gune artistikoan, sarrera doakoa dela. Antolatzaileek oinez joateko eskatu dute, ibilgailuentzako sarbidea itxi egingo baita.

Oreka TX txalapartaren inguruko musika proiektu entzutetsua da. Nazioarteko ibilbide luzea du, eta euskal musika tradizionala beste kultura batzuetako soinuekin uztartzen du.

Egitaraua

Maiatza Kulturaleko agenda beste jarduera hauekin osatuko da:

• Osteguna, 18:30: Gorka Valdesen hitzaldia hegaztiei buruz, kultur etxean.

• Ostirala, 19:00: Jokin Lasaren ‘Aberriak eta atzerriak’ musika ikuskizuna.

• Maiatzak 18, 18:00: Mural parte-hartzailea plazan, Eñaut Aiartzaguenarekin.

• Maiatzak 20, 18:00: Proiekzioa.

The post Arri eta Oreka TX taldearen kontzertua izango dira Mañariako asteburu kulturaleko protagonistak first appeared on DOT Durangaldea.

MAÑARIA | Udalak lau banku eta hiru zakarrontzi berri jarri ditu plaza nagusiaren eta errekaren ondoan dagoen parkean. Lanak joan zen astean burutu ziren eta 2.253 euroko aurrekontua izan dute.
Orain arteko elementuak zaharkituta zeudenez, ordezkatu egin dira.

Banku eta zakarrontzi berriak material erresistentez eginda daude, eguraldiaren eraginari urte askoan aurre egiteko eta epe luzerako erabilera bermatzeko.

Lan hauen helburua herriko espazio publikoen mantentze-lanak hobetzea eta eremu horien txukuntasuna eta erabilgarritasuna zaintzea da, herritarren ongizatea bermatuz.

The post Mañariko Udalak banku eta zakarrontzi berriak jarri ditu plazaren ondoko parkean first appeared on DOT Durangaldea.

MAÑARIA| Hontza Museoak, Bizkaiko Natur Zientzien lehen museo ofizialak, 2025eko urtea balantze oso positiboarekin itxi du. Mañariako Zumelaga Jauregian kokatua (Ebaristo Bustintza “Kirikiño” idazlearen azken egoitza izan zena) museoak 2.217 bisitari jaso ditu urtean zehar, eta guztira 24.431 bisitara iritsi da 2014an berriro ireki zenetik.

Arduradunek adierazten duten bezala “hiri-nukleo handietatik urrun egon arren, Hontza Museoak erreferentziazko espazio gisa sendotzen jarraitzen du, herritarren babesari eta eskaintzen duen proposamen zientifiko eta dibulgatiboari esker. 2025ean, guztira 110 bisita gidatu antolatu dira, museoak duen bokazio pedagogikoa indartuz, bereziki hezkuntza-eremuan”.

Bisitarien profila askotarikoa izan da: %44a haurrak, %42 helduak, eta gainerakoa gazte eta adinekoen artean banatu da. Generoari dagokionez, emakumeen eta gizonen arteko banaketa orekatua izan da. Jatorriari erreparatuta, bisitarien %91,6 Euskal Autonomia Erkidegokoak izan dira; horien artean %76,9 Bizkaikoak, %9,6 Gipuzkoakoak eta %4,9 Arabakoak. Halaber, azpimarratzekoa da nazioarteko bisitarien presentzia.

Publikoari zuzendutako jarduerez gain, museoak jarduera zientifiko sendoa garatzen jarraitu du. Gaur egun, Hontza Museoak 50.000 ale inguru gordetzen ditu, horietatik 48.183 informatizatuta, ikerketa eta kontsulta zientifikoa errazteko. Funtsak hamar aretotan banatuta daude, eta diziplina ugari hartzen dituzte barne: botanika, mikologia, geologia, paleontologia eta zoologia. Ondare horri 3.000 ale baino gehiagoko liburutegi espezializatua gehitzen zaio.

Lankidetza-harremanak

Horrez gain, 2025ean zehar Hontza Museoak hainbat erakunde eta unibertsitaterekin dituen lankidetza-harremanak sendotzen jarraitu du, ikerketa zientifikoa eta prestakuntza sustatzeko helburuarekin. Lankidetza horien emaitza izan dira museoko funtsak oinarri hartuta garatutako ikerketa-proiektuak, gradu eta master amaierako lanak, doktoretza-ikerketak, baita ikasleen praktikaldien bidez egindako jarduerak ere. Jardun horrek museoa ikerketa eta prestakuntzarako plataforma aktibo gisa finkatzen du.

Erakusketa-jarduerari dagokionez, “Tresnak eta Natura” aldi baterako erakusketa dago ikusgai, 2026ko irailera arte, eguneroko objektuen eta elementu naturalen arteko harremana aztertzen duen proposamen berritzailearekin.

2026ari begira, Hontza Museoak bere jarduera zientifiko, pedagogiko eta dibulgatiboa indartzen jarraitzeko konpromisoa berretsi du, bisitari kopurua handituz eta museoa herritarrengana gero eta gehiago hurbilduz, bereziki hezkuntza-eremuarekin eta komunikabideekin lankidetza sendotuz.

Informazio gehiago nahi izanez gero, jar zaitez gurekin harremanetan info@hontzamuseoa.eus helbidean.

The post 2.217 bisitari jaso zituen 2025ean Mañariko Hontza Museoak first appeared on DOT Durangaldea.