Ekitaldia datorren asteartean izango da Zornotza LHIIn goizeko 9:00etan hasita
AMOREBIETA-ETXANO | Urtero Lanbide Heziketa eta lan mundua euskararekin eta hizkuntza kudeaketarekin lotutako Hizkelan jardunaldia ospatzen da. Aurtengoa Hizkelan IX. jardunaldia izango da. Landuko diren gaietan azpimarragarrienak hauek ditugu: Giza Garapen Iraunkorra eta Jasangarritasuna, Lanbide Heziketako materialak, Ulibarri programa, ikastetxeetako normalkuntza praktika eredugarriak, “Ingura” ikas-ingurune digitala, Euskararen Dekretua, Euskara Gizarteratzeko gakoak eta Duala euskaraz bultzatzeko Aldundien egitasmoak.
Jardunaldiari sarrera emateko izango ditugu Eusko Jaurlaritzako Hezkuntza Saileko Lanbide Heziketako Plangintza eta Antolaketako Zuzendaria den Nikolas Sagarzazu Alzua, Bizkaiko Foru Aldundiko Euskara Zuzendari Nagusia den Isaac Amezaga Larrazabal, Zornotzako Lanbide Heziketako Ikastetxe Integratuko Zuzendaria den Idoia Atxaga Mendizabal eta Laneki elkartearen Presidente den Ainitze Blanco Etxaleku. Aurtengo ekimena Bizkaiko Foru Aldundiak lagunduta izango da.
Ekitaldian izango ditugu Eusko Jaurlaritzako Hezkuntza Saileko Lanbide Heziketako Sailburuorde Jon Labaka, Bizkaiko Foru Aldundiko ordezkariak, Laneki elkarteko elkartekideak (Ikaslan Araba, Ikaslan Bizkaia, Ikaslan Gipuzkoa eta Hetel elkartea), Lanbide Heziketako ikastetxeetako ordezkariak (zuzendaritzako kideak, irakasleak, Hizkuntza Normalkuntza Arduradun Teknikariak, Lanbide Heziketako Dualaren arduradunak, tutoreak…), udaletako ordezkariak eta teknikariak, enpresetako ordezkariak, hizkuntza zerbitzuetako kideak etab…. 100 eragile eta protagonista bilduko dira. Hizkelan jardunaldia Lanbide Heziketa, erakunde, enpresa, eta erakundeen zubi lanerako ekitaldi garrantzitsua da. Elkargune izateaz gain, praktika onak eta ezagutzak partekatzeko leku ere bada. Honez gain, Lanbide Heziketan euskara bultzatu duen enpresa zein norbanakoei, egindako ibilbidea errekonozitzea helburu duen Laneki oroigarri banaketa egingo da.
Erakundetako ordezkari eta teknikarientzat, Lanbide Heziketako ikastetxeetako kideentzat, lantokietako eta elkarteetako arduradunentzat. Hain zuzen ere, Lanbide Heziketako ikastetxeetako zuzendarientzat eta Hizkuntza Normalkuntza teknikarientzat, Dualeko arduradunentzat, Aldundietako eta Udaletako euskara arduradun eta teknikarientzat, Hizkuntza Normalkuntza planetan murgildutako enpresa, erakunde eta elkarteetako arduradunentzat, eta orokorrean euskara eragile, teknikari eta besterentzat.
Lanbide Heziketa eta lan mundua euskalduntzean dauden egitasmoak ezagutzea, ideia berri eta praktika onak partekatzea, eta euskalduntze bidea errazteko baliabideen berri izatea, besteak beste.
