Martxoaren 15ean, Lilakrosak herritarrak bilduko ditu berdintasunaren aldeko martxa herrikoi batean
DURANGO | Durango martxoaren 8a, Emakumearen Nazioarteko Eguna, ospatzeko prestatzen ari da, eta horretarako jardueraz beteriko egitaraua antolatu da. Herritarrak genero berdintasunaren inguruan hausnartzera eta konprometitzera gonbidatuko dira. Martxoan zehar, hainbat jarduera kultural, hezitzaile eta sozial izango dira, borroka feminista ikusarazteko eta gizarte bidezkoago eta berdinzaleago baterantz aurrera egiteko beharrari balioa emateko. “Denon ardura da” lelopean, berdintasunaren aldeko borroka gizarte osoa inplikatzen duen zeregin partekatua dela nabarmendu nahi da.
Ekitaldien hasiera martxoaren 5ean izango da, 13:00etan Andragunean egingo den adierazpen instituzionalarekin, eta Emakumearen Nazioarteko Egunaren ospakizunen hasiera izango da. Adierazpen horren ondoren, 18:30ean, Durangoko goi mailako kirolariekin topaketa bat egingo da Kurutzesantu Museoan, Eneritz Iturriagaetxebarria Mazaga txirrindulari profesional ohiak gidatua.
Martxoaren 7an, 18:30ean, Plateruena Kultur Aterpean bideoklip murgiltzaile bat grabatuko da. Jarduera honek mezu feminista modu sortzailean hurbiltzea eta herria emakumeen ahalduntzea sustatuko duen diskurtso bisual baten eraikuntzan inplikatzea bilatzen du.
Martxoaren 8an, “Beste mundu bat feminismotik” izeneko manifestazio feminista egingo da Durangon, 12:30ean, Ezkurdiko plazatik abiatuta Durangoko Mugimendu Feministak antolatuta.
Martxoaren 12an “Izena duena bada” izeneko bertso saioa egingo da, Medicus Mundi Bizkaiak antolatuta. Ekitaldia arratsaldeko 18:30tan hasiko da Durangoko Arte eta Historia Museoan.
Programazioarekin jarraituz, Zugaza Zinemanek Zineforum feminista hartuko du martxoaren 14an, Philip Barantiniren “Adolescencia” filmaren emanaldiarekin. Saioa 11:00etan hasiko da, eta Estibaliz Linares ziberindarkeria matxistetan adituak moderatutako mahai-inguru batekin osatuko da. Espazio horretan, egungo gizartean emakume gazteek dituzten erronkei, genero-joerei eta botere-dinamikei buruz eztabaidatuko da. Jarduera hau Andraguneak eta Andereak elkarteak elkarlanean antolatzen dute.
Martxoaren 15ean, XIX. Lilakrosak herritarrak bilduko ditu berdintasunaren aldeko martxa herrikoi batean, Ezkurdi plazatik 12:00etan abiatuta. 11:00etatik aurrera, bertaratzen direnek Ibaizabal Durango Eskubaloi Kirol Taldeari laguntzeko kamiseta solidarioak erosi ahal izango dituzte, berdintasunak kirolean eta gizartean duen garrantziaz sentsibilizatzen laguntzeko. Kamisetak martxoaren 3tik 12ra egongo dira eskuragarri Andragunean (Lariz dorea, 2), 5 €-ko prezioan. Interesa dutenek astelehen eta asteazkenetan eros ditzakete, 16:30etik 18:30era, eta astearte eta ostegunetan, 11:30etik 13:30era.
Hilaren amaieran, martxoaren 26an, Kurutzesantu Museoak “Adineko Emakumeen aurkako indarkeria: egiturazkoa, ezkutukoa eta berezia” hitzaldia eskainiko du, Iratxe Herrero Zarate gerontokriminologo eta ikertzailearen eskutik. 17:30ean, adineko emakumeek jasaten dituzten indarkeria mota desberdinei buruzko hausnarketa egingo da, kolektibo hori oraindik oso ikusezina baita borroka feminista askotan. Jarduera hau Durangoko Pentsionisten Mugimenduarekin elkarlanean antolatzen da.
Kantu feministen lehiaketa
Programazioari amaiera emateko, martxoaren 28an, Plateruena Kultur Aterpeak Kantu Feministen VIII. Lehiaketa hartuko du, finalisten kontzertuarekin. Musika ekitaldi honek amaiera emango dio jarduera zikloari mugimendu feministaren ospakizun batekin, musikaren bidez emakumeen eskubideen aldeko borroka erdigunean jarriz.
Jesica Ruiz Berdintasun zinegotziak berdintasunaren alde antolatutako programazioan parte hartzera gonbidatu ditu durangarrak: “Programazio honekin, Durangon berdintasunarekin dugun konpromiso irmoa berresten dugu, eta herritarrak gonbidatzen ditugu funtsezko gaiei buruz hausnartzera, hala nola indarkeria matxista, emakume gazteen parte hartzea kirolean eta adineko emakumeen egoera. Jarduera horien bidez, gizartea sentsibilizatu, ikusarazi eta mobilizatu nahi dugu, gizarte bidezkoago eta berdinzaleago baten alde. Gainera, nabarmendu nahi dugu berdintasuna erantzukizun kolektiboa dela, eta, beraz, ekintza horietan aktiboki parte hartzeko deia egiten dugu, mundu bidezkoago eta indarkeriarik gabeago baterantz aurrera egiteko. Aurten jarduerak antolatu ditugu herriko hainbat elkarterekin elkarlanean, eta hori oso aberasgarria da, eta hainbat esparru ukitu nahi izan ditugu (kirola, kultura, adinekoak, zinema…)”.
