Mozioak, EAJ-PNV eta PSE-EEren aldeko botoekin onartua izan da
AMOREBIETA-ETXANO | Pasadan ostiralean egindako azken osoko bilkuran, Amorebieta-Etxanoko Udalak mozio bat onartu du, Euskal Autonomia Erkidegoko hainbat herritan, hala nola Azpeitian, Ondarroan, Ordizian edo Gasteizen, berriki Ertzaintzaren eta udaltzaingoen aurka izandako erasoak eta mehatxuak erabat gaitzesteko. Mozioa EAJ-PNVren eta PSE-EEren aldeko botoekin onartu da. EH Bilduk, halaber, gertakari horiek egungo polizia-ereduari buruzko iritzi publikoa eta adierazpen askatasuna kriminalizatzeko eta gutxiesteko erabiltzen ari direla adierazi du, eta horrekin bat egin du Podemoseko bozeramaileak ere; bi alderdiek EAJ-PNVk eta PSE-EEk aurkeztutako mozioaren aurka bozkatu dute.
Udalak segurtasun indarrei babesa publikoki adieraztea erabaki du, gertatutako indarkeria eta etsaitasun ekintzak inola ere onartu behar ez direla azpimarratuz. Eraso horiek, batzuetan, zuzeneko erasoak eta polizia-etxeetako kalte materialak hartu dituzte barne, eta tokiko agintariek bizikidetzaren eta gizarte-bakearen aurkako erasotzat kondenatu dituzte. Zentzu horretan, mozioak batasunerako eta elkarrekiko errespeturako deia ere egiten du, gizarte demokratiko baten oinarri gisa.
Mozioak, halaber, Ertzaintzaren eta udaltzaingoen eguneroko lana balioan jarri eta errespetatzearen garrantzia nabarmentzen du, hurbileko polizia baita, herritar guztien segurtasuna bermatzeko eta legeak betetzeko lan egiten duena. Idatzian, Ertzaintza gertuko polizia-eredu demokratikoa dela azpimarratzen da, oinarrizko eskubideen babesarekin konprometitua, eta euskal autogobernuaren barruan duen funtsezko zeregina nabarmentzen da.
Hori dela eta, Amorebieta-Etxanoko Udalak Ertzaintzaren eta udaltzainen aldeko babes irmoa berretsi du, baita udalerri seguru eta errespetuzkoa eraikitzeko konpromisoa ere, non kultura demokratikoa eta bakezkoa sustatuko den.
