MAÑARIA | Mañariko Udalak jakinarazi nahi du Agustin Sarrionandia alkateordeak eta zinegotziak bere kargua utzi duela, trafikoko arau-hauste baten harira. Udalak errespetatu egiten du Sarrionandiak hartutako erabakia, eta bereziki nabarmendu nahi du egoeraren aurrean erakutsi duen ardura kargu publikoa uzteko erabakia hartuta, gertatutakoaren erantzukizuna bere gain hartuz.

Mañariko Udalaren ustez, erakunde publikoen eta bertako ordezkari politikoen jardunak herritarren konfiantza izan behar du oinarri.

Horregatik, zintzotasunez eta erantzukizunez jokatzearen garrantzia azpimarratu nahi du. Era berean, udalak eskerrak eman nahi dizkio Agustin Sarrionandiari orain arte Mañariko herriaren alde egindako lanagatik.

The post Mañariko alkateordeak bere kargua utzi du trafikoko arau-hauste baten harira first appeared on DOT Durangaldea.

AMOREBIETA-ETXANO | Udako etenaldiaren ostean, Amorebieta-Etxanoko Udalak berriro jarri du martxan Arkalaz Mugitu, herritar guztiei zuzendutako jarduera fisikorako orientazio-zerbitzu doakoa. Ekimenaren helburua da zornotzarrek jarduera fisikoa eguneroko bizitzan txertatu ahal izatea, modu seguruan, progresiboan eta bakoitzaren beharretara egokituta.

Ohitura osasungarriak sustatzeko zerbitzu pertsonalizatua

Arkalaz Mugitu zerbitzuaren bidez, jarduera fisikoko profesional batek orientazio pertsonalizatua eskaintzen du, parte-hartzaile bakoitzari bere egoerara, helburuetara eta egoera fisikora egokitutako plana zehazten laguntzeko. Zerbitzuak ariketa eta entrenamenduei buruzko gomendioak, udalerriko kirol-eskaintzari buruzko informazioa eta jarraipena eskaintzen ditu, plana pertsona bakoitzaren bilakaerara egokitzeko.

Zerbitzua herritar guztiei zuzenduta dago, adina, jarduera fisiko maila edo osasun-egoera edozein dela ere. Arkalaz Mugituren helburua da bizimodu aktiboago eta osasungarriagoak sustatzea, ariketa fisikoa egiteko oztopoak murriztuz eta jarduera fisikoak osasun fisikoan zein mentalean dituen onurak herritarrengana hurbilduz.

Nola eskatu zerbitzua?

Arkalaz Mugitu zerbitzura hitzordu bidez jo daiteke. Arreta Zelaieta Zentroan eskaintzen da, asteartetan 09:00etatik 13:00etara eta ostegunetan 16:00etatik 20:00etara. Gainera, hamabostean behin, astearteetan, profesionalak osasun-zentroan ere eskaintzen du arreta.

Ikasturte berri honetan, zerbitzuarekin harremanetan jartzeko telefono-zenbakia aldatu egin da. Hitzordua eskatzeko, interesdunek 722 259 003 zenbakira deitu behar dute.

Bizimodu aktiboago eta osasungarriago baten aldeko konpromisoa

Arkalaz Mugitu martxan jartzearekin batera, Udalak jarduera fisikoa herritarrengana hurbiltzeko eta udalerri aktiboago, osasungarriago eta inklusiboago bat sustatzeko ekimenak bultzatzen jarraitzen du. Zerbitzuaren helburua da pertsona bakoitzak bere egoerara hobekien egokitzen den jarduera aurkitzea, betiere profesional baten laguntza eta orientazioarekin.

The post Arkalaz Mugitu programa berriro jarri da martxan herritar guztiengana jarduera fisikoa hurbiltzeko first appeared on DOT Durangaldea.

AMOREBIETA-ETXANO | Musikak berriro beteko ditu Amorebieta-Etxanoko elizak eta baselizak irailean, Eleizetan zikloaren eskutik. 2026ko edizioak sei kontzertu eskainiko ditu irailaren 5etik 20ra, udalerriko ondarearen parte diren hainbat espaziotan askotariko musika-proposamenak eskainiz.

Eleizetan 2002tik antolatzen den ganbera musikako zikloa da, eta musikaz gozatzeaz gain, Amorebieta-Etxanoko ondare monumentala ezagutaraztea ere badu helburu. Programak kalitatezko kontzertuak eskaintzen ditu, formatu hurbil eta zuzen batean, hainbat estilo musikal uztartuz.

Aurten, kontzertuak Etxanoko Andra Mari elizan eta Boroa, Dudea, Garaitondo eta Bernagoitia auzoetako baseliza eta elizetan egingo dira.

Sei hitzordu irailean

Programazioa irailaren 5ean, larunbata, hasiko da, 20:00etan, Espliego Folk taldearen emanaldiarekin, Etxanoko Andra Mari elizan.Hurrengo egunean, irailaren 6an, igandea, 19:00etan, Irati Bilbao arituko da Boroako San Pedro baselizan.

Bigarren asteburuan, Aitor Huergo izango da protagonista irailaren 12an, larunbata, 20:00etan, Dudeako San Miguel baselizan. Ondoren, Haria Laukotea (Musikene) taldeak kontzertua eskainiko du irailaren 13an, igandea, 19:00etan, Garaitondoko San Isidro baselizan.

Azken asteburuan, Jou González eta Marta Cara arituko dira irailaren 19an, larunbata, 20:00etan, Bernagoitiko San Miguel elizan. Zikloari amaiera emateko, AMCB, Bilboko Ganbera Abesbatza eta Orkestra, izango da protagonista irailaren 20an, igandea, 19:00etan, Etxanoko Andra Mari elizan.

Autobus zerbitzu doakoa

Kontzertuetara joateko, Eleizetan zikloak autobus zerbitzu doakoa eskainiko du. Autobus guztiak San Migel kaletik (Osasun zentroa) abiatuko dira.

Irteera orduak honako hauek izango dira:

• Irailak 5, Espliego Folk: 19:30
• Irailak 6, Irati Bilbao: 18:30
• Irailak 12, Aitor Huergo: 19:30
• Irailak 13, Haria Laukotea (Musikene): 18:30
• Irailak 19, Jou González eta Marta Cara: 19:00
• Irailak 20, AMCB: 18:30

The post Eleizetanek berriro musikaz beteko ditu Amorebieta-Etxanoko elizak eta baselizak first appeared on DOT Durangaldea.

EGURALDIA | Irailaren lehen asteburua sargori dator Durangaldera: abisu horia aktibatuko da ostiralean eta larunbatean 35 °C-tik gorako tenperaturengatik

• Euskalmetek abisu horia ezarri du ostiral eta larunbatean, 13:00etatik 19:00etara.

• Igandean ere bero handia egingo du (35 °C-tik gora) eta euri-jasak botatzeko arriskua handituko da.

Durangaldea iraileko lehen asteburuari bero ikugarriarekin ekingo dio. Iragarpen meteorologikoek tenperatura altuen pasarte bat berretsi dute, eta ondorioz abisu horia aktibatuko da eskualdean ostiralean eta larunbatean.

Egunez egun

• Ostirala, irailak 4 (Abisu Horia):

  • Tenperaturak: Gutxienekoak 17 °C-koak izango dira eta gehienezkoak 36 °C-raino igoko dira.

  • Oduak eta haizea: Eguzkitsua egunaren zatirik handienean, eta arratsalde-gauan hodei gutxi batzuk agertuko dira. Ipar-mendebaldeko haize fin-fina.

  • Abisua: Bero handiagatik abisu horia egongo da 13:00etatik 19:00etara.

• Larunbata, irailak 5 (Abisu Horia):

  • Tenperaturak: Beroak ez du atzera egingo eta gehienezkoak 35 °C-ren inguruan mantenduko dira.

  • Oduak eta haizea: Hodei artean egongo da zerua egun osoan zehar, euri gutxiko probabilitatearekin (% 10 eguerditik aurrera). Ipar-ekialdeko haize leuna.

  • Abisua: Euskalmeten abisu horia indarrean jarraituko du 13:00etatik 19:00etara.

• Igandea, irailak 6:

  • Tenperaturak: Termometroek berriro ere 35 °C-ak gaindituko dituzte.

  • Oduak eta euria: Ezegonkortasuna handituko da. Zerua hodeitsu egongo da eta prezipitazio aukera % 55ekoa izango da egunaren lehen partean eta % 40koa arratsaldean.

The post Irailaren lehen asteburua sargori dator Durangaldera first appeared on DOT Durangaldea.

MAÑARIA | Urkiola Landa Garapenak (ULG) Damarena jaialdia aurkeztu du, Durangaldeko landa-lurraldea eta bertako baliabide turistikoak ezagutaraztea helburu duen ekimen berria. Lehen edizio hau irailaren 20an, igandez, egingo da Mañariko Angurreta Harrobia Arte Espazioan. Sarrera doakoa izango da eta udazkeneko ekinozioarekin bat eginez ospatuko da.

Jaialdiaren izenak lotura zuzena du eskualdearekin: kondairak dionez, Anbotoko Damak urtean bitan begiratzen dio haranari, eta egun horietako batean kokatuko da jai hau. ULGko presidente Erramun Osaren hitzetan, «Damarena lurraldeari begiratzeko beste modu bat da. Turismoa landa-garapenarekin lotu nahi dugu, eta Angurreta bezalako lekuak horretarako aukera paregabea dira».

Eguneko egitaraua

• 12:00 — Bisita gidatua: ‘LITOLOGIKA’ Iratxe Jaio eta Klaas Van Gorkum artisten instalazio berria estreinatuko da. Artistek beraiek egingo dute bisita gidatua, eta Victor Arrizabalaga Angurretako bultzatzaileak nabarmendu duenez, harrobiaren historia eta artea uztartuko dira.

  (Parte hartzeko ezinbestekoa da aurrez izena ematea angurretaharrobia.com webgunean).

• 19:00 — Haize Arrosa taldearen kontzertua Berrizko taldeak ikuskizun berezia eskainiko du, sorpresaz eta eskualdeko zein herrialde mailako gonbidatuz betea. EITBk grabatuko du emanaldia. Eneritz Gorritxategi abeslariaren esanetan, «Angurretak eskaintzen duen paisaia eta giroa ez dira ohiko eszenatoki baten modukoak».

Gastronomia eta busa

Egun osoan zehar, bertaratzen direnek eskualdeko produktuak eta edariak dastatzeko aukera izango dute. Antolakuntzak garraio zerbitzua ere erraztuko du: etengabeko autobus doakoa egongo da Mañariko plazatik Angurretaraino joan-etorria egiteko.

Ekimenak Mañariko Udalaren eta Bizkaiko Foru Aldundiko Turismo Sailaren babesa du.

The post Urkiola Landa Garapenak Damarena aurkeztu du, Durangaldeko jaialdi berria first appeared on DOT Durangaldea.

NANa eta pasaportea berritzeko hitzorduak ostiralean, irailak 4, goizeko 8:00etatik aurrera emango dira, HAZen, bai aurrez-aurre, bai telefonoz

DURANGO | Durangoko Udalak urriaren 1a eta 21a dokumentazio izapideak egiteko hitzordu berriak ezarri ditu. Herritarrek NANa egitea edo berritzea, pasaportea egitea edo berritzea, eta NAN elektronikoaren ziurtagiriak aktibatzea egin ahal izango dute Ezkurdin kokatuko den bulego mugikorrean.

The post Urriaren 1ean eta 21ean NANa eta pasaportea berritzeko aukera Durangon first appeared on DOT Durangaldea.

Mª Tere Ugarriza Rekaldek irailaren 13ra arte izango ditu bere lanak ikusgai, eta hilaren 14tik 26ra Pintzelak elkarte zornotzarrak “Ekialdea” talde-erakusketa aurkeztuko du

AMOREBIETA-ETXANO | Zelaietako erakusketa gelak Pintzelak elkarte zornotzarrari lotutako bi proposamen hartuko ditu irailean. Programazioa Mª Tere Ugarriza Rekalde elkarteko kideari eskainitako erakusketa monografikoarekin hasiko da, eta hilaren bigarren hamabostaldian “Ekialdea” talde-erakusketak hartuko du lekukoa.

Irailaren 1etik 13ra Mª Tere Ugarriza Rekalderen “Margotzea izan da nire ametsa txikitatik” erakusketa bisitatu ahal izango da. Pintzelak elkarteak iraileko lehen hamabostaldia artistari eskaintzea erabaki du, elkartearen barruan egindako ibilbidea aitortzeko eta haren lana gertutik ezagutzeko aukera eskaintzeko.

Irailaren 14tik aurrera, berriz, Pintzelak elkartearen “Ekialdea” talde-erakusketak hartuko du lekukoa, eta hilaren 26ra arte egongo da ikusgai. Erakusketa osatzen duten lanen bidez, elkarteak “denbora geldiarazi eta kolorearen bitartez kultura-zubi bat eraikitzea” proposatzen du.

Ordutegia

Bi erakusketak zentroaren ohiko ordutegian bisitatu ahal izango dira: astelehenetik ostiralera, 08:30etik 21:30era; larunbatetan, 10:00etatik 14:00etara eta 16:00etatik 20:00etara; eta igandeetan, 16:00etatik 20:00etara.

The post Mª Tere Ugarrizak eta Pintzelak elkarteak artez beteko dute Zelaieta irailean first appeared on DOT Durangaldea.

DURANGO | Durangoko Udalak Mañaria ibaiko begetazioa garbitzeko lanak burutu ditu azken asteetan, URA Agentziaren eta Udalaren arteko lankidetza-protokoloaren baitan.

Lanak Andra Mari kaleko zubitik Montevideo Etorbideko zubira arteko ibai-zatian egin dira. Esku-hartzearen barruan, eraikinen hormetatik irteten ziren hainbat zuhaitz moztu dira, eta ibaiertzean dauden beste zuhaitz batzuetan inausketa-lanak egin dira.

Jarduketaren helburu nagusia izan da ibaira begira dauden etxebizitzetako leihoen ingurua begetaziotik libre uztea eta erortzeko arriskuan zeuden zenbait zuhaitz kentzea. Horrez gain, prebentzio-neurri gisa, uholde-garaian adarrek edo zuhaitzek Montevideo Etorbideko zubian trabak sortzeko arriskua murriztea bilatu da, uraren joan-etorria erraztuz eta uholde-arriskua gutxitzen lagunduz. Lanek 7.800 euroko aurrekontua izan dute.

The post Azken asteetan Mañaria ibaiko garbiketa lanak aurrera eraman ditu Durangoko Udalak  first appeared on DOT Durangaldea.

AMOREBIETA-ETXANO | Amorebieta-Etxanoko herritarrek oso positiboki baloratzen dute udalerriko bizi-kalitatea. Hala jasotzen du Ikerfelek 2026ko ekainean egindako Iritzi Azterketa Soziologikoak: elkarrizketatutako pertsonen %92k uste du Amorebieta-Etxanon “oso ondo” edo “nahiko ondo” bizi dela, eta batez besteko balorazioa 10etik 8,1ekoa da.

Udalerrian norberaren bizitzari buruz egiten den balorazioa are handiagoa da, 10etik 8,3koa. Gainera, herritarren %71k uste du Amorebieta-Etxanok hobera egin duela azken urteotan, eta datu horrek aurrerapen esanguratsua erakusten du 2025eko urrian egindako neurketarekin alderatuta, orduan iritzi hori herritarren %50ek partekatzen baitzuen.

Amorebieta-Etxanoko alkate Ainhoa Salterainek nabarmendu duenez, “datuek erakusten digute Amorebieta-Etxanoko herritarrek bizi-kalitate ona dutela, udal zerbitzuak positiboki baloratzen dituztela eta herriak aurrera egin duela hautematen dutela. Balorazio horrek lanean jarraitzera animatzen gaitu, baina, aldi berean, ez konformatzera eta gure herritarrak oraindik kezkatzen dituzten gaiak artatzera ere behartzen gaitu”.

Udal zerbitzuen balorazio ona

Azterketak zerbitzu publikoen inguruko pertzepzio positiboa ere jasotzen du. Balorazio onena dutenen artean daude kaleen garbitasuna (7,5), Herritarren Arreta Zerbitzua-SAC (7,2), kirola (7,1) eta herritarren segurtasuna (6,9).

Oro har, elkarrizketatutako pertsonen %64k oso edo nahiko positiboki baloratzen du udal kudeaketa, eta batez besteko nota 10etik 6,7koa da.

Datu horiek garrantzi berezia hartzen dute herritarrek adierazitako lehentasunak aztertzean: herritarren arreta eta zerbitzu publikoak Udalak landu beharreko bigarren gai nagusi gisa agertzen dira, aipamenen %14rekin, etxebizitzaren atzetik.

Azterketak Ametsetatik Herrira prozesuaren balorazio bereziki positiboa ere jasotzen du. Udalak bultzatutako partaidetza-prozesu horren helburua herritarrak entzutea eta Amorebieta-Etxanoren hurrengo 10-15 urteetako etorkizuna elkarrekin definitzea da.

Herritarren %56k ezagutzen du ekimena, %23k parte hartu duela adierazi du eta %81ek positiboki edo oso positiboki baloratzen du, batez beste 10etik 8,1eko puntuazioarekin.

Ainhoa Salterain alkateak adierazi duenez, “datu horiek erakusten dute herritarrak entzuten direnean, pertsonek ekarpenak egiteko eta beren herriaren etorkizunari buruz erabakitzeko espazioak irekitzen direnean, erantzuna positiboa dela. Ametsetatik Herrirak, hain zuzen ere, egiteko modu hori adierazten du: etorkizunera begiratzea hemen bizi diren pertsonak kontuan hartuta”.

Hobetzen jarraitzeko esparruak

Azterketak hobetzeko tarte handiena duten esparruak identifikatzeko aukera ere ematen du. Aparkatzeko erraztasuna, 4,7ko balorazioarekin, eta trafikoa, 5,8koarekin, dira herritarrek hobekuntza-marjina handiena antzematen duten esparruak.

Arlo horretan, Udalak dagoeneko neurri zehatzak jarri ditu martxan, tartean Zelaietako doako eta txandakako 150 aparkaleku-plaza berriak, 2025aren amaieran martxan jarri zirenak.

Bestalde, aztertutako udal proiektuek balorazio altuak jaso dituzte. El Karmelo parkearen irekierak eta txandakako aparkaleku-plaza berriek 8,0 lortu dute; oinezkoentzako pasabideen seinaleztapena hobetzeak eta Jauregizaharren berrurbanizazioak, 7,9; Urgozok, 7,7; eta udalaren WhatsApp kanal berriak, 8,0.

The post Amorebieta-Etxanoko herritarrek oso positiboki baloratzen dituzte udalerriko bizi-kalitatea first appeared on DOT Durangaldea.

AMOREBIETA-ETXANO | Eubako auzotarrak jaietan murgilduko dira barikuan, irailaren 4tik 6ra bitartean, adin guztiei zuzendutako egitarau zabal eta parte-hartzaile batekin. Festak irailaren 4an, ostiralez, abiatuko dira txikienen gozamenarako antolatutako umeentzako eskulan tailerrekin eta apar festarekin, 17:30etik 19:30era. Sukaldaritza eta joko zaleek ere izango dute beren tartea arratsaldean zehar, 20:00etan tortilla txapelketa jokatuko baita eta, jarraian, 20:30ean, mus txapelketa.

Larunbatean, irailak 5, Mozorro Eguna ospatuko dute Euban. Eguneko egitaraua erdigunean jarriko duten herri bazkariekin hasiko da: lehenik umeen txanda izango da 13:30ean, eta ondoren nagusiena 15:00etan. Bazkalostean Giroa berotzeko bertso saioa eta “Kittu” erromeria izango dira ikusgai eta entzungai. Iluntzean hanburgesak eta oilaskoak jateko aukera egongo da, eta gaueko festa borobiltzeko DJ festa abiatuko da 21:30etik aurrera.

Auzoko jaiak agurtzeko, igandean, irailak 6, meza ospatuko da 12:00etan, eta ondoren Soinutxikierekin triki-kantu-dantza saioaz gozatu ahal izango dute bertaratutakoek. Arratsaldean, 17:30ean, Tor Magoaren ikuskizuna egongo da haurrentzat, eta 18:30ean briska txapelketa jokatuko da hirunaka. Festak gozo amaitzeko, txokolatada batekin emango zaio amaiera Eubako hiru eguneko egitarauari.

The post Kitturen erromeria, bazkariak eta mozorro eguna Eubako jaietan first appeared on DOT Durangaldea.