Gobernu-taldeari gardentasuna, parte-hartzea eta prozesu serio bat irekitzea eskatzen diote
ABADIÑO | Abadiñoko Udaleko EAJko eta PSEko udal taldeek publikoki salatu dute gardentasun falta eta oposizioaren bazterketa Hiri Antolamenduko Plan Orokorraren (HAPN) bigarren hasierako onarpena egiteko prozesuan (lehen hasierako onarpena 2019an egin zen).
Azaldu dutenez, ostiral honetan egin da Udalean gai hau aztertzeko lehen informazio-batzordea, baina, bi alderdietako ordezkariek adierazi dutenez, bertan ez zaie HAPO berriarekin lotutako dokumentaziorik eman bi alderdietako ordezkariei, “diapositiba batzuk baino ez dituzte ikusi”. “Kalean jakin dugu EH Bilduk eta AIBk osatzen duten gobernu taldeak planaren bigarren onarpena ekaineko osoko bilkurara eraman nahi duela, oposizioak aurretik inolako eztabaidarik egin gabe eta dokumentazioa eskuratu gabe”, kritikatu dute.
EAJk eta PSEk gobernu taldeari leporatu diote “aldebakarrez” jokatzea Abadiñoren etorkizunerako garrantzi handia duen gai batean. “HAPO ez da edozein izapide: udalerriko hazkundea, lurzoruaren antolamendua eta azpiegiturak markatzen dituen dokumentua da. Ezin da herritarren edo gainerako alderdi politikoen bizkar egin “, adierazi dute.
Bi alderdiek gardentasuna, parte-hartzea eta prozesu serio eta adostu bat irekitzea eskatzen diote gobernu-taldeari, inplikatutako eragile guztiek — baita Abadiñoko herritarrek ere — HAPO berriaren edukia ezagutu eta eztabaidatu ahal izan dezaten hasierako onespena eman aurretik.
