Proiektuak espazio seguru eta irisgarriak sortzea aurreikusten du bero handiko egoeren aurrean
DURANGO | Udalak proiektu berri bat hasi du “Klima babeslekuak” sarea diseinatu eta ezartzeko, herritarrak klima aldaketaren aurrean babesteko, batez ere muturreko bero egoeretan. Ekimen aitzindaria da udalerrian, eta pertsona guztientzako espazio seguruak eta irisgarriak bermatzea du helburu, kolektibo kalteberenei arreta berezia eskainiz.
Proiektu hau Durangok jasangarritasun eta erresilientzia klimatikoan hartutako konpromisoen parte da. Nabarmentzekoak dira Udaleko Larrialdi Plana berrikustea (2025eko otsaila), Klimaren eta Energiaren aldeko Alkatetza Itunari atxikitzea (2025eko iraila) eta Udaleko 2030 Agenda onartzea (2025eko abendua), beroaren edo hotzaren aurrean babesleku gisa egokiak diren udal espazioak identifikatzea barne. Horrela, Udalak aurrera egiten du arrisku klimatikoei aurrea hartzeko eta herritarren osasuna babesteko.
Proiektua 2026an gauzatuko da, hiru fase bereizitan, eta lanari ikuspegi tekniko, parte hartzaile eta komunikatibo batetik helduko zaio.
Lehen fasean, urtarrilean eta otsailean gauzatuko dena, klima testuingurua aztertu eta proiektua definituko da. Europako, autonomia-erkidegoko eta tokiko mailan egokitzeko estrategiak berrikusiko dira, baita indarrean dagoen legeria eta Durangoko Klima eta Energia Plana ere. Bero boladei buruzko proiekzioak ere egingo dira, eta auzo kalteberak identifikatuko dira, babeslekuen irizpideak ezartzeko: helburua, hartzaileak eta erabilera mugak.
Aldi berean, partaidetza eta komunikazio planak diseinatuko dira, udal teknikariekin eta tokiko elkarteekin batera. Otsailetik uztailera bitartean ekintzak egingo dira, hala nola informazio saioak, auzo bilerak, kolektibo zaurgarriekin topaketak, emakumeekin saio bat, online inkesta bat eta bisita gidatuak. Horri esker, herritarren ikuspegia txertatu ahal izango da klima babeslekuen sarearen diseinuan.
Bigarren fasean (otsailetik irailera), babesleku klimatikoen katalogoa egingo da. Udaleko teknikariekin espazio posibleak aztertuko dira, eta bisitak egingo dira irisgarritasuna, erosotasun termikoa, itzala, iturriak, komunak eta eremu kalteberetatik gertu egotea baloratzeko. Guneetako arduradunekin ere jarriko dira harremanetan, eta saio parte-hartzaileak egingo dira auzoetako eragileekin eta tokiko kolektiboekin. Proposamenak aztertu ondoren, fitxa teknikoak berrikusiko dira eta babeslekuen zerrenda bat baliozkotuko da, horiek lotuko dituzten ibilbide freskoak proposatzeaz gain.
Hirugarren fasean, plana eta babesleku klimatikoen mapa zabalduko dira.
Durangoko Udalak herritarren ongizatearekin duen konpromisoa berretsi du, bereziki klima aldaketa gehien pairatzen dutenen artean. Klima babeslekuak prebentzio eta egokitzapen neurri bat dira, eta tresna bat sare komunitarioa indartzeko, hiri ingurunea hobetzeko eta Durango hobe baterantz aurrera egiteko.
