Bizkaiko txakolina uztartuko dituen programazio zabala egongo da

DURANGALDEA | Bizkaiko Txakolina Jatorri Deiturak eta Urkiola Landa Garapenerako Elkarteak antolatutako «Mahasti Artean» jaialdia Durangaldera iritsiko da aurten, bere zazpigarren edizioan. Udaren amaierarekin eta mahats-bilketaren hasierarekin bat eginez, irailaren 11tik 13ra bitartean, eskualdea topagune bihurtuko da zentzumen guztientzako pentsatutako esperientziez gozatzeko. Aurreko urteetan beste eskualde batzuetan izan ondoren, aurtengo hitzorduak hiru kokaleku berezi izango ditu: Amorebieta-Etxanoko Etxanojauregi mahastia, Durangoko Azoka, eta bereziki azpimarratzekoa, Elorrioko Solatsu Telleria.

Elorriok protagonismo berezia izango du jaialdiaren egitarauan. Irailaren 12an, larunbata, goizeko 11:30etik aurrera, “Mahasti Yoga” saioa egingo da 1700. urte inguruan eraiki eta duela gutxi berreskuratutako Solatsu teileria historikoan. IZAKI Yogako Miren Mentxakak zuzenduko du saioa, eta ondoren, espazioa bisitatu eta Bizkaiko lau txakolin dastatzeko aukera egongo da, Saltsanek prestatutako gertuko produktu gastronomikoekin batera.

Asteburu osoko egitarauak eskaintza anitza jasotzen du Durangaldeko gainerako lekuetan. Ostiralean, María Cruickshank-en umore-bakarrizketak emango dio hasiera jaialdiari Etxanon. Larunbat iluntzean, musikak hartuko du lekukoa, Zea Mayseko Aiora & Piti eta Arima Soul taldeen kontzertuekin mahastien artean. Igandean, aldiz, Durangoko historia eta zaporeak uztartuko dituen ibilbide gidatu batek eta bertako Azokan egingo den dastaketak borobilduko dute asteburua.

Sarrerak eta informazio osagarria eskuragarri daude jaialdiaren webgune ofizialean: www.bizkaikotxakolina.eus

The post Elorrioko Solatsu Telleriak “Mahastien Artean” jaialdiaren 7. edizioa hartuko du first appeared on DOT Durangaldea.

ELORRIO | Udalak amaitutzat eman ditu Kurutziagako gurutzea lehengoratu eta zaharberritzeko lanak, udalerriko ondare historiko eta artistikoaren elementu baliotsuenetako bat babestuz. 28.329,73 euroko inbertsioari esker, 1522ko hareharrizko monumentu historiko honek bere jatorrizko edertasuna berreskuratu du. Esku-hartzearen ardatz nagusietako bat, garbiketa eta harriaren tratamenduaz gain, argiztapen-sistema berritzea izan da.

Izan ere, zaharberritze-lanak hasi aurretik, gurutzearen argiztapena anulatuta zegoen; lurreko fokoetan ura sartzen zenez, segurtasunagatik deskonektatu egin behar izan ziren. Orain, arazoa errotik konponduta, foko horiek erabat aldatu dira eta instalazioa iragazgaiztu da, gurutzeak gaueko orduetan argi berezia eta ikusgarria izan dezan berriro ere.

Kurutziagako gurutzea udalerriko historiaren lekuko zuzena da, eta Udalarentzat harrotasunezkoa da berriro ere egoera ezin hobean ikustea. Ur-filtrazioen arazoa konponduta eta fokoak aldatuta, herritarrek zein bisitariek Elorrioko ondarearen altxor handienetako bat bere osotasunean gozatzeko aukera izango dute gauez ere.

Esku-hartze hau 2023an hasitako ibilbidearen mugarri garrantzitsua da, Santa Anako (2024) eta Txanberiko gurutzeetan (2025) egindako lanen ondotik. Elorriok EAEko gurutze-multzorik ugariena eta baliotsuena du, inbentariatutako guztien %10 inguru biltzen baitu. Babes-maila gorena (1. maila) duen estilo hispano-flandestarreko harribitxi honen iraupena bermatuz, Udalak bere iragana etorkizuneko belaunaldiei egoera onenean transmititzeko konpromisoa berretsi du.

The post Elorrioko Kurutziagako gurutzea zaharberritzeko lanak amaitu dira first appeared on DOT Durangaldea.

ELORRIO.— Elorrioko EAJ-PNVk begi onez ikusi du gaur arratsaldeko osoko bilkuran Elorrioko Udalak eta Eusko Jaurlaritzak onartu duten lankidetza-hitzarmena. Akordio honi esker, Goietako lursailak, Aldapebeitia jauregia eta Aldapebeitia Txikia eranskina Eusko Jaurlaritzako Etxebizitza Sailaren esku geratuko dira, udalerrian babes ofizialeko alokairuzko etxebizitzak sustatzeko helburuarekin.

Guztira, babes ofizialeko alokairuzko 54 etxebizitza eraikiko dira: 43 Goietan egingo dira, eta gainerako 11ak Aldapebeitia jauregia eta eranskina zaharberrituz lortuko dira. Proiektu honek, etxebizitza beharrari erantzuteaz gain, herriko ondare historiko hori berreskuratu eta herritarren erabilerara bideratuko du.

Alderdi jeltzaleak adierazi du berri “pozgarria” dela Elorriorentzat eta eskualde osoarentzat, etxebizitza lortzeko zailtasun handienak dituzten pertsonei alternatibak eskainiko dizkiolako. Halere, neurria beharrezkoa izan arren, “ez dela nahikoa” ohartarazi dute.

EAJ-PNVk osoko bilkurako eztabaidan azaldu duenez, alokairu babestuko proiektu honek ez dio bere kabuz erantzungo herriko gazte eta familia askoren errealitateari. Azaldu dutenez, herritar askok ez dituzte babes ofizialeko etxebizitza bat lortzeko baldintza ekonomikoak betetzen (altuegiak direlako), baina era berean ezin dute merkatu libreko etxe bat erosi edo alokatu, herrian dagoen eskaintza falta erabatekoagatik. Egoera horrek gazte asko herritik kanpo bizitzera behartzen dituela salatu dute, eta tokiko higiezinen agentziek arazo honetaz urteak daramatzatela ohartarazten gaineratu dute “Alokairuko etxebizitza babestua beharrezkoa da eta urrats garrantzitsua da, baina ez du bere kabuz konpontzen Elorrion etxebizitza lortzeko dagoen arazoa”.

Hori dela eta, EH Bilduren udal gobernuari etxebizitza eskaintza berria sortzea lehentasuntzat hartzeko eta sustapen libreak bideratzeko baldintzak errazteko eskatu diote.

HAPOren atzerapena

Bestalde, jeltzaleek kezka handia agertu dute Elorrioko Hiri Antolamenduko Plan Orokorraren (HAPO) aurrerapena prestatzeko prozesuak dakarren atzerapenagatik. Plan hori funtsezko tresna da herriaren hazkundea antolatzeko eta etxebizitza berriak sustatu ahal izateko.

Gogorarazi dutenez, udal gobernuak iazko irailerako iragarri zuen planaren aurrerapena, baina urtebete geroago oposizioko taldeek ez dute inolako informaziorik jaso. EAJ-PNVren ustez, honek gobernu taldeak azken hamarkadan etxebizitza politikan izan duen “ekimen eta plangintza falta” islatzen du. “54 babes ofizialeko etxebizitzak berri onak dira eta gure babes osoa dute, baina orain gobernu taldeari dagokio bere lana egitea. Gazteek eta familiek beren bizi-proiektua hemen garatu dezaten, etxebizitza aukera berriak bultzatu, planifikatu eta erraztuko dituen Udala behar dugu”, biribildu dute.

The post Elorrioko EAJk babestu egin du alokairuko 54 VPO eraikitzea, baina “ez dira nahikoak” first appeared on DOT Durangaldea.

ELORRIO.—  Elorriok prest dauka Ferixa Nausikoak ospatzeko egitarau zabala. Irailaren 4tik 13ra bitartean, herria musikaz, kulturaz, kirolaz, tradizioz eta herri-giroz beteko duten ehunka jarduera izango dira, adin guztietako herritarrei zuzenduta. Egitaraua Udalak, Jai Batzordeak eta herriko elkarte, eragile zein boluntario ugarik elkarlanean prestatu dute, beste urte batez jai parte-hartzaile, anitz eta herrikoiak eskaintzeko helburuarekin.

Aurtengo jaien une hunkigarrienetako bat larunbatean, irailak 5, bizi izango da txupinazoarekin. Edizio honetan, EME Elorrioko Merkatarien Elkarteak izango du txupinazoa jaurtitzeko ohorea, elkartearen 25. urteurrena ospatzeko eta herriari egiten dion ekarpena eskertzeko. Ospakizun honekin bat eginez, EMEk jaietako zapi horiak banatuko ditu doan bere denda eta tabernetan.

Bestalde, Jose Luis Pulido Calvoren “Iskanbila” lana izan da Ferixa Nausikoak 2026 iragarriko dituen kartel lehiaketako irabazlea.

Txosnagune berria

Aurtengo Ferixa Nausikoek aldaketa eta hobekuntza logistiko garrantzitsuak ekarriko dituzte:

• Txosnagunearen kokapen berria: Bokata txosna Buzkantz kalean egongo da, eta karpa azpiko txosnak zein haien kontzertuak Ganondoko sarreran egingo dira.

• Karrozen ibilbide berria: Desfilea Aldatsekuatik abiatuko da, herriko plazatik igaro, eta San Pio, Errebonbilo eta Errekakaletik berriro plazaraino igoko da. Karrozen desfilean eta koadrilen jolasetan parte hartu nahi dutenek programan agertzen diren QR kodeen bidez eman dezakete izena.

• Ferixia eta gandua: Irailaren 6ko nekazaritza, artisautza eta abeltzaintza azokan ahalik eta eskaintzarik zabalena bildu nahi izan da eta, aurreikuspenen arabera, aurten behiak ere izango dira azokan.

• Garraioa eta atrakzioak: Autobus zerbitzuak indartu eta egokituko dira, eta barraketan haur txikientzako atrakzio berri bat egongo da.

Musika izango da berriro ere jaien motor nagusietako bat. Eskaintza oso zabala izango da: elektronika, erromeriak, fanfarreak, DJ emanaldiak, karaokea, tributuak, flamenkoa, folka eta Maruxak ikuskizuna. Horrez gain, txikienek bitsaren festa eta jolasak izango dituzte; gazteek ekintza ugari Ganondoko uhartean; eta adinekoek euren egun berezia ospatuko dute mendi ibilbide, meza, bazkari eta dantzaldiarekin.

Hona hemen jaien hitzordu nagusien kronologia:

• Irailak 4, ostirala: Txosnagunearen irekiera.

• Irailak 5, larunbata: Txupinazoa eta danborrada.

• Irailak 6, igandea: Ferixia (Nekazaritza eta abeltzaintza azoka).

• Irailak 7, astelehena: Koadrilen bazkaria eta jolasak.

• Irailak 11, ostirala: Jubilatuen eguna eta Los Zopilotes Txirriaos taldearen kontzertu nagusia.

• Irailak 12, larunbata: Sukalki Eguna, karrozen jaitsiera eta DJak.

• Irailak 13, igandea: Jaien amaiera “Elorrioko Koloreak eta Zaporeak” ekimenarekin, herri kirolekin eta bertso saioarekin.

Gainera, herriko kirol taldeek ere protagonismo berezia izango dute, lagunarteko futbol, saskibaloi eta eskubaloi partidekin.

Ferixa Nausikoek aurten ere jai parekide, seguru eta errespetuzkoen aldeko konpromiso irmoa berretsiko dute. Horretarako, eraso matxista eta arrazisten aurkako protokolo feminista aktibatuko da berriro, herriko mugimendu feministarekin elkarlanean.

Informazioa edo laguntza behar duten pertsonek 688 86 52 94 telefono zenbakira jo ahal izango dute, eta jaietan zehar kapela moreak banatuko dira. Era berean, kontsumo arduratsuaren inguruko sentsibilizazio-kanpaina ere egingo da.

Julene Lazkano alkateak herritar guztiei jaiak bizitzeko gonbita luzatu die: “Ferixa Nausikoak herri osoaren elkarlanaren emaitza dira. Eskerrik beroenak eman nahi dizkiegu jaiak posible egiten dituzten elkarte, eragile, boluntario, udal langile, merkatari, ostalari, nekazari, abeltzain eta artisau guztiei. Gonbidapena luzatzen diet herritar guztiei jaiak euskaraz, errespetuz, berdintasunez eta arduraz gozatzera”.

The post Elorrioko Merkatarien Elkarteak botako du aurtengo txupinazoa Ferixa Nausikoetan first appeared on DOT Durangaldea.

ELORRIO | Aurten, Dermatosi Nodular kutsakorra gaixotasuna dela eta, behiek eta txahalek ezingo dute aurtengo Ferixa Nausietako azokan parte hartu.

The post Irailean Elorrio egingo den ganadu-feriarako izena emateko epea zabalik first appeared on DOT Durangaldea.

ELORRIO | Udalak Fytasaren lursaila eta instalazioak erosi ditu. Operazio horren bidez, Udalak bere egin du urte luzez abandonatuta eta degradazio egoeran egon den eremu bat, eta aukera berri bat ireki du herriaren erdigunean kokatutako espazio hori berreskuratzeko, birgaitzeko eta etorkizuneko beharrei erantzuteko.

Fytasa fundizio nodularrak 96 urteko ibilbidea izan zuen, eta 2011n itxi zituen ateak behin betiko. Ordutik, instalazioak erabilerarik gabe egon dira, pixkanaka hondatuz. Plan Orokorraren berrikuspenaren testuinguruan, udal gobernuak argi izan du hasieratik eremu horrek ezin duela industria-erabilerari lotuta jarraitu. Herriaren erdigunean dagoen kokapenak eta dituen metro koadroek aukera ematen dute etxebizitzarekin, ekipamenduekin eta herritarren behar berriekin lotutako etorkizuneko erabilerak aztertzeko. Hausnarketa hori berretsi zuten, gainera, HAPOren berrikuspeneko parte-hartze prozesuan parte hartu zuten herritarrek.

Azken urtea kudeaketa handikoa izan da Udalarentzat. Erosketa prozesua konplexua izan da, besteak beste, jabetza egoera bera zaila zelako: alde batetik, inbertsio funts bat zegoen, eta, bestetik, konkurtso-administratzaile bat, Fytasaren zati bat oraindik hartzekodunen konkurtsoan baitzegoen. Horrez gain, hainbat azterketa egin dira operazioaren egokitasuna bermatzeko: lursailaren egoera, kutsaduraren irismena, jarduketaren bideragarritasun ekonomikoa eta Udalak erosketa gauzatzeko duen ahalmena. Prozesu osoan zehar beharrezko diskrezioz jokatu da, espekulazio aukerak saihesteko.

Erosketa prozesua ekainean amaitu da, eta operazioaren prezioa 345.000 eurokoa izan da. Udala dagoeneko hasi da hurrengo urratsak lantzen. Ingurumen Sailarekin harremanetan egon da Eusko Jaurlaritzan, eta kutsadura kentzeko prozedura abiaraziko duen enpresa kontratatu du. Lehenik eta behin, bulegoen eraikina ahalik eta azkarren eraisteko asmoa dago, premiazko prozedura baten bidez; izan ere, gaur egun pertsonak modu irregularrean sartzen dira eraikinera, eta egoera arriskutsua da. Ondoren, gainerako pabiloiak eraitsi eta deskontaminatzeko lanak egingo dira. Horren harira, Julene Lazkano, Elorrioko alkateak, adierazi duenez “Lehen urratsak martxan daude: lurzorua deskontaminatzeko prozedura hasiko da, eta bulego-eraikina premiaz eraitsiko da.”

Aldi berean, Udalak eremuaren hirigintza-kalifikazioa aldatzeko prozesua abiatuko du, gaur egungo industria-erabileratik bizitegi-erabilerara igarotzeko. Hori guztia epe ertain/luzeko proiektu baten barruan kokatzen da, helburu argi batekin: degradatutako eta kutsatutako espazio bat berreskuratzea, herriaren erdigunean aukera berriak sortzea eta etxebizitza publikoaren parkea handitzeko bidea irekitzea. Maria Herreroren hitzetan, “Urteetako degradazioaren ondoren, Udalak lursaiak eta instalazioak eskuratu ditu aukera handi gisa; epe ertain/luzerako inbertsio estrategikoa da.”

Elorrioko Udalak lanean jarraituko du arduraz, diskrezioz eta determinazioz, Fytasaren eremua herriarentzat aukera estrategiko bihurtzeko eta Elorrioren etorkizuneko garapenean funtsezko pieza gisa lantzeko.

The post Elorrioko Udalak Fytasaren lursaila eta instalazioak erosi ditu first appeared on DOT Durangaldea.

ELORRIO | 2025eko martxoan hasitako Urkizuaran kaleko obrak amaitu dira. San Anton ermitatik Maderas Gallastegiraino doan tarteak eraldaketa handia izan du: errepidea egokitu da, zeuden espaloiak hobetu dira, oinezkoentzako ibilbide berri bat sortu da, argiztapen berria jarri da eta ur-bilketa sistema berritu da, beste hainbat esku-hartzeren artean.

Julene Lazkano Elorrioko alkateak nabarmendu duenez, “lehengo errepide nagusia herritar guztiek gozatzeko moduko pasealeku polit bihurtu da”. Azpimarra berezia egin nahi izan da, halaber, udalerrirako sarbide den bide honetan irisgarritasuna eta segurtasuna hobetzeko: autoen abiadura murriztu egiten da bidea estutu delako eta zebra-bide altxatuak jarri direlako, eta oinezkoentzako tarte berria hesiz babestuta dago.

Esku-hartzearen kostu osoa 714.000 eurokoa izan da, eta horietatik 506.314 euro Bizkaiko Foru Aldundiak jarri ditu.

Udalak azpimarratu du etengabeko ahalegina egiten ari dela udal azpiegiturak hobetzeko eta espazio publikoak modernizatzen jarraitzeko, herritarren bizi-kalitatean zuzenean eragiten duten jarduketen bidez.

Era berean, obrek iraun duten bitartean auzotarrek erakutsitako ulermena eta lankidetza eskertu nahi izan ditu Udalak, eta orain berritutako gune honetaz gozatzera gonbidatu ditu.

The post Elorriok paseorako gune berria inauguratu du Urkizuaran kalean first appeared on DOT Durangaldea.

ELORRIO | Tokiko erakundeen eta Elorrioko herritarren pazientzia muga-mugara iritsi da. Udalak publikoki adierazi du bere “kezka sakona” herriko osasun zentroak dituen gabeziengatik. Egoera honek onartu ezinezko gainkarga eragiten die profesionalari, eta zerbitzuaren kalitatea gutxitzen du herriko 7.300 biztanleentzat.

Teorian, lantaldeak 5 mediku, 6 erizain, emagin bat, pediatra bat eta administrazioko langileak ditu, baina errealitatea oso bestelakoa da. Udalak salatu duenez, baxak, oporrak eta absentziak ez dira ordezkatzen. Ondorioz, erizainek medikuen funtzioak bete behar izaten dituzte askotan, euren lan-presioa nabarmen handituz.

Prekarietate honen ondorioz, profesionalen “ihesa” gertatzen ari da: Elorrio ez da helmuga erakargarria, eta langileek beste zentro batzuetara joatea aukeratzen dute aukera izan bezain laster, langile falta gehiago larriagotuz.

Egoitza eta Zumelegi

Salaketaren puntu kritikoenetako bat anbulatorioko langileen zereginen banaketa da. Herritarrak artatzeaz gain, Aldundiaren adinekoen egoitza eta Zumelegi Laguntza Zentroa ere artatu behar dituzte.

“Egoitzarako langile espezifikoak esleitzea ezinbestekoa da”, aldarrikatu du Udalak. Baliabide horietako erabiltzaileek behar duten etengabeko arreta bermatzea oso zaila da mediku berak kontsulta arrunta eta egoitzako urgentziak txandakatu behar dituenean.

Pediatria eta emagin zerbitzuen egoera ere “eskasa” dela deritzote. Gaur egun, haurren arreta lanaldi erdian eskaintzen da, astean bizpahiru egunetan bakarrik. Horrek atzerapenak eragiten ditu funtsezko berrikuspenetan, eta familiak beste udalerri batzuetako larrialdietara joatera behartzen ditu.

Konponbideak exijitzen dituzte

“Nola bermatu daiteke arreta egokia langileak gainkargatuta badaude?”, galdetu du Udal Gobernuak. Gauzak horrela, Udalak iragarri du eskaera formala bidaliko diola Osasun Sailari premiazko neurriak eskatzeko.

Helburua argia da: kalitatezko osasun zerbitzu publiko duina berreskuratzea eta lan-baldintza egokiak bermatzea, profesionalek Elorrira etortzeaz gain, bertan geratzea erabaki dezaten.

The post Elorriok osasun zentroaren egoera “kezkagarria” dela salatu du first appeared on DOT Durangaldea.

ELORRIO | Elorrioko Udalak 2025eko aurrekontuari dagozkion asfaltatze-lanak hasiko ditu martxoaren 12an. Azken urteotan bezala, oraingoan ere diru-partida esanguratsua bideratu da udalerriko bideen egoera hobetzeko; oraingo honetan, 100.000 euroko inbertsioa egingo da.

Lanek 20 eguneko iraupena izango dute eta herri zein landa eremuko hainbat guneetan gauzatuko dira. Herri eremuan, Urkizuaran, San Agustineko industrialdean eta Argiñeta etorbidean egingo dira jarduketa nagusiak. Landa eremuan, berriz, Gaztañeta, Aramiño eta Arriarte izango dira esku-hartze nagusien guneak.

Horrez gain, asfaltatze-lan zabalekin batera, hobekuntza puntualak egingo dira Goieta, Morgaondo, Angio, Areistiortu, Aldape, Ibaikua, Padura eta Besaide kalean.

Udalak herritarren ulermena eskatzen du lanek iraun bitartean sor daitezkeen eragozpenen aurrean, eta jarduketa hauen helburua bideen segurtasuna eta erabilgarritasuna hobetzea dela gogorarazten du.​

The post Hainbat kale eta bide asfaltatuko dira martxoan Elorrion first appeared on DOT Durangaldea.