Publiko guztiarentzako jarduerak izango dira: kontzertuak eta lehiaketak, gastronomia, dantzak eta herri probak
AMOREBIETA-ETXANO | Luis Urrengoetxea kaleak dena prest du aurten ere bere jai giroan murgiltzeko. Horrela, azaroaren 6tik 9ra, jaiek egitarau zabala eta askotarikoa eskainiko dute, publiko guztiarentzat pentsatutako jarduerekin: haurrek, gazteek eta helduek lehiaketak, kontzertuak, emanaldiak eta askoz gehiago izango dituzte.
Hasiera ostegunean izango da, hilak 6, herriko tabernetan zehar ohiko pintxo-potearekin, trikitilariekin eta musika giroarekin 19:00etatik aurrera. Ordu horretan bertan, jaiei hasiera emateko ekitaldia egingo da, eta, 20:00etan, Zornotzako Otxoteak bere emanaldia eskainiko du.
Hilaren 7an, ostirala, jaiek hitzordu klasikoetako batekin jarraitzen dute: 19:00etan hasiko den Igel Txapelketarekin. 19:30etan karaoke ibiltaria ospatuko da eta gaua Gu eta Guitarrak taldearen kontzertuarekin amaituko da Euskal Herria Enparantzan 22:30etan.
Larunbatean, hilak 8, 12:00etatik aurrera dantzak izango dira Udabarri Dantza Taldearekin, eta jaki banaketa herri sukaldaritza lehiaketan. Arratsaldean sari banaketa egingo da eta festak GOTX Elektroxarangarekin jarraituko du eta, gauean, Moonshine Wagon eta Manifa taldeen kontzertuak izango dira Zelaieta parkeko karparen azpian.
Jaiei amaiera emateko, igandean, hilak 9, ohiko giza proba (proba herrikoia) egingo da 12:30ean, Harriti eta Lutaber emakumezkoen taldeen arteko desafioarekin. Ondoren, Gaztedi Barria fanfarreak musika jarriko dio giroari, eta festa 15:00etan amaituko da, zozketarekin.
Antolatzaileek gogorarazi dute, euria eginez gero, ekitaldiek aldaketak izan ditzaketela.
