Alde zaharreko edukiontziekin hasiko den prozesu progresiboa, herri osora zabaltzeko helburuarekin
ELORRIO | Elorrion dauden paperontziak apurka-apurka berritzeko eta bateratzeko prozesua martxan jarriko da datozen hilabeteetan. Une honetan, lehen urrats gisa, alde zaharrean jarri dira edukiontzi berriak, eta horiekin hasiko da berritze-fase hau. Helburua herri osoan gaur egun dauden eredu desberdinak pixkanaka ordezkatzea da, irudi bateratuagoa, erabilgarriagoa eta eraginkorragoa lortzeko.
Gaur egun, Elorrioko kaleetan hainbat eredu eta tamainatako zakarrontziak daude, urteetan zehar instalatu direnak, zahartuta eta egoera txarrean daudela. Aniztasun horrek, batetik, herritarrentzat nahasmendua sor dezake, eta bestetik, udal brigadaren mantentze- eta kudeaketa-lanak zailtzen ditu. Horregatik, berritze-prozesu honen bidez, erabilera errazagoa eta mantentze-lan eraginkorragoak ahalbidetuko dituen sistema bateratu bat ezarri nahi da.
Prozesua ez da bat-batekoa izango, faseka gauzatuko da. Lehen “takada” honetan alde zaharreko paperontziak berrituko dira, eta ondoren, pixkanaka beste auzoetara hedatzen joango da. Modu honetan, aldaketa ordenatua eta jasangarria bermatu nahi da, eguneroko funtzionamenduan eraginik txikiena izan dezan.
Berritze honek ez du soilik irudi-kontua bilatzen; garbitasuna, funtzionaltasuna eta lan-baldintzak hobetzea ere baditu helburu. Paperontzi homogeneoek brigadaren lana errazten dute, bai hustuketan bai konponketa eta ordezkapenetan, eta horrek zerbitzuaren kalitatean ere eragin positiboa du.
Udalak herritarren ulermena eta lankidetza eskertzen ditu trantsizio-prozesu honetan, eta gogorarazi nahi du aldaketa hauek Elorrio garbiago, antolatuago eta atseginago baten aldeko apustuaren parte direla.
