Udalak eskerrak eman dizkie zerbitzua behar bezala erabiltzeko konpromisoa azaldu duten herritarrei
AMOREBIETA-ETXANO | 2025eko urrian tamaina handiko tresnak biltzeko sistema berria martxan jarri zuen martxan Amorebieta-Etxanoko Udalak eta orduz geroztik guztira 125 pertsonek erabili dute zerbitzua, ezarritako jarraibide berriei jarraituz. Herritarren erantzun horrek Amorebieta-Etxanoko hondakinen kudeaketaren hobekuntzan zornotzarren harrera ona eta inplikazio aktiboa erakusten du.
Udalak bizilagunen jokabide arduratsua eskertu du, bilketa guneetan ordena mantentzen lagundu dutelako eta bide publikoan altzariak, koltxoiak edo etxetresna elektrikoak pilatzea saihestu dutelako. Neurri hori jasangarritasunaren aldeko udal-estrategiaren parte da, eta bilketa-prozesua erraztea eta hiri-ingurune partekatuarekiko errespetua sustatzea du helburu.
Hala eta guztiz ere, objektuak aldez aurretik abisatu gabe edo ezarritako ordutegitik kanpo utzi diren kasuak ere detektatu dira, eta horrek zerbitzuaren funtzionamendu egokia zailtzen du eta eragozpenak sortzen ditu ingurunean. Horregatik, elkarlanean jarraitzeko eta arauak errespetatzeko deia egiten du Udalak, bizikidetza eta espazio publikoaren egoera ona bermatzeko.
Nola funtzionatzen du sistema berriak?
2025eko urritik aurrera, tamaina handiko tresnak edo etxeko altzariak edukiontzira ateratzeko, Herritarren Arreta Zerbitzuara (HAZ) deitu behar da aldez aurretik, ostiraleko 14:00ak baino lehen. Eskaera egin ondoren, objektuak astelehenean utzi behar dira, 19:00etatik aurrera, gertuen dagoen edukiontziaren ondoan (zuzenean haren gainean jarri gabe). Bilketa astearteetan egiten da.
Sistema hau tamaina handiko etxeko tresna eta altzarietarako baino ez da, hala nola altzariak, koltxoiak edo etxetresna elektriko solteak. Kanpo geratzen dira obrako materialak, etxebizitzak edo lokalak hustearen ondoriozko hondakinak edota sukalde zein gela osoak. Era berean, enpresek eta autonomoek beren kontura kudeatu behar dituzte hondakinak.
Udalak gogorarazi du, halaber, Amorebieta-Etxanoko Garbiguneak lehentasuna duela tamaina handiko tresnak jasotzeko. Garbigune hau astelehenetik ostiralera dago irekita 09:00etatik 13:25era eta 15:30etatik 18:00etara, eta larunbatetan 09:00etatik 13:25era. Gainera, garbigune mugikorrak urtean bitan bisitatzen du udalerria Zubiondo parkean.
Sistema berriak zerbitzua optimizatzea, bide publikoan saturazioa saihestea eta ingurumen-kontzientzia partekatua sustatzea ahalbidetzen du. Udalak guztion artean, Arkalaz eraikitako udalerri garbiago, ordenatuago eta iraunkorrago baten aldeko konpromisoa berresten du.
