AMOREBIETA-ETXANO | Amorebieta-Etxanoko Udalak enplegagarritasuna eta herriko garapen sozioekonomikoa sustatzeko apustu sendoa egin du berriro. 2026ko Enplegu Planaren barruan, langabezian dauden herritarrei zuzendutako kontratazio prozesu berri bat jarriko du martxan ekainean. Ekimen honen bidez, 9 zornotzarrek lortuko dute lana: 8 peoi gisa arituko dira eta pertsona bat arduratuko da lantaldea gidatzeaz.

Auzorik auzo eta berdegunez berdegune, espazio publikoen mantentze-lanak indartzea izango da euren zeregin nagusia. Kontratuek sei hilabeteko iraupena izango dute eta udan bertan hasiko dira lanean. Interesatuek Lanbideren webgunearen bidez eman beharko dute izena, ekainaren 8tik 14ra bitartean.

Baldintzak

Deialdi honetan sartu nahi duten hautagaiek baldintza zehatz batzuk bete beharko dituzte:

• Lanbiden lanbila gisa erregistratuta egotea.

• Gutxienez urtebetez Zornotzan erroldatuta egotea.

• Talde-arduradun posturako, B motako gida-baimena izatea.

• 2024ko urtarrilaren 1etik aurrera Udalarekin lan-kontraturik eduki ez izana.

Izen-ematearekin batera, NAN edo AIEren kopia, DARDE (EABA) agiria, lan-biziaren txostena eta, talde-buruen kasuan, gida-baimenaren kopia aurkeztu beharko dira.

Udalak gogorarazi du kontratazio hauek, langabeei aukera berri bat emateaz gain, herriko bizi-kalitatea hobetzeko balio dutela, hiri-ingurunea eta naturguneak zainduago egongo baitira. Argibide gehiago nahi izanez gero, herritarrek Udal Enplegu Bulegora jo dezakete (San Miguel kalea, 3) edota 94 630 00 02 telefonora deitu (1402 luzapena).

The post Zornotzak 9 langabe kontratatuko ditu Enplegu Planaren bidez, herriko espazioak zaintzeko first appeared on DOT Durangaldea.

ABADIÑO | Bilboko Gotzailetzak mahai gainean izan zuen Durangalderako oso mingarria izango litzatekeen erabaki bat: Urkiolako Santutegia eta Abadetxe historikoa betiko ixtea. Joseba Legarza, Peli Romarategi, Antonio Madinabeitia (ekainaren 13an bi urte beteko dira hil zela) edota Bittor Garaigardobil gotzaina joan ostean, eta bertako egunerokoari eutsi zioten Felix eta Kontxi laikoek alde egin ondoren, hutsunea erabatekoa zirudien mendatean.

Alabaina, 2025eko irailean, Urkiolako patua aldatu egin zen. Erretiratuta eta lasai egon litezkeen bi apaizek, Bermeoko sustraiek lotuta, mendiaren gogortasunari zein mistikari heltzea erabaki zuten. Juanjo Elezkanok eman zuen lehen urratsa, eta gauetako bakardadeari buruzko abisuei jaramonik egin gabe, aurrera egin zuen. Handik gutxira, Mikel Azpeitia herrikideak egitasmoaren berri izan eta zalantzarik gabe bat egin zuen berarekin. Geroztik, teilatua, lana eta umore ona partekatzen dituzte: “Urkiolara erretiratzera etorri ginen, baina hemen beti dago zeregina”.

Bizitza kontenplatiboaren topikoetatik urrun, haien egunerokoa ez da batere monotonoa. 1898an eraikitako tenplua goizeko zortzietatik arratsaldeko zazpiak arte zabalik izateaz arduratzen dira, eta igandero eguerdiko hamabietan meza ematen dute. “Jendeak uste du denbora libre asko dugula, baina ez da horrela”, azaldu dute. Egun bakoitza “ustekabez beteta” dator, batez ere paper kontuekin; duela gutxi, banku baten oharra jaso zuten Santutegiaren izenean zegoen kontu ezezagun bat blokeatu dietela esanez: “Guk uste genuen BBK-ko txartel bakarra genuela!”, kontatu dute barrez.

Mikelentzat mendatea ez da arrotza, 1974an bertan egon baitzen 23 urterekin apaizgai, Zornotzara bidali aurretik. Juanjok, berriz, Ekuadorren misiolari gisa aritutako esperientzia dakar motxilan. Urkiolako lekukoa hartzeak bertako tradizio artistiko eta zientifikoak zaintzea ere badakar: Peli Romarategiren lau urtaroen mural ezaguna babesteaz gain, eskualdeko “eguraldi-gizon” berriak bihurtu dira. Egunero jasotzen dituzte estazio meteorologikoaren datuak Euskalmetekin lankidetzan, garai batean Legarzak eta Garaigardobilek egiten zuten moduan.

Hilabete hauetako balorazioa oso positiboa da, inguruko bakeak eta isiltasunak lanerako indarra ematen baitie. Dagoeneko, inguruko baserritar baten traktorearen laguntzaz, Abadetxe osteko baratza berreskuratzen hasi dira, eta aterpetxea berritzeko asmoa dute; horretarako, Abadiñoko Udalari argi indarra jartzeko eskaria egin diote.

San Antonio

Mendatean daramaten egokitzapen sasoia asteburu honetan biziko dute une gorena, ekainaren 13an San Antonio eguna ospatuko baita, inguruko jai jendetsuenetako bat. Eguraldia lagun, milaka pertsona hurbilduko dira urteroko abere eta nekazaritza azokaz gozatzera.

Fidelen ugaritasunari erantzuteko, lau meza egongo dira goizean (10:00etan, 11:00etan, 12:00etan eta 13:00etan), eta nagusia gotzainak gidatuko du. Igandean, Errepikapen egunean, beste bi meza egongo dira (10:00etan eta 12:00etan). Bisitari oldearen aurrean, bi apaizek dei argia egin dute Parke Naturala errespetatzeko: “Etortzen den jendeari eskatzen diogu Urkiola aurkitu duena baino hobeto uzteko”.

The post Mikel eta Juanjo, Urkiolako Santutegiko zaindari berriak first appeared on DOT Durangaldea.

DURANGO | Durangoko kirol elkarteek eta haien bueltan dabiltzan kirolariek Landako Gunea hartuko dute asteburu honetan, ‘Durangoko Kirol Egunak’ jardunaldien bigarren edizioan. Ekainaren 13an eta 14an, herriko 21 klubek eta elkarteek bat egingo dute herritarrei euren eguneroko lana bertatik bertara erakusteko eta herrian dagoen kirol aniztasun handia ezagutarazteko.

Eskaintza ez da makala izango. Larunbatean (10:00-14:00 eta 16:00-20:00) zein igandean (10:00-14:00), bertaratzen direnek era guztietako diziplinak ezagutu eta probatu ahal izango dituzte: futbola, rugbia, eskubaloia, igeriketa, txirrindularitza, mendizaletasuna, triatloia, padela, boleibola, xakea, pilota, arkularitza edota arte martzialak, besteak beste.

Gainera, egitarauaren barruan bi hitzordu berezi egongo dira. Batetik, Street Workout Together taldeak kalistenia saioak gidatuko ditu Ibaizabal parkean larunbatean: goizeko 10:00etatik 12:00etara 18 urtetik gorakoentzat, eta 12:00etatik 14:00etara 12 eta 17 urte bitarteko gazteentzat. Bestetik, igandean, kirola eta musika uztartuko dituen zunbatoi ireki batekin girotuko dute Landako Gunea, 10:00etatik 11:50era.

Kluben lana balioan jartzeko unea

Iker Txertudi Kirol zinegotziak ekimenaren aurkezpenean adierazi duenez, klub hauen guztien atzean “dedikazio, konpromiso eta talde-lan ordu asko” daude, eta asteburuko topaketa aukera paregabea da esfortzu hori guztia argitara ateratzeko. Zinegotziaren ustez, azoka honek Durangoko kirolaren “indarra eta aniztasuna” islatzen ditu espazio bakar batean.

Parte hartuko duten elkarteak:

• Alpino Tabira Mendizale Taldea
• Arkulariak
• Arripu Futbol Kluba
• Club Pelotazale Durango
• Cultural Deportiva de Durango
• Durango Rugby Taldea
• Haszten
• Ibaizabal Eskubaloi Taldea
• Indar Xsport
• Larrasoloeta Xake Taldea
• Mendibeltz Kirol Taldea
• Mobidurango
• Mugarra Triatloi Taldea
• Ninjutsu Wadokan
• Ouraiby Kirol Elkartea
• Padelzaleak
• Sapuberri Boleibol Taldea
• Sociedad Ciclista Duranguesa
• Tabira Igeriketa Taldea
• Torneos Durango
• Uztai Taldea

The post Durangok herriko kirol eskaintza zabala erakutsiko du asteburuan Landako Gunean first appeared on DOT Durangaldea.

AMOREBIETA-ETXANO | “Hauxe da dagoena”. Oso haserre hasi du bere kontakizuna Zornotzako bizilagun batek, mugikorrarekin Euskotrenen geltokiko igogailuaren egoera tamalgarria grabatzen duen bitartean. Eguneroko irisgarritasun oztopoak agerian uzten dituen salaketa honek herritar askoren sutan jarri du; izan ere, kaltetuen esanetan, arazoak bi urte inguru daramatza konponbide sendorik jaso gabe.

Matxuraren jatorria begi-bistan dago bideoan: ekintza bandaliko baten ondorioz, igogailuko kristal handi bat erabat hautsita ageri da. Txikizioa berehala konpondu beharrean, itxurakeria hutsezko “irtenbidea” eman zioten garai batean, zinta isolatzaileekin itsatsita. Gainera, pasadan astean igogailua erabat zerbitzuz kanpo geratu zen, ateak enbofatuta eta trabatuta zeudela. Egoera honek zuzenean jotzen du herriko kolektibo zaurgarrienen aurka: eskailerak igo ezin dituzten adinekoak, haur-kotxeak daramatzaten gurasoak edo erosketekin doazen herritarrak.

“Gero eta okerrago dago”

Igogailurik gabe, trenbidearen beste aldera igarotzeko edo aldapa gainditzeko dagoen alternatiba bakarra oinezkoentzako bide luzeago bat egitea da. “Umeekin, karroarekin edo eskailerak igo ezin dituen jendearekin bagoaz, herriaren beste muturreraino joan behar dugu etxeraino iristeko. Egun osoan lan egin ondoren, hau ez da batere atsegina inorendako”, adierazi du zornotzarrak DOT komunikabideari bidalitako bideoan.

Gauzak horrela, auzokideek gogor kritikatu dute hilabeteak igaro ahala instalazioaren egoera makurtu besterik egiten ez duten “adabakiak” jartzeko politika hori. Mugikortasun arazo honek auzoko bizi-kalitatea kaltetzen duela-eta, erakundeen inplikazio zuzenagoa eskatu dute behingoz. “Egunero jasaten dugu hau eta, itxuraz, ez dago honetarako aurrekonturik”, amaitu du bizilagunak, kaltetutako elementu guztiak erabat berritzeko eskatuz.

The post “Hauxe da dagoena”: Zornotzako geltokiko igogailuaren utzikeria salatu dute first appeared on DOT Durangaldea.

DURANGO | ETAk Jesus Mari Pedrosa PPko zinegotzia tiroz hil zuela 26 urte beteko dira bihar. Hori dela eta, gaur goizean omenaldia egin diote Durangon, atentatua gertatu zen leku berean: Ermodo eta Juan Antonio Abasolo kaleen arteko kantoian, Gaztelumendi farmaziaren parean hain zuzen.

Ekitaldian izan dira Carmen Hernandez Pedrosaren alarguna eta Ainhoa alaba, baita Carlos Garcia Durangoko zinegotzi popularra eta Javier de Andres Euskadiko PPko presidentea ere, alderdiko beste hainbat kiderekin batera. Loreak utzi eta minutu bateko isilune hunkigarria gorde ondoren, bertaratutakoek Pedrosaren memoria aldarrikatu dute haren oroimenezko plakaren ondoan.

Carlos Garciak balioan jarri du aurten, lehen aldiz, omenaldia hilerrian egin beharrean erailketa gertatu zen kale-izkinan bertan egin izana. Garciaren ustez, terrorismoaren biktimen oroimena kalean bertan bizirik mantentzea ezinbestekoa da belaunaldi berriek gertatutakoaren berri izan dezaten. “Plaka hauek Durangoko azalean iltzatuta daude betiko”, adierazi du bozeramaileak.

Bestalde, Javier de Andresek azpimarratu du Pedrosa gogoratzea “orainaldiko kontua” ere badela. Ildo horretatik, Euskadin oraindik ere jazarpen eta mehatxu zantzuak badirela salatu du, eta adibide gisa jarri du duela aste gutxi Carlos Garcia zinegotziak berak jasandako seinalatzea.

Ekitaldia amaitu ostean, bertaratutakoek herriko beste hainbat txokotara jo dute, Durangori lotutako ETAren beste biktima batzuen plaken aurrean ere loreak uzteko.

The post PPk Jesus Mari Pedrosa omendu du Durangon, duela 26 urte erail zutela gogoratzeko first appeared on DOT Durangaldea.

AMOREBIETA-ETXANO | Zornotzako Udalak ‘Zornotzan Kantuz’ ekimenaren edizio berri bat aurkeztu du gaur goizean. Ostiral honetan, egitasmoak musika eta giro bikaina itzuliko ditu Amorebieta-Etxanoko kaleetara. Aurten bosgarren edizioa izango du hitzorduak, eta jada herriko kultur egutegiko proposamen jendetsuenetako eta berezienetako bat bezala finkatu da.

Jardunaldia 19:15ean hasiko da Venecia tabernaren ondoan, herriko kale eta plazetan barrena egingo den musika-ibilbide batekin. Bertan parte hartuko dute Zornoza Koralak, Abes Kimu Abesbatzak, Dizdira Ahots Taldeak, Nagusien Koruak, Andra Mari Ikastolak eta Xuxurlariak Abesbatzak; Ederto Txistu Taldea, berriz, ibilbidea txistuz laguntzeaz arduratuko da. Errepertorioari dagokionez, aurten hogei bat kanta izango dira eta, bitxikeria gisa, abesbatza bakoitzak ez du jakingo aldez aurretik gainerako taldeek zer pieza abestuko duten.

Herritarren arteko lotura

Ekimenaren helburua, beste behin ere, kaleak herritar guztiei irekitako abesbatza herrikoi handi bihurtzea izango da. Parte-hartzea errazteko, egunean bertan kantu-liburuxkak banatuko dira bertaratutakoen artean, hitzorduan zehar abestuko diren kanta guztiekin; horrela, nahi duen edozein herritarrek bat egin ahal izango du musika-bidearekin.

Ainhoa Salterain alkateak balioa eman dio ekimenari, bere ustez herritarren arteko lotura indartzen laguntzen baitu kaleak “musikaz eta giroz” betez. Era berean, zornotzarrak jardunaldian parte hartzera animatu ditu, egun horretan “benetako protagonista” herria bera izango dela azpimarratuz.

The post ‘Zornotzan Kantuz’ egitasmoak musikaz beteko du berri herria ostiral honetan first appeared on DOT Durangaldea.

DURANGO | Durangoko Udalak ‘Kantariak’ ekimena aurkeztu du gaur goizean, Bartolome Ertzilla Musika Eskola Publikoarekin batera sustatutako proiektua, 7 urtetik gorako haurren artean abesbatza-kantua bultzatzeko helburua duena. Egitasmoa 2026-27 ikasturtean jarriko da martxan, eta musika modu ludiko eta hezitzailean hurbiltzeaz gain, udalerriko kultur historiari estuki lotutako abesbatza-tradizioari eutsi nahi dio.

Aurkezpenean parte hartu dute Arantza Barrenetxea Bartolome Ertzilla Musika Eskolako presidenteak, Iker Ruiz de Alegria zentroko zuzendariak eta Valentin Sagastizabal Durangoko Orfeoiko presidenteak. Ekitaldian, Barrenetxeak aitortu duenez, “badakigu abesbatza-tradizioa galtzeko arriskuan egon daitekeela belaunaldi berrien artean kantua sustatzen ez bada”. Kezka hori bera agertu dute herriko Doinu Zahar edo Bogoroditsie bezalako taldeek ere.

Jarduera honen bidez, ikasleek musikaz gozatzeko espazio bat izango dute, musika-entzumena, adierazpen ahotsa zein emozionala landuz, eta, aldi berean, “bizikidetza, iraunkortasuna eta talde-lana” bezalako balioak indartuz. Interesatuek Musika Eskolan bertan jaso dezakete informazioa eta izena eman, dela aurrez aurre, dela telefonoz edo posta elektronikoz.

Kontzertua eta hobekuntzak

Prentsaurrekoan, gainera, ‘Kantika Korala’ taldearen kontzertu berezi bat iragarri dute. Haur eta gazteen abesbatza-arloan Euskadin erreferente den talde honek datorren igandean, maiatzaren 31n, arratsaldeko 18:00etan eskainiko du emanaldia Andra Mari elizan.

Azkenik, Udalak aurkezpena aprobetxatu du Musika Eskolako teilatuan berriki egin diren berritze-lanak baloratzeko, eta iragarri du etorkizunean eserleku berriak jarriko dituztela ekitaldi-aretoan, zentroko instalazioak hobetzeko asmoz.

The post Durangok ‘Kantariak’ egitasmoa jarri du martxan, haur eta gazteak abesbatzara gerturatzeko first appeared on DOT Durangaldea.

ERMUA / MALLABIA | URA-Uraren Euskal Agentziak, Eusko Jaurlaritzari atxikitako erakundeak, funtsezko urrats estrategiko bat osatu du Debabarreneko ingurumen-azpiegiturari dagokionez. Goitondo-Ermua kolektore berria zerbitzuan jartzearekin batera, erakundeak amaitutzat eman du Ermuko eta Mallabiako udalerrien saneamendu-eskema; izan ere, hiri- eta industria-hondakin-urak zuzenean Elgoibarko Apraizko araztegira bideratzea lortu du, ingurunera itzuli aurretik behar bezala tratatu daitezen.

Mugarri teknologiko eta ekologiko honek nabarmen murrizten du Ego ibaiaren gaineko kutsadura-presioa, historikoki inguruko egoitza- eta industria-guneetako isurien ondorioz oso zigortuta egon den ibasturria baita.

Motor handia

Gidatze nagusi berriak ia 1.800 metroko luzera du eta Errekazabaleta ibaiaren paraleloan doa, Mallabiako industria-lurzoruak Ermuko sarearekin lotuz. Obrak Goitondo eremuko lau industrialdeei ematen die zerbitzua; horiek guztira 17,23 hektareako azalera dute eta eskualdeko jarduera ekonomikoaren gune nagusietako bat dira.

Sistemak segundoko 15,5 litroko batez besteko kauda xurgatzeko diseinatuta dago, hau da, 4.500 biztanleko populazio baten hondakinen baliokidea. Hala ere, teknikariek gogoratu dute karga kutsatzailea askoz ere handiagoa dela, konektatutako enpresen izaera guztiz industriala dela eta. Gainera, sarea epe luzera begira dimentsionatu da modu estrategikoan, etorkizuneko konexioak ahalbidetzeko, hala nola Mallabiako Berano auzoa edota Ermuko Okinzuriko garapen berriak.

Bi urteko obrak

Lanak 24 hilabetez luzatu dira eta 3,49 milioi euroko azken inbertsioa eragin dute (BEZa barne). Proiektua oso konplexua izan da, hodiak korridore oso estu batean egokitu behar izan baitira, ibaiaren, BI-2301 foru-errepidearen eta oinezkoen bideen hurbiltasunak baldintzatuta. Gainera, hainbat gune estrategikotan 4,5 metrotik gorako sakonerako zangak hondeatu behar izan dira ibaiaren azpiko igarobideak saihesteko.

Proiektu hau URAk eta inguruko udalek duela bi hamarkadatik hona garatzen ari diren fasetako planaren barruan kokatzen da, Gipuzkoako Uren Partzuergoarekin batera ahaleginak koordinatuz arroaren errekuperazio ekologiko osoa finkatzeko.

The post Ego ibaiaren kutsadura arintzeko, Goitondo Apraizko araztegira konektatu du URAk first appeared on DOT Durangaldea.

DURANGO | Durango Kirolak erakundeak San Fausto pilotalekuan dagoen taberna-kafetegiaren zerbitzuak emateko lizitazio prozesua ireki du. Prozesu honen bidez, tabernaren kudeaketaz, otorduen prestaketaz eta kafetegi-zerbitzuaz arduratuko den enpresa bat kontratatu nahi da, pilotalekuko eta inguruko kirol-instalazioetako erabiltzaileen beharrei erantzuteko.

Baldintza-agiriaren arabera, enpresa esleipendunak urteko emakida-kanon bat ordaindu beharko du; lizitaziorako gutxieneko kanona 425 eurokoa izango da hilean (BEZ kanpo). Kontratuaren hasierako iraupena urtebetekoa izango da, eta urtero luzatzeko aukera egongo da, gehienez ere hiru urte bete arte.

Esleipena egiteko orduan, kalitate-prezio erlaziorik onena hartuko da kontuan. Besteak beste, alderdi hauek baloratuko dira: gutxieneko kanona hobetzea, langileen kualifikazioa eta ostalaritzako titulazioak, euskarazko hizkuntza-eskakizuna eta emakumeen enplegua sustatzea.

Eskaerak aurkezteko epea maiatzaren 22ko 15:00etan amaituko da. Enpresa interesatuek Udalaren kontratazio plataformaren bidez (www.durango.eus) aurkeztu ditzakete proposamenak; bertan kontsulta daitezke prozesuaren xehetasun guztiak.

The post Durango Kirolak San Faustoko pilotalekuko kafetegiaren emakida lizitatu du first appeared on DOT Durangaldea.