AMOREBIETA-ETXANO | Bizkaiko Foru Aldundiak indartu egin du N-634 errepidean mugikortasun seguru, irisgarri eta orekatuagoa lortzeko duen konpromisoa, San Antonio auzoan oinezkoentzako azpiegitura bat eraikita. Izan ere, gune hori bereziki kritikoa da, zirkulazioaren intentsitatea handia delako. Zehazki, lanean ari dira oinezkoentzako gaineko pasabide bat eraikitzeko, igogailu eta guzti, irisgarritasuna bermatzeko. Horrez gain, espaloi berriak eraikiko dira, eta hobekuntzak egingo dira Bizkaibusen geralekuen inguruan.

Elixabete Etxanobe ahaldun nagusia eta Ainhoa Salterain Amorebieta-Etxanoko alkatea amaitzear dauden obrak ikustera joan dira gaur goizean. Obra horiek nabarmen hobetuko dute errepidearen albo banatan dauden bizitegi-eremuaren eta enpresa-eremuaren arteko lotura. Izan ere, bide horretako zirkulazio-bolumena handia da: 20.000 ibilgailu inguru ibiltzen dira egunero, eta, tartean, ibilgailu astun ugari.

Bide-ardatz horretan bide-segurtasuna hobetzeko estrategia jarraituaren barruan dago esku-hartze hori. Azken hamabost urteetan, erakundeek hamar bat jarduketa bultzatu dituzte N-634 errepidearen gune horretan, eta guztira 31,8 milioi euroko inbertsioa egin dute. lurreta, Zornotza eta Zaldibarko bide-segurtasuna hobetzeko egin dira lanak; horietako batzuk gaur egun garatzen ari dira, hala nola Amorebieta-Etxanoko San Antonio edo Zaldibarko zeharbidea. Azken helburua da erantzuna ematea trafiko handia, jarduera ekonomikoa eta pertsonen eguneroko joan-etorriak biltzen dituen errealitate konplexu bati.

Gainera, etorkizunean gauzatzeko helburuaz, Galdakao eta Etxebarri arteko beste hiru jarduketa hasierako fasean daude. Ahaldun nagusiak nabarmendu duenez, obrak, handiak zein txikiak, «ez dira proiektuaren zenbatekoaren arabera neurtu behar, sortzen duten onuraren arabera baizik». Etxanobek hiru testuingurutan kokatu du pasabidea: «Lehenengoa San Antonio da, zeina gurutzatzeko bide seguru eta erosoa den orain. Bigarrena Durangaldea da, pasabide hori N-634 errepidean bide-segurtasuna hobetzeko jarduketei gehitzen zaielako. Eta hirugarrena Bizkaia da. Legegintzaldi honetan, errepideen foru-sarea itsasadarraren azpiko tunelarekin osatzeko helburua ezarri dugu, eta, aldi berean, hiriguneetan trafikoaren inpaktua murrizteko jarduketak egitekoa, hala nola La Avanzadan, Ermuan, Markinan, Txipion edo San Antonion, pasabide honekin».

Bestalde, Ainhoa Salterain Amorebieta-Etxanoko alkateak nabarmendu du “jarduketa honen helburua da bide-segurtasuna indartzea eta oinezkoen babesean urrats sendoa ematea, trafiko handiko puntu batean arriskuak murriztuz. Pasabide berriak bidegurutze seguruagoa eta ordenatuagoa ahalbidetuko du, arrisku egoerak ezabatuz eta guztiontzako mugikortasun eredu seguruago baterantz aurrera eginez”.

Eskari historikoa

San Antonio auzoak konfigurazio desberdina du errepidearen alde batean eta bestean: batean, bizitegi-erabilera da nagusi; eta, bestean, jarduera ekonomikoko eremuak daude, hala nola Inbisa enpresa-parkea eta Arania enpresa. Errealitate hori dela eta, ohikoak izaten dira oinezkoen alde batetik besterako joan-etorriak, batez ere autobus-geralekuetara joateko, eta orain arte bide hori ez zen behar bezain segurua. Hain zuzen, pasabidearen eginkizun nagusietako bat da Bizkaibusen erabiltzaileei bermatzea autobus-geralekuetara ahalik eta segurtasun handienarekin iritsi ahal izango direla.

Premia horri erantzuteko, azpiegitura berria errepidearen gainean egongo da, horixe jo baita aukera seguruentzat, dagozkion azterlan teknikoak egin ondoren. Jarduketa horren barruan sartzen da metalezko taula duen gaineko pasabide tiranteduna egitea, eskailera eta igogailua izango dituena, eta errepidearen albo banatan espaloi berriak egitea eta autobus-geralekuen ingurunea egokitzea. Horri esker, erabiltzaile guztientzako ibilbide irisgarria, erosoa eta segurua bermatuko da, arreta berezia jarriz mugikortasun-zailtasun handienak dituztenengan.

Proiektua hilabete barru irekiko da jendeak erabil dezan, eta 1.619.158,04 euroko inbertsioa jaso du, Amorebieta-Etxanoko Udalak eta Bizkaiko Foru Aldundiak batera finantzatuta. Udalak 200.000 euroko ekarpena egin du, eta pasabidearen eta espaloien titulartasuna eta ondorengo mantentze-lanak bere gain hartuko ditu; foru-erakundeak, berriz, gainerako jarduketa finantzatu du.

The post San Antonioko pasabidea azken fasean sartu da Amorebieta-Etxanon first appeared on DOT Durangaldea.

BERRIZ | EAJ Durangaldeak agerraldia egin du gaur goizean Berrizko Marino Lejarreta belodromoan, instalazioa berritzeko eta estaltzeko obrak “guztiz geldituta” daudela salatzeko eta lanak berehala abiarazteko eskatzeko. Eskualdeko alkate eta kargu jeltzaleekin batera, txirrindularitzaren munduko aurpegi ezagunak egon dira babesa ematen, hala nola Marino Lejarreta bera, Iban Mayo eta Igor Antón txirrindulari ohiak, eta Raúl Mena Durangaldeko Belodromoko Kirol Klubeko presidentea.

Proiektuak hiru fase ditu eta 6,8 milioi euroko inbertsioa aurreikusten du guztira. Orlan Isoird Berrizko alkateak azaldu duenez, lehenengo fasea da premiazkoena (3,5 milioi eurokoa), egitura estali eta birgaitzea dakarrelako: “Behin hori eginda, gainontzeko lanei ekiteko sinergiak sortuko dira”.

Fase hori finantzatzeko 3 milioi euro bermatuta daude jada Mankomunitatearen eta Bizkaiko Foru Aldundiaren artean, eta jeltzaleek proposatu dute falta diren 500.000 euroak eskualdeko diru-geldikinarekin estaltzea. Bigarren eta hirugarren faseetan barruko guneak egokituko lirateke eta lehiaketa ofizialetarako egurrezko pista homologatua jarriko litzateke.

Mireia Elkoroiribe Durangoko alkateak adierazi du mozio bat defendatuko dutela gaur arratsaldean Durangaldeko Mankomunitateko osoko bilkuran, obren lizitazioa “lehenbailehen” abia dadin. EAJren ustez, EH Bilduk zuzentzen duen gobernu taldeak ez du egitasmoa bultzatu azken urteetan, eta jarrera horrek arrisku larrian jartzen du Aldundiak emandako 1,5 milioi euroko laguntza.

Ekitaldian, Raúl Menak instalazioa pairatzen ari den narriadura kezkagarria deitoratu du, eta Marino Lejarretak gogorarazi du neguko hilabeteetan entrenatzen jarraitu ahal izateko ezinbestekoa dela belodromo estali bat izatea.

The post EAJk Berrizko belodromoa estaltzeko lanak berehala lizitatzea eskatu du first appeared on DOT Durangaldea.

DURANGO | Landako kiroldegia dotore jantziko da datorren larunbatean, ekainak 20, herriko kirol egutegiko ekitaldirik ikusgarrienetako bati harrera egiteko: Uztai Taldea Durango klubak antolatutako Ekaineko Gala. Goizeko 11:00etatik aurrera, gaztetxuenek zein talde adituenek tapiz gainera eramango dituzte denboraldi osoan zehar landutako koreografiak eta ariketak.

Eskualdeko gimnasia erritmikoaren festa handia izango da, musika, akrobazioak, mugimenduen dotorezia eta klubaren mailloten kolore bizia uztartuko dituena. Erakustaldian era guztietako saioak ikusi ahal izango dira: esku hutsik egindako piramide eta ariketa konbinatuetatik hasi eta pilota zein uztaiak baliatuz osatutako errutina konplexuetaraino. Emaitzak Uztai Taldeak urtez urte mantentzen duen maila tekniko altua eta gimnasten garapena utziko ditu agerian.

Harrobiko kirolari babesa

Ekitaldi honek Durango Kirolak-en eta Durangoko Udalaren laguntza instituzionala dauka, baita herriko hainbat merkatariren babesa ere; ezinbesteko bultzada Durangaldeko oinarrizko kirolari ikusgaitasuna emateko.

Antolatzaileek herritar, senide eta kirolzale guztiak gonbidatu dituzte datorren larunbat goizean Landakoko harmailetara hurbiltzera, kirolari gazteak berotasunez babesteko eta udari hasiera emateko ikuskizun bikonaz gozatzeko.

The post Uztai Taldeak erritmoz eta magiaz beteko du Landako Gunea ekaineko galarekin first appeared on DOT Durangaldea.

DURANGO | Durangok gaur goizean aurkeztu du Uda Giro programazioaren edizio berria. San Agustin Kultur Guneak antolatutako zikloak kultura herriko plaza, parke eta bestelako espazio publikoetara eramango du berriro ere uda osoan zehar. Guztira hamahiru proposamen eskainiko dira ekainaren 23tik irailaren 5era, adin guztietako herritarrei zuzenduta. Zirkoa, antzerkia, musika, dantza garaikidea, zinema, magia, bertsolaritza eta performancea izango dira programako ardatz nagusiak.

Aurkezpenean, Paule Sanchez Kultura zinegotzi eta San Agustin Kulturguneko presidenteak nabarmendu du helburua Durango “aire zabaleko agertoki handi” bihurtzea dela, kultura herritarrengana hurbilduz eta tokiko talentua balioan jarriz. Programazioan hainbat artista durangarrek hartuko dute parte (Irati Bilbao, Iñaki Jaio, Aroa Blanco edota Oskar Lu, esaterako), eta eguraldi txarra eginez gero, emanaldi guztiek estalitako ordezko gune bat izango dute.

The post Uda Girok hamahiru kultur proposamen eramango ditu Durangoko kaleetara uda honetan first appeared on DOT Durangaldea.

DURANGO |Larunbat honetan, 17:00etatik 20:00etara, Lehen Mailako kluben Espainiako Txapelketako mailari eusteko azken lehia jokatuko da Landakoko pistan.. Zortzi talde arituko dira lehian kategoriari eusteko asmoz, eta horietatik bi jaitsiko dira.

Parte hartuko duten klubak honako hauek dira: Atletismo Portugalete, Irungo Super Amara BAT, Nafarroako Hiru Herri, Durango Kirol Taldea, Atletismo Badajoz, Córdoba Patrimonio Cultural, Narón Atletismo eta Vigoko Celta. Txapelketak 18 banakako proba eta bi errelebo saio (4×100 eta 4×400) bilduko ditu. Formatu honetan postu bakoitzak garrantzi handia du: lehenengotik zortzigarrenera bitartean 8 puntutik 1era banatzen dira, eta puntu horiek aurreko bi jardunaldietan lortutakoei gehituko zaizkie azken sailkapena erabakitzeko.

Etxeko taldearen erronka

Orain arteko puntuak kontuan hartuta, Córdoba Patrimonio Culturalek eta Durango Kirol Taldeak 5 punturekin ekingo diote lehiari; atzetik dituzte Super Amara BAT eta Atletismo Badajoz 4 punturekin, ya Narón 3rekin. Jaitsiera postuetan Hiru Herri, Celta eta Portugalete Atletismoa daude, bina punturekin.

Durango Kirol Taldearen helburua seigarren urtez jarraian Lehen Mailan jarraitzea da. Durangarrak hasierako puntuaziorik onenarekin iritsiko dira hitzordura, baina taldeko hiru atleta garrantzitsuren hutsuneak baldintzatuta lehiatu beharko dute Landakon.

The post Durango Kirol Taldeak Lehen Mailari eustea izango du jokoan larunbat honetan first appeared on DOT Durangaldea.

DURANGO | Durangoko Udaleko Turismo Sailak martxan jarri du “Durangoko nire txokorik gogokoena” argazki lehiaketaren bigarren edizioa. Instagram bidez egiten den ekimen honek herriko gune, paisaia edo une berezienak argazki baten bidez hilezkortzera gonbidatzen ditu herritarrak zein bisitariak.

Lehenengo edizioak izandako harrera bikainaren ostean —guztira 169 irudi aurkeztu ziren—, lehiaketa berriro dator sormena bultzatzeko eta sare sozialen erabilera kulturala sustatzeko asmoz. Helburua argia da: Durango hobekien ezagutzen dutenen begirada baliatzea herria turistikoki ezagutarazteko. Izan ere, parte-hartzaileek herriko ondarea, txokorik ezkutuenak, ilunabarrak edo gastronomia islatu ditzakete euren lanetan.

Nola parte hartu eta zeintzuk diren baldintzak

Lehiaketan parte hartzeko, irudiak Instagram kontu publiko batetik igo behar dira, @durangobizkaia profila aipatuz. Horrez gain, traola hauek idatzi beharko dira argitalpenean: #mirinconfavorito, #mirinconfavoritodedurango2026, #DurangoBizkaia eta #DurangokoTxokorikPolitena2026. Azkenik, izen-emate formularioa bete beharko da. Parte-hartzaile bakoitzak nahi adina argazki aurkeztu ditzake, baina izen-emate bat egin beharko du irudi bakoitzeko.

Jesica Ruiz Turismo zinegotziak ekimenean parte hartzeko deia egin die herritarrei: “Iazko arrakastak argi utzi zuen jendeak Durangoko edertasuna erakusteko duen gogoa. Edizio honekin gure paisaiak, ondarea eta herria berezi egiten duten xehetasun txiki horiek balioan jartzen jarraitu nahi dugu”.

Diru-sariak eta estatu mailako jauzia

Tokiko mailan, lehiaketak bi sari banatuko ditu: 200 euroko lehen saria eta 100 euroko bigarrena. Irudi irabazlea, gainera, herria sustatzeko materialetan (postaletan, pegatinetan eta karteletan) erabiliko da.

Baina bidea ez da hor amaituko. Durangoko argazki onenak herria ordezkatuko du lehiaketaren estatu mailako fasean. Bertan, Espainia osoko irudiekin lehiatuko da sari handiagoak lortzeko (500 euroko lehen saritik hasi eta 50 euroko akzesitetaraino).

Argazkiak aurkezteko epea ekainaren 1etik uztailaren 15era egongo da zabalik. Herriko irabazleak nor diren uztailaren 24an jakingo da, eta estatu mailako emaitzak, berriz, irailaren 27tik aurrera argitaratuko dira, Turismoaren Munduko Egunarekin batera.

The post Durangoko txokorik politenak erakusteko argazki lehiaketa abiatu dute Instagramen first appeared on DOT Durangaldea.

DURANGALDEA | Hona hemen egunez eguneko egitarau xehatua:

EGUENA, EKAINAK 11

• DURANGO | Adinekoen Zentroari buruzko Herritarren Topaketa: Udalak aurrera darrai Saibi eraikin zaharrean (Euskaltegi ohian) egongo den Adinekoen Zentro berria diseinatzeko partaidetza prozesuarekin. Hirugarren faseko topaketa hau 17:00etan izango da Elkartegian (bi orduko iraupena).

• DURANGO | Gastronomia tailerra azokan: Amillena Jatetxeko Lurrek eta Vanesak tokiko sukalde teknikak eta ezagutzak partekatuko dituzte 18:00etatik aurrera.

• AMOREBIETA-ETXANO | ‘Ametsetatik Herrira’ prozesuaren amaiera: Udalak tokiko gobernuak inoiz bultzatutako partaidetza prozesurik handienaren amaiera ekitaldia ospatuko du 18:30ean.

BARIKUA, EKAINAK 12

• DURANGO | Swing kontzertua Ezkurdin: Bartolome Ertzilla Musika Eskolako Bart…Sax! saxofoi taldeak eta Durangaldeko Swing Taldeak kontzertu dantzagarria eskainiko dute aire librean, 19:00etan Ezkurdiko kioskoan.

• DURANGO | Muruetatorreko jaiak: Auzoko jaiei hasiera emango zaie egitarau zabal batekin.

ZAPATUA, EKAINAK 13

• URKIOLA | San Antonio eguna: Tradiziozko meza nagusiak egongo dira goizean zehar: 10:00etan, 11:00etan, 12:00etan (Bilboko Gotzainak gidatua) eta 13:00etan.

• DURANGO | Durangoko Kirol Egunak: Herriko 21 klub eta elkarte Landako Gunean bilduko dira zapatuan eta igandean kirol eskaintza zabala erakusteko.

• AMOREBIETA-ETXANO | Ikasturte amaierako festa: Eskola urteari agur esan eta udari ongietorria egiteko festa indartsua antolatu dute Zelaieta parkean, 17:00etatik 22:00etara, familiei zuzendutako doako ekintzekin. Eguraldi txarra eginez gero, Gure Kirolak pilotalekura aldatuko da.

DOMEKA, EKAINAK 14

• DURANGO | Dantzaldiak Ezkurdin: Udako dantzaldiak martxan egongo dira 18:30etik 20:30era. Euria eginez gero, saioa Musika Eskolan egingo da.

• DURANGO | Euskal Sagardoaren Festa: Azokan bertako produktuak, euskal sagardoa eta tradizioa uztartuko dira 12:00etatik 15:00etara, herritar guztiei irekitako jardunaldian.

The post Kontsultatu hemen Durangaldeko aste honetako agenda first appeared on DOT Durangaldea.

DURANGO | Joan den astean egin zuen Durangoko Haurren Eskola Kontseiluak ikasturteko azken bilera. Saio horretan, kontseiluko kide gazteek ‘Durango Tour’ egitasmoaren balorazio sakona egin zuten; hain zuzen ere, Durangoko Udalaren babesarekin euren kabuz diseinatu eta bultzatutako ekimena.

Gaztetxoen ustez, esperientzia ezin hobea izan da hainbat arrazoirengatik: parte-hartzaileei emandako azalpenen argitasuna, ibilbidearen antolaketa txukuna eta haur gidarien inplikazio handia azpimarratu dituzte. Horrez gain, herrira iritsi berri direnei harrera egiteko, herria ezagutarazteko eta gizarteratzea errazteko tresna bikaina izan dela adierazi dute, umeei herri-bizitzan aktiboki parte hartzeko aukera emanez.

Gogoratu beharra dago ‘Durango Tour’ ekimenaren proba pilotua duela hilabete inguru jarri zela martxan. 10 eta 12 urte bitarteko haurrek gidatutako ibilbide horretan, herriko txoko esanguratsuenak eta durangarren eguneroko bizitzaren xehetasunak erakutsi zizkieten bisitariei. Ordu t’erdi pasatxoko iraupena izan zuen ekintzak, eta Udaletxeko arkupetan egindako luntx batekin borobildu zuten eguna.

Ekimenak utzitako zapore onari esker, Haurren Kontseiluak argi utzi du proiektuari segida eman nahi diola aurrerago ere. Udalbatzako alderdi guztiek txalotu egin dute umeen lana, eta eskerrak eman dizkiete Durangoko gaztetxoen ahotsa entzunarazteko eta herri hobe bat eraikitzeko erakutsitako konpromisoagatik.

The post Durangoko Haurren Eskola Kontseiluak bikaintzat jo du ‘Durango Tour’ ekimena ikasturte amaieran first appeared on DOT Durangaldea.

OTXANDIO | Eusko Jaurlaritzako Industria, Trantsizio Energetiko eta Jasangarritasun Sailari atxikitako URA-k, Uraren Euskal Agentziak, Oleta ibaia lehengoratzeko lanak amaitu ditu. Presazelai inguruan ibaiaren eskuinaldea erabat jota utzi zuen 2025eko ur-goraldi indartsu batek: presaren egitura zati batean hautsi eta ibertzea higatu zuen. Lan hauei esker, urak eramandako lurrak bere tokira itzuli dituzte, ibaiaren joan-etorria naturalizatu dute eta, batez ere, Mekoletako aisialdi-gunera hurbiltzen diren herritarren segurtasuna bermatu dute.

Gunearen balio ekologikoari eutsi nahian, obrak bioingeniaritza teknikak erabiliz egin dituzte; hau da, elementu artifizial edo zurrunik gabe, ibaiaren berezko dinamika errespetatuz. “Ingurua berreskuratzeko eredu argia da hau. Ezponda bati egonkortasuna eta segurtasuna itzuli diogu, baina ibaiaren biodibertsitatea eta kalitate ekologikoari kalterik egin gabe”, azaldu dute obraren arduradun teknikoek.

Lan hauek URAk eta Otxandioko Udalak herriko ibaiak zaintzeko eta mantentzeko duten lankidetza-hitzarmenari esker gauzatu dira. Guztira, 46.000 euroko inbertsioa egin da (BEZa barne), eta Europako Eskualde Garapeneko Funtsaren (EGEF 2021-2027) babesa jaso du proiektuak.

Ibaiaren horma berria sendotzeko, enborrak sartu dituzte oinarrian, eta lurrez zein harri-koskorrez osatutako ezponda berriaren gainean jute biodegradagarrizko manta bat zabaldu dute, landaredia berriz ere bertan sustrai dadin. Gainera, presaren hausturak alboan sortutako bide naturalari eutsi diote, uraren fluxua modu askeagoan eta naturalagoan joan dadin.

Kontuan hartu behar da inguru hau Zadorrako urtegien kontserbazio eremuan (KBE) kokatuta dagoela. Hori dela eta, arreta handiz lan egin da: aisialdi-guneko lizar lepatuak babestu dituzte, bisoi europarraren eta igarabaren habitatak ez asaldatzeko neurriak hartu dira, eta lanak lehorrean egin dira ura ez lausotzeko. Amaitzeko, inguruko harizti eta basoei dagokien landaredia ereingo dute bertan.

The post Oleta ibaiko ezpondak egonkortu eta ingurua seguruago bihurtu du URAk Otxandion first appeared on DOT Durangaldea.