AMOREBIETA-ETXANO | Marmitako lehiaketa hitzordu garrantzitsua bihurtu da zornotzarrentzat jaietako egitarauaren baitan. Izan ere, partaidetza urtez urte hazten ari da. Aurten 5900 pertsonek eman dute izena, 362 kuadrillatan banatuta.

Era berean, aurten ere marmitakoak prestatzeko iaz gehitutako gune berriak mantenduko dira Ogenbarrena auzoan eta San Pedro eta Lehendakari Agirre kaleetan, nahiz eta orokorrean guneen banaketa-planoa ez den aldatu. Gainera, iaz bezala, komunak etengabe garbituko dira lehiaketa egunean zehar. Lehiaketa datorren uztailaren 18an ospatuko da.

Lehiaketan parte hartuko duten kuadrillek bete beharreko tokiak zozketa publiko bidez esleitu dira gaur. Zozketaren emaitza jarraian kontsulta daiteke: https://labur.eus/marmi 

Ekitaldia behar bezala garatzeko, Udalak 21 gazte kontratatu ditu gazteen enplegu-poltsatik. Hauek mahaiak eta aulkiak banatzeko lan egingo dute lehiaketa egunean.

Horrez gain, beste 2 pertsona kontratatu dira jai guztietarako, mugikortasun murriztua dutenentzako erreserbatutako espazioen zaintza eta erabilera egokia bermatzeko.

Beraz, guztira 23 pertsona kontratatu dira jaietarako.

Mahai eta aulkiak mapan esleitutako lekuetan emango dira, 10:30etik 13:00etara, eta 13:00etatik 19:30era jasoko dira. Taldeek uneoro bete beharko dituzte antolatzaileen oharrak. Sari banaketa 14:30ak eta 15:00ak bitartean egingo da Zubiondo plazan.

The post 362 taldek hartuko dute parte aurtengo marmitako lehiaketan first appeared on DOT Durangaldea.

DURANGALDEA.— Durangaldeko Ikerlari Gazteen bosgarren deialdiak badu irabazlea. Andu Allande Moreno Basabe elorriarrak eskuratu du saria, bere herrian bertan sorturiko Funcor kooperatibari buruz egindako ikerketa lanagatik. Saritutako lanak izenburu esanguratsu hau darama: «Kooperatibismoa. Kapitalismoaren barneko argi-izpi hutsala. Funcor kooperatibaren ibilbidea ardatz harturik eginiko ikerketa».

Gerediaga Elkarteak 2022an jarri zuen martxan sariketa hau, Durangaldeko ondare, historia, kultura eta gizartearen zaintza, ikerketa eta zabalpenarekiko zaletasuna eskualdeko gazteen artean bultzatzeko helburuarekin. Aurten ere, egitasmoak Durangoko Merinaldearen Amankomunazgoaren babesa izan du. Hori dela eta, Idoia Otaduy Amankomunazgoaren presidenteak eta Gotzon Gomez Gerediagako presidenteak eman diote 1.500 euroko saria elorriar gazteari.

1955etik aurrera, Euskal Herrian hainbat proiektu kooperatibista jarri ziren abian, eta giro horretan sortu zen Elorrion Funcor kooperatiba, Andoni Esparzaren eskutik. Esperientzia oso emankorra izan zen eta 1970era arte iraun zuen. Galdategia edota nekazaritza-makineria saltzeko fabrika izatetik harago, beste hainbat egitasmo garrantzitsuren sustatzaile izan zen Funcor:

• Euskarazko herriko lehen ikastola.

• “Arte” unibertsitatea.

• Txirrindulari talde profesionala.

• Laboral Kutxaren sorkuntza.

• Ama Lur euskarazko lehen film luzearen finantzaketa, besteak beste.

Azken urteotan Funcorren eragina aztertzeko zenbait lan eta jardunaldi (2022an, Elorrion) egin badira ere, Andu Allande Moreno Basaberen ikerketak ikuspegi berri bat eskaintzen dio kontakizunari. Lan honek Funcorrek Elorrion izandako eragin hurbilean jartzen du begirada, orduko testuinguru sozial eta ekonomikoaren azterketa sakona eginez.

Edizio honetako epaimahaia Iune Ruiz Taglek, Iruri Altzerreka Martinezek eta Peru Bilbao Lasak osatu dute. Adituen ustez, Morenoren lanak Durangaldeko historia garaikidearen pasarte garrantzitsu bat jorratzen du bikain.

“Ondo egituratua dago, bibliografia anitza eta aberatsa dauka, eta aurrez idatziz dokumentatu gabeko informazio eta testigantzak ere jasotzen ditu”, nabarmendu dute epaimahaikideek lan saritua baloratzerakoan.

The post Funcor kooperatibari buruzko ikerketa lanak irabazi du Durangaldeko Gazte Ikerlarien Sariketa first appeared on DOT Durangaldea.

DURANGO.— Bizkaiko Foru Berriaren (1526-2026) V. mendeurrena ospatzen duen erakusketa ibiltaria Durangora iritsi da bere ibilbideari amaiera emateko. Joan den apiriletik Bilbo, Balmaseda, Bermeo, Portugalete eta Galdakao lako herriak bisitatu ondoren, Bizkaiko Foru Aldundiak eta Batzar Nagusiek autogobernuaren zutabe hau zabaltzeko aurreikusitako egutegia betez heldu da erakusketa herri durangarrera.

Ekimen honen helburu nagusia orain dela 500 urte onartu zen testuaren garrantzia herritarrengana hurbiltzea da, Bizkaiko nortasunaren eta demokraziaren oinarria baita. Erakusketa uztailaren 19ra arte egongo da zabalik Landako Gunearen zabalgunean.

Diseinu bisual eta irisgarria duten gaikako hamar panelen bitartez, bisitariek bidaia bat egin dezakete autogobernuaren mugarri nagusietan zehar: Jaun Zuriaren legendatik hasi eta 1526an Gernikako Arbolaren azpian testua onartu zen bidegurutzeraino.

Erakusketak bere garairako oso aurreratuak ziren hainbat alderdi juridiko nabarmentzen ditu, hala nola emakumearen parekatze juridikoa, “habeas corpus”-a edota herentzien erregulazioa. Funtsezko beste kontzeptu batzuk ere azaltzen dira panelotan; esaterako, “foru baimena” eta ondoren Ekonomia Ituna sortarazi zuen fiskalitate sistema. Kuriositate gisa, John Adams AEBetako Konstituzioaren aitak Bizkaiko erakundeen aurrean azaldu zuen interesa ere aipatzen da.

Bertsio alternatiboak Bilbon

Durangoko erakusketaz gain, ekimenak beste bi bertsio ditzake Bizkaiko hiriburuan:

• Metrorako egokitzapena: Edukien bertsio murriztu bat Eliptika (lehengo Moyua) geltoki berrira lekualdatu da, ekainean Gurutzetan egon ondoren. Honela, metroaren erabiltzaileek euren joan-etorrietan ondare historiko hau ezagutzeko aukera dute.

• Foru Liburutegian: Aditu eta ikertzaileentzat diseinatutako erakusketa tekniko eta zientifikoago bat dago zabalik abuztura arte Bilbon. Bertan, balio historiko handiko pieza askoren artean, Bizkaiko Foru Berriaren (1526) jatorrizko liburua dago ikusgai.

The post Bizkaiko Foru Berriaren V. Mendeurreneko erakusketa Durangon first appeared on DOT Durangaldea.

AMOREBIETA-ETXANO | EH Bildu eta Elkarrekin Podemos talde politikoek Mariluren, Down sindromea duen Amorebieta-Etxanoko bizilagunaren, egoerari buruz zabaldu duten informazioaren aurrean, Udalak Mariluri eta bere familiari laguntzeko konpromisoa berretsi nahi du.

Egoera hori Bizkaiko Foru Aldundiak, eguneko zentroetan plazak esleitzeko eskumena duen administrazioak, Marilu Amorebieta-Etxanoko Nafarroa Zentroan bertan dagoen adinekoentzako eguneko zentrora aldatzeko proposamena egin ondoren sortu da.

Horregatik, lehenik eta behin, eguneko zentroak arautzea Bizkaiko Foru Aldundiaren eskumena dela argitu nahi du Udalak, bai desgaitasuna duten pertsonentzako baliabideetan, bai adinekoentzako baliabideetan. Beraz, Amorebieta-Etxanoko Udalak ez du plaza horien esleipenari edo aldaketari buruzko erabakirik hartzen.

Udalak argi utzi nahi du Udaleko Gizarte Ekintzako saila etengabeko harremanetan egon dela hasiera-hasieratik erabiltzailearen familiarekin, udaleko talde politiko guztietako ordezkariekin eta Bizkaiko Batzar Nagusietako kideekin, egoera aztertzeko eta Marilurentzat ahalik eta erantzunik onena bilatzeko.

Gaur egun, Bizkaiko Batzar Nagusietan lantalde bat ari da kasu hori aztertzen, eta irailean azterlan horren ondorioak ezagutaraztea aurreikusten da.

Bizkaiko Foru Aldundiak Marilu Amorebieta-Etxanoko Nafarroa zentroan mantentzea proposatu du, adinekoentzako eguneko zentroan. Aukera honek, gainera, prozesua trantsizio egokitu bidez laguntzeko Udalak duen konpromisoa jasotzen du, Mariluren beharrizanak ahalik eta gehien zainduz eta artatuz.

Amorebieta-Etxanoko Udalak ulertzen du familiaren kezka, baina beharrezkotzat jotzen du informazio zehatza eta osoa ematea.

Amorebieta-Etxanoko Udalaren konpromisoa da, eta uneoro izango da, Mariluri eta bere familiari laguntzea, baita erakunde eskudunekin lankidetzan aritzea eta Mariluri ahalik eta arretarik onena bermatzeko edozein erabaki hartzeko lan egitea ere.

The post Zornotzako Udalak Mariluri eta bere familiari laguntzeko konpromisoa berretsi du first appeared on DOT Durangaldea.

EGURALDIA | Joan den asteburuko bero sargoriaren ondoren, astelehen honetan nabarmen baretuko da giroa. Kostaldetik gertu, tenperatura maximoak 30 ºC-tik beherakoak izango dira, eta barnealdean jaitsiera arinagoa izango den arren, termometroek atsedena emango dute. Zeruan erdi mailako hodeiak eta hodei altuak izango dira nagusi, batez ere egunaren bigarren zatian, eta kantauri isurialdean behe-hodei batzuk ere agertuko dira. Haizeak ahul eta aldakor joko du, baina orduak aurrera egin ahala ipar osagaiko haizea nagusituko da.

Asteartean, berriro gora

Atsedenak, ordea, gutxi iraunduko du. Asteartean, hego-ekialdeko haizearen sarrera berri batek tenperaturak nabarmen igoko ditu barnealdeko eskualdeetan. Kostaldea hego-ekialdeko haize honen eremutik kanpo geratuko denez, bertan igoera arinagoa izango da.

Arratsaldean, ipar osagaiko haizea sartuko da indarrez, giroa freskatuz eta beroa arinduz. Zeruari dagokionez, erdi mailako hodeien eta hodei altuen arteko tarteak izango ditugu, eta egunaren hasieran zein amaieran behe-hodei trinkoagoak espero dira kantauri isurialdean.

The post Bero eta udako tenperaturak aste honetarako first appeared on DOT Durangaldea.

ELORRIO | Aurten, Dermatosi Nodular kutsakorra gaixotasuna dela eta, behiek eta txahalek ezingo dute aurtengo Ferixa Nausietako azokan parte hartu.

The post Irailean Elorrio egingo den ganadu-feriarako izena emateko epea zabalik first appeared on DOT Durangaldea.

AMOREBIETA-ETXANO | Udalak azken urtean jaiotako haurrei ongietorria egingo die Karmengo jaien baitan egingo den ekitaldi berezi batekin. “Ekimen honen bidez, zornotzarron herrira batu diren haurrei ongietorria eman nahi diegu. 2025eko uztailaren 1etik 2026ko ekainaren 30era arte bitartean jaiotako haurrak eta haien familiak uztailaren 14an bilduko gara udaletxean, eta han Amorebieta-Etxanoko ikur den zapi urdina jarriko diegu. Ekitaldi sinbolikoa da, baina badakigu ilusio handia egingo duela”, adierazi du Ainhoa Salterain Amorebieta-Etxanoko alkateak.

Ekitaldia uztailaren 14an izango da, 19:00etan, Amorebieta-Etxanoko Udaletxean eta helburu nagusia da udalerriarekin eta bere tradizioekin lotura sendotzea haurtzarotik.

Udalak azken urtean jaiotako haurrak dituzten familiak ekitaldi honetan parte hartzera gonbidatzen ditu, jaien hasiera elkarrekin ospatzeko eta herriko txikienei protagonismoa emateko.

The post Zornotzak zapi urdinarekin emago die ongietorria azken urtean jaiotako haurrei first appeared on DOT Durangaldea.

EGURALDIA | Uda giroarekin jarraituko dugu datozen egunetan gure eskualdean, eta termometroak 30 gradu inguruan mantenduko dira. Hala ere, freskotasuna bilatzeko prestatu, gutxi iraunduko du eta: astebururako beroa bueltan izango dugu eta tenperaturak berriro gora egingo du, 40 gradu ingurura iritsi arte. Itzalak bilatzeko, ondo hidratatzeko eta erdiguneko orduetan kontu handiz ibiltzeko asteburua izango da.

The post Ostera ere 40 gradu inguru astebururako first appeared on DOT Durangaldea.

AMOREBIETA-ETXANO | Ostiral honetan, uztailaren 10ean, Larreako Jaiak hasiko dira, publiko guztiarentzako egitarau zabala eta anitzarekin. Hiru egunetan zehar, Larrea auzoa musikaz, lehiaketaz, kulturaz eta tradizioz beteko da, dibertsiorako eta bizikidetzarako uneak partekatzeko aukera eskainiz.

Jaiak 19:00etan hasiko dira ohiko txupinazoarekin. Ondoren, 19:30ean Tortilla Txapelketa egingo da, eta 21:00etan sarien edo tortillen banaketa izango da. Gauari jarraipena emateko, 22:00etan Iluntzean ikuskizuna izango da, eta 23:30ean DJ saioa.

Uztailaren 11n, larunbata, goizeko 11:00etan hasiko dira Paella Txapelketa eta aldi berean haurrentzako puzgarriak eta jolasak 11:00–14:30etara. 13:00etan Ross Dantza Taldearen emanaldia izango da, eta 14:00etan paellen banaketa egingo da. Arratsaldean, 17:30ean, Iratxe eta Imanolen kantaldi gidatua izango da, eta 18:30ean Mus Txapelketa. Ondoren, 19:00etan Karropoteoa egingo da. Gauean, 22:00etan Itziarren Semeak taldea eta 23:30ean Argitu Erromeria izango dira. Eguna amaitzeko, Kantzontzilo eta kulero lasterketa egingo da.

Uztailaren 12an, igandea, 12:00etan Txistupoteoa izango da Zornotzako txistulariekin, eta 13:00etan Igel Txapelketa. 15:00etan Auzo Bazkaria egingo da, eta 17:30ean Futbolin Txapelketa. Ondoren, 19:30ean Sardinada izango da, jaietako azken ekitaldia.

Herri bazkarira joateko interesa dutenek Errota Barrin eta Propin eman dezakete izena. Gainera, tortilla eta paella txapelketetarako mahaiak eta aulkiak egongo dira, gehienez ere bi mahai eta hamalau aulki talde bakoitzeko.

Amorebieta-Etxanoko Udalak herritarrak Larreako Jaietan aktiboki parte hartzera gonbidatzen ditu, auzoko kultura, musika eta ekintza sorta aberatzez gozatzeko.

Etxondoposoko Jaiak

Etxondoposoko Jaiak 2026 uztailaren 11n, larunbatean, ospatuko dira, eta egun osoko egitaraua izango dute. Jai giroan, tradizioa, kultura eta aisialdia uztartuko dira, besteak beste, txistulariak, trikitixa, aizkolariak, herri kirolak, mus txapelketa, briska txapelketa eta zuzeneko musika saioak izango baitira.

Larunbatean bertan hasiko dira festak, 12:00etan txupinazo eta pregoiarekin. Ondoren, 12:30ean, txistularien, trikitilarien eta aizkolarien saioa izango da. Eguerdian, 14:00etan igel txapelketa egingo da, eta arratsaldean, 15:30ean, auzo bazkaria egingo da.

Jarduerak arratsaldean eta gauean ere jarraituko dute. 17:30ean, mus eta briska txapelketak egingo dira, parte-hartzaileek joko tradizional horietan aritzeko aukera izan dezaten. Gauean, 20:30ean, sari banaketa eta zozketa egingo dira, eta 21:00etan mariatxiak izango dira. Egunari amaiera emateko, 22:00etan zuzeneko musika emanaldia izango da.

Etxondoposoko Jaiak auzoko eta herriko giroa sustatzeko antolatutako ekitaldia dira, tradizioak, musikak eta elkarguneek protagonismo berezia izango duten jardunaldia eskainiz. Amorebieta-Etxanoko Udalak herritarrak jaietan parte hartzera eta giroaz gozatzera animatzen ditu.

The post Larreako eta Etxondoposoko jaiak ospatuko dira Zornotzan first appeared on DOT Durangaldea.