ZALDIBAR | EAJ-PNVk EH Bilduk 2023ko udal hauteskundeetara aurkeztu zuen hauteskunde-programako konpromiso nagusietako batzuk udalerriaren egungo egoerarekin alderatu ditu. Alderdi jeltzalearen ustez, legegintzaldia amaitzeko urtebete baino gutxiago falta denean, proposamen horietako hainbat oraindik gauzatu gabe daude edo ez dute aurrerapen esanguratsurik izan.

Jeltzaleen esanetan, adibiderik argienetako bat EH Bilduk kaleen garbiketa, mantentze-lanak, argiztapena eta margoketa hobetzeko hartu zuen konpromisoa da. Hala ere, EAJ-PNVk salatu du udalerriak oraindik ere hainbat gunetan garbitasun faltarekin, kartelekin eta pintaketekin lotutako arazoak dituela. Egoera horrek herritarren kexak ere eragin ditu, eta Udalak ez du erantzun eraginkorrik eman.

“Espazio publikoa zaintzeak eragin zuzena du herritarren bizi-kalitatean. Ez da nahikoa hobekuntzak iragartzea; udalerria egoera onean mantendu eta herritarren eskaerei erantzun behar zaie“, adierazi dute EAJ-PNVtik.

Alderdi jeltzaleak hauteskunde-kanpainan egindako beste promesa batean ere jarri du arreta: Parkeko Hoteleko bigarren solairuan alokairu sozialeko etxebizitzak eraikitzea. Hiru urte igaro ondoren, salatu du proposamen hori ez dela gauzatu, eta, gainera, udalerrian etxebizitza sozialaren eskaintza handitzeko beste inolako jarduketarik ere ez dela bultzatu.

Era berean, EAJ-PNVk kritikatu du Berdintasun Kontseilua geldirik egotea, urtebete baino gehiago baitaramatza deialdirik egin gabe. Jeltzaleen ustez, egoera horrek kontraesanean jartzen du EH Bilduk mugimendu feministarekin eta emakumeen kolektiboekin lankidetza indartzeko hartutako konpromisoa.

Horri gehitu behar zaio San Andresen gizarte-etxe bat sortzeko proposamena ere. Hauteskunde-programan jasotako ekimena izan arren, legegintzaldi osoan ez da inolako urratsik egin hura gauzatzeko.

“Hauteskunde-promesek herritarren aurrean itxaropenak eta konpromisoak sortzen dituzte. Hiru urte igaro ondoren, EH Bilduk zaldibartarren konfiantza eskatzeko aurkeztu zituen proposamenetako asko oraindik ez dira egintza bihurtu“, adierazi dute EAJ-PNVtik.

The post Zaldibarko EAJk hauteskunde-promesak “ez betetzea” leporatu dio EH Bilduri first appeared on DOT Durangaldea.

ZALDIBAR | Dena prest dago uztailaren 2tik 5era Zaldibaruko kaleak jai giroz, musikaz eta ekintzez betetzeko. Aurten ere, herria topagune bilakatuko da eta ez da ezer faltako: gastronomia, kontzertuak, herri kirolak eta, nola ez, elkartasun keinu potolo bat txupinazoan. Gainera, asteburu honetan bertan hasiko dira motorrak berotzen Eitzagan!

Zaldibartarrek ondo jatea maite dutela argi dago. Aurten ere, sabela bapo betetzeko aukera ederra egongo da:

• Tortilla txapelketa eta herri bazkari jendetsua.

• Lomo eta sardina jatea Olea kalean.

• Odoloste dastaketa bikaina Bekoetxe kalean.

Musika izango da jaien motorra. Kaleak girotzen hiru elektrotxaranga arituko dira: Matraka, Elektrotxufla eta Gotx. Baina adi, agertokira igoko diren taldeek ere itxura itzela baitute:

• Erromeria: Altxa Porru.

• Akustikoa: Nebar.

• Rock eta indarra: Sukena, Streetwise eta Xaukena Xauk.

• Gaupazaleentzat: Hainbat DJ arituko dira goizaldeko ordu txikiak arte.

Kulturak ere bere lekua izango du. Uztailaren 5ean, maila goreneko bertso saioa egongo da Zaldua plazan Leire Vargasen gidaritzapean: Xabat Illarregi, Aitor Etxebarriazarraga, Saioa Alkaiza eta Unai Iturriaga. Antzerkiari dagokionez, Markeliñe talde zornotzarrak ‘Artilusio’ kaleko ikuskizuna eskainiko du.

Kirolariek eta umeek ere izango dute non aukeratu: areto futbola, 3×3 saskibaloia, pilota partidak, herri kirolak, ginkana eta apar festa egongo dira eta!

Aurten, une hunkigarriena uztailaren 2an, 18:45ean, biziko da. Hamadako Izarrak elkarteak botako du txupinazoa udaletxeko baliotik. Jai Batzordeak beraien lana saritu nahi izan du, urtero Saharako haur errefuxiatuak hartzen baitituzte Olazar aterpetxean Oporrak Bakean programari esker. Gainera, aurten 50 urte betetzen dira Arabiar Errepublika Demokratiko Sahararra proklamatu zenetik; beraz, elkartasuna adierazteko eta autodeterminazio eskubidea aldarrikatzeko keinua ere izango da.

Errespetua eta berdintasuna: Eneritz Azpitarte alkateak eta herriko talde feministek argi utzi dute: “Zaldibar indarkeria matxistarik eta erasorik gabeko herria izatea nahi dugu. Erasotzaileek ez dute lekurik gure artean”.

Aurten jaien berri emango duen kartela Huescatik dator. Noemí Ruizek irabazi du lehen saria (250 €). Bigarren saria Ibone Gómez zaldibartarrarentzat izan da (150 €) eta haurren kategorian Olaia Uribarri izan da txapelduna (100 € herriko denda eta tabernetan gastatzeko). Guztira, 17 lan aurkeztu dira aurten!

Zaldibar herriguneaz gain, auzoek ere badute euren txanda:

• Eitzaga: San Pedro jaiak asteburu honetan bertan! Ekainaren 26tik 29ra.

• Goierri: Uztailaren 17tik 19ra.

• Urizar eta Sallabente: San Lorentzoak, abuztuaren 10ean.

The post Zaldibar festa giroan murgiltzeko prest datorren ostegunetik aurrera first appeared on DOT Durangaldea.

ZALDIBAR | Udalak lankidetza-hitzarmena sinatu du udalerriko familia batekin, Goierriko karobi historikoa modu integralean konpondu ahal izateko. Labea XIX. mendeko eraikina da, balio kultural handikoa, baina azken 20 urteetan mantentze lanik egin ez denez, gaur egun hondatuta dago, landarediak estalita eta ikusezin. Egoera horren aurrean, udalak beharrezkotzat jo du azpiegitura konpontzea eta ondareari dagokion ikusgarritasuna ematea, eta, hain zuzen ere, labea jabego pribatuko lurretan dagoenez, udalak eremu horretako familiarekin egin du hitzarmena, bertan esku hartu ahal izateko.

Akordioak jasotzen duenez, udalak bere gain hartuko ditu karobia eta inguruak garbitzeko lanak. Sastrakak kenduko ditu, eta ingurua txukundu. Behin hori eginda, udalak txosten tekniko bat egingo du karobiaren egoera ebaluatzeko eta beharrezko konponketak zehazteko. Era berean, mantentze lanak urtean behin egiteko konpromisoa hartu du udalak. Halaber, akordioak bigarren hitzarmen baterako bidea zabaltzen du, etorkizunean labearen konponketa integrala egiteko eta inbertsio tekniko zein ekonomikoak zehazteko.

Eneritz Azpitarte alkateak akordioa txalotu du, eta eskerrak eman dizkio karobiko lurren familiari, ondarea zaintzeko erraztasunak emateagatik. “Hogei urtean mantenu lanik egin ez denez, karobiak egoera tristea bizi du. Akordio honi eskerrak, ondarea berreskuratzeko bidean jarriko gara, karobiak garai bateko distira berreskuratu dezan. Gure herriko altxor historiko hau merezi bezala txukuntzeko eta zaintzeko ordua da”, esan du alkateak.

Ondare historikoa

Goierriko karobia Aixolarako bidean dago, Goenzelai Etxebarri baserritik gertu, eta 1997 eta 2000 urte artean zaharberritu zen azken aldiz. Balendin Lasuen historialari zaldibartarrak dokumentatu zuenez, “XIX. mende bukaerako labea da, lur-gainbehera txiki batean sendo eraikia, barruan kanpai zilindriko bat duena, tronko-konikoa, goiko aldeko barautsetik kargatzeko. Sua erdi-puntuko arkudun atexkatik sartzen zen. Ate hori oinarrian dago, bidearen aldean. Gainera, duela hamarkada batzuk labea zaharberritzeko premiaz hitz egin zuen: “Zalantzarik gabe, 1933-34 urte aldera funtzionatzeari utzi zion labea berreskuratzea interesgarria izango litzateke, batez ere, labearen ingurua egokitzeko, labe-karobia erabat estaltzen duten sastrakak eta landaredia kentzeko, eta aurrealdea eta alboak berdintzeko”. Lasuenen hitzek erabateko zentzua izaten jarraitzen dute gaur egun ere. Hori dela eta, Zaldibarko Udalak bere konpromisoa berretsi du herriko ondarea zaintzeko eta dibulgatzeko.

The post Zaldibarko Udalak Goierriko karobia zaharberritzeko hitzarmena sinatu du first appeared on DOT Durangaldea.

ZALDIBAR | Zaldibarko Udalak Auzo Taxia jarri du martxan, eta, horrekin, urrats berri bat eman du landa-eremuen eta hirigunearen arteko konexioa hobetzeko. Zerbitzua Zaldibarko baserri-auzoetan bizi diren herritarrei zuzenduta dago nagusiki, Gazagako, Goierriko, Arangureneko, Eitzagako, Sallabenteko eta Olarreagako auzotarrentzat, baina San Andreseko bizilagunek ere erabili ahal iazngo dute, kasu horretan, mugikortasun arazoak dituztenean. Zerbitzua udalerrian erroldatuta dauden 18 urtetik gorako pertsonei zuzenduta dago. Hala ere, 12 eta 18 urte bitarteko adingabeek ere erabili ahal izango dute, betiere gurasoen edo tutoreen baimena badute.

Auzo Taxiak joan-etorriko bidaiak eskainiko ditu baserri auzoen eta herrigunearen artean, udalerriko mugen barruan, eta, horregatik, ez da aurreikusten beste herri batzuetarako desplazamendurik egitea. Zerbitzuaren ordutegia honako hau izango da: astelehenetik ostiralera 07:30etik 20:00etara eta larunbatetan 09:00etatik 14:00etara. Igande, jaiegun eta abuztuan ez da zerbitzurik egongo.

Txartela eta bonuak

Zerbitzua erabili nahi duten herritarrek erabiltzaile-txartela eskatu beharko dute udaletxean, eta behin hori eginda, bonuak erosi ahalko dituzte udaletxean bertan. Txartelen gutxieneko erosketa 5 bonukoa izango da, eta 12,5 euroan eskuratu ahalko dira (2,5 euro ibilbide bakoitzeko). Bidaiariak bonu bat eman beharko dio taxilariari egindako ibilbide bakoitzeko eta bere erabiltzaile txartelarekin identifikatu beharko da. Taxia eskatzeko, erabiltzaileek udalak emandako telefonora deitu beharko dute, edo taxilariarekin berarekin harremanetan jarri beharko dute bidaia adosteko.

“Lehen ez zegoen gazteen emantzipaziorako laguntzarik, eta orain, bai. Lehen ez zegoen psikologoarenera joateko laguntzarik gazteentzat, eta orain, bai. Ez geneukan auzo taxirik, eta aurrerantzean, bai. Hori da gobernu talde honen bidea: dauden zerbitzuak indartzea eta ez baldin badaude, sortzea, Auzo Taxiarekin egin bezala. Herritar guztien irisgarritasuna bermatu nahi dugu, bereziki herrigunetik urrutirago bizi direnena, zerbitzu publikoak hurbilago eta eskuragarriago izan ditzaten”, esan du Eneritz Azpitarte alkateak.

Alkateak gogorarazi du Auzo Taxia 2026ko udal aurrekontuetan adostu zutela gobernu taldeak eta PSE-EEk, alderdi sozialistaren emendakin bat tarteko. Azpitartek alderdien arteko elkar-ulertzea txalotu du, eta aurrerantzean ere herriaren mesedetan lan egitera deitu ditu ordezkari guztiak.

The post Zaldibarko Udalak zerbitzu berria ipini du martxan: Auzo Taxia first appeared on DOT Durangaldea.

ZALDIBAR | Udalak pauso berri bat eman du herriko azpiegiturak eta zerbitzuak hobetzeko: komun publiko autogarbigarria jarri du Euskal Herria etorbidean, udalerriko lehenengoa. Azpiegitura osasun etxearen eta parkearen ondoan dago.

Herritarrek askotan helarazi diote udalari komun publiko baten beharra. “Parte hartze bidezko aurrekontuetan, adibidez, behin baino gehiagotan jaso dugu proposamena, eta norbanako herritarrek ere sarritan mahai gaineratu digute eskaera”, azaldu du Eneritz Azpitarte alkateak. “Udalak bat egin du eskariekin eta beharrezkoa iritzi dio komun publikoa jartzeari. Azkenean, hemen daukagu, erabiltzeko prest”, gaineratu du.

Komun publikoa atal bitan banatua dago. Kanpoaldean, hiru pixaleku daude, eta barruan, altzairu herdoilgaitzeko komunontzia, xaboi-banagailua, ur-txorrota, lehorgailua eta papera. Halaber, haurren pixoihalak aldatzeko taula bat ere badago. Komuna erabili eta gero, erabiltzaileak barrutik irtendakoan, azpiegiturak minutu bat inguruz garbitzen du barrualdea, bere kabuz. Udalak 82.370,75 euroko inbertsioa egin du.

The post Zaldibarko Udalak komun publikoa atondu du Euskal Herria etorbidean first appeared on DOT Durangaldea.

ZALDIBAR | Udalerriko kirol instalazioak hobetzeko konpromisoari eutsita, Zaldibarko Udalak kalistenia parkea atonduko du Olazarko zelaian. Azpiegitura ia 70 metro karratu zabal izango da, eta indarra, bizkortasuna eta malgutasuna lantzeko askotariko elementuak izango ditu: horma-barra bat, eraztun-joko bat, monkey bar edo eskailera horizontala, flexioak egiteko bi barra eta sokadun eskailera. Halaber, elementuen azpialdean hartxintxarrezko zoladura jarri da. Udalak 33.000 euroko inbertsioa egin du guztira.

“Rokodromo berria inauguratu genuen duela aste batzuk, eta kalistenia parkea prestatzen gabiltza orain. Hori da gure bidea: udalerriko kirol azpiegiturak hobetzen eta kirol eskaintza zabaltzen joatea”, esan du Eneritz Azpitarte alkateak.

The post Zaldibarko Kalistenia parkea atontzeko lanak, martxan Olazarren first appeared on DOT Durangaldea.

ZALDIBAR | Udalak legealdi honetako proiektuetako bat bete du: rokodromoa berritu du, eta araudiak agintzen dituen betekizunetara egokitu. Batetik, goitik behera berritu da eskalada gunea. 98 metro karratuko boulderra jarri da hasiberrientzat zein eskalada-teknikan sakondu nahi dutenentzat. Era berean, eskaladarako hainbat bide jarri dira, baita suspentsio-taula eta Campus Board bana ere. Bestetik,  udalak azpiegiturako komunak berritu ditu. Komun berriak ipini dira, eta aldagelak eta dutxak gehitu zaizkie horiei. Zerbitzu horiek arku-tiroko kirolariek ere erabili ahalko dituzte aurrerantzean. Lanek 190.000 euroko inbertsioa izan dute, eta Bizkaiko Foru Aldundiak 41.397 euroko laguntza eskaini du.

Eneritz Azpitartek nabarmendu duenez, “eskalada praktikatzeko joera asko hazi da azkenaldian, eta Zaldibarko Udalak beharrezkotzat jo du rokodromoa berritzea. Horri eskerrak, bi helburu lortu dira: herriko eskalatzaileek merezi bezalako azpiegitura izatea eta azpiegitura horrek segurtasun irizpideak betetzea”. Horrez gainera, legealdiko ildoari jarraituta, udalak herriko kirol instalazioak hobetzen jarraituko duela nabarmendu du Azpitartek.

Inaugurazioa ostiralean 

Rokodromo berriak ostiral honetan, otsailak 27, irekiko ditu ateak, 18:00etan. Inaugurazio ekitaldian Ainhize Belar eskalatzaile atxondarrak parte hartuko du.

Halaber, udalak jakinarazi du herritarrek asteburu honetatik aurrera erabili ahalko dutela instalazioa. Aldez aurretik rokodromoan izena emanda zeudenek nahikoa izango dute udaletxetik pasatzea eta txartela aktibatzea. Erabiltzaile berriek udaletxetik pasatu beharko dute, derrigorrezko inprimakia bete eta fidantza ordaindu. Behin hori eginda, rokodromoa erabili ahal izateko giltza jasoko dute.

The post Ainhize Belar eskatzaile atxondarrak inauguratuko du Zaldibarko rokodromo berritua first appeared on DOT Durangaldea.

ZALDIBAR | Zaldibarko Udalak eta Gerediaga Elkarteak Bittor Garitaonandiaren jaiotzaren 150. urteurrena ospatzeko ekitaldi sorta prestatu dute. Euskaltzale, konpositore, idazle eta euskaltzain urgazle izan zen zaldibartarra omentzea da asmoa, azken aldiz duela 50 urte egin zitzaion aitortzaren ondoren. Martxoan zehar, musika, literatura eta euskararen inguruko hitzorduak hartuko ditu herriak.

Ekitaldi sorta erakusketa batekin abiatuko da; izan ere, martxoaren 5etik 15era liburutegi zaharrean Garitaonandiaren ibilbidea jasotzen duten panelak, idatziak eta partiturak egongo dira ikusgai. Literaturak ere bere tokia izango du hurrengo egunean, 8 eta 12 urte bitarteko ume zaldibartarrek parte hartutako ipuin lehiaketaren sari banaketarekin; ekitaldia 18:30eta egingo da ospitale ondoko kaperan eta guztira 38 lan aurkeztu dira lehiaketara. Gainera, martxoaren 7an Euskaltzaindiak jendaurreko batzarra egingo du udaletxean, 12:00etan, non Joseba Sarrionandiak Garitaonandiaz eta Zaldibarko literaturaz jardungo duen.

Amaiera

Omenaldi sorta martxoaren 14an amaituko da, Donostiako Orfeoiak Olazarko frontoian eskainiko duen kontzertuarekin, 19:30etan. Sarrerak otsailaren 23tik martxoaren 6ra egongo dira salgai udal liburutegian, bost euroan. Eneritz Azpitarte alkatearen esanetan, Garitaonandiak “argi izpi zabal bat ekarri zuen dena egiteke zegoen garaian”; Gerediagako Gotzon Gomezek, berriz, azpimarratu du haren ekarpena Euskal Pizkundeko ondarearen parte dela, eta bere oroimenerako prestatu duten ariketak “etorkizunerako pistak ere eman ditzakeela”.

The post Zaldibarrek Bittor Garitaonandia omenduko du haren jaiotzaren 150. urteurrenean first appeared on DOT Durangaldea.

ZALDIBAR | Gaur arratsaldean banatu dira Zaldibarko Jango DOT pintxo lehiaketako bi sariak. Parte hartu duten zazpi tabernetatik, Castet, ‘Bolivar’ pintxoarekin -masailezur hanburgesa guacamole, yuzu eta bakoi marmeladarekin-, edizio honetako irabazle nagusia izan da, bi errekonozimenduak lortuz, epaimahai profesionalarena eta baita herrikoiarena ere.

Eneritz Azpitarte alkateak eman ditu bi sariak. Jango DOTen laugarren edizioak 10.000 pintxo inguru merkaturatzea ahalbidetu du, eta oso balantze positiboa utzi du bertako ostalaritzaren artean.

Aurtengo edizioa “arrakastatsuena” izan dela esan du, eta, beste behin ere, lehiaketa finkatuan izandako giro bikaina nabarmendu du. “Asteburuan jende asko egon da oso giro onean”, gaineratu du.

EPAIMAHAI PROFESIONALA (Ana Beatriz Posse Navas eta Janire Beltrán)

CASTET
KAROBI
EL CALDERO DE PAM

HERRI-EPAIMAHAIA

CASTET (218 boto)
KAROBI (74 boto)
SORGIN (52 boto)

Dolce Gusto kafe-makina baten irabazlea, herri-epaimahaiko Café Baquek emanda, Guillermo Santamaría izan da

Jango DOTeko antolatzaileak hurrengo lehiaketen datak eman aurreratu dituzte:  Abadiño (martxoaren 5etik 8ra) eta Durango (martxoaren 26tik 29ra).

The post Casteten ‘Bolivar’ pintxoa, Jango DOT Zaldibar 2026ko irabazle handia first appeared on DOT Durangaldea.