AMOREBIETA/BERRIZ | Lorentzo Deunaren Jaiak ospatuko dituzte hurrengo egunetan eskualdeko hainbat txokotan. Besteak beste, Zornotzako Berna auzoan eta Berrizen jai-giroa izango da nagusi. Hemen duzue prestatu duten egitaraua:

Montorrako Jaiak

• 13:00 Bolandera jaurtiketa jaiei hasiera emateko

• 13:15 Hirugihar jana

• 14:00 Txapel jaurtiketa txapelketa

• 20:00 Patata tortilla txapelketa. Aurkezpena

• 22:00 Asto-probak. Pisu librean

• 24:00 Erromeria Kittu taldeagaz

• 11:45 Txistulariekaz ermitara igoera

• 12:00 Meza (Misa), ondoren Uxarteko sagardoa

• 13:00 Trikitilariak.

• 13:30 Rana txapelketa lokala

• 18:30 Umeentzako ekintzak

• 20:00 – 22:00 Taloak.

• 22:00 Asto-probak pisu librean, ondoren sari ematea

• 24:00 Erromeria: Joxpa taldeagaz

• 11:45 Txistulariekaz ermitara igoera

• 12:00 Meza auzoko hildakoen alde

• 13:15 Trikitilariak.

• 13:30 Porra txapelketa

• 14:30 Auzo bazkaria

Berrizen

• 19:00 Donien Atxa

• 19:15 Auzoko ume eta nagusientzako jolasak

• 20:00 Afari merienda

• 11:oo Meza. Ondoren dantzariak: Berrizko San Lorentzo dantza taldie

• 12:00 Jarraian herri kirolak: Harria jasotzen: Izei eta Aritz Abendibar. Aizkora: Irati Astondoa. Iparraldeko jokoak: Sara Asenjo eta Jon Lapatzaran. Esatari: Jesús Gisasola

• Amaitzeko Bolo txapelketa

The post Lorentzo Deunaren jaiak domekan hasiko dira Montorran eta Berrizen first appeared on DOT Durangaldea.

BIZKAIA | Espainiako Polizia Nazionalaren Dokumentaziorako Unitate Mugikorra (VIDOC) uztail honetan berriro egon da Durangon. Azken hamabost hilabeteotan 28 aldiz egon da unitate hau Durangoko herrian, eta denbora honetan guztira 779 NAN eta 234 pasaporte izapidetu ditu.

“Ekimenei esker, herritar askok aukera izan dabe agiriok berritzeko etxetik gertu, herritik urten beharrik barik”, nabarmendu dau Carlos García Buendía Gobernuaren Bizkaiko azpidelegatuak. Azpidelegatua Durangon izan da zerbitzuaren jarraipena egiteko, Mireia Elkoroiribe alkateagaz, Jesica Ruiz alkateordeagaz eta Teresa Herráez Euskadiko Polizia Nazionaleko buruagaz batera.

2025eko apirilean Ermuan abiatu zenetik, VIDOC unitateak Bizkaiko 49 udalerri bisitatu ditu jada, dokumentu ofizialak berritzeko aukera hiri handietatik kanpo bizi diren herritarrengana hurbilduz. Laster, lurraldeko beste zazpi herritara ere heltzea aurreikusten da.

Orain arteko balantze orokorrari erreparatuta, Bizkai osoan 4.724 NAN eta 1.571 pasaporte igorri dira unitate mugikor honen bidez; guztira, 6.295 izapide baino gehiago egin dira lurraldean.

Mireia Elkoroiribe Durangoko alkateak erakundeen arteko elkarlana txalotu dau eta zerbitzuaren erabilgarritasuna azpimarratu dau: “Dokumentazio Unitate Mugikorra maiztasunez Durangora etortzeak izapide nagusi bat errazten dau eta turrustan egingo liratekeen joan-etorriak saihesten ditu, batez ere mugitzeko zailtasun gehien dituzten pertsonen kasuan”.

Puntu finkoak

Bidaia-talde mugikorraz gain, zerbitzua osatzeko Dokumentazioa Eguneratzeko Puntuak (PAD) jarri dira martxan Balmasedan, Ermuan eta Durangon bertan. Gainera, Amorebieta-Etxanoko eta Muskizko udalek ere eskatu dabe sistema hau beren herrietan jartzea, tramitazio batzuek ez dezaten eskatuko beste udalerri batzuetara joatea.

The post Polizia Nazionalaren unitate mugikorrak 6.295 agiri kudeatu ditu Bizkaiko herrietan first appeared on DOT Durangaldea.

AMOREBIETA-ETXANO | 2026ko Karmengo jaiak amaituta, Amorebieta-Etxanoko Udalak herritarren esperientzia, balorazioak eta iritziak ezagutu nahi ditu. Horretarako, online inkesta bat jarri du martxan jaietan parte hartu duten pertsonek gustukoen izan dituzten ekitaldiak, hobetu beharreko alderdiak eta etorkizuneko edizioetarako proposamenak parteka ditzaten.

Galdetegiaren bidez, jai-egitarauko hainbat ekimen puntuatzeko aukera dago, hala nola kontzertuak, antzerki-emanaldiak, txupinazoa, marmitako lehiaketa ezaguna, danborradak edota su artifizialak.

Jaietako egitaramaz gain, inkestak bide emango du egindako prebentzio eta antolaketa lanak baloratzeko. Besteak beste, herritarrek beren iritzia eman ahal izango dute komun publikoen egoeraz, garbiketaz, Puntu Moreaz, irisgarritasun-neurriez edota marmitako egunean egindako mahai-banaketaz.

Era berean, galdetegiak atal berezi bat du jaien balorazio orokorra egiteko eta 2027ko edizioari begira iradokizunak zein hobekuntza-proposamenak helarazteko.

Parte-hartzea erabat anonimoa da, eta galdetegia euskaraz zein gaztelaniaz bete daiteke Udalak horretarako gaitutako online estekaren bidez. Jasotako ekarpen guztiak datozen urteetako programazioa, zerbitzuak eta antolaketa orokorra hobetzeko erabiliko dira.

The post Zornotzak online inkesta bat abiarazi du Karmengo jaien inguruko herritarren iritzia jasotzeko first appeared on DOT Durangaldea.

DURANGO | Udalak jakinarazi du ekainaren 1etik langile faltagatik aldi baterako itxita dagoen Durangoko Gizarte Segurantzaren bulegoa urriaren 1ean berriz irekitzea aurreikusten dela.

Espainiako Gobernuaren ordezkariordeak Udalari azaldu dionez, egoera behin-behinekoa izan da, hainbat bajaren ondorioz 12 langileko plantillatik pertsona bakarra zegoelako lanean. Udal Gobernutik jarraipen zuzena egiten ari dira zerbitzua behar bezalako langile kopuruarekin berreskuratzeko.

The post Durangoko Gizarte Segurantzaren bulegoa urriaren 1ean irekiko da berriro first appeared on DOT Durangaldea.

AMOREBIETA-ETXANO | Ostegun honetan, uztailak 23, Sociedad Deportiva Amorebietako lehen taldeak hezur eta haragizko hasiera eman dio aurredenboraldiari Urritxen. Jon Castrillo entrenatzaile berriaren aginduetara, urdinek lehen lan saioa osatu dute Bigarren Federazioan jarraian egingo duten bigarren urterako sasoian jartzeko helburuarekin.

Lehen lan egun honetan 23 futbolariko taldea bildu da, jarraitutasuna, harrobiaren bultzada eta fitxaketa berrien arteko uztartzea ardatz hartuta.

Iazko sasoitik hamar jokalarik jarraitzen dute: Jon Altamira eta Xabier Murgoitio atezainek; Aitor Intxausti, Asier Hernáiz eta Javier Entrecanales atzelariek; Iker Rekagorri, Peru Candaudap, Jon Goienetxe eta Jon Azkuna erdilariek; eta Ion Etxaniz aurrelariak.

Horiei harrobitik igotako hiru jokalari gazte batu zaizkie: Txaber Ajuriagoikoa erdilaria eta Unax Benito eta Unai Bikandi aurrelariak. Gainera, Aritz Petralanda atezainak eta Iñigo Beaskoetxea atzelariak, azken denboraldian SDAko Gazteen A taldean aritutakoak, lehen taldearekin egingo dute aurredenboraldia.

Fitxaketen atalean, kirol zuzendaritzak zortzi jokalari berri lotu ditu:

• Atzelariak: Iker Torre (CD Laredo), Ekain Díaz de Alda (Real Racing Club) eta Ekaitz Presa (SD Leioa).

• Erdilariak: Gorka Agirre (SD Gernika), Eder Agirregomezkorta (SD Leioa), Xalbat Larralde (Real Sociedad) eta Ignacio Angulo (SD Indautxu).

• Aurrelaria: Ibai Cabo (Real Sociedad).

Castrillorekin batera, honako hauek osatuko dute lan-talde teknikoa: Kike Gutiérrez (bigarren entrenatzailea), Markel Cascón (preparatzaile fisikoa), Pablo Azkarate (atezainen entrenatzailea) eta Sergio Del Olmo (fisioterapeuta).

Talde zornotzarra Bigarren Federazioko 1. Taldean lehiatuko da denboraldi honetan, euskal, kantabriar, asturiar eta galiziar taldeen aurka. Azken orduko berrikuntza gisa, Atlético Astorga ere multzo honetan egongo da (hasiera batean beste batean zegoen arren), CD Arenteirok arrazoi ekonomikoengatik utzitako lanpostua betetzeko.

Ligako lehia irailaren 5eko eta 6ko asteburuan hasiko da, eta SDAk Arosa SC hartuko du Urritxen lehen jardunaldian.

Iraila iritsi bitartean, zornotzarrek prestakuntzako zortzi partida jokatuko dituzte:

• Abuztuak 4: Arenas Club (Urritxen)

• Abuztuak 8: Bilbao Athletic (Urritxen)

• Abuztuak 12: SD Eibar B (Urritxen)

• Abuztuak 15: Cultural de Durango (Tabiran)

• Abuztuak 19: Sodupe UC (Hurtado de Saratxon)

• Abuztuak 22: Deportivo Alavés B (Olaranben)

• Abuztuak 26: SD Gernika (Urbietan)

• Abuztuak 29: Aurrera de Vitoria (Olaranben)

The post SD Amorebietak abiatu du denboraldia: Jon Castrilloren aroa hasi da Urritxen first appeared on DOT Durangaldea.

DURANGO | L’Atelier dantza eskolak amaiera ahaztezina eman dio denboraldiari. Durangoko taldeak antzezpen bikaina osatu du nazioarteko zirkuituan ospe eta exigentzia handiena duen Global Dance Open txapelketan. Lehiaketa joan den astean ospatu zen Donostiako Kursaal auditorioan eta Victoria Eugenia antzokian.

Guztira Durangoko 47 dantzari bertaratu ziren Gipuzkoako hiriburura, eta balantze historiko batekin itzuli dira etxera: zilarrezko bi domina eta euren kategoria bakoitzeko zortzi koreografia onenen artean kokatutako ia proposamen guztiak.

Arrakastarik handiena MisStars taldearen eskutik iritsi zen, zilarrezko domina eskuratu baitzuen Mini Classical Large Ensemble kategorian. Bestalde, Junek eta Aitorrek osatutako bikoteak eskolaren bigarren azpTxapelketa lortu zuen Intermediate Classical Duet mailan bigarren postu distiratsua sinatuz.

Sari hauek L’Atelierreko irakasle taldearen hilabeteetako lanaren emaitza dira: dantza klasikoko proposamenak Oiane Azconizagak zuzendu ditu, Anne Etxebarria irakasle laguntzaile duela, eta Leire Cotoré izan da dantza garaikide eta lirikoko pieza guztien arduraduna. L’Atelierreko zuzendaritzatik azaldi dute “Oso harro itzuli gara etxera. Munduko eskola onenen aurka lehiatu gara eta gure dantzariak maila berean egon direla egiaztatzea oso pozgarria da. Dominez haratago, guztien hazkunde artistiko eta pertsonalarekin gelditzen gara, urte osoan egindako lanaren saria izan baita”.

Emaitzak

• MisStars – Mini Classical Large Ensemble (Zilarrezko domina)

• June eta Aitor – Intermediate Classical Duet (Zilarrezko domina)

• 5. postua: Starlights (Intermediate Classical Large Ensemble)

• 5. postua: BabyStars (Teen Large Ensemble)

• 6. postua: Intza Cano (Junior Classical Solo)

• 7. postua: Boomlight (Intermediate Lyrical Large Ensemble)

• 7. postua: Intza Cano (Junior Lyrical Solo)

• 8. postua: Nora Bilbao (Mini Classical Solo)

• 8. postua: Minishock (Teen Large Ensemble)

• 9. postua: Nora Garate (Mini Classical Solo)

• 9. postua: Aitor Hernández (Intermediate Lyrical Solo)

• 11. postua: Amaia Santamaría (Intermediate Lyrical Solo)

Orain arte lehiatu diren exigentzia handieneko txapelketan parte hartze historiko honekin, L’Atelierrek Durangotik goi mailako heziketaren alde egindako apustua sendotu du, tokiko talentua nazioarteko dantza agertoki nagusietara eramanez.

The post L’Atelierrek Munduko Global Dance Open txapelketan zilarrezko bi domina lortu ditu first appeared on DOT Durangaldea.

Durangoko armarrian eta herriak urarekin duen loturan oinarrituta, obra TADUko aparkalekuaren eta trenbide zaharraren ibilbide berriaren ondoan kokatuko da

The post Durangoren ikur berria bihurtu nahi duen Victor Arrizabalagaren eskultura first appeared on DOT Durangaldea.

ELORRIO.— Elorrioko EAJ-PNVk begi onez ikusi du gaur arratsaldeko osoko bilkuran Elorrioko Udalak eta Eusko Jaurlaritzak onartu duten lankidetza-hitzarmena. Akordio honi esker, Goietako lursailak, Aldapebeitia jauregia eta Aldapebeitia Txikia eranskina Eusko Jaurlaritzako Etxebizitza Sailaren esku geratuko dira, udalerrian babes ofizialeko alokairuzko etxebizitzak sustatzeko helburuarekin.

Guztira, babes ofizialeko alokairuzko 54 etxebizitza eraikiko dira: 43 Goietan egingo dira, eta gainerako 11ak Aldapebeitia jauregia eta eranskina zaharberrituz lortuko dira. Proiektu honek, etxebizitza beharrari erantzuteaz gain, herriko ondare historiko hori berreskuratu eta herritarren erabilerara bideratuko du.

Alderdi jeltzaleak adierazi du berri “pozgarria” dela Elorriorentzat eta eskualde osoarentzat, etxebizitza lortzeko zailtasun handienak dituzten pertsonei alternatibak eskainiko dizkiolako. Halere, neurria beharrezkoa izan arren, “ez dela nahikoa” ohartarazi dute.

EAJ-PNVk osoko bilkurako eztabaidan azaldu duenez, alokairu babestuko proiektu honek ez dio bere kabuz erantzungo herriko gazte eta familia askoren errealitateari. Azaldu dutenez, herritar askok ez dituzte babes ofizialeko etxebizitza bat lortzeko baldintza ekonomikoak betetzen (altuegiak direlako), baina era berean ezin dute merkatu libreko etxe bat erosi edo alokatu, herrian dagoen eskaintza falta erabatekoagatik. Egoera horrek gazte asko herritik kanpo bizitzera behartzen dituela salatu dute, eta tokiko higiezinen agentziek arazo honetaz urteak daramatzatela ohartarazten gaineratu dute “Alokairuko etxebizitza babestua beharrezkoa da eta urrats garrantzitsua da, baina ez du bere kabuz konpontzen Elorrion etxebizitza lortzeko dagoen arazoa”.

Hori dela eta, EH Bilduren udal gobernuari etxebizitza eskaintza berria sortzea lehentasuntzat hartzeko eta sustapen libreak bideratzeko baldintzak errazteko eskatu diote.

HAPOren atzerapena

Bestalde, jeltzaleek kezka handia agertu dute Elorrioko Hiri Antolamenduko Plan Orokorraren (HAPO) aurrerapena prestatzeko prozesuak dakarren atzerapenagatik. Plan hori funtsezko tresna da herriaren hazkundea antolatzeko eta etxebizitza berriak sustatu ahal izateko.

Gogorarazi dutenez, udal gobernuak iazko irailerako iragarri zuen planaren aurrerapena, baina urtebete geroago oposizioko taldeek ez dute inolako informaziorik jaso. EAJ-PNVren ustez, honek gobernu taldeak azken hamarkadan etxebizitza politikan izan duen “ekimen eta plangintza falta” islatzen du. “54 babes ofizialeko etxebizitzak berri onak dira eta gure babes osoa dute, baina orain gobernu taldeari dagokio bere lana egitea. Gazteek eta familiek beren bizi-proiektua hemen garatu dezaten, etxebizitza aukera berriak bultzatu, planifikatu eta erraztuko dituen Udala behar dugu”, biribildu dute.

The post Elorrioko EAJk babestu egin du alokairuko 54 VPO eraikitzea, baina “ez dira nahikoak” first appeared on DOT Durangaldea.

DURANGO. – Musika Bulego elkarteak Musik(H)abian aurkezten du, musika-sektorearekin lotutako proiektuak bultzatzeko ekintzailetza programa berria. Ekimena Euskal Herriko musika-ekosistema indartzeko helburuarekin sortu da, ekintzaileei haien ideiak proiektu sendo, bideragarri eta iraunkor bihurtzeko beharrezko tresnak, ezagutzak eta laguntza eskainiz.

Programa beren jarduera artistikoari lotutako proiektu bat profesionalki egituratu nahi duten musikariei, nahiz musikaren industriarekin lotutako enpresa-ekimenak garatzen ari diren ekintzaileei zuzenduta dago.

Metodologia praktiko, presentzial eta parte-hartzaile baten bidez, hautatutako pertsonek hamar astez sektoreko profesional erreferenteekin batera lan egingo dute beren proiektuen garapen integralean. Programak hainbat arlo jorratuko ditu: negozio-ereduaren diseinua, produktu eta zerbitzuen garapena, marketina eta komunikazioa, finantzaketa, alderdi legalak eta jabetza intelektuala, monetizazioa eta nazioartekotzea, besteak beste.

Formakuntza urriaren 14tik abenduaren 16ra garatuko da, 40 orduko talde-formakuntzak eta 25 orduko banakako mentoring saioak uztartuz. Gainera, hautatutako proiektu bakoitzak 1.500 euroko laguntza ekonomikoa jasoko du, programan parte-hartzea errazteko eta garapenarekin lotutako gastuei aurre egiteko. Prozesuaren amaieran, parte-hartzaileek beren proiektuak aurkeztuko dituzte Must +PRO, Euskal Herriko musikaren sektoreko topaketa profesionaleko, pitching saioetan.

Lau proiektuk parte hartuko dute lehen edizio honetan. Horietako hiru Euskal Herriko edozein lurraldetan bizi diren eta musika-arloarekin lotutako ideia edo proiektua duten adinez nagusiak diren pertsonei zuzendutako deialdi ireki baten bidez hautatuko dira. Laugarren proiektua Durangoko Udalak tokiko ekimenetarako bultzatutako deialdi espezifiko baten bidez aukeratuko da.

Interesdunek beren hautagaitza aurkeztu ahal izango dute irailaren 16ra. Durangoko Udalak datozen asteetan kaleratuko du bere deialdia. Hautaketa-prozesuaren emaitza urriaren lehen astean jakinaraziko da, eta programa urriaren 14an hasiko da.

Mireia Elkoroiribe Durangoko alkateak azpimarratu duenez, “Musik (H) abian-ek ezin hobeto irudikatzen du Durango Musika Aterpearekin bultzatu nahi dugun filosofia. Ez gara ari eraikin bat berritzeaz bakarrik, Plateruena, baizik eta Durango euskal sorkuntza, musika eta kulturarako erreferentziazko ekosistema bihurtuko duen udalerri proiektu bat eraikitzeaz. Talenturako aukerak sortu nahi ditugu, sortzaileei lagundu eta musika dinamizazio kultural, sozial eta ekonomikorako motor bihurtu urte osoan”.

Halaber, Elkoroiribek azpimarratu duenez, “Musika Bulegoarekiko lankidetza adibide bat da, sektoreko eragileen eskutik lan eginez, Euskal Herri osoari zein tokiko talentuari mesede egingo dieten ekimenak bultzatzeko. Durango Musika Aterpea bokazio ireki, kolaboratibo eta ibilbide luzearekin jaio da, eta Musik (H) abian bezalako programak bide horren lehen urratsa dira”.

Musik(H)abian Musika Bulegoak antolatutako ekimena da, Durangoko Udalaren babes nagusiarekin, Eusko Jaurlaritzaren babesarekin eta Agustinak Zentroaren lankidetzarekin.

The post Musika Bulegoak Musik(H)abian programa martxan jarri du Durangon first appeared on DOT Durangaldea.