AMOREBIETA-ETXANO | Datorren apirilaren 26an, igandea, 10:00etatik 14:30era bitartean, Boroak III. Ganadu eta Artisau Azoka hartuko du. Adin guztietarako egitaraua prestatu da, eta bertan ganadu eta nekazal postuen erakusketak, produktu dastaketak eta herri-kirol erakustaldiak izango dira protagonista.

Goizeko 10:00etan emango zaio hasiera azokari, ganadu eta nekazal postuen erakusketarekin. Goiz osoan zehar trikitilariek girotuko dute Boroa, eta Eusko Label produktuen dastaketak ere eskainiko dira.

Egitarauko une nagusietako bat 12:00etan izango da, Mikel Etxebarriak eskainiko duen ardi-mozketa erakustaldiarekin. Ondoren, 13:00etan, herri kirolen txanda helduko da: harri-jasotzaile lanetan Jon Gisasola eta Haritz eta Izei Abendibar arituko dira, eta aizkoran Irati Astondoa izango da protagonista.

Azokak tradizioa, lehen sektorea eta tokiko produktuak uztartuko ditu, giro herrikoian, zornotzar zein bisitarien gozamenerako.

Trafiko neurriak

Azoka dela eta, trafiko-neurri bereziak ezarriko dira Boroa inguruan. 10:00etatik 14:30era, Boroara sartzeko errepidea noranzko bakarrekoa izango da, eta irteera Urgoiti auzotik egin beharko da. Garaitondotik, ordea, sarrera eta irteera bi noranzkoetan mantenduko dira.

Era berean, seinaleak eta konoak jarriko dira baserrietarako sarbideetan, baimendu gabeko lekuetan aparkatzea saihesteko. Gogorarazten da Urgoiti eta Marabi auzoetara sarrera bizilagunentzat soilik izango dela.

Neurri hauekin, Amorebieta-Etxanoko Udalak azokara bertaratzen direnen segurtasuna eta ekitaldiaren garapen egokia bermatu nahi ditu. Egunean zehar, trafiko-langileen eta Udaltzaingoaren jarraibideei kasu egitea gomendatzen da.

The post Boroako III. Ganadu eta Artisau Azoka igande honetan ospatuko da first appeared on DOT Durangaldea.

AMOREBIETA-ETXANO | Ostegun honetan, Liburuaren Nazioarteko Egunaren harira, Leiduzu lehiaketaren sari-banaketa ospatu da, euskarazko irakurketa eta literatura sustatzeko helburuarekin antolatutako ekimena. Udaleko Euskara Zerbitzuak herriko ikastetxeentzako antolatutako lehiaketako sariak banatu dira, eta 50 ikaslek parte hartu dute. Lanak euskarazko liburuen inguruko iruzkinak edo literatur-lanak izan dira, eta epaimahaiak lanen egokitasuna, zuzentasuna eta originaltasuna baloratu ditu.

Parte hartzaileek hainbat aukera izan dituzte euren sormena adierazteko: euskaraz irakurritako liburu bati buruzko 3 minutuko audio edo bideo iruzkinak, idatzizko iruzkinak edo antzezpen iruzkinak, bertso edo poesia iruzkinak…

Lehiaketa hiru kategoriatan antolatu da: LH 5-6, DBH 1-2, eta DBH 3-4, baina, tamalez, azken kategoriako lanik ez da aurkeztu. Epaimahaiak saridunak aukeratzerako orduan, testuaren edo bideoaren egokitasuna eta zuzentasuna izan ditu irizpide nagusiak. Hala ere, lanen originaltasunari ere garrantzia berezia eman zaio, eta kategoria bakoitzean bi sari banatu dira, irizpide horiek guztiz kontuan hartuta.

Honako hauek izan dira saridunak: 

LH 5-6koen kategorian, Ane Mentxaka Aspiazu, Karmelitak ikastetxeko ikaslea, izan da irabazlea Bahiketa Jolas Parkean liburuaren bideo iruzkinagatik. Bere iruzkin argia, zuzena eta kamera aurrean erakutsitako jarrera nabarmendu du epaimahaiak. Kategoria honetan, Eder Trabudua Gutiérrez izan da txapeldunorde, Nur eta Afrikako Bidaia liburuaren bideo iruzkinarekin. Bestalde, Paule Furundarena Martínez-ek sari berezia jaso du, bideo originalena egin duelako Bukatu Dira Aitzakiak liburuari buruz.

DBH 1-2koen kategorian, Sare Muniozguren, Andramari ikastolako ikaslea, izan da irabazlea Ezekiel liburuaren bertso iruzkinagatik. Epaimahaiak bere lana nabarmendu du, irakurritako liburuaren protagonista deskribatzea eta gertaeren nondik norakoak azaltzeko modu eder eta egokiagatik. Bigarren saria Libe Zarazua-ri eman zaio, Andramari ikastolakoa, Onin eta Afrikarako Bidaia liburuaren idatzizko iruzkinagatik.

Saridunek Elkar liburu dendetan erosteko 150 euroko bonuak eskuratu dituzte, eta sariak irakurketa eta literatura sustatzeko aintzatespen eta motibazio gisa banatu dira. Gaurko ekitaldia herriko gazteen sormena eta euskararen erabilera sustatzeko ekintza garrantzitsua izan da.

Liburu banaketa liburutegian

Liburutegian, hainbat liburu banatu zaizkie hurbildu direnei, bai gaztelaniaz eta baita euskaraz ere. Gaztelaniaz, latinoamerikar literaturaren omenez, Gabriel García Márquezen “Cien años de soledad” liburua eman da, eta euskaraz, euskal literaturako izen handi bati aitortza egin nahi zaio, Bernardo Atxagari, “Sara izeneko gizona” liburua banatuz. Baina haur eta gazteek ere opari berezia izango dute. 12-18 urte bitartekoek, Mangako komiki bat euskaraz izango dute opari irakurketari heltzeko. 6-12 urte bitartekoek, “Zipotz” komikia, eta 0-6 urte bitartekoek, Miren Agur Meabe euskal idazlearen “Katta” bildumako ipuina. Liburu eta komiki hauek istorioen txokoetan ere izango dira eskuragarri, liburuak partekatzeko herrian zehar dauden armairu horietan, hain zuzen.

The post ‘Leiduzu’ lehiaketaren sari banaketa ospatu da Zornotzan first appeared on DOT Durangaldea.

DURANGO | Datorren igandean, apirilak 26, Durango Kantari ekimenaren saio berri bat ospatuko da Durangon. Herri-kantugintza eta herritarren parte-hartze aktiboa sustatzea helburu duen egitasmo honek giro jai-zalea ekarriko du berriro herriari. Hitzordua 12:30ean izango da, Merkatu Plazan, eta oraingoan Eingo taldeak gidatuko du saioa.

Udalak herritar guztiak animatu nahi ditu taldean abestera eta une kolektibo honetaz gozatzera. Parte-hartzea errazteko, Durango Kantariko kantutegia eskuragarri dago udaleko webgunean (www.durango.eus), edota ekitaldiko karteletan agertzen den QR kodearen bidez deskargatu daiteke.

The post Durango Kantari igandean itzuliko da Merkatu Plazara Eingo taldearekin first appeared on DOT Durangaldea.

DURANGO | Dendak Bai merkatari elkarteak hautaketa prozesu bat ireki du Durangon eta Iurretan bizikletaz banaketak egingo dituen pertsona bat kontratatzeko. Banaketaz gain, elkartearen eguneroko zeregin txikietan laguntza ematea ere izango da langilearen lana. Erakundeak profil dinamikoa, harremanetarako gaitasuna duena eta tokiko merkataritzarekin konpromisoa duena bilatzen du.

Azaldu dutenez, hautagaia pertsona arduratsua eta antolatua izatea, jarrera hurbila izatea eta euskaraz jakitea baloratuko da. Gidabaimena izatea ere kontuan hartuko da, nahiz eta ez den ezinbesteko baldintza.

Lanpostuak kontratu mugagabea eskaintzen du lanaldi partzialean. Ordutegia astelehenetik ostiralera izango da, goizez eta bi arratsaldez; horrela, lana beste ardura batzuekin uztartzeko aukera emango du. Elkarteak azpimarratu duenez, lan “dinamikoa, aktiboa eta tokiko merkataritzarekin zuzeneko harremanean” egongo dena da, hori baita haien jardueraren zutabeetako bat.

Interesa duten pertsonek info@dendakbai.eus helbidera bidali dezakete curriculuma, mezuaren gaian “CV Reparto” adieraziz.

The post Dendak Bai elkarteak banatzailea behar du Durango eta Iurretarako first appeared on DOT Durangaldea.

AMOREBIETA-ETXANO | Herriak berriro ere albiste bikaina jaso du nazioarteko kirol arlotik. Andoni Ibarra Muñoz gazteak, Irrisbizi Bilbao klubeko patinatzaileak, brontzezko domina eskuratu du Buenos Airesen jokatutako patinaje artistikoko Munduko Kopan, lehiaketa ikusgarri batean.

Andoni 7 urterekin hasi zen patinaje artistikoan, eta ordutik etengabeko garapena izan du. Dagoeneko 6 aldiz Euskadiko txapelduna izan da, eta nazioartean ere emaitza aipagarriak pilatzen ari da: 2024an brontzea Europako Kopan (Zürichen), 2025ean 6. postua Munduko Kopan (Trieten) eta urte berean urrea Europako Kopan (Matosinhosen).

Gaur egun, Espainiako Federazioan bi urtez federatuta darama, eta maila gorenean lehiatzen ari da.

Itzulera ikusgarria

Testuinguru horretan, Andonik beste pauso handi bat eman du 2026an Buenos Airesen jokatutako Munduko Kopan, non brontzezko domina eskuratu duen lehiaketa ikusgarri batean, Irune Monje entrenatzailearen eta Ander Magariño koreografo eta entrenatzailearen gidaritzapean, baita BRANKAko Gorka prestatzaile fisikoaren laguntzarekin ere.

Txapelketa bi zatitan banatzen da: disko laburra eta disko luzea. Lehenengoan patinatzaile guztiek parte hartzen dute, baina puntuazio onenak lortzen dituztenek bakarrik egiten dute disko luzea. Bi saioen baturak erabakitzen du azken sailkapena. Hasiera ez zen erraza izan zornotzarrarentzat. Disko laburrean akats ugari egin zituen, pistako presio handiaren ondorioz, eta 7. postuan kokatu zen, hirugarren sailkatuarengandik 11 puntura.

Hala ere, amore eman gabe, disko luzean egindako lan bikainari esker alde hori guztia berreskuratzea lortu zuen. Azkenean, hirugarren postuan amaitu zuen, itzulera ikusgarria eginez.

Gainera, une bereziki tentsuak bizi izan zituen: aurkariek disko luzea egiten zuten bitartean, Andoni lehen postuan mantentzen zen une batez, hasierako puntuazio baxua izan arren.

Emaitza honek are balio handiagoa du patinaje artistikoa kirolik zorrotzenetako bat dela kontuan hartuta. Zehaztasun tekniko handia eskatzen du, eta entrenamendu ordu asko behar dira, bai patinean, bai prestakuntza fisikoan, malgutasunean eta alderdi psikologikoan.

Ahalegin handia familiaren babesean

Azkenik, azpimarratzekoa da maila honetako lorpenak ez direla soilik kirol arloko ahaleginaren ondorio. Izan ere, lehiaketetan parte hartzeak dakarren kostu ekonomikoa familiak bere gain hartzen du osorik, lortutako emaitzak bikainak izan arren.

Andoniren azken lorpenak argi uzten du lana, konpromisoa eta determinazioa uztartzen direnean helburu handiak lortzea posible dela. Zornotzarrak etorkizun oparoa du aurretik, eta dagoeneko nazioarteko patinajean bere tokia sendotzen ari da.

Zorionak, Andoni! Egindako lanak eta erakutsitako ausardiak merezitako saria izan dute, eta zornotzarrak nazioartean beste pauso sendo bat eman du.

The post Andoni Ibarra zornotzarrak brontzezko domina lortu du Argentinan first appeared on DOT Durangaldea.

AMOREBIETA-ETXANO | Amorebieta-Etxanok Amoreszena jaialdiaren lehen edizioa aurkeztu du gaur goizean. Familiei zuzendutako antzerki jaialdi hau maiatzaren 22tik 24ra ospatuko da, adin guztietarako prestaturiko egitarauarekin. Udalak bultzatutako ekimena familia bidezko kultur aisialdia sustatzeko eta antzerkia sormenerako zein balioak transmititzeko tresna gisa erabiltzeko jaio da.

Egitaraua ostiralean, hilak 22, hasiko da Markeliñeren “Andante” eta Hortzmugaren “Alonso, el mensajero de los mandatos imposibles” lanekin. Jardunaldia amaitzeko, gazteentzako antzerki proposamen bat izango da Zornotza Aretoan. Larunbatean izango da jarduera gehien, herriko hainbat gunetan banatuta: “Titeretú” antzerki interaktiboa Zelaieta parkean, “Errotik” ipuin musikalak, “La Petit Caravane” ikuskizun ibiltaria eta “Babes” antzezlana Zubiaurren. Eguna borobiltzeko, Zirkozaurreren “Kalejira” eta “¡Soy una bomba!” lana ikusi ahal izango dira Andra Mari plazan.

Amaiera

Igandean emango zaio amaiera jaialdiari familia osoarentzako saio berriekin; besteak beste, Engruna Teatreren “Univers” (Zornotza Aretoan) eta Zirkun Zirkoren “Loratzen” zirku ikuskizuna plazan. Egitaraua osatzeko, Anita Maravillas taldeak “Procesos y recorrido” hitzaldia eskainiko du Zelaietako auditorioan.

Aurkezpenean, Ainhoa Salterain alkateak eta Koldo Bilbao Kirol zinegotziak azpimarratu dute “lehen aldiz ospatuko den jaialdi honek garrantzi berezia” duela herriarentzat. Ildo horretan, gaineratu dute “antzerkiak eta kulturak balio hezitzaileak” transmititzen dituztela eta ekimen hau “sormenaren eta dinamizazio kulturalaren aldeko apustu garbia” dela.

The post Amoreszena jaialdiak antzerkiz beteko du Zornotza maiatzean first appeared on DOT Durangaldea.

DURANGO | Durangoko Udalak, Durango Kirolak Erakunde Autonomoaren bitartez, lizitazio prozesua ireki du Tabirako udako igerilekuetako taberna-kafetegia ustiatzeko. 2026ko udako denboraldirako deialdia da, instalazioetako erabiltzaileei zerbitzu egokia bermatzeko asmoz.

Kontratuaren xedea udal taberna-kafetegia kudeatzea eta ustiatzea da. Horrek jendearen arreta, garbiketako lanak, mantentze-lanak eta espazioaren funtzionamendu egokia bermatzea dakar. Zerbitzua igerilekuen irekiera aldian eskainiko da: 2026ko ekainaren 11tik irailaren 13ra arte, biak barne, eta instalazioen ordutegi berberan.

Arlo ekonomikoari dagokionez, gutxieneko kanona 250 eurokoa da hilean (BEZ kanpo). Lizitatzaileek kopuru hori hobetu dezakete euren eskaintzetan. Kontratuak urtebeteko iraupena izango du, baina 2027ko eta 2028ko udako denboraldietarako luzatzeko aukera egongo da. Gainera, esleipendunak 1.500 euroko behin betiko bermea jarri beharko du.

Baldintzak eta eskakizunak

Lizitazioan parte hartzeko, gaitasun ekonomikoa egiaztatu beharko da (gutxienez 75.000 euroko erantzukizun zibileko aseguru baten bidez) eta baita gaitasun teknikoa ere (elikagaien higienean eta manipulazioan prestakuntza izatea). Esleipena egiteko garaian, hainbat irizpide hartuko dira kontuan: proposatutako kanonaren hobekuntza, antzeko zerbitzuetan izandako esperientzia, ostalaritza arloko prestakuntza, euskararen ezagutza eta emakumeen enpleguaren sustapena.

Taberna-kafetegiak egunero egon beharko du zabalik udako denboraldian, arreta jarraitua bermatuz eta indarrean dagoen araudia betez.

Interesa duten pertsona edo enpresek maiatzaren 5eko 15:00ak arte dute parte-hartzeko eskaera aurkezteko. Eskaerak Euskadiko Kontratazio Publikoaren Plataformaren bidez (https://www.contratacion.euskadi.eus) egin behar dira; bertan dago ikusgai lizitazioaren informazio xehe guztia.

The post Durangok lizitaziora atera du Tabirako igerilekuetako kafetegi zerbitzua first appeared on DOT Durangaldea.

IURRETA | Gaursako Rentacar saileko mobilizazioek, joan den martxoaren 27an hasitakoek, aurrera darraite. Astelehen honetan enpresaren eta langileen artean egindako bilera, berriz ere, akordiorik gabe itxi da. Hiru aste baino gehiagoko grebaren ostean, gatazkak bere horretan jarraitzen du: zuzendaritzak hobekuntza ekonomikoak aztertzeari uko egiten diola azaldu dute.

Sindikatuen iturriek adierazi dutenez, proposamen “minimalista, zentzuzkoa eta egokitua” aurkeztu dute mahai gainean. Proposamen horren helburua saileko baldintza ekonomikoak eta lan-baldintzak eguneratzea da, horietako asko urteetan berrikusi gabe baitaude. Langileen esanetan, oinarrizko doikuntzak dira, Gaursa bezalako enpresa batek bere gain hartu ditzakeenak, batez ere taldeko beste arlo batzuetan soldata-berrikuspenak aplikatu direla kontuan hartuta.

Ekintza berriak

Enpresak, ordea, bere jarrerari eutsi dio eta eduki ekonomikoa negoziatzeari uko egin dio. Bere planteamendua antolaketa-gaietara mugatu du, baina langileentzat hori ez da nahikoa gatazka amaitzeko. “Baldintza ekonomikoei buruzko benetako negoziaziorik gabe, ezin da gatazka itxi”, adierazi dute.

Rentacar saileko langileek salatu dute historikoki baztertuta geratu direla soldata kontuetan, eta eskatzen duten eguneratzeak lan-baldintzak duintzea besterik ez duela bilatzen.

Aste honetako bileran aurrerapausorik eman ez denez, mobilizazioek aurrera jarraituko dute. Langileek greba mantentzen dute eta ez dute baztertzen ekintza berriak abiatzea, enpresak negoziazio ekonomikorako bidea irekitzen ez badu.

The post Gaursa Mobilityko langileek grebarekin jarraituko dute first appeared on DOT Durangaldea.

SASKIBALOIA | Gizonezkoen Nazional 1eko Tabirako Baquek aise irabazi zion Getxori (54-90) eta aurrerapausoa eman du titulua lortzeko. 19 garaipen eta 5 porrotekin, bi partidako aldea ateratzen dio (txapelketa amaitzeko bi jardunaldi falta dira) bere hurrengo jarraitzaileari, San Prudentzio, ligako bigarrenari eta hurrengo aurkariari igande honetan, 18:00etan, Landako kiroldegian. Garaipen batek ligako txapeldun bihurtuko luke Tabirako. Talde durangarrak gogor irabazi zuen partida. Lehen laurdena irabazten hasi ondoren (16-19), bigarren partzialean aldeak areagotu egin ziren eta atsedenaldira 26-41 iritsi ziren. Aldageletatik igaro ondoren, taldea 48-73ra arte urrundu zen eta partida erabakita utzi zuen. Azken laurdenean, aldeak areagotu egin ziren azken +36 horretaraino.

Mikel Amesti (21 puntu eta 3 errebote), Xabier Arroitajauregui eta Aitor Calle (10 puntu) eta Paul Magunazelaia (9 puntu).

The post Gizonezkoen Tabirako taldearen garaipena first appeared on DOT Durangaldea.