AMOREBIETA-ETXANO | Karmen 2.0 proiektuak aurrera jarraitzen du, eta datorren asteartean, urriaren 13an, Karmen kaleko 11. eta 17. zenbakien arteko tartea berrurbanizatzeko lanak hasiko dira. Espaloiak zabaltzea, berdegune gehiago sortzea, oinezkoen mugikortasuna lehenestea eta ibilgailuen trafikoa murriztea dira jarduketa berri honen ardatz nagusiak. Helburua hiri-ingurunea hobetzen jarraitzea eta zornotzarren bizi-kalitatea handitzea da.

Berrurbanizazio honek Karmen 2.0 proiektuari jarraipena emango dio, Amorebieta-Etxanoko erdigunea irisgarriagoa, jasangarriagoa eta herritarren ongizatera bideratuagoa izango den espazio bihurtzeko. Urbanizazio-proiektu hau udal gobernuaren legegintzaldi honetako apustu nagusietako bat da, eta herriko ardatz nagusietako bat den Karmen kalea berreskuratzea eta modernizatzea du helburu. Horretarako, oinezkoen mugikortasuna, jasangarritasuna eta herritarren bizi-kalitatea lehenesten dituen diseinua izango du oinarri.

Jarduketa Karmen kaleko beste tarte batean egingo da, 11. eta 17. zenbakien artean, hau da, Konbenio kaleko bidegurutzetik Larrabide kaleko bidegurutzera bitartean. Lan horiei esker, hiri-ingurunea hobetzen jarraituko da, irisgarritasuna eta jasangarritasuna sustatuz eta oinezkoen mugikortasunari lehentasuna emanez. Proiektuaren handitze honek 750.000 euroko aurrekontu zenbatetsia du, eta lanak gauzatzeko epea sei hilabete ingurukoa izango da.

Xehetasunak

Asteartean hasiko diren lanen bidez, espaloiak zabalduko dira, oinezkoentzat espazio gehiago sortzeko eta joan-etorriak erosoagoak eta seguruagoak izan daitezen. Horrez gain, inguruan landaredia gehituko da, zuhaitzak eta zuhaixkak landatuz. Horrela, herriko berdeguneak handituko dira, airearen kalitatea hobetzen lagunduko da eta hilabete beroenetan itzalgune gehiago egongo dira.

Oinezkoei lehentasun handiagoa emango dien espazioaren diseinuak trafikoa baretzen ere lagunduko du. Horretarako, oinezkoentzako pasabide goratuak jarriko dira, eta ibilgailuen abiadura murrizteko neurriak hartuko dira. Era berean, azpiegitura-sareak berrituko dira, saneamendu-sarea barne, sistema banatzailera egokitzeko. Horri esker, euri-urak eta hondakin-urak husteko sistemaren eraginkortasuna hobetuko da.

Azkenik, hiri-altzariak ere berrituko dira, herriko diseinu orokorrarekin bat datozen banku eta paperontzi berriak jarriz. Halaber, argiteria publikoa hobetuko da, gaueko segurtasuna areagotzeko eta argi-kutsadura murrizteko.

Ainhoa Salterain alkateak proiektu honen garrantzia azpimarratu du, udal gobernuak Amorebieta-Etxano eraldatzeko duen konpromisoaren barruan. «Karmen 2.0 proiektuaren handitzea herri irisgarriago, jasangarriago eta pertsonentzat atseginago baten alde egiten dugun apustuaren beste erakusgarri bat da. Gure bizilagunen ongizatea eta bizi-kalitatea hobetzeko diseinatu dugu proiektu hau, baita herrigune dinamikoagoa eta ingurumenarekiko errespetutsuagoa sortzeko ere. Amorebieta-Etxano etengabe ari da eraldatzen, eta proiektu hau bide horren parte da», adierazi du Salterainek.

Handitze honekin, herrigune bizigarriago bat sortzeko bidean aurrera egiten jarraitzea espero da. Oinez eta bizikletaz ibiltzea bezalako mugikortasun aktiboko moduak sustatu nahi dira, jasangarritasuna udalerriko hirigintza-politiken ardatz nagusietako bat izan dadin.

The post Asteartean hasiko dira Karmen kaleko 11. eta 17. zenbakien arteko tartea berrurbanizatzeko lanak first appeared on DOT Durangaldea.

BIZKAIA | Bizkai Buru Batzarrak Ibone Bengoetxea Otaolea Bizkaiko Ahaldun Nagusi izateko hautagai gisa eta Ana Otadui Biteri Bizkaiko Batzar Nagusietako presidente izateko hautagai gisa proposatzea erabaki du gaur arratsaldean, 2027ko maiatzaren 23rako aurreikusita dauden udal eta foru hauteskundeei begira. Oinarriek berretsi beharko dute proposamena, urriaren erdialdetik aurrera irekiko den barne-prozesuan.

Ibone Bengoetxea

Ibone Bengoetxea bilbotarra da eta esperientzia instituzional eta politiko handia du. Erakunde-sare osoaren lehen mailako ezagutza du, erantzukizun handienaren ikuspegitik.

Bilboko Udaleko Alkateordea izan da Iñaki Azkunaren agintaldian; Euskadiko Udalen Elkarteko (EUDEL) Presidentea; Herri Administrazioko eta Erakunde Harremanetarako Foru Diputatua; gaur egun Eusko Jaurlaritzako Lehen Lehendakariordea da.

Euzko Alderdi Jeltzalean afiliatuta dago 1991.urtetik eta kudeaketa-arlo ugari ezagutzen ditu, erantzukizun publikoaren garapenean hainbat arlotako buru izan baita. Garraioak, kultura, hezkuntza, administrazio publikoa, harreman instituzionalak, giza baliabideak, komunikazioa, komunikabide publikoak eta hizkuntza-politika kudeatu ditu.

Ana Otadui

Ana Otadui Biteri Elorriotarra da. Bizkaiko Batzar Nagusietako presidentea da 2015. urtetik. Zuzenbidean lizentziaduna da, Deustuko Unibertsitatean ikasi zuen eta unibertsitate horretako Euskal Ikasketen Sailean aritu ondoren, funtzionario plaza lortu zuen Bizkaiko Foru Aldundiko Administrazio Orokorreko teknikari gisa, oposizio bidez.

Ogasuneko, Lehendakaritzako eta Kulturako foru sailetan lan egin du bere ibilbide profesionalean, eta, gaur egun, Administrazio Orokorreko teknikaria da, kultura-ondareko zerbitzuan eszedentzian dagoena.

2005etik Eusko Alderdi Jeltzalean afiliatua, 2007ko udal hauteskundeetan Elorrioko Udalerako EAJren hautagaitzaren buru izan zen. Lau urtez oposizioko bozeramaile izan ondoren, 2011n Elorrioko Alkate izendatu zuten, eta erantzukizun hori 2009tik aurrera Eusko Legebiltzarreko eserlekuarekin bateragarri egin zuen. 2015eko ekainean, Bizkaiko Batzar Nagusietako lehendakari hautatu zuten.

The post Ibone Bengoetxea Ahaldun Nagusirako eta Ana Otadui Batzar Nagusietarako proposatu ditu EAJk first appeared on DOT Durangaldea.

URDUÑA | Urduña mendira aterako da datorren igandean, urriaren 11n, XXI. Urduñako Mendi Martxarekin. Txarlazo Mendi Taldeak urtero antolatzen duen hitzordua dagoeneko hiriko egutegian errotutako ekitaldia da, eta aurten ere kirola, natura eta lagunarteko giroa uztartuko ditu.

Antolatzaileek azaldu dutenez, aurtengo edizioak hiru ibilbide izango ditu: luzea, motza eta familientzakoa. Horrela, adin eta maila ezberdinetako parte-hartzaileek euren neurriko ibilbidea aukeratu ahal izango dute.

Foru Plaza izango da martxaren abiapuntua, eta bertan eman ahal izango da izena igandean bertan, 07:30etik aurrera.

Ibilbide luzea izango da abiatzen lehena, 08:00etan. Parte-hartzaileek 24,74 kilometroko ibilbidea eta 974 metroko desnibela gainditu beharko dituzte. Ibilbidean zehar, gainera, jan-edan gune bat izango dute Balcon de Ruben inguruan.

10:00etan abiatuko da ibilbide motza, 11,83 kilometrokoa eta 264 metroko desnibelekoa. Azkenik, 11:00etan hasiko da familientzako martxa. Ibilbide honek 6,74 kilometro eta 44 metroko desnibela izango ditu, eta umeek zein helduek elkarrekin naturaz gozatzeko aukera izango dute.

Izen-ematearen prezioa 5 eurokoa izango da ibilbide luzean, 3 eurokoa motzean eta euro batekoa familientzako ibilbidean. Jardunaldiaren amaieran, gainera, hainbat opariren zozketa egingo da parte-hartzaileen artean.

Mendia ezagutzeko hilabetea

Mendi martxaz gain, Txarlazo Mendi Taldeak eta Urduñako Udalak hainbat jarduera antolatu dituzte urrirako, “Mendiaren hilabetea” egitasmoaren barruan. Ekimenaren helburua da herritarrak Urduñako mendien, historiaren eta natura-ondarearen inguruan gehiago ezagutzeko eta hausnartzeko gonbita egitea.

Besteak beste, Txarlazo Mendi Taldearen historiari buruzko argazki-erakusketa dago ikusgai Alondegian, urriaren 18ra arte.

Egitarauaren barruan, gainera, Iñaki García Uribek hitzaldia eskainiko du gaur, 19:00etan, Gorbeiako Gurutzearen 125. urteurrenari buruz. Urriaren 14an, berriz, ordu eta leku berean, Juanjo Hidalgok ‘Txaulas y txabolas. Construir para la necesidad’ hitzaldia emango du, Gorobel inguruko artzaintzari lotutako eraikuntza tradizionalen inguruan.

Horrela, Urduñak mendia izango du protagonista urrian, kirola eta aisialdia ez ezik, udalerriak bere natur ingurunearekin duen lotura eta mendizaletasunaren historia ere aldarrikatuz.

The post Urduña mendira aterako da igandean, XXI. Urduñako Mendi Martxaren eskutik first appeared on DOT Durangaldea.

GERNIKA | 1936ko urriaren 7an sortu zen lehen Eusko Jaurlaritza, Jose Antonio Agirre lehendakaria buru izan zuena. Asteazken honetan, 90 urte geroago, urteurrena ospatzeko ekitaldi nagusia egingo dute Gernika-Lumoko Batzar Etxean, Imanol Pradales lehendakaria buru izango dela.

12:00etan hasiko den jardunaldian, lehen Gobernu hura eta haren ondorengoak izan zirenak (herbestetik lan egin behar izan zuen Jaurlaritza, Trantsizio garaian aritu zen Eusko Kontseilu Nagusia eta demokraziaren garaiko Jaurlaritza guztiak) aitortuko dira eta 1936tik gaurdainoko haria ez dela eten aldarrikatuko da.

Ekitaldian gaur egungo zein iraganeko ordezkaritza instituzional zabala espero dute, besteak beste, Juan Jose Ibarretxe, Patxi Lopez eta Iñigo Urkullu lehendakaria. Imanol Pradales lehendakariak irakurketa instituzionala egingo du.

Jai eguna izango den 2027ko urriaren 7a bitartean, hainbat ekitaldi egingo dira lehen Eusko Jaurlaritza izan zena aitortzeko eta agintari haiek utzitako ondarea balioan jartzeko helburuarekin.

Izan ere, 1936an, Francoren jarraitzaileek Estatu kolpea jo eta gerra puri purian zegoenean eratu zuten lehen Gobernu hura. Jose Antonio Agirre lehendakariarekin batera, alderdi politiko ezberdinetako 10 sailburuk osatu zuten eta Gernikako Arbolaren azpian egin zuten euren karguen zina. Haien agintaldian gaur egun ezagutzen dugun erkidegoaren erakundeen oinarriak jarri ziren. Gerrak aurrera egin ahala, batzuk erbestera joan behar izan zuten eta beste batzuk atxilotu eta fusilatu egin zituzten.

Ekitaldi hauekin, Eusko Jaurlaritzak adierazi du haiek inspiratu zituen printzipioak (demokrazia, askatasuna eta justizia soziala) etorkizunera eraman nahi dituela.

The post Eusko Jaurlaritzaren 90. urteurrena ospatuko dute Gernikako Batzar Etxean first appeared on DOT Durangaldea.

MENDI DUATLOIA | Tabirako ingurua kirolaren eta festaren erdigune bihurtu zen berriro joan den larunbatean, Durangoko IV. Mendi Duatloia dela eta. Mugarra Triatloi Taldeak prestatutako jardunaldiak adin, gaitasun eta maila desberdinetako pertsonak elkartzea lortu zuen, goizeko haur eta herri-probetatik hasi eta arratsaldeko lehiaketa ofizialeraino.

Goizean zehar giro bikaina bizi izan zen 7 eta 13 urte bitarteko 62 haurren parte-hartzearekin. Ondoren, Duatloi Inklusiboaren txanda heldu zen; bertan 16 kirolarik eta beren familiek ibilbideaz gozatu ahal izan zuten, bakoitzak bere erritmoan. Goizeko saioa amaitzeko, Herri-Duatloian 40 lagunek (21 emakume eta 19 gizon) hartu zuten parte, kirol hau gertutik ezagutzeko aukera izanda.

Arratsaldeko proban

Arratsaldean lehiaketa nagusiari ekin zitzaion, Euskal Herriko Mendi Duatloi Zirkuituko hirugarren proba puntuagarrian. Guztira 123 duatletek (53 bakarka eta 70 erreleboka) ikuskizun bikaina eskaini zuten 9 kilometro korrika (+320 m) eta 18,5 kilometro mendiko bizikletan (+700 m) osatutako ibilbide berrituan.

• Emakumezkoak: Ainhoa Markinez idiazabaldarrak (Lea La Blanca) iazko garaipena berretsi zuen, 2:16:02ko denborarekin proba osoa lideratuz. Bigarren postuan Jone Gomez (2:24:20) sailkatu zen eta hirugarrenean Izarne Maioz (2:27:51), azken hau zirkuituko behin-behineko lider jarri delarik.

• Gizonezkoak: Alexander Ordeñana usansolotarrak erremontada ikusgarria egin zuen BTT sektorean, lehen trantsizioan seigarren joan ondoren azkenean lehen postua eskuratuz. Aitor San Sebastian izan zen bigarren eta Eneko Gurrutxaga hirugarren (zirkuituko lider berria).

• Eskualdeko ordezkariak: Tokiko kirolarien artean, Kerman Zurituriza durangarrak bosgarren postu bikaina lortu zuen bakarkako sailkapen orokorrean. Erreleboetan, Antton Belaustegi eta Jon Munitxa abadiñarrak nagusitu ziren gizonezkoetan, eta Naroa Odiaga zein Unai Moran bikote mistoan.

Oso pozik erantzunarekin

Antolatzaileen izenean, Mugarra Triatloi Taldeak balorazio oso positiboa egin du: «Izen-emateek oso harrera ona izan dute eta ehundik gora parte-hartzaile batu ditugu berriro proba ofizialean. Gainera, parte-hartzaileek oso harrera ona egin diote ibilbide berriari». Taldeak azpimarratu duenez, lorpen handiena giro inklusiboa eta adin guztietako kirolariak gune berean biltzea izan da, eta dagoeneko bosgarren edizioa prestatzen hasteko gogoz agertu dira.

The post Ainhoa Markinez idiazabaldarrak irabazi du Durangoko Mendi Duatloia first appeared on DOT Durangaldea.

BERMEO | Udalak inauguratu berri du Txibitxiaga eta Itxasbegi kaleen arteko igogailua. Jarduketaren helburua auzoaren goialderako sarbidea hobetzea izan da, eta, horrela, inguruko etxebizitzetara iristeko bide erosoagoa eta irisgarriagoa eskaintzea.

Txibitxiaga kalea herriaren beheko aldean hasten da, portura sartzeko biribilgunearen inguruan, eta Itxasbegi ingururaino igotzen da. Kaleak malda handia du ibilbide osoan, eta, gainera, ibilbide luzea da. Horren ondorioz, zaila zen herriaren beheko aldea eta goialdeko etxebizitzak irisgarritasun-baldintza egokiekin lotzea.

Egoera horri erantzuteko, igogailu berriak Txibitxiaga kalearen goialdera ez ezik, tarteko maila batera ere iristeko aukera ematen du, bertako etxebizitzetarako sarbidea errazteko. Horretarako, bi pasabide egin dira: lehenengoa 10,50 metrora iristen da, eta bigarrena 16,30 metrora. Horrela, ibilbidean zehar dauden desnibelak bi mailatan gainditzen dira, eta auzoko hainbat etxebizitzatara iristeko bidea errazten da.

Igogailua hainbat etxebizitza-eraikinen artean dagoenez, proiektuak arreta berezia jarri du ingurunean “ahalik eta eragin bisual txikiena” izan dezan. Horretarako, diseinu liraina eta arina aukeratu da, eta beira erabili da egiturari arintasun handiagoa emateko eta inguruko eraikinekin ahalik eta modu naturalenean txertatzeko.

Igogailuaren kabina itsasora begira kokatu da, portuko ikuspegia aprobetxatzeko. Aldi berean, alboetako horma opakuek inguruko etxebizitzen pribatutasuna babesten dute. Igogailuak zortzi lagunentzako edukiera du, eta 630 kilogramoko karga har dezake.

Obrak 2025eko maiatzean hasi ziren, eta Carpintería Metálica Draga S.L. enpresak gauzatu ditu. Jarduketaren inbertsioa 941.997,63 eurokoa izan da.

Inbertsioaren %100 Eusko Jaurlaritzaren finantzaketarekin gauzatu da. Alde batetik, 392.165,36 euroko dirulaguntza jaso da toki-erakundeek irisgarritasun unibertsaleko jarduketak egin ditzaten, 2023an deitutako laguntza-ildotik. Bestetik, 549.832,27 euro Inbertsio Estrategikoen Erakunde arteko Planaren bidez finantzatu dira.

Jarduketa Opengela (PIIE) ekimenaren esparruan garatu da, hiri-berroneratzea eta inguruko bizilagunen bizi-kalitatea hobetzea helburu duten jarduketen barruan. Proiektua Eusko Jaurlaritzako Lurralde Plangintza, Etxebizitza eta Garraioak Sailaren eta Bermeoko Udalaren arteko lankidetzaren emaitza da.

Nadia Nemeh Shomaly Bermeoko alkatea pozik agertu da igogailua, hainbeste hilabetetako lanaren ondoren, martxan dagoelako: “Poza ematen du azkenean igogailu hau martxan ikusteak, atzean lan eta ahalegin handia izan baita. Horregatik, eskerrak eman nahi dizkiet proiektuan parte hartu duten guztiei eta, bereziki, obra gauzatu eta aurrera ateratzeko lanean aritu diren guztiei”.

Alkateak adierazi du, herri irisgarriagoa egitea ez dela oztopo fisikoak kentzea bakarrik; “herritarren eguneroko joan-etorriak erraztea eta auzoak herriarekin hobeto lotzea ere badela”. Ildo horretan, nabarmendu du Txibitxiaga eta Itxasbegi arteko igogailu berriak orain arteko desnibela gainditzeko aukera ematen duela eta inguruko bizilagunei herriko beste guneetara modu erosoagoan eta autonomoagoan iristeko bidea eskaintzen diela.

Hartara, herritarrak instalazio berria erabiltzera animatu ditu, eta erabilera egokia egiteko eskatu du: “Igogailua guztiona da, eta, horregatik, denon ardura ere bada zaintzea. Herritarrei eskatzen diegu behar bezala erabiltzeko eta instalazioa zaintzeko. Guztion laguntza beharrezkoa izango da igogailuak egoera onean jarrai dezan eta behar duen mantentze-lana egokia izan dadin”.

Igogailu berriarekin, Txibitxiaga kalearen goialderako sarbidea hobetu da, eta tarteko etxebizitzetara iristeko bidea ere erraztu da. Horrela, auzoaren eta herriaren arteko lotura irisgarriagoa eta erosoagoa izango da.

The post Bermeok igogailu berria inauguratu du herritarren irisgarritasuna hobetzeko first appeared on DOT Durangaldea.

AMOREBIETA-ETXANO | Amorebono 2026 kanpainak zornotzarren artean izan duen harrera onaren ondorioz, asteburu honetan agortu dira eskuragarri zeuden bonu guztiak. Irailaren 1ean abian jarritako ekimenak herritarren parte-hartze handia izan du, eta beste behin ere agerian utzi du zornotzarrek tokiko merkataritza eta ostalaritzarekiko duten babesa.

Edizio honetan, bonuak zuzenean erabili ahal izan dira kanpainari atxikitako establezimenduetan. Horrela, herritar guztientzat errazagoa izan da bonuak erabiltzea, eta, aldi berean, prozesua sinplifikatu egin da merkatarientzat, ostalarientzat eta zornotzarrentzat. Amorebono bakoitzak 5 euroko deskontua eskaini du 20 eurotik gorako erosketetan edo kontsumizioetan, eta pertsona bakoitzak gehienez sei bonu erabili ahal izan ditu.

Amorebono 2026 kanpainaren barruan, guztira, 32.000 bonu jarri dira zirkulazioan. Horretarako, Amorebieta-Etxanoko Udalak 160.000 euroko inbertsioa egin du, tokiko merkataritza eta ostalaritza babesteko.

Amorebieta-Etxanoko Udalak positiboki baloratu du kanpainaren bilakaera, eta Amorebono bezalako ekimenen garrantzia azpimarratu du udalerriko ekonomia dinamizatzeko, tokiko establezimenduei laguntzeko eta gertuko kontsumoa sustatzeko.

The post Amorebono 2026 kanpainak harrera bikaina izan du eta bonuak agortu dira first appeared on DOT Durangaldea.

URDUÑA | Urduñako Museoak Gervasio Sánchez Argazkilaritza Sari Nazionala jaso duen argazki-kazetariaren “Bizitzaren aldeko aktibistak” erakusketa hartuko du urriaren 8tik abenduaren 13ra bitartean. Erakusketak Hondurasen eta Guatemalan giza eskubideen, emakumeen eskubideen eta ingurumenaren defentsan egindako lanagatik mehatxatuta dauden pertsonen errealitatea ikusaraztea du helburu.

Artistak jendaurrera eraman nahi ditu mehatxu eta indarkeria guztien gainetik beren komunitate eta lurraldeen defentsan diharduten 40 gizon-emakumeren bizipenak, argazkiak, testuak eta ikus-entzunezkoak baliatuz. Lan horren bidez, baliabide naturalen ustiapenak dakartzan gizarte eta ingurumen-ondorioei buruzko gogoeta piztu nahi du, bai eta oinarrizko eskubideen defentsak duen garrantzia azpimarratu ere.

Erakusketa Urduñan, Amurrion eta Getxon aldi berean garatuko den erakusketa-proiektu baten parte da. Iker Santocildes alkateak adierazi duenez, “Getxok proiektuaren ikuspegi feminista jasotzen duten 20 argazkiz osaturiko erakusketa ibiltaria jasoko du; Amurriok eta gure hiriak, berriz, jatorrizko erakusketa partekatuko dute, Gervasio Sánchezek egindako lana ezagutaraziz”.
Halaber, erakusketa ikusgai dagoen bitartean, Entramar elkarteak dibulgazio-jarduerak eta bisita gidatuak eskainiko ditu ikastetxeentzat, belaunaldi gazteenei errealitate hori hurbiltzeko eta giza eskubideen zein ingurumenaren defentsaren inguruko hausnarketa sustatzeko.

Bisita gidatua, mahai-ingurua eta musika

Erakusketaren inaugurazioa urriaren 8an izango da, 19:00etan, eta Gervasio Sánchezek berak gidatutako bisita batekin hasiko da, bertaratutakoei Ertamerikan bertan egindako lanaren gakoak azalduz. Ondoren, mahai-ingurua egingo da Guatemalako Mujeres Tejiendo Red kolektiboko ordezkariekin, Koldo Badillo Urduñako Museoko Arte Erakusketa Aretoko zuzendariak moderatuta. Azkenik, Presaganako Txistularien musika-emanaldia izango da, ekitaldiari amaiera emanez.

Euskadin ikusgai egongo den “Bizitzaren aldeko aktibistak” erakusketa Herriarte elkarteak antolatu du, Gurari Etxea, Getxoko Udala, Amurrioko Udala, Urduñako Museoa, Hamaika Kale eta Urduñako Udalarekin lankidetzan, eta Eusko Jaurlaritzako Garapenerako Lankidetzaren Euskal Agentziaren babesa du.

The post Urduñako Museoak Gervasio Sanchez argazki-kazetariaren erakusketa hartuko du first appeared on DOT Durangaldea.

BILBO | Artxandako tuneletan kirola, elkartasuna eta josteta bildu dira Artxandako Tuneletako Gau Krosaren 2026ko edizioan. 292 atletak hartu dute parte Bizkaiko Foru Aldundiak Interbiak-en bitartez antolatutako zazpi kilometroko gaueko lasterketa berezi honetan. Kirol-ekitaldi honetan aritu direnek normalean ibilgailu gurpildunak baino ibiltzen ez diren azpiegitura baten zehar egin dute  korrika.

Kirol-erronkaz gainera, lasterketa honetan nagusi izaten dira beti jai-giroa eta elkartasun-borondatea. Inskripzioekin bildutako dirua (8.000 euro) Stop Accidentes eta Hartutako Burmuineko Gaitzaren Elkartea erakundeei eman zaie. Biek ere izugarrizko lana egiten dute trafiko-istripuetan kalte hartutako pertsonei eta haien senideei.

Jardunaldiaren amaieran, sariak eman zaizkie kategoria guztietako garaileei (gazte-kategorietan Kutxabank izan da babeslea) eta kirol-materialaren zozketa egin da. Eroskik ere lagundu du: hornidura-poltsak eman ditu eta bi Seleqtia gourmet otzara zozketatu ditu.

The post Artxandako Tuneletako Gau Krosak 292 atleta bildu ditu first appeared on DOT Durangaldea.