MALLABIA | Udalak Zapatuero programa garatzen jarraitzen du, aisialdi hezitzailea eta parte-hartzailea sustatuz, eta berdintasuna, errespetua, aniztasuna eta lankidetza bezalako balioak indartuz. Oraingoan, martxoaren 21eko jardunaldian adinaren arabera bereizitako bi proposamen eskainiko dira, sormena eta berdintasunaren inguruko hausnarketa bultzatuz.

Berdintasun tailerra – Kontzejuzarrean

Txikienei zuzendutako jardueran, parte-hartzaileek brotxe eta giltzatako pertsonalizatuak sortuko dituzte. Sormen-prozesu baten bidez, berdintasuna, errespetua, adiskidetasuna, lankidetza eta aniztasuna landuko dituzte. Tailerrak adierazpen artistikoa eta ikaskuntza uztartuko ditu, parte-hartzea eta talde-lana sustatuz, giro seguruan.

Frida Kahlo tailerra  – Zurrutokian

Nerabeek Frida Kahloren bizitza eta berdintasunaren alde egindako ekarpena ezagutuko dituzte lehenik, eta ondoren birziklatutako potoak apaindu eta loreontzi bihurtuko dituzte. Proposamen honek kultura, jasangarritasuna eta sormena uztartzen ditu, artearen bidez hausnarketa eta garapen pertsonala sustatuz.

The post Mallabiko Udalak berdintasunaren aldeko tailerrak eskainiko ditu first appeared on DOT Durangaldea.

AMOREBIETA-ETXANO | Berba Lapiko ekimenak emakumeen eskubideen eta genero berdintasunaren inguruko hausnarketa eta eztabaida sustatuko ditu martxoan. Ekimen honen helburu nagusia da herritarrak emakumeen historia, esperientzia eta gizartean duten eragina ezagutaraztea, aldi berean feminismoa eta berdintasuna sustatuz.

Horrenbestez, martxoan zehar, Berba Lapikok liburutegian kokatutako armairu berezian liburu feministak eta genero berdintasunari buruzko material anitz jarriko ditu herritarren eskura. Liburu hauek, literatura, komikiak, elaberria eta entsaiak bezalako esparruetan, emakumeen ikusgarritasuna eta errespetua lantzen jarraitzeko aukera emango dute.

Era berean, liburutegira hurbildu ezin direnentzat, herritarrak emakumeen eskubideak eta pentsamendu feministaren azkeneko bilakaerak ezagutzeko aukera izango dute herritik zehar dauden istorio txokoak deritzoten armairu horietan, 100 liburu banatuz. Liburuak euskaraz eta erdaraz egongo dira, eta herrian zehar dauden armairuetan egongo dira eskuragarri. Ekimen honek herritarrak gonbidatzen ditu feminismoaren inguruko hausnarketa sustatzeko eta parte hartzeko.

Ekimen guzti hau biribiltzeko, gogorarazi nahi da Skolastika elkarteak antolatutako “Irakurleak”  erakusketa martxoaren 27ra arte ikusgai egongo dela Zelaietako erakusgelan. Emakumeak, Berdintasuna eta irakurzaletasuna batzen dituen erakusketa ikusgarria izango da.

Berba Lapiko egitasmoa udal liburutegian kokatutako gune bizia da, bizitzarekin eta herriarekin zerikusia duten gaiak jorratzeko helburuarekin. Ekimen honek emakumeen ikusgarritasuna eta errespetua sustatzen jarraitzen du martxoko ekintza honekin, eta herritarrak parte-hartzera eta hausnarketara gonbidatzen ditu.

The post Zornotzak emakumeen eta berdintasunaren aldeko liburu feministak eskainiko ditu first appeared on DOT Durangaldea.

Guztira, 91 kasu erregistratu dira 2025ean, eta horietatik 67 protokolo instituzionalaren bidez tratatu ziren

DURANGO | Udalak indarkeria matxistako biktima diren emakumeen arreta integralari buruzko 2025eko datuen berri eman du. 2024ko maiatzean abian jarritako zerbitzu honek emaitza positiboak erakutsi ditu erakundeen arteko lankidetzari esker.

The post Durangoko Udaleko Indarkeria Matxista Unitateak 41 kasu berri artatu ditu 2025ean first appeared on DOT Durangaldea.

Martxa 12:00etan abiatuko da Ezkurditik eta Andra Marinen amaituko da

DURANGO | Lilakrosaren XIX. edizioa ospatuko du igande honetan martxoaren 15ean, Martxoaren 8ko Emakumeen Nazioarteko Egunaren harira antolatutako jardueren baitan. Ekimen honen helburua emakumeen eta gizonen arteko berdintasunaren aldeko hausnarketa kolektiboa eta herritarren parte-hartzea sustatzea da.

The post Lilakrosak Durango zeharkatuko du igande honetan berdintasunaren alde first appeared on DOT Durangaldea.

DURANGO | Durangoko Udalak ireki du 2026ko Abesti Feministen VIII. Lehiaketaren bozketa herrikoiaren epea. Berdintasun Sailak bultzatutako ekimen honen helburua da musikaren bidez emakumeen eta gizonen arteko berdintasunaren aldeko mezuak ikusaraztea eta sustatzea. Lehiaketa martxoaren 8a, Emakumeen Nazioarteko Eguna, dela eta antolatutako jardueren baitan kokatzen da, eta berdintasunarekin eta eraldaketa sozialarekin konprometitutako sorkuntza artistikoa sustatzea du xede.

The post Zabalik Durangoko 2026ko Abesti Feministen VIII. lehiaketako bozketa first appeared on DOT Durangaldea.

DURANGO | Ehunka lagun bat egin ziren igande honetan M8an Durangon egin zen manifestazioa, berdintasunaren aldeko aldarrikapenak eta borrokak markatutako jardunaldiaren ekitaldi nagusiarekin. Durangoko Mugimendu Feministak antolatutako mobilizazioa 12:30ean abiatu zen Ezkurdi plazatik, herriaren bihotza morez tindatuz.

«Beste mundu bat feminismotik» lelopean, martxak udalerriko kale nagusiak zeharkatu zituen, aldarrikapenezko eta belaunaldiz belaunaldiko giroan. Ibilbidean zehar, emakumeen eskubideen aldeko aldarriak egiten ziren, eta egungo gizarte-eredua eraldatzeko beharra azpimarratzen zen, berdintasun erreala eta eraginkorra lortzeko.

Manifestazioaren amaieran, ohar bat irakurri zuten. Bertan, antolatzaileek espazio publikoak okupatzen jarraitzearen eta desberdintasun iraunkorren aurrean alternatiba feministak eraikitzearen garrantzia azpimarratu zuten. Mobilizazio horrekin, Durangok berriro erakutsi zuen auzi feministarekiko konpromisoa, istilurik gabe eta parte-hartze handiarekin igaro zen jardunaldian.

The post M8ak Durangoko kaleak hartuko zituen «Beste mundu bat feminismotik» lelopean first appeared on DOT Durangaldea.

AMOREBIETA-ETXANO | STEAM arloan lanean ari diren emakumeak omendu ditu aurten Amorebieta-Etxanok, Marixelarre sariaren bosgarren edizioan. Gaur, martxoak 8, Zubiondo parkeko karpan ospatu da ekitaldia eta herritar ugari elkartu dira udalerriko zientzia, irakaskuntza, matematika, arte eta osasun arloko profesionalen lana balioan jarri eta aitortzeko.

Aipatu bezala, aurtengo edizioan, STEAM esparruan, hau da, zientzia, teknologia, ingeniaritza, artea, matematika eta osasun arloan lan egiten duten emakume zornotzarrei egin zaie aitortza. Unibertsitateetan, ikerketa-zentroetan, teknologia-enpresetan, ikastetxeetan zein osasun-arloko zerbitzuetan diharduten emakumeak, hain zuzen, euren ibilbide profesionala eta herriari egiten dioten ekarpena balioan jarriz.

STEAM arloko emakumeak erreferente 

Sarritan, gaur egun, emakume zientzialarien lana urruneko erreferenteekin lotu ohi da, baina Amorebieta-Etxanon bertan badira ibilbide arrakastatsu eta inspiratzaileak egin dituzten emakumeak. Hori dela eta, aurten Marixelarre sariak herriko emakume horiek jarri ditu erdigunean, oraindik ere nagusiki gizonezkoena den esparruetan emakumeen presentzia eta lidergoa ikusarazteko.

Ainhoa Salterain Amorebieta-Etxanoko alkateak hitz batzuk eskaini dizkie aitortza jaso duten emakumeei, eta haien lana eta konpromisoa azpimarratu ditu, zientzia eta teknologiaren arloan egiten duten ekarpena ez ezik, herriarentzat duten balioa ere nabarmenduz: “Gaur aitortzen ditugun emakume hauek erakusten digute talentua eta prestakuntza etxean bertan ditugula. Zientzia eta teknologia ez dira urruneko errealitateak; gure udalerrian ere badira ikertzen, irakasten eta berritzen ari diren emakumeak. Zuen ibilbideak erreferente dira gure neska eta gazteentzat, eta etorkizun berdinzaleago baterako bidea irekitzen jarraitzen dute”, adierazi du alkateak.

Belaunaldi berrientzako ispilu

Aitortza ekitaldiak mezu argi bat helarazi nahi izan du: neskek eta gazteek erreferente hurbilak behar dituzte, eta Amorebieta-Etxanon badituzte. Ingeniariak, kimikariak, fisikariak, arkitektoak, informatikariak, irakasleak, erizainak, medikuak edo ikerketan ari diren emakumeak dira gaurko protagonistak.

Halaber, ekitaldira bertaratu ezin izan duten emakume guztien kasuan, aitortza saria HAZen (Herritarren Arreta Zerbitzua) jaso ahal izangok dute. Horrela, ekimena ekitaldira mugatu gabe, udalerri osoan zehar zabaltzen da, eta emakume aitortu guztiek merezitako errekonozimendua eskuratu ahal izango dute.

Udalak gogorarazi du errekonozimendu honek helburu bikoitza duela: batetik, emakume hauen lana balioan jartzea; eta bestetik, belaunaldi berriei mezua bidaltzea, zientzia eta teknologia ere euren lekua direla erakutsiz.

Ekitaldiari amaiera emateko, Dizdira Ahots abesbatzak emanaldia eskaini du, giro hunkigarri eta ospakizunezkoa sortuz, eta beste behin ere argi utziz berdintasuna arlo guztietan eraikitzen dela, baita zientzian ere.

The post STEAM arloan diharduten emakumeak omendu ditu Zornotzako Marixelarre Sariak first appeared on DOT Durangaldea.

IURRETA | Martxoaren 8ko, Emakumeen Nazioarteko Egunaren harira DOTB Durangaldeko Telebistak Iurretako Landa Eremuko Emakumeei buruzko dokumentala eskainiko dau bihar. Inmediobai Komunikazioak ekoitzitako eta Iurretako Udalaren sormen-bekari esker Iurretako Anderebide emakumeen alkarteak gauzatutako dokumental honek herriko emakumeen memoria kolektiboa berreskuratzea dauka helburu, belaunaldi ezberdinen arteko transmisioa bermatuz.

Dokumentala bi atal nagusitan banatuta dago. Lehenengo zatian, “Atzo” izenburupean, iraganeko bizimodua jorratzen da. Bertan, adineko emakumeek baserriko lan gogorra, familiaren zaintza eta garai hartako gizarte-mugak ekartzen dabez gogora. Testigantza hunkigarrien bidez, emakume horiek Iurretako ekonomia eta gizarte egituran auki daben funtsezko papera azpimarratzen da, askotan itzalean geratu bada ere.

Bigarren atalak, berriz, gaur egungo egoerari eta etorkizunari begiratzen dautso. Landa eremuan jarraitzen daben emakumeen erronkak, ekintzailetza eta baserri-bizitzaren bilakaera aztertzen dira. Anderebide elkarteak bultzatutako proiektu honek argi utzi nahi dau landa eremuko emakumeak ez direla soilik iraganeko parte, baizik eta Iurretaren orainaren eta geroaren motorra direla.

Transmisioa eta aitortza

Aurkezpen ekitaldian, Iurretako Udaleko ordezkariek eta Anderebide elkarteko kideek proiektuaren garrantzia nabarmendu eben. “Gure amamak eta amak izan dira baserrien zutabeak, eta haien istorioak ezagutzea ezinbestekoa da gure herriaren nortasuna ulertzeko”, adierazi eben sustatzaileek.

Proiektu honek, liburu eta dokumental formatuan, Iurretako ondare kultural eta soziala aberasten dau, emakumeen begirada erdigunean jarriz.

Dokumentala ikusgai izango da DOTB Duragaldeko Telebistan bihar eguerdiko 14:00etan, 18:00etan eta 22:30ean, landa eremuko emakumeen lana eta bizitza balioan jartzeko asmoz.

The post Iurretako landa eremuko emakumeei buruzko dokumentala eskainiko dau DOTB-k first appeared on DOT Durangaldea.

MALLABIA | Martxoaren 8an, Emakumeen Nazioarteko Eguna ospatuko da eta harira, Mallabiko Udalak egitarau anitz bezain zabala antolatu du, berdintasunarekin duen konpromisoa berretsiz eta gizarte bidezkoago eta inklusiboago bat eraikitzeko bidean emakumeen eskubideen aldarrikapenarekin bat eginez.

Otsailaren 21etik martxoaren 21era bitartean luzatuko den programazioak bideo foruma, antzerkia eta hitzaldiak batuko ditu, emakumeen ikusgarritasuna eta ahalduntzea ardatz hartuta. Era berean, kirolak protagonismo berezia izango du aurten ere. Otsailaren 21ean, EH-ko Emakumezkoen Gomazko Paleta Elite txapelketako 3. jardunaldia jokatuko da herriko frontoian, eta otsailaren 22an Euskal Pilota Egokituko zirkuituak bi saio eskainiko ditu, adimen urritasuna eta urritasun fisikoa duten pertsonentzat. Otsailaren 28an, Emakumeen Binakako pilota txapelketa izango da ikusgai.

Bestalde, martxoaren 1ean, 36. Emakumezkoen lasterketa herrikoia “Lilatoia” egingo da Donostian, eta Mallabitik autobus zerbitzua eskainiko da parte hartu nahi dutenentzat. Egun berean, Kontzejuzarrean “La boda de Rosa” filmaren bideo foruma antolatuko da. Era berean, “mirada de una mujer palestina” pintura erakusketaren aurkezpena izango da Rouhifa Kassem-en eskutik, 12:00etan, Kontzejuzarrean eta martxoaren 15era bitarte izango da ikusgai. Martxoaren 6an, ostirala, 19:00etan, Emakumeen osasun eskolak izango da Kontzejuzarrean, eta saioan gaixotasun kardiobaskularrak, min kronikoak eta migrainak landuko dira.

Era berean, Mallabiko ikasleek beraientzat erreferente diren emakumeak landuko dituzte eskolan, eta lan hauek martxoaren 6an, 8an eta 15ean egongo dira ikusgai Kontzejuzarrean.

Martxoaren 8an egitarauko ekitaldi nagusiak eramango dira aurrera; alde batetik, kontzentrazioa egingo da Kontzejuzarrean. Ondoren, Adierazpen Instituzionala irakurriko da. Amaitzeko, 12:30ean, ‘In Crescendo’ klown ikuskizuna eskainiko da Kontzejuzarrean, helduentzat zuzenduta, gaztelaniaz emango dena. Programazioak martxoaren 15ean jarraituko du, “Menopausia versus andropausia/osteoporosia” hitzaldiarekin, eta martxoaren 20an EH-ko Emakumezkoen Gomazko Paleta Elite Txapelketaren finala jokatuko da, 19:00etan. Azkenik, martxoaren 21ean emango zaio amaiera programazioari, herriko frontoian jokatuko den frontenis txapelketa mistoarekin.

Mallabiko Udalak herritar guztiak gonbidatzen ditu antolatutako jardueretan parte hartzera eta berdintasunaren aldeko konpromisoa egunerokoan ere praktikara eramatera.

The post Mallabiak hilabeteko egitarau zabalarekin ospatuko du Emakumeen Nazioarteko Eguna first appeared on DOT Durangaldea.