MAÑARIA | Arri proiektuaren baitan, formatu txikiko lanak ikusi ahal izango dira larunbatean herriko hainbat gunetan. Igandean, berriz, Oreka TX taldearen kontzertua izango da Angurretan; antolakuntzak herrigunetik oinez igotzeko deia egin du.

Mañariako Maiatza Kulturalak aurrera jarraituko du datozen egunetan. Arri proiektua eta Oreka TX taldearen emanaldia izango dira egitarauaren ardatz nagusiak, astean zehar aurreikusitako beste hainbat jarduerarekin batera.

Maiatzaren 16an, Arri proiektuaren barruan, formatu txikiko pieza artistikoak ikusi ahal izango dira udalerriko gune desberdinetan. Korrala Sormen Guneak antolatutako ekimen hau “ginkana teatral” gisa definitu dute arduradunek.

Ikusleek ibilbide bat osatu beharko dute pieza guztiak ezagutzeko. Doako txartelak 17:00etan banatuko dira plazan, eta emanaldiak non izango diren sekretupean gordeko da hasiera ordura arte.

Proposamenen artean, Ibawa kolektiboaren dantza garaikidea, Karrika Antzerki Taldearen lan bat eta soka finkoa zein clowna uztartzen dituen pieza bat egongo dira. Amaiera 20:00etan izango da plazan, Swingtronics taldearen kontzertuarekin. Maiatzaren 17an, 12:00etan, Oreka TX taldeak kontzertua eskainiko du Angurreta gune artistikoan, sarrera doakoa dela. Antolatzaileek oinez joateko eskatu dute, ibilgailuentzako sarbidea itxi egingo baita.

Oreka TX txalapartaren inguruko musika proiektu entzutetsua da. Nazioarteko ibilbide luzea du, eta euskal musika tradizionala beste kultura batzuetako soinuekin uztartzen du.

Egitaraua

Maiatza Kulturaleko agenda beste jarduera hauekin osatuko da:

• Osteguna, 18:30: Gorka Valdesen hitzaldia hegaztiei buruz, kultur etxean.

• Ostirala, 19:00: Jokin Lasaren ‘Aberriak eta atzerriak’ musika ikuskizuna.

• Maiatzak 18, 18:00: Mural parte-hartzailea plazan, Eñaut Aiartzaguenarekin.

• Maiatzak 20, 18:00: Proiekzioa.

The post Arri eta Oreka TX taldearen kontzertua izango dira Mañariako asteburu kulturaleko protagonistak first appeared on DOT Durangaldea.

DURANGO | Datorren igandean, apirilak 26, Durango Kantari ekimenaren saio berri bat ospatuko da Durangon. Herri-kantugintza eta herritarren parte-hartze aktiboa sustatzea helburu duen egitasmo honek giro jai-zalea ekarriko du berriro herriari. Hitzordua 12:30ean izango da, Merkatu Plazan, eta oraingoan Eingo taldeak gidatuko du saioa.

Udalak herritar guztiak animatu nahi ditu taldean abestera eta une kolektibo honetaz gozatzera. Parte-hartzea errazteko, Durango Kantariko kantutegia eskuragarri dago udaleko webgunean (www.durango.eus), edota ekitaldiko karteletan agertzen den QR kodearen bidez deskargatu daiteke.

The post Durango Kantari igandean itzuliko da Merkatu Plazara Eingo taldearekin first appeared on DOT Durangaldea.

FUTBOLA | Berrizeko beteranoek urteroko bazkaria egiten zuten, zelaiko pasadizo ahaztezinez gozatzeko. Serafin Cedrunek zuzendutako adin-taldeari zuzenduta, berrogeita hamar lagun inguruk babarrun jana eta giro onak eta adiskidetasunak markatutako jardunaldia izan zuten. Duela hamar urtetik hona ospatzen ari dira.

The post Berrizko beteranoek ohiko janariaz gozatu zuten first appeared on DOT Durangaldea.

DURANGO | Datorren azaroaren 18an, arratsaldeko 19:00etan, Durangoko Udaletxeko Osoko Bilkuraren aretoak  Antso Estegiz kaleko berrurbanizazio-proiektuaren 2. faseari buruzko informazio-saioa hartuko du, bizilagunei zuzendua.

Bilera horretan, proiektuaren puntu nagusiak azalduko dira, aurreikusitako lanak ondo ulertzen laguntzeko. Era berean, lanak gauzatzeko aurreikusitako baldintzak eta epeak azalduko dira.

Saio honen helburua inguruko bizilagunei informazio zuzena eta eskuragarria ematea da, bereziki auzo horretan bizi diren edo bertatik sarri igarotzen diren pertsonei. Izan ere, jarduketek aldi baterako eragina izan dezakete bai mugikortasunean, bai ingurune hurbilean.

Durangoko Udalak interesa duten pertsona guztiak gonbidatzen ditu saio honetan parte hartzera.

The post Antso Estegiz kaleko berrurbanizazioaren 2. faseari buruzko informazio-saioa, azaroaren 18an first appeared on DOT Durangaldea.

ELORRIO | ​​​ Urriaren 25ean ospatu zen Errebonbillo aire libreko pintura lehiaketaren 35. edizioa, Iturrizoro elkartearen antolaketapean eta Elorrioko Udalaren laguntzarekin. Aurtengo edizioan 28 margolari aritu ziren Elorrioko kale eta inguruetan, Bizkaiatik, Gipuzkoatik, Nafarroatik, Gasteiztik eta Madrildik etorritako artistekin. Epaimahaiaren eta parte-hartzaileen hitzetan, aurten aurkeztutako lanen maila oso altua izan zen.

Lehiaketako lehen saria Fernando de Vicentek (Durango) jaso zuen, “Argiñeta” izeneko koadroarekin, bigarren saria Ricardo Azkargirtari eman zitzaion, “Con la iglesia nos hemos topau” lanagatik, eta hirugarren saria José Miguel Arranzi (Astrabudua) dagokio, “Bi-Kale eta Erreka” izeneko margolanagatik. Bestalde, herriko sari berezia Juan Mari Lersundik jaso zuen, Elorrioko margolari gisa egindako lanagatik.

Epaimahaia Itxaso Basauri, Andrea Jiménez, Juanjo Altuna eta Jose Etxebarria artistek osatu zuten, eta denek nabarmendu zuten parte-hartzaileen teknika eta sormen maila bikaina izan dela.“Urtez urte lehiaketa sendotzen doa, eta Elorrio erreferente bihurtu da aire libreko pintura zaleentzat”, adierazi dute antolatzaileek.

Lehiaketara aurkeztutako lan guztiak azaroaren 14ra arte daude ikusgai Iturri Kultur Etxeko erakusketa-aretoan, goizeko 9:30etik 20:00etara.

The post Fernando de Vicente durangarrak Errebonbillo lehiaketa irabazi du “Argiñeta” lanarekin first appeared on DOT Durangaldea.

DURANGO | San Fausto auzoak haurrentzako parke berri bat izango du ostiral honetan, Zeharmendieta kaleko etxe eraiki berrien ondoan. Auzokide asko harrituta agertu ziren, lanak amaituta egon arren itxita jarraitzen zuelako. Ostiral honetan ireki dituzte haurrentzako hiru sarbideak. Gainera, Bernardo Gabiola kaleko bidegorria babesten zuten hesiak kendu dituzte.

The post Durangok haurrentzako parke berri bat ireki du San Fausto auzoan first appeared on DOT Durangaldea.

ZALDIBAR | Asteazken honetako honetako osoko bilkuran, Zaldibarko udalbatza berritu da. Jose Luis Maiztegi (EAJ) zinegotzia taldera batu da, Marian Trejo jeltzaleak iraileko osoko bilkuran dimisioa aurkeztu eta gero.

Maiztegi ez da berria Zaldibarko Udalean. Herriko alkate izan zen 2019tik 2023rako legealdian. “Ilusio handiz” bueltatu da politikagintzara. “Lanera nator, eta lagundu ahal dudan neurrian lagunduko dut. Proposamenak egiten jarraituko dut EAJko gainerako kideekin batera, zaldibartarren mesederako”, adierazi du. Eneritz Azpitarte alkateak ongietorria egin dio Maiztegiri.

The post Jose Luis Maiztegik zinegotzi kargua hartu du Zaldibarko udalbatzan first appeared on DOT Durangaldea.

ELORRIO | Udalak jakinarazi duenez, Urkizuaran kalearen eta Arrasate etorbidearen zati bat itxita egongo dira trafikoarentzat hiru astez, urriaren 1etik 21era, egiten ari diren oinezkoen ibilbidearen obrak direla-eta.

Mozketak Aidazuko bidegurutze-inguruari eragingo dio, eta soilik bizilagunei baimenduko zaie sarbidea. Gainerako ibilgailuek saihesbidetik egin beharko dute desbideratzea.

Udaletik adierazi dutenez, lanek eragozpenak sortuko dizkiete herritarrei, eta ulermena eskatu dute obrek irauten duen bitartean.​

The post Urkizuaran kalean eta Arrasate etorbidean trafikoa moztuko dute obrak direla eta first appeared on DOT Durangaldea.

ELORRIO | EROSKIk aste honetan abiatu du bere jarduera programa Elorrioko langileentzat, herrian egoitza irekirik 50 urte bete direla ospatzeko. Lehen mugarri bezala, Elorrioko Udala gonbidatu du instalazioetara egoitzaren ildo historikoaren gaineko irudi bat desestaltzeko. Bertan, berrogeita hamar urte honetako gertaerarik esanguratsuenak biltzen dira. Ekitaldian izan dira Rosa Carabel Kooperatibako CEOa, Beatriz Aparisi egoitzako gerentea, Irune Mateo Eroskiren Harreman Instituzionalen arduraduna, Julene Lazkano Elorrioko alkatea eta Maria Herrero udaleko alkateorde nagusia. Hitza hartu dutenean, azpimarratu da EROSKIk erroak herrian dituela, komunitatearekin konprometitzen dela, eta lurraldean balioak sustatzen dituela, hala nola kooperazioa, iraunkortasuna eta etorkizuna.  

Urriaren 16ra bitarte, jarduera sail bat gauzatuko du Elorrioko langileentzat. Helburua da mugarria ospatzea, lankideek esperientziak trukatzea, loturak indartzea eta lan ingurunearen eta lan arloetako funtzioen ezagutza handiagoa sortzea. 

Ekitaldian, Eroskiren tamainako kooperatiba batek egoitza hemen izateak duen garrantzia azpimarratu du Julene Lazkano Elorrioko alkateak eta nolako onurak dakatzan udalerrirako, bai enplegagarritasun aldetik, bai ospe aldetik eta bai aberastasun aldetik. 

Egoitzako arduradunak, berriz, Beatriz Aparisik, hauxe azpimarratu nahi izan du: “Hau ez da bakarrik eraikin bat. Denona den etxea ere bada. Bertan, kooeratibak eta langileek era erresilientean eboluzionatu dute. Gaur, eskerrak eman nahi dizkiogu Elorrioko Udalari 50 urte honetan erakutsi duen hurbiltasunagatik eta jarrera onagatik. Zinez uste dugu bidaide ona izan dela eta ziur gaude elkarrekin hazten jarraituko dugula batera lan eginez, horrek onurak ekarriko baitizkio herritarrei eta eskualdeari”. 

The post Eroskik Elorrioko egoitzaren 50. urteurreneko ospakizunak hasi ditu first appeared on DOT Durangaldea.