DURANGALDEA | Hona hemen egunez eguneko egitarau xehatua:

EGUENA, EKAINAK 11

• DURANGO | Adinekoen Zentroari buruzko Herritarren Topaketa: Udalak aurrera darrai Saibi eraikin zaharrean (Euskaltegi ohian) egongo den Adinekoen Zentro berria diseinatzeko partaidetza prozesuarekin. Hirugarren faseko topaketa hau 17:00etan izango da Elkartegian (bi orduko iraupena).

• DURANGO | Gastronomia tailerra azokan: Amillena Jatetxeko Lurrek eta Vanesak tokiko sukalde teknikak eta ezagutzak partekatuko dituzte 18:00etatik aurrera.

• AMOREBIETA-ETXANO | ‘Ametsetatik Herrira’ prozesuaren amaiera: Udalak tokiko gobernuak inoiz bultzatutako partaidetza prozesurik handienaren amaiera ekitaldia ospatuko du 18:30ean.

BARIKUA, EKAINAK 12

• DURANGO | Swing kontzertua Ezkurdin: Bartolome Ertzilla Musika Eskolako Bart…Sax! saxofoi taldeak eta Durangaldeko Swing Taldeak kontzertu dantzagarria eskainiko dute aire librean, 19:00etan Ezkurdiko kioskoan.

• DURANGO | Muruetatorreko jaiak: Auzoko jaiei hasiera emango zaie egitarau zabal batekin.

ZAPATUA, EKAINAK 13

• URKIOLA | San Antonio eguna: Tradiziozko meza nagusiak egongo dira goizean zehar: 10:00etan, 11:00etan, 12:00etan (Bilboko Gotzainak gidatua) eta 13:00etan.

• DURANGO | Durangoko Kirol Egunak: Herriko 21 klub eta elkarte Landako Gunean bilduko dira zapatuan eta igandean kirol eskaintza zabala erakusteko.

• AMOREBIETA-ETXANO | Ikasturte amaierako festa: Eskola urteari agur esan eta udari ongietorria egiteko festa indartsua antolatu dute Zelaieta parkean, 17:00etatik 22:00etara, familiei zuzendutako doako ekintzekin. Eguraldi txarra eginez gero, Gure Kirolak pilotalekura aldatuko da.

DOMEKA, EKAINAK 14

• DURANGO | Dantzaldiak Ezkurdin: Udako dantzaldiak martxan egongo dira 18:30etik 20:30era. Euria eginez gero, saioa Musika Eskolan egingo da.

• DURANGO | Euskal Sagardoaren Festa: Azokan bertako produktuak, euskal sagardoa eta tradizioa uztartuko dira 12:00etatik 15:00etara, herritar guztiei irekitako jardunaldian.

The post Kontsultatu hemen Durangaldeko aste honetako agenda first appeared on DOT Durangaldea.

DURANGO| Muruetatorre auzoak dena prest dauka jaietan murgiltzeko. Muruetatorre Auzo Elkarteak egitarau orekatua eta indartsua ondu du ekainaren 13 eta 14rako, auzo-giroa, kultura eta gastronomia ardatz hartuta, txikienak zein nagusiak gune berberean elkartzeko.

Jaien eztanda larunbatean, ekainak 13, iritsiko da goizeko 11:00etako txupinazoarekin. Lehen unetik, Jaizale Txistulari Elkartearen kalejira alaiak auzoko bazterrak girotuko ditu; bitartean, umeek jolasekin eta puzgarriekin gozatzeko aukera izango dute. Eguerdian, sukaldeko tresnak hartzeko unea izango da, Paella Txapelketa jendetsua ospatuko baita. Kazolak 14:00etan aurkeztu beharko zaizkio epaimahaiari, asteburuko hitzordurik jendetsuenetako batean.

Larunbat arratsaldean, puzgarriek eta herri kirolek gazteenak martxan mantenduko dituzte, eguneko plater nagusiei bide eman aurretik. Arratsaldeko 19:00etan, barre algarak ziurtatuta egongo dira Kike Biguri umorista ezagunaren bakarrizketarekin. Ondoren, auzo-zozketa egingo da, eta 21:00etatik aurrera musikak hartuko du protagonismoa. Plateruena x Izar Records plataformarekin lankidetzan, herriko taldeen txanda izango da: Ur, Leven Slave eta Blackmoon Durangoko bandek kontzertu indartsua eskainiko dute, txosna goizeko ordubatean itxi arte.

Igandea, magia eta erritmo artean

Igandean, ekainak 14, jai-giroak ez du indarrik galduko. Goizeko 12:00etan Oliver Magoaren familientzako ikuskizunak ilusioz beteko du auzoa. Arratsaldean, berriz, apar-festa freskagarriak gaztetxoenak blaituko ditu 16:30ean, eta, jarraian, 17:00etan, txokolate-jan herrikoia egingo dute indarrak berreskuratzeko.

Txokolatearen kaloriak erretzeko, auzo elkarteak proposamen mugitua prestatu du 17:45erako: herritar guztiei irekitako salsa eta dantza tailerra, jaietako azken orduetan auzoa erritmoz eta energia honez betetzeko. Azkenik, 20:00etan emango zaie amaiera jaiei agur ofizialarekin, urtero auzoko ekintzak bizirik mantentzen laguntzen duten denda eta erakundeei eskerrak emanez.

PROGRAMAZIOA

Zapatua, ekainak 13

• 11:00 – Jaien hasiera

• 11:00 – Umeentzako jolasak eta puzgarriak

• 11:00 – Txistulariak (Jaizale Txistulari Elkartea).

• 14:00 – Paella aurkezpena, paella lehiaketa

• 16:00 – Herri kirolak eta puzgarriak

• 19:00 – Monologuista: KIKE BIGURI.

• 21:00 – Rifen zozketa

• 21:00 – Kontzertua: Ur, Leven Slave y Blackmoon

• 01:00 – Txosnaren itxiera

Domeka, ekainak 14

            12:00 – Magia ikuskizuna MAGO OLIVER.

• 16:30 – Apar festa

• 17:00 – Txokolatada herrikoia

• 17:45 – Salsa tailerra eta Dantza

• 20:00 – Agurra eta Jaiaren Amaiera

The post Muruetatorre jaietan murgiltzeko prest dago asteburuan first appeared on DOT Durangaldea.

DURANGO | Datorren ekainaren 12an, Bartolome Ertzilla Musika Eskolako Bart…Sax! taldeak ikasturte amaierako kontzertua eskainiko du Durangoko Ezkurdi plazan. Oraingo honetan, taldeak swing erritmoetan oinarritutako errepertorioa aurkeztuko du, musika eta dantza uztartuz eta herritarrei aire zabalean gozatzeko aukera eskainiz.

Kontzertuan, musikariak Ezkurdiko kiosko historikora igoko dira, entzulez eta lindy hop dantzariz inguratuta. Izan ere, ekimenaren helburua ez da soilik musika entzutea, baizik eta bizitzea eta sentitzea ere. Swing musikarekin batera sortu zen lindy hop dantza, 1920ko hamarkadako komunitate afroamerikarraren adierazpen kultural gisa, eta gaur egun ere bere energia, jariotasuna eta izaera ireki eta parte-hartzaileagatik nabarmentzen da.

Horretarako, Bart…Sax! taldeak, Itziar Castrilloren zuzendaritzapean, lankidetza estuan jardungo du Durangaldeko Swing Taldearekin. Azken urteotan, talde honek dantza estilo hau Durangaldeko herritarrengana hurbiltzeko lanean dihardu, Korrala Sormen Gunean antolatzen dituen tailer eta jardueren bidez.

Jardunaldiak egitarau bikoitza izango du. Lehenik, 17:00etatik 18:30era, Bartolome Ertzilla Musika Eskolako aretoan lindy hop klase ireki bat eskainiko dute Bilboko Little Harlem eskolako Iker eta Gina irakasleek. Saioa publiko guztiei zuzenduta dago eta swingaren munduan lehen urratsak egin nahi dituztenentzat aukera paregabea izango da.

Ondoren, 19:00etan, Ezkurdiko kioskoan, Bart…Sax! taldeak swing erritmoetan oinarritutako kontzertua eskainiko du. Emanaldian guztira hamahiru pieza interpretatuko dira big band formatuan, eta Elaia Berrojalbiz abeslari gaztearen ahotsa ere izango da protagonista hainbat kantutan. Hogei musikari inguruk hartuko dute parte kontzertuan.

Ekimenak aukera bikaina eskainiko du aire librean, komunitatean eta giro parte-hartzailean musikaz eta dantzaz gozatzeko. Antolatzaileek herritarrak gonbidatu dituzte jardunaldian parte hartzera eta swingaren erritmoan murgiltzera, arratsalde berezi eta ahaztezin bat partekatzeko asmoz.

The post Bart…Sax! musikaz eta dantzaz beteko dute Ezkurdi first appeared on DOT Durangaldea.

ABADIÑO – Abadiñoko Udalak datozen urteetarako zaintzen arloko lan-ildo nagusiak markatuko dituen diagnostikoa eta ekintza plana aurkeztuko ditu. Plan hau azterketa kuantitatibo zein kualitatibo baten eta parte-hartze sozialeko prozesu sakon baten emaitza da. Prozesu horretan arduradun politikoek, udal-teknikariez gain, gizarte-eragileek, zerbitzu publikoen kudeatzaileek eta adinekoen elkarteek hartu dute parte. Helburua argia da: gaur egungo eta etorkizuneko beharrei erantzuteko (bereziki 60 urtetik gorako pertsonei dagokienez), herrian zaintza nola hobetu elkarrekin definitzea.

Udalerriaren errealitatetik sortutako eredu parte-hartzailea

Jarduera Plana Abadiñoko errealitatearen azterketa zehatz batetik abiatu da, herritarrak nola bizi diren, zer behar dituzten, haien egoera sozial eta ekonomikoa zein den, eta erabilgarri dauden zerbitzuak zeintzuk diren xehetuz. Horretarako, arlo soziodemografiko, soziohabitazional, sozioekonomiko eta sozioedukatzaileko datuak eta proposamenak aztertu dira, betiere herritarren eta gizarte-eragileen ahotsarekin, esperientziekin eta proposamenekin aberastuta.

Eredu berria bost arlo handitan antolatzen da:

• Parte-hartzea eta jarraipena: Herritarrek iritzia emateko, jarraipena egiteko eta erabakietan parte hartzeko guneak sortzea.

• Informazioa eta eskubideak: Informazioa eta eskura dauden zerbitzu zein laguntzetarako sarbidea hobetzea.

• Hurbileko zerbitzu irisgarriak: Baliabideak egokitzea, auzo eta pertsona bakoitzera hobeto irits daitezen.

• Bakardadearen aurkako borroka: Bakarrik sentitzen diren pertsonei laguntzeko ekimenak indartzea.

• Iraupen luzeko zainketak: Arreta-eredu hurbilagoak, malguagoak eta egoera bakoitzera egokituak bultzatzea.

Hurbiltasunean eta komunitatean oinarritutako prebentzioa

Proposatutako eredua zaintzak hurbiltasunetik garatzeko ideiarekin egituratzen da; hau da, pertsonen ohiko ingurunean, sare komunitarioak indartuz eta zerbitzu publikoen, herritarren eta auzokideen arteko lankidetza sustatuz. Era berean, prebentzio-izaera nabarmena du: mendekotasun-egoerei aurrea hartzea eta adinekoen bizi-kalitatea hobetzea bilatzen du, laguntza-beharrizan handiagoak agertu baino lehen, udal-eskumenen eremuaren barruan.

Prozesua ez da diagnostiko honekin amaituko. Udalak lanean jarraituko du jasotako jarduerak pixkanaka garatzeko, betiere Durangoko Merindadearen Mankomunitatearekin, Osakidetzarekin, Bizkaiko Foru Aldundiarekin eta herriko gizarte-sarearekin (adinekoen eta auzo-elkarteak) koordinatuta, Zainketen Koordinazio Mahaian zehaztuko den ibilbide-orri baten bidez.

“Eredu hau ez da dokumentu bat bakarrik, Abadiño ulertzeko modu bat da: guztion artean zaintzen, laguntzen eta eraikitzen den herri bat”, adierazi dute Udaletik.

Aurkezpen irekia 

Prozesua jendaurrean azaltzeko, ekainaren 9an (bihar), bilera ireki bat egingo da Errota Kultur Etxean, 18:00etan. Dokumentua xehetzearekin batera, bertaratutakoen iritziak eta hobetzeko proposamenak jasoko dira.

Era berean, bilera horretan, estrategia honen baitan abian jarriko den proiektu berritzaile bat aurkeztuko da: Auzosare eredua. Ekimen honen helburua bakardade-egoeretan dauden pertsonak garaiz detektatzea eta esku hartzea da. Proiektu hau Europa mailan jardunbide egokitzat jotzen da eta laster jarriko da martxan Abadiñon.

The post Abadiñok ‘Auzosare’ eredua aurkeztuko du gaur first appeared on DOT Durangaldea.

DURANGO | Medicus Mundi Bizkaiak Durangoko Udalarekin lankidetzan antolatutako “Durangotik Hegoaldera” lehiaketaren hirugarren edizioa gaur eman da ezagutzera prentsaurrekoan, herritarrak osasunari, berdintasunari eta elkartasunari buruz sentsibilizatzeko.

Lehiaketak helburu bikoitza du. Alde batetik, Durangon osasuna eta berdintasuna hobetzeko ekimenak proposatzera gonbidatzen ditu elkarteak, ikastetxeak, erakundeak eta herritarrak. Bestetik, parte-hartzaileek Guatemalako errealitatea eta Medicus Mundik bertan garatzen dituen proiektuak bertatik bertara ezagutzeko aukera izango dute.

18 urtetik gorako hiru pertsonako taldeek har dezakete parte, eta horietatik gutxienez bik Durangon bizi, lan egin edo jaiotakoak izan behar dute. Izena ematea doakoa da eta 2026ko ekainaren 17ra bitarte egongo da zabalik, esteka honetako inprimakiaren bidez. Bertan, lehiaketaren xehetasun guztiak ere kontsulta daitezke. Parte-hartzaileek proposamenak helbide honetara bidali behar dituzte: educa.bizkaia@medicusmundi.es.

Proposamenak udalerrian osasuna eta ekitatea sustatzeko izango diren jarduerak izan beharko dituzte ardatz, eta horien artean tailerrak, zineforumak, erakusketak, esku-hartze artistikoak, ikerketak edo kaleko ekintzak egon daitezke. Originaltasuna, bideragarritasuna, irismena eta Medicus Mundiren misioarekiko koherentzia baloratuko dira.

Azken ekitaldia ekainaren 18an izango da, 18:00etan, Andragunean. Bertan, talde bakoitzak bere proposamena partekatuko die gainerako taldekideei zein epaimahaiari, eta parte-hartzaile guztiei aitortza egingo zaie. Epaimahaiak erabakiko du zein izango den talde irabazlea, eta emaitzak parte-hartzaileei jakinaraziko zaizkie, baita Medicus Mundi Bizkaiaren webgunean eta

sare sozialetan ere. Bidaia talde bakar batek jasoko badu ere, erakundeak beste proposamen interesgarri batzuk lagundu edo gauzatu ahal izango ditu.

Talde irabazleak 6-10 eguneko bidaia bat jasoko du Guatemalara, tokiko erakundeak bisitatuz eta lankidetza proiektuetan parte hartuz. Gainera, Guatemalako esperientzia partekatzeko konpromisoa hartu beharko du, Durangon aurkezpen, edukien edo elkarrizketen bidez, Medicus Mundirekin koordinatuta.

Saria eskuratzeko, ezinbestekoa da proba puntuagarria entregatzea. Parte hartzeak lehiaketaren oinarriak eta arauak onartzea dakar, Jokabide Kodea betetzea, hizkuntza inklusiboa erabiltzea, ingurumenarekiko errespetua eta datu pertsonalen tratamendua barne. Ezin izango dira Epaimahaiaren partaide izan aurreko irabazleak, kontratatutako langileak, Medicus Mundi Bizkaiko Zuzendaritza Batzordeko kideak eta haien zuzeneko senideak.

Jesica Ruiz, Durangoko Udaleko Immigrazio zinegotziak, “Durangotik Hegoaldera 2026” gisako ekimenen garrantzia azpimarratu du, herritarren parte-hartzea, elkartasuna eta osasunari eta berdintasunari buruzko sentsibilizazioa sustatzeko. “Lehiaketak Medicus Mundi Bizkaiaren eta Durangoko Udalaren arteko hamar urteko lankidetza sustatzen du, eta aukera ematen die herritarrei proiektu berritzaileak proposatzeko, Durango inklusiboagoa eta nazioarteko lankidetzarekin konprometituagoa izan dadin”. Lehiaketari buruzko informazio gehiago nahi izanez gero, webgune honetara jo daiteke.

The post Abian da ‘Durangotik Hegoaldera 2026’ proiektua first appeared on DOT Durangaldea.

ABADIÑO | Zine-karteldegiak denboraldiko estreinaldirik indartsu eta dotoreenetako bat hartzeko prest daude: Alberto San Juan buru duen ‘La Luz’ film luzea. Trailer ofizialak ikusmin handia piztu du zinemazaleen artean, eta, aktore talde bikainaz gain, pelikulak lotura estua du gure lurraldearekin. Izan ere, pelikularen ardatz den tentsio eta misterio giro hori Urkiolako Parke Naturalean lortu dute, eszena garrantzitsu batzuk Santutegiaren barruan zein inguruko parajeetan grabatu baitzituzten.

Suspense psikologikoa eta sekretuak dira istorio honen hari nagusiak. Ezusteko gertakari batek protagonisten ustezko lasaitasuna hankaz gora jarriko du, eta ezer ez den bezalako errealitate bati aurre egin beharko diote. Modu horretan, egiaren (edo “argiaren”) bilaketa erlojupeko lasterketa zirraragarri bihurtuko da, ezusteko eta biraketaz betea.

Isolamendu eta bakardade testuinguru horretan, Urkiolak berebiziko garrantzia hartzen du. Atzealdeko dekoratu hutsa izan beharrean, Bizkaiko mendiek beste pertsonaia baten pisua dute, narrazioak behar duen misterio eta magnetismo itzala zabalduz.

Luxuzko aktore taldea

Istorio ilun honi bizitza emateko, ‘La Luz’ pelikulak ibilbide luzeko izen handiak eta talentu berriak uztartu ditu. Kritikak, hain zuzen ere, aktoreen lana goraipatu du; elkarrizketek ez ezik, begiradek, isiltasunek eta inguruko tentsioak pisu itgela baitute pelikulan zehar.

Sustapen lanetan, talde tekniko zein artistikoko kideek euskal mendietako filmaketaren gogortasuna eta edertasuna ekarri dituzte gogora. Azpimarratu dutenez, inguruko eguraldi aldakorrak eta gunearen energiak berezko errealismo organikoa eman diote filmari, eta horixe bera islatuko da pantaila handian.

Trailerrak milaka ikustaldi daramatza dagoeneko eta ikusmina nagusi da. Gauzak horrela, ‘La Luz’ urteko esperientzia zinematografiko handienetako bat bihurtzeko osagai guztiak ditu: ezinbesteko hitzordua thriller zaleentzat eta Urkiolako paisaia ikonikoak pantaila handian ikusteko aukera paregabea.

The post ‘La Luz’, Urkiolan filmatutako eszenak dituen thrillerraren estreinaldia first appeared on DOT Durangaldea.

AMOREBIETA-ETXANO | Berriki ospatutako Saratxu, Bernagoitia eta San Isidro auzoetako jaien ondotik, asteburu honetan Elgezabal auzoaren txanda izango da. Ekainaren 5etik 14ra bitartean, auzoa jai giroan murgilduko da, publiko guztientzako proposamenez betetako egitarau batekin.

Jaiak ohiko kanpai-hotsa eta bolanderekin hasiko dira, eta astelehenera bitarte jarduera ugari eskainiko dira: mus eta briska txapelketak, poteoa trikitilariekin, auzo-bazkaria, igel eta tortilla lehiaketak, erromeria zuzeneko musikarekin, meza, haurrentzako jarduerak puzgarriekin, parrillada eta txokolatada barne.

Horrez gain, ekainaren 13an, larunbata, San Antonio egunean, meza ospatuko da auzoko hildakoen omenez. Igandean, hilak 14, Elgezabalek auto klasikoen kontzentrazioa hartuko du Inbisako industrialdean, motorraren zaleentzako hitzordua, jaiei amaiera biribila emanez.

The post Zornotzako San Antonio jaiak Elgezabalen bariku honetan hasiko dira first appeared on DOT Durangaldea.

Lehiaketak udalerriko tokirik gustukoenen irudiak partekatzera gonbidatzen ditu herritarrak

DURANGO | Durangoko Udaleko Turismo Sailak “Durangoko nire txokorik gogokoena” argazki-lehiaketaren bigarren edizioa jarri du abian. Instagram bidezko lehiaketa horrek herritarrak gonbidatzen ditu udalerria berezi egiten duten espazio, paisaia, une eta elementuak irudien bidez erakustera.

The post “Durangoko nire txokorik gogokoena” argazki lehiaketa abian first appeared on DOT Durangaldea.

DURANGO  | Durangoko Udalak, Mobidurango zerbitzuaren bidez, berriro ere ibilaldi osasungarriak antolatu ditu adineko pertsonentzat San Fausto eta Aramotz auzoetan. Ekimen honen helburu nagusia parte hartzen dutenen mugikortasuna, koordinazioa eta oreka sustatzea da, eta, aldi berean, aire zabaleko jarduera fisikoa bultzatzea eta bizilagunen arteko sozializazioa eta gozamena sustatzea.

Ibilaldiak ibilbide seguruak bermatzeko diseinatuta daude, ordubete inguruko iraupenarekin, eta jarduera fisikoaren zientzietako tituludunek gidatzen dituzte, jarduera parte-hartzaile bakoitzaren ezaugarrietara egokitzeko.

Oraingo honetan, ibilaldiak ekainaren 5ean, 12an, 19an eta uztailaren 3an egingo dira. Ordutegiak eta irteera puntuak honako hauek dira: Aramotzen 9:30etik 10:30era Otamotzena Gizarte Etxetik, eta San Fauston 11:00etatik 12:00etara eliza paretik.

Gainera, Udalak ohiko ibilaldi osasungarriak eskaintzen ditu asteazkenetan, 9:30ean, Kurutziagako iturritik irtenda, eta ekainaren 17ra bitarte izango dira.

Parte hartzeko, aurretik izena eman behar da, Adinekoen Arloaren bidez 944 657 451 telefonora deituz, edo Mobidurango zerbitzura 637 419 418 zenbakira deituz.

The post Ostiralean adinekoentzako ibilaldi osasungarriak hasiko dira Durangon first appeared on DOT Durangaldea.