GARAI | Udalak ia 73.000 euroko zenbatekoa inbertitu du azpiegitura hori egiten. Kopuru horretatik, 50.500 euro jarri du Bizkaiko Foru Aldundia. Gainerako guztia -azpiegituraren xehetasunak aztertzeko helburuz eskatu zen txosten teknikoa ere-, Garaiko Udalak jarri du, ia 30.000 euro.

2025. urteko aurrekontuak eztabaidatzeko prozesuan, Herriko Taldeak proposatu ostean, udalean ordezkaritza duten bi taldeek, Herriko Taldeak eta EAJ-PNVk, Garain komun publiko baten bideragarritasunari buruzko txostena (kokagune posibleak, egin beharreko inbertsioaren zenbatekoa eta abar) egiteko asmoz, 5.430 euroko diru-zuzkidura aurreikusi zuten.

2025eko udaberrian, txostena eskuetan, udala gobernatzen duen taldeak, hainbat irizpide kontuan hartuz (erabilgarritasuna, irisgarritasuna, argitasuna, ura, estolderia eta argia hartzeko tokirik hurbilena), erabaki zuen azpiegitura San Migel auzoko umeen jolas-eremuaren ondoan jartzea, dirulaguntzak eskatu zituen eta esleipen prozesua abian jarri.

Esan beharra dago azpiegitura berria egitasmo zabalago baten barruko ekimena dela. Ekimen horri jarraikiz, umeek jolas-eremua urte osoan balia dezaten, jolas-eremua estali eta, esparru horretan gertatzen diren aldian aldiko beroaldien ondorioak apaltzeko xedez, irla klimatikoa eraikiko da. Era berean, obra sute-ahoak instalatzeko baliatu da, balizko suteei aurre egiteko modua izan dezan udalak.

The post Garaik komun publiko berria estreinatu du San Miguelen 73.000 euroko inbertsioarekin first appeared on DOT Durangaldea.

GARAI | Inbertsioa herri-bideetan. Garaiko Udalak auzoetako azpiegiturak hobetzeko planarekin jarraitzen du eta Emaldirako errepideko lanak amaitu berri ditu. Azken jarduketa honekin, erakundeak 174.381 euroko inbertsioa egin du agintaldi honetan guztira, udalerriko auzo-errepideak berritzera eta mantentzera bideratuta.

Emaldirako bidean egin diren azken lanen bidez, areka erabat konpondu da eta bidea margotu da, segurtasuna eta ikusgaitasuna areagotzeko asmoz.

Udal planak onurak utzi ditu herriko hainbat gune estrategikotan:

• Aiartza auzoa (Beratuko errepidea): Oso-osorik konpondu da. Arekak txukundu, asfaltatze lanak egin eta babes-hesi bat jarri da bertan.

• Urrestiko eremua (Oiz mendirako bidea): Asfaltatze lanak gauzatu dira eta hondatuta zeuden porlanezko xaflak konpondu ditu Udalak.

Lanek ez dute etenik Garaian. Datozen asteetan, Udalak lizitazio prozesu berriak abiatuko ditu herri-bideetan hobekuntzak egiten jarraitzeko:

1. Aiartzako auzoaren zati batean arekak konpontzea.

2. Momoitioko San Juanetik Urienera doan bidean arekak egiteko lanak esleitzea.

3. Etxeita artera (Etxeitako artera) doan errepidean zabalera gehigarriak egitea. Azken honek ibilgailuak gurutzatzea eta herritarren igarobidea erraztuko du, auzotarren segurtasuna nabarmen hobetuz, bereziki neguko hilabeteetan.

The post Garaiko Udalak Emaldirako errepidea konpontzeko lanak amaitu ditu first appeared on DOT Durangaldea.

GARAI | Garaiko Udalak eta Gerediaga Elkarteak lankidetza hitzarmena jarri dute martxan herriko ondare material eta ez-materiala ikertu, aztertu eta biltzeko asmoz. Tokiko erakundeak bultzatutako ekimen honek Garaiko memoria historikoa eta ohiturak berreskuratzea du helburu, denboraren pasatzearekin batera galdu ez daitezen.

“Herri baten ondarea hizkeran, bizipenetan, belaunaldiz belaunaldi transmititutako ohituretan eta etxean gordetzen ditugun paperetan islatzen da”, nabarmendu du Erramun Osa Garaiko alkateak. Osak defendatu du erakunde publikoen zeregina dela ondare hori babestea: “Nondik datorren ez dakiena eta zer bihurtu den ulertzen ez duena, enborrik gabeko zuhaitza bezalakoa da”. Hori dela eta, Gerediaga Elkartearengana jo dute arlo horretan erreferente nagusia delako.

Bestalde, Gotzon Gomez Gerediaga Elkarteko presidenteak ilusio handia erakutsi du lan talde berri honekin: “Herritarren kontakizunak entzunez eta etxeetan kontserbatzen diren dokumentuak aztertuz, Garaiko historian murgilduko gara. Lan baliotsua eta oso interesgarria izango da”.

Proiektua datozen hilabeteetan garatuko da eta oso zehatzak diren hiru lan-ildoren inguruan egituratuko da:

• Bideo-elkarrizketak interneterako: Ikertzaileek hainbat herritarrekin hitz egingo dute Garaiko antzinako bizimodua nolakoa zen jasotzeko. Etxeen arkitektura, lanbide tradizionalak, elikadura, jolasak, eskola edo auzolana izango dituzte hizpide. Testigantza hauek guztiak bideoz grabatuko dira eta sarean jarriko dira herritar guztien eskura.

• Material grafikoa biltzea: Argazki eta irudi zaharren bilaketa bat egingo da, herriaren iraganaren ispilu bisual gisa balioko dutenak.

• Dokumentu pribatuen inbentarioa: Garaiko baserriek balio historiko handiko eskuizkribuak gordetzen dituzte (jabetza paperak, nekazaritza jardueraren datuak edo familia-kronikak). Helburua esparru pribatuan zainduta dauden dokumentu horien inbentario oso bat egitea da.

Gerediagako ikertzaileak laster jarriko dira harremanetan herritarrekin elkarrizketak hasi eta familiako artxiboak kontsultatzeko. Bi erakundeek dei egin diete garaitarrei proiektuan aktiboki parte har dezaten, euren oroitzapenen eta etxeetako ateak zabalduz, Garaiko historiaren puzzle hau guztien artean osatzeko.

The post Garaiko Udalak eta Gerediagak indarrak batu dituzte herriko ondare historiko berreskuratzeko first appeared on DOT Durangaldea.

GARAI – Garaiko Udalak argiteria publikoa berritzeko lanak egin ditu San Migel auzoko eremu batean. Guztira, 21 kale-argi edo farola eta hainbat detektagailu aldatu dira, eta jarduketa honek 10.600 euroko inbertsioa suposatu du.

Berritu den tarteak herriko hainbat azpiegitura garrantzitsu hartzen ditu barne; hala nola, frontoia, kultur etxea, kirolgune berria, San Migel eliza, Garaiko landetxea, hilerria, oinezkoentzako ibilbidea eta inguruko aparkalekua.

Udaletik azaldu dutenez, inbertsio honek hiru helburu nagusi ditu:

• Segurtasuna bermatzea: Argi nahikoa egon dadin, herritarrak zein bisitariak eremu horretan gauez era seguruan ibili ahal izateko.

• Eraginkortasuna eta aurrezpena: Duela hainbat urte instalatutako sistema zaharkitua kendu eta sistema efizienteago bat ezarri da, energiaren kontsumoa gutxitzeko.

• Ingurumena zaintzea: Argi-kutsadura murriztea lortu nahi da; horretarako, beheko aldea ahalik eta ondoen argiztatuko da, baina zerurantz igortzen den argitasuna apalduz.

Lan hauen bidez, Garaiko erdiguneko auzo honek azpiegitura modernoagoa, jasangarriagoa eta seguruagoa izango du hemendik aurrera.

The post Garaiko Udalak San Migel auzoko argiteria berritu du first appeared on DOT Durangaldea.

GARAI  | Udalak Milikua sektorean kokatutako eraikigarria den lursail baten salmenta iragarri du. Erabaki honekin, Udalak herrian bizitzeko aukera eman nahi dio familia berri bati, udalerrian gaur egun etxebizitzak eraikitzeko dagoen lursail falta arintzeko asmoz.

Salgai jarri den finkak 3.066,12 metro koadroko azalera du guztira. Hirigintza-aukeren inguruan, gehienezko eraikigarritasuna 377 metro koadrokoa dela zehaztu du erakundeak.

Udalak 61.690,09 euroko irteera-prezioa finkatu du (BEZik gabe). Kopuru horretatik gora, interesatuek beren proposamen ekonomikoak aurkeztu ahal izango dituzte lurra erosteko.

Epeak eta eskaerak

Eskaintzak aurkezteko epea datorren ekainaren 30eko 14:00etan amaituko da. Indarrean dagoen araudia jarraituz, tramitazioa modu elektronikoan egin beharko da nahitaez.

Baldintza-pleguari buruzko zalantzak argitu edo informazio zehatza nahi duten pertsonek, Garaiko Udalaren ohiko arreta-kanalak erabil ditzakete bulego-ordutegiaren barruan.

Datu nagusiak

• Lur azalera: 3.066,12 m²

• Eraikigarritasuna: 377 m²

• Gutxieneko prezioa: 61.690,09 € (+ BEZ)

• Epe muga: Ekainak 30 (14:00)

• Tramitazioa: Soilik elektronikoa

The post Garaik Milikua sektoreko orube bat jarri du salgai, familia berrien etorrera errazteko first appeared on DOT Durangaldea.

GARAI | Duela hamahiru urte udalek sinatutako akordio ofizial gisa hasi zena, ezinbesteko hitzordu bihurtu da Garaiko eta Lantziegoko egutegietan. Joan den larunbatean, maiatzak 9, Bizkaiko herriak anfitrioi lanak egin zituen Lantziegoko bizilagun eta ordezkari talde zabal bati harrera egiteko, urtero topagunea txandakatzeko ohiturari jarraituz.

Eguna San Juan de Momoition hasi zen; bertan, garaitarrek hamaiketako batekin hartu zituzten bisitariak. Harreraren ondoren, taldea Trumoitako esparru harresitura joan zen, Garaiko ondarearen bitxietako bat ezagutzeko bisita kulturala egitera.

Goizeko une esanguratsuenetako bat San Migel elizaren ondoan bizi izan zen. Bertan, senidetzearen ikurrak biltzen dituen parkean elkartu ziren partaideak: artea, mugarria eta Arabako Errioxatik ekarritako mahastiak. Ohikoa denez, taldeko argazki tradizionala atera zuten puntu horretan, bi herrien arteko harremanaren sendotasuna irudikatuz.

Jaiak herriko plazan jarraitu zuen, dozenaka lagun bildu zituen herri-bazkari batekin. Astean zehar euri-iragarpenak egon arren, jai giroak eta musika doinuek girotu zuten bazkalostea. Pandemiaren etenaldiaren ostean, lotura honek indar guztia berreskuratu duela erakutsi zuten bertaratutakoek.

Ekitaldi honekin, Garaik eta Lantziegok anaieratasun ituna berritu dute, erakundeetatik haratago, bizkaitarren eta arabarren arteko adiskidetasun egun bihurtuz.

The post Garaik eta Lantziegok senidetze harremanak estutu dituzte jardunaldi hunkigarri batean first appeared on DOT Durangaldea.

GARAI | Garaiko Udalak amaitutzat eman ditu Oiz mendiaren inguruan basoberritzeko eta bideak konpontzeko proiektuaren lehen faseari dagozkion lanak, 91.000 metro karratu inguruko azalera hartu duen jarduketa. Proiektua Udalaren, Bizkaiko Foru Aldundiaren eta Iberdrolaren arteko lankidetzari esker garatu da.

Baso-berritzeari dagokionez, 82.202 euroko inbertsioa egin da eta 90.770 metro koadroko azaleran jardun da. Trumoita inguruan, 45.500 metro karratuko eremuan, hosto erorkorreko espezie autoktonoak landatu dira, hala nola haritz melatuak, arteak eta urkiak. Guztira, 2.738 zuhaitz landatu dira; horietatik mila baino gehiago haritzei eta arteei dagozkie, eta 547 urkiak dira.

Gainerako lursaila, 52.000 metro koadro inguru, itsas pinuz eta zedroz berritu da, eta guztira eremu osoan landatutako 3.000 zuhaitzak gainditu ditu. Lanak amaitu ondoren, babes-itxiturak jarri dira landaketa berriak babesteko.

Lursail bakoitzaren orientazioaren eta ezaugarrien arabera aukeratu dira espezieak. Udalaren arabera, proiektuaren helburu nagusiak honako hauek dira: basoa dibertsifikatzea, bertako espezieei protagonismo handiagoa ematea, Oiz ibaiaren ingurunea ingurumenaren ikuspegitik berreskuratzea, baso-jarraitutasuna bermatzea eta hegaztientzako eta beste fauna-espezie batzuentzako ekosistema berriak sortzea. Gainera, Udalak azpimarratu du, beste jarduera batzuetatik datozen diru-sarreren eskasia dela eta, baso-ustiapen jasangarria dela udalerriaren etorkizuneko diru-sarreren iturri nagusietako bat.

31.000 euro bideak hobetzeko

Azpiegiturei dagokienez, oinarrizko konponketak egin dira Oiz mendira sartzeko bidearen hasierako zatian. Udalak 16.000 euro inbertitu ditu asfaltoa hondatuta duten eremuetan zuloak eta pitzadurak konpontzeko eta hormigoizko zati bat birgaitzeko. Guztira, 31.000 euroko inbertsioa egin da bideak hobetzeko.

Azkenik, Garaiko Udalak lursail txikien jabe pribatuekin akordioak lortu ditu lursail horiek udaleko baso-politikan integratzeko. Akordio horiei esker, mendi publikoen hedadura eta jarraitutasuna handitu nahi dira, eta basoen dibertsifikazioa indartu. Ildo horretan, Udala 90.000 metro koadro mendi publiko bihurtzeko lanean ari da aurten, Garaiko mendiguneari egitura eta kudeaketa sendoagoak emateko.

The post Garaik Oizen egindako basoberritzeko eta bideak hobetzeko lehen fasea amaitu du first appeared on DOT Durangaldea.

GARAI | Udalak  jakitera eman duenez, herriko bizilagunek martxoaren 31n, asteartea, NAN eta/edo pasaportea berritzeko aukera izango dute. Horretarako, aldez aurretik hitzordua eskatu beharko da Garaiko Udalera deituta.

Tokiko iturriek azaldu dutenez, beste herri batzuetan gertatzen den bezala, Polizia Nazionalaren furgoneta lehen aldiz joango da herrira, herritarrei NANa eta pasaportea berritzeko aukera eskaintzeko.

The post Garaitarrek martxoaren 31n berritu ahal izango dituzte NANa eta pasaportea first appeared on DOT Durangaldea.

GARAI | Gaur goizean, Garain, Bizkaiko Foru Aldundiak landatartasun handiena duten udalerrientzako ezohiko laguntzen programa berria aurkeztu du. Guztira, 5 milioi euroko inbertsioa aurreikusten du ekimenak, eta helburua da landa-bideak hobetu eta mantentzea, udalerri txikienek azpiegitura horiek mantentzeko dituzten zailtasunei erantzunez.

Aurkezpenean Elixabete Etxanobe ahaldun nagusia izan da, Garai­ko alkate Erramun Osarekin batera, eta bertan izan dira foru eta udal ordezkariak ere. Etxanobek azaldu duenez, programa honek “udalerriek eskualde-topaketetan egindako eskaera errepikatu bati” erantzuten dio, eta nabarmendu du Bizkaia “ez dela soilik azpiegitura handiekin eraikitzen”, baizik eta eguneroko azpiegitura txikien zaintzarekin ere, lurralde-kohesioa bermatzeko.

Funtsezko laguntzak

Bestalde,  Osak azpimarratu du udalerri txikientzat laguntza mota hauek funtsezkoak direla. “Landa-bideez ari garenean, sakabanatuta bizi diren pertsonak jartzen ditugu erdigunean”, adierazi du, bide horiek eguneroko mugikortasuna errazten dutela eta bizi-kalitatea hobetzen laguntzen dutela azpimarratuz.

Programa Bizkaia Denontzat estrategiaren barruan kokatzen da, eta landatartasun-mapa eta biztanleria-dentsitatea hartuko ditu kontuan dirulaguntzen portzentajea zehazteko. Guztira, 83 landa-udalerrik jaso ahal izango dituzte laguntzak, udalerri bakoitzeko 60.000 euroko gehieneko zenbatekoarekin. Dekretu arautzailea udaberrian argitaratzea aurreikusten da, eta laguntzak 2027ko apirilera arte justifikatu ahal izango dira.

The post Aldundiak landa-bideetarako 5 milioiko foru plana aurkeztu du Garain first appeared on DOT Durangaldea.