LEIOA | Txorierri eta Lamiako lotzen dituen udal igogailua martxan da berriro Txorierri eta Lamiako lotzen dituen igogailuak zerbitzua berreskuratu du, konponketa-lanak eta beharrezko egiaztapen teknikoak amaitu ondoren.

Esku-hartzearen bidez, igogailuaren motorrean zegoen matxura konpondu da. Horretarako, Alemaniatik ekarritako osagai espezifikoak behar izan dira, eta horrek konponketa-epeak luzatu ditu.

Lan guztiak amaituta, igogailua berriro dago erabilgarri, eta bi eremuen arteko lotura berreskuratu du, erabiltzaileen joan-etorriak erraztuz.

Igogailuaren zerbitzua berreskuratzearekin batera, Leioako Udalak aldi baterako ezarritako autobus-zerbitzua ere amaituko da. Zerbitzu hori igogailua geldirik egon den bitartean jarri da martxan, auzotarren joan-etorziak errazteko eta matxurak eragindako eragozpenak arintzeko.
Horrela, ordezko garraio-zerbitzua urriaren 25era arte, igandea barne, egongo da martxan, igogailuaren ohiko funtzionamendua berrezarri denez gero.

The post Txorierri eta Lamiako lotzen dituen udal igogailua martxan da berriro Leioan first appeared on DOT Durangaldea.

GETXO | Arene, Iturgitxi, Zubilleta eta Maidaganen komun publikoak jartzea izan da 2027ko Aurrekontu Parte-hartzaileen bigarren fasean boto gehien jaso dituen proposamena. Irailaren 17tik 27ra egin zen bigarren fasea. Lehenetsitako proiektuetan, aurrekontu hauetara bideratzen den milioi bat euroko urteko partida inbertituko da, ordena honetan:

1.- Arene, Iturgitxi, Zubilleta eta Maidaganen 4 komun publiko jartzea

2.- Zubilletako haur-parkea estali eta berritzea

3.- Aire zabaleko zinema udan

4.- Gazteentzako kontzertuak Muxikebarriko Arrigunaga aretoan

5.- Bizitzak salbatzen dituzten panelak instalatzea (jokabide suizida prebenitzeko kanpaina)

6.- 50 m-ko igerilekuan horma bereizgarriak eta garabi-aulki eramangarriak Faduran eta Gobelan

Sei proiektuak batuta, inbertsioa 988.300 eurokoa da.

Prozesua

Bigarren fase honetan 1.495 pertsonak hartu dute parte (1.493 2025ean). Horietatik 1.142k aurrez aurreko kanalen bidez parte hartu dute (2025ean 1.307) eta 353k Zeugaz online plataformaren bidez (2025ean 186). Boto baliogabeak 60 izan dira (76 iaz), beraz, baliozko ekarpenak 1.435 dira. Aurten ere bide presentzialetatik jaso da elkarte baten ekarpena, eta, beraz, 1.436 ekarpen baliodun egin dira guztira (1.417 2025ean).

Emakumeek emandako botoen %57,84 ordezkatzen dute; gizonek, gainerako %42,16; eta lehenengoen parte-hartzea handiagoa izan da, bai aurrez aurre, bai online (Zeugaz).

Adinaren arabera, onlineko portzentaje handiena (%34,8) 45-54 urtekoei dagokie, eta ondoren, 35-44 urtekoei (%25,2) eta 55-64koei (18,7%); 65 urtetik gorakoek botoen %9 inguru hartzen dute. Parte-hartze presentzialaren kasuan, 65 eta 74 urte bitarteko pertsonak dira talde ugariena osatzen dutenak (%21,6), ondoren 35 eta 44 urte bitartekoak daude (%16,7) eta, azkenik, 45 eta 54 urte bitartekoak (%15,9). Bi boto-prozedurak batuta, parte-hartzerik handiena 45 eta 54 urte bitartekoei dagokie (%20,6), eta, ondoren, 35 eta 44 urte bitartekoei (%18,8) eta 65 eta 74koei (%18,1).

The post Getxon lau komun publiko jartzea, gehien bozkatutako proposamena first appeared on DOT Durangaldea.

LEIOA | Urriaren 23an, ostiralean, 19:00etan izango da hitzordua, Ikea Barrin. Ondoren, Pinuetan, Trivial kaletarraren edizio berri bat egingo dute, udalerriari buruzko ezagutzak modu dibertigarrian partekatzeko.

Leioaren 500. urteurreneko ospakizunek bi hitzordu berri izango dituzte urriaren 23an. Alde batetik, Gure Ohiturak eta Txikiak dantza taldeek Dantza Plaza berezia eskainiko dute elkarrekin, euskal dantzak eta tradizioak ardatz hartuta. Bestetik, arratsalde-gauean, Pinuetan egingo den Trivial kaletarrak Leioari buruzko ezagutzak proban jartzeko aukera emango du.

Dantza Plaza 19:00etan hasiko da, Ikea Barrin. Leioako herritar guztiei zuzendutako emanaldi berezi honen bidez, udalerriaren urteurrena ospatzeaz gain, euskal folklorearen eta tokiko ohituren balioa nabarmendu nahi dute.

Dantza-saioaren ondoren, ospakizunak Pinuetan jarraituko du, 20:30etik aurrera. Trivial kaletarraren edizio berri honetan, parte-hartzaileek Leioako historia, datuak eta bitxikeriak ezagutzeko eta partekatzeko aukera izango dute, giro atsegin eta dibertigarrian.

Urriaren 30ean eta 31n

Urteurreneko egitarauak beste bi data esanguratsu izango ditu urriaren amaieran. Urriaren 30ean, Leioa Eguna ospatuko dute Artatza jauregian, 20:00etatik aurrera. Ekitaldiaren bidez, udalerriko elkarteen lana eta Leioari egiten dioten ekarpena aitortuko dituzte. Aurten, Leioa Egunaren saria GAUDE elkarteari emango diote, desgaitasun intelektuala duten pertsonei eta haien familiei urte luzez eskainitako laguntzagatik eta aukera berriak sortzeko egindako lanagatik.

Urriaren 31n, berriz, Leioaren 500. urteurrenaren data zehatzean, ospakizun-egun berezia egingo dute. Goizean, Leioa tiene un tesoro ekimenaren fase berri bat jarriko da martxan, 9:00etatik 14:00etara, udaletxearen inguruan.

Arratsaldean, 20:00etan, Errekalde plazan egingo dute urteurreneko ekitaldi nagusia: Leioa Invisible ikuskizuna. Musikak, dantzak eta emozioak bat egingo dute Leioaren bost mendeko historia ospatzeko.

Ikuskizunaren amaieran, azken tuperrak sinbolikoki lurperatuko dituzte. Une horretan, 500 lagunek hartuko dute parte, udalerriaren historiako urte bakoitza ordezkatuz.

Egunari amaiera emateko, txokolatada herrikoia eta kale-animazioa izango dira Bidebarri bulebarrean, eta erromeria, berriz, Ikea Barrin.

The post Leioak euskal dantza eta tradizioak uztartuko ditu 500. urteurrena ospatzeko first appeared on DOT Durangaldea.

SOPELA | Astelehen honetan egindako iraileko ohiko Osoko Bilkuran, Sopelako Udalbatzak aho batez onartu zuen Bizkaiko Foru Aldundiari Uribe Kosta eta EHUko Leioako campusa lotzen dituen Bizkaibus zerbitzuan, bereziki A2166 linean, premiazko neurriak har ditzala eskatzeko mozioa. Ekimenak udal talde guztien aldeko botoak jaso zituen: EH Bildu, Elkarrekin Podemos, EAJ-PNV, PSE-EE eta Auzokideen Alternatiba.

Udala hainbat auzotarren eta unibertsitateko ikasleen kexen jakitun da; izan ere, eskari handiko ordutegietan autobusek beren edukiera osatzen dute udalerriko azken geltokietara iritsi baino lehen —bereziki Larrabasterran—, eta erabiltzaile asko zerbitzurik gabe eta klaseak galtzeko arriskuan geratzen dira.

Onartutako akordioaren bidez, Sopelako Udalak honako hau eskatu dio Aldundiari eta Bizkaibusi:

1. A2166 linearen saturazio-egoera premiaz aztertzea.
2. Beharrezko neurriak berehala hartzea, erabiltzaileek udalerriko geraleku guztietan lineara sartzeko aukera bermatzeko.
3. Garraio-eskaintza indartzea, maiztasunak handituz, errefortzu-zerbitzuak jarriz edo edukiera handiagoko ibilgailuak erabiliz
4. Etengabeko elkarrizketa mantentzea Sopelako Udalarekin egoeraren jarraipena egiteko.

Udal Gobernuaren ustez, garraio publikoa funtsezko zerbitzua da eta benetako eskarira egokituta egon behar du, udalerriko ehunka gazteren goi-mailako hezkuntzarako sarbidea bermatzeko.

The post Sopelako Udalbatzak aho batez eskatu dio Aldundiari EHUrako Bizkaibus zerbitzua indartzeko first appeared on DOT Durangaldea.

GETXO  | Udal-gobernuaren (EAJ/PNV eta PSE-EE) eta PP udal-taldeen aldeko botoekin, eta EH-Bildu eta Elkarrekin Podemos udal-taldeen aurkako botoekin,  onetsi dute Osoko Bilkuran, behin-behinean, Getxobus hiri-garraio kolektiboaren zerbitzu publikoaren tasa arautzen duen ordenantza fiskala. Zerbitzu horren barruko erabilerako erregelamenduari oniritzia eman diote boto berdinekin, baina Elkarrekin Podemos taldearen abstentzioarekin.

Alderdi guztiek aurkeztu dituzte euren ordenantzarako zuzenketak eta azkenean onetsi egin da, EAJ/PNV, PSE-EE eta PP taldeek planteatu duten moduan,  aldizkako txartela 2 eurotik 1 eurora jaistea (EH-Bilduk 0,50 € proposatu du eta Elkarrekin Podemosek doakotasuna). Era berean, Gobernuaren eta PP udal-taldearen arteko akordioa egon da Barik txartelean integratutako tituluen tarifetarako: 0,60 euro Creditrans arruntarekin eta 0,35 euro Gizatransekin (65 urtetik gorakoentzat eta desgaitasuna duten pertsonentzat), Udal-gobernuak proposatu duen bezala.

Familia ugarientzako ezarritako tarifa 0,48 euro eta 0,30 euro Creditransekin, eta 0,28 euro eta 0,18 euro Gizatransen, kategoriaren arabera. Mugikortasun-kanpainak edo interes orokorreko jarduerak direla eta, doako egunak ezartzeko aukera ere jaso da. Zuzenketa hori PPk aurkeztu du eta EAJ/PNVk eta PSE-EEk onartu dute.

Tarifa horiek espreski ezartzeak bermatzen du etorkizunean zenbatekoak aldatu nahi badira, Udalak baloratu eta onetsi beharko dituela aldaketak. Aldi berean, Getxobus Barik sistemara gehitzea ahalbidetzen du, baita gainerako tituluentzat Bizkaiko Garraio Partzuergoak ezarritako baldintzak mantentzea ere.

Beharrezko izapideek eta prozedurek aurreikusi diren epeak errespetatzen badituzte, proiektu pilotu hau Gabonen inguruan jar liteke martxan.

Getxobusen erregelamenduari dagokionez, EH-Bilduk osoko zuzenketa bat —ezetsia izan dena— eta hogei bat zuzenketa partzial —horietako batzuk hizkuntza eskubideak defendatze aldera— aurkeztu ditu. Elkarrekin Podemosek ere beste hogei zuzenketa proposatu ditu, baina horietako gehienak ezetsi egin dira.

EH-Bildu eta Elkarrekin Podemos udal-taldeek uste dute Getxobus proiektua gaizki diseinatuta dagoela, zenbait auzoa kanpoan uzten dituela (Azkorri, Portu Zaharra, Santa Ana…), tarifa garestiak planteatzen dituela, eta, gainera, erregelamendua asko hobetu daitekeela. EAJ/PNV, PSE-EE eta PP udal-taldeek, berriz, defendatzen dute prezioak irisgarriak direla, Bizkaiko Garraio Partzuergoaren tituluekin bat egiten dutela eta proba pilotu bat egiteko erregelamendua dela, bere lehen hilabeteetan nola funtzionatzen duen ikustea eskatzen duena, beharrezkoa den guztian ebaluatu eta hobetu ahal izateko.

Mozioak

Mozioen kapituluan, testigantza izaerako hiru onetsi dituzte. Lehenengoa PP taldeak aurkeztu du Algortako Sarrikobaso eta Telletxe kaleen artean pasabide bat eraikitzeko beharrezkoak diren azterketak hasteko tramiteak irekitzea eskatzeko. Beste biak egin ditu EH-Bilduk, udal liburutegietako euskarazko bibliografia-funtsa pixkanaka handitzeko Plan bat abian jartzeko, besteak beste, eta alkateak oposizioko taldeei 2027ko aurrekontu-proiektua bidaltzeko, araudiak ezarritako dokumentazio guztiarekin batera, eta ondoren Udalbatzan aurkezteko.

Azkenik, jendearen eskaeren eta galderen txandan, esku-hartzeak gai partikularrei buruzkoak izan dira, besteak beste, Salsiduko arrapalak martxan jartzeari, lonjak etxebizitza bihurtzeko baldintzak malgutzeari, eta garbitasuna eta lorezaintza hobetzeari buruzkoak.

The post Getxobus noizbehinkako txartela euro batekoa izango da first appeared on DOT Durangaldea.

The post Getxobus martxan jarriko da gabonak baino lehen, urtebeteko proba pilotuarekin first appeared on DOT Durangaldea.