BIZKAIA | Bizkai Buru Batzarrak Ibone Bengoetxea Otaolea Bizkaiko Ahaldun Nagusi izateko hautagai gisa eta Ana Otadui Biteri Bizkaiko Batzar Nagusietako presidente izateko hautagai gisa proposatzea erabaki du gaur arratsaldean, 2027ko maiatzaren 23rako aurreikusita dauden udal eta foru hauteskundeei begira. Oinarriek berretsi beharko dute proposamena, urriaren erdialdetik aurrera irekiko den barne-prozesuan.

Ibone Bengoetxea

Ibone Bengoetxea bilbotarra da eta esperientzia instituzional eta politiko handia du. Erakunde-sare osoaren lehen mailako ezagutza du, erantzukizun handienaren ikuspegitik.

Bilboko Udaleko Alkateordea izan da Iñaki Azkunaren agintaldian; Euskadiko Udalen Elkarteko (EUDEL) Presidentea; Herri Administrazioko eta Erakunde Harremanetarako Foru Diputatua; gaur egun Eusko Jaurlaritzako Lehen Lehendakariordea da.

Euzko Alderdi Jeltzalean afiliatuta dago 1991.urtetik eta kudeaketa-arlo ugari ezagutzen ditu, erantzukizun publikoaren garapenean hainbat arlotako buru izan baita. Garraioak, kultura, hezkuntza, administrazio publikoa, harreman instituzionalak, giza baliabideak, komunikazioa, komunikabide publikoak eta hizkuntza-politika kudeatu ditu.

Ana Otadui

Ana Otadui Biteri Elorriotarra da. Bizkaiko Batzar Nagusietako presidentea da 2015. urtetik. Zuzenbidean lizentziaduna da, Deustuko Unibertsitatean ikasi zuen eta unibertsitate horretako Euskal Ikasketen Sailean aritu ondoren, funtzionario plaza lortu zuen Bizkaiko Foru Aldundiko Administrazio Orokorreko teknikari gisa, oposizio bidez.

Ogasuneko, Lehendakaritzako eta Kulturako foru sailetan lan egin du bere ibilbide profesionalean, eta, gaur egun, Administrazio Orokorreko teknikaria da, kultura-ondareko zerbitzuan eszedentzian dagoena.

2005etik Eusko Alderdi Jeltzalean afiliatua, 2007ko udal hauteskundeetan Elorrioko Udalerako EAJren hautagaitzaren buru izan zen. Lau urtez oposizioko bozeramaile izan ondoren, 2011n Elorrioko Alkate izendatu zuten, eta erantzukizun hori 2009tik aurrera Eusko Legebiltzarreko eserlekuarekin bateragarri egin zuen. 2015eko ekainean, Bizkaiko Batzar Nagusietako lehendakari hautatu zuten.

The post Ibone Bengoetxea Ahaldun Nagusirako eta Ana Otadui Batzar Nagusietarako proposatu ditu EAJk first appeared on DOT Durangaldea.

BILBAO | Udalak bukatu ditu Lezamako Trenbide Zaharreko bidean (2. barrutia, Uribarri) dauden begiratoki bi egokitzeko obrak. Esku-hartze horri esker, espazio horiek hobetu eta nabarmendu ahal izan dira eta egoteko eremu erosoagoak, irisgarriagoak eta seguruagoak bihurtu dira, herritarrek erabiltzeko aukera izan dezaten.

Jarduketa horrek 128.838,73 euroko aurrekontua izan du eta hiru hilabetetan gauzatu da. Horrela, bada, lekuaren egoera hobetu eta irudia berritu da, eta zoladura berria, hiri-altzariak, edateko ur-iturriak, babes- eta argiztapen-elementuak jarri dira.

Esku-hartzea kalearen leku bitan egin da. Lehenengoa 65A-65C atarien ondoan dago; bigarrena, berriz, Artxandako funikularraren trazaduraren eta Artxandako igoeraren artean dago. Bi puntu pribilegiatu horietatik Bilboko hiri-paisaia ikus daiteke.

Begiratokia bi berritu dira

Lehenengo begiratokian espazioa erabat berritu da, hormigoizko galtzada-harri aurrefabrikatuz zolatutako plataforma berri bat sortuz. Gainera, eremua berriro antolatu da eta edateko uraren iturri berri bat, eserlekuak, paperontzia eta babes-baranda bat instalatu dira, erabiltzaileen erosotasuna eta segurtasuna handitzeko.

Jarduketa osatzeko, argiztapena hobetu da proiektagailu bat jarrita eta lorezaintza-lanak eginda.

Bigarren begiratokian zoladurak erabat berritu dira -gainazal-akabera apaingarria izango du- eta egoteko leku berri bat jarri da. Era berean, edateko ur-iturri bat, eserlekuak eta babes-baranda berria jarri dira eta, gainera, argiztapena indartu da, luminaria integratua duen zutabe baten bidez.

Eremu bietan zuhaitz berriak landatuko dira udagoienean, mota horretako jardueretarako garai egokiagoa baita; horrela, behar den moduan ezartzen eta espazioa paisaian integratzen lagunduko da.

The post Bilbok Lezamako trenbide zaharreko bidean bi behatoki egokitzeko lanak amaitu ditu first appeared on DOT Durangaldea.

Thriller berria gala handi batekin eta alfonbra gorriarekin aurkeztuko da Bilboko Euskalduna Jauregian, datorren irailaren 29ko arratsaldean

BILBAO | Catherine Zeta-Jones aktore galestar ospetsua, Oscar bat eta BAFTA bat (Chicago filmarekin) eta Tony bat irabazi dituena, Bilbora itzuli da KILL JACKIE seriearen nazioarteko aurkezpena egiteko. Iaz filmatu zuten, 20 astez, Bilbo, Bizkaia, Londres eta Swanseako kokaleku ezagunetan.

Irailaren 29an izango da, Bilboko Euskalduna Jauregian. Gala handi bat egingo da, alfonbra gorri eta guzti, eta 20:00etatik aurrera bi kapitulu proiektatuko dira.

Ekitaldi berezi honetan, aktorea bera, Juan Mari Aburto Bilboko alkatea eta Ainara Basurko Bizkaiko Foru Aldundiko Ekonomia Sustatzeko diputatua egongo dira. Gainera, aktoreetako batzuk ere etorriko dira: Óscar Jaenada, Sidse Babett Knudsen, Darci Shaw, Julian Rhind Tutt, Christine Adams eta Hattie Hook. Damon Thomas zuzendaria, Tom Butterworth showrunnerra, Peter Lawson ekoizle exekutiboa eta José Luis Escolar ekoizlea ere hor izango dira.

Bilboko ekitaldia estreinaldiaren atarikoa izango da. Hain zuzen ere, seriea urriaren 2an estreinatuko da: HBO Max-ek, Espainian, Portugalen, Suedian, Danimarkan, Norvegian, Finlandian, Islandian, Frantzian eta Belgikan.   PRIME VIDEOk, berriz, Erresuma Batuan, Irlandan, Herbehereetan, Turkian, Alemanian, Austrian, Suitzan, Liechtensteinen, Luxenburgon eta Kanadan emango du, eta AMCk Estatu Batuetan.

Asteartean bertan, irailak 29, prentsaurreko berezi bat egingo da goizean Euskal Museoak Bilboko Zazpikaleetan dituen instalazioetan.    Komunikabideekin egingo den topaketa horretan, Catherine Zeta-Jones aktoreak berak parte hartuko du, Juan Mari Aburto alkatearekin eta Ainara Basurko diputatuarekin batera. Aktoreen, zuzendariaren eta ekoizleen laguntza izango dute, aukera bikaina filmaketan parte hartu duen talde osoa zuzenean ezagutzeko.

KILL JACKIE zortzi ataleko serie bat da, Sunday Times-en best sellerren zerrendan ageri den The price you pay liburuan oinarritua. Liburuaren idazlea Nick Harkaway da (Aidan Truhen izenordearekin idazten du eta John Le Carré idazle ezagunaren semea da).

Filmaketa osoan zehar, Bilboko eta Bizkaiko leku oso ezagunak erakutsiko dira, Londresekin eta Galeseko Swansearekin batera. Zatirik handiena, seriean agertzen diren espazioen ehuneko 78, Bilbo eta Bizkaiko lekuak dira, eta gainerakoa (% 22), Erresuma Batua, Gipuzkoa eta Nafarroakoak.

Trailerrak Bilboko eta Euskadiko toki ezagunenetako batzuk erakusten ditu, besteak beste, Catherine Zeta-Jones gaueko soineko batez jantzita Guggenheim Museoaren aurrean pasieran. Airetiko planoak ere baditu, La Salve zubia eta Jesusen Bihotzaren monumentua gainetik erakutsiz. Era berean, jet pribatuz betetako aireportu batean filmatutako eszenak ageri dira. Sekuentzia ikusgarrienetako batean, terminala lehertu egiten da. Baina berez Getxoko gurutzaontzien terminala da.

Serieak, gainera, protagonista erakusten du Solokoetxe auzoko eskaileretatik salto egiten, Gaztelugatxeko San Joan ermitara joaten, eta Bizkaiko Foru Aldundiaren Kale Nagusiko Jauregian, fikziorako Londresko luxuzko hotel bihurtua. Beste eszena aipagarri batzuk Getxoko Punta Begoñako galerietakoa (sikario batzuk agertzen dira) eta Donostiako Kontxako badiara ematen duen igerileku txundigarrikoa dira.

Filmaketa taldea

200 profesionalek baino gehiagok parte hartu dute britainiar ekoizpen honetan, The price you pay eleberrian oinarritua. Zuzendaritza nagusia Damon Thomas da, Killing Eve-n egindako lanagatik ezaguna; Tom Butterworth, berriz, Gangs of London-ekin lotuta dagoena, serieko showrunnerra da.

Zeta-Jonesekin batera ageri dira Óscar Jaenada (Rambo V, Cantinflas), Daniel Ings (El caballero de los Siete Reinos, The Gentlemen), Sidse Babett Knudsen (Prime Target, Borgen), Hattie Hook (Of An Age, Ten Pound Poms), Darci Shaw (A Thousand Blows, This City is Ours), Raff Law (Masters of The Air, Triton), Enzo Cilenti (Black Mirror, The Crown), Christine Adams (Hijack, Malice), Julian Rhind–Tutt (Britannia, Napoleon), Karlis Arnolds Avots (Soviet Jeans, Lovable), Set Sjöstrand (La rueda del tiempo, Valhalla), Tadashi Ito (La Sociedad de la Nieve, El Hoyo 2), Sebastián Armesto (Gangs of London, A Small Light), Julian Barratt (The Mighty Boosh, The Great), Gavin Spokes (La Casa del Dragón, Slow Horses), Jonathan Cake (And Just Like That, Camping), Bamshad Abedi-Amin (A Town Called Malice, The Last Kingdom), Bill Paterson (Fleabag, Criminal Justice) eta Ron Perlman (Hellboy).

Killing Eve eta Gangs of London serieen sortzaileen eskutik, KILL JACKIE Fremantle-k eta Steel Springs Pictures-ek koproduzitu dute. Sortzaileak Conor Keane, Tom Butterworth (Gangs of London), Peter Lawson (John Wick) eta Damon Thomas (Killing Eve) dira. Hauek dira ekoizle exekutiboak: Peter Lawson eta José Agustín Valdés, Steel Springs Pictures-en aldetik, eta Tom Butterworth, Damon Thomas, Catherine Zeta-Jones, Rebecca Dundon, Dante Di Loreto eta Jeffrey Levine. Conor Keanek zati batean idatzi du telebistarako egokitzapena, eta ekoizle elkartua da. Nick Harkaway seriearen kontsultore exekutiboa da. José Luis Escolarren Deabru Kalea Filmeak ekoizpen-etxeak seriearen ekoizpena gainbegiratu zuen Bizkaian eta Erresuma Batuan.

Sinopsia

Jackie Pricek (Zeta-Jones) hogei urte daramatza luxuz inguratuta bizitzen: mundu osoan zehar bidaiatzen, artelanak saltzen eta, batez ere, anonimotasunari eusten, nazioarteko droga-trafikatzaile gisa duen iragan arriskutsutik ihes egin ondoren. Hain zuzen ere, bizitza pixka bat aspergarria izaten hasten denean, bat-bateko aldaketa bat gertatzen da, zeharo hilgarria, norbaitek “Zazpi Demonioak” –munduko sikario beldurgarrienek osatutako taldea– bera hiltzeko kontratatzen dituenean. Azpijoko horren atzean bere iraganeko norbait dagoelakoan, Jackie bere izaera zaharrera itzuli eta plan zentzugabe eta arriskutsu batean murgiltzen da: “Zazpi Demonioak” banan-banan akabatzea, berandu baino lehen. Hala ere, laster konturatuko da bere demonioak askoz ere beldurgarriagoak direla atzetik dituen hiltzaile ankerrak baino… eta bere ezkutuko sekretuek etxetik hurbil eramango dute.

The post Bilbok hartuko du asteartean Catherine Zeta-Jones protagonista duen seriearen munduko estreinaldia first appeared on DOT Durangaldea.

BIZKAIA | Arabako eta Bizkaiko foru-aldundiak Gorbeiako Gurutzearen zimenduak konpontzeko eta hobetzeko obrak hasi dituzte. Baterako jarduketa da, egituraren oinarria indartu eta egonkortzeko eta behar bezala kontserbatuko dela bermatzeko.

Lanak, batez ere, gurutzearen zimenduetan eta hura kokatuta dagoen lurra lehengoratzean oinarrituko dira. Pertsonen eta animalien etengabeko igarotzeak, gailurraren baldintza klimatikoekin batera, denboraren poderioz oinarriaren ingurunea higatzea eragin du eta zimenduaren berme-eremuaren zati bat agerian geratu da.

Jarduketa honi esker espazio hau egonkortu eta gurutzearen oinarria narriadurari eta higadurari aurre egiteko babestu ahal izango da eta, horrela, kontserbazioan lagunduko da.

Lanek hilabete inguruko iraupena izango dute. Aldi horretan Gurutzearen eta materialak biltzeko egokitutako gunearen perimetroa itxita egongo da, eta, beraz, lanak egiten diren bitartean ezin izango da gune horietara hurbildu.

Hala ere Gorbeiako gailurrerako sarbidea irekita egongo da, oro har. Bakarrik mugatu beharko da obraren fase jakin batzuetan, baldin eta fase horien ezaugarriak direla-eta segurtasun-neurriak zorroztu behar badira.

Arabako eta Bizkaiko foru-aldundiek instalatutako seinaleei kasu egiteko eta une oro basozaintzako langileen eta inguruan dauden bi aldundietako langileen jarraibideei jarraitzeko eskatu diete Gorbeiako Parke Naturalera hurbiltzen diren pertsonei.

Lanak egiten diren bitartean txangozaleak gailurrera iritsi ahal izango dira, baina ezingo dira Gurutzearen perimetrora edo Ama Birjinaren ingurura iritsi.

Postontzia eta orientazio-mahaia eskuragarri egongo dira. Azken elementu hau ere bi aldundiek adostutako jarduketen barruan dago, eta dagoeneko konpondu da.

Bateratuan egiten duten jarduketa

Gorbeiako Gurutzea Arabako eta Bizkaiko lurralde historikoen banalerroan dago, Gorbeiako Parke Naturalaren eta Kontserbazio Bereziko Eremuaren (KBE) barruan. Gurutzearen kokapenak eta bi erakundeek naturagune honen kudeaketan eta kontserbazioan dituzten eskumenek bultzatuta, bi aldundiek elkarrekin jardun dute elementua kontserbatzeko.

Joan den martxoan bi erakundeek lankidetza-esparrua adostu zuten gurutzearen zimenduak konpontzeko eta hobetzeko. Jarduketaren barruan sartzen dira oinarria hobetzeko lanak, orientazio-mahaia konpontzea eta inguruan dauden elementu arkeologikoen jarraipena eta babesa egitea.

Jarduketa guztietarako aurreikusitako inbertsioa 167.742,78 eurokoa da, BEZa barne, eta bi foru-administrazioek ordainduko dute, % 50ean.

The post Arabak eta Bizkaiak Gorbeiako Gurutzearen oinarria indartzeko lanak hasi dituzte first appeared on DOT Durangaldea.

BIZKAIA | Bizkaiko ahaldun nagusiak, Elixabete Etxanobek, Bizkaiko Foru Aldundiak antolatutako Bizkaian Hazi topaketan parte hartu du igande honetan. Ekimenak ume eta nerabeek erabakitzeko, sortzeko eta ekarpenak egiteko duten gaitasunean konfiantza izateko eta laguntzeko gai den lurraldea aldarrikatu du. Jardunaldiak elkarrekin bizitzeko, parte hartzeko, gaitasunak garatzeko eta kezka berriak aurkitzeko eskura dituzten programa eta ekimenetako batzuen berri eman du.

Ehun pertsona inguru bildu dira Bilboko Zabalgune eraikinean bizipenak partekatzeko eta gaur egun Bizkaian hazteak zer esan nahi duen hausnartzeko. Topaketaren abiapuntua ideia nagusi bat izan da: umeek eta nerabeek gaur egun bizi dutena lagungarria dela beste pertsona batzuekin eta haien inguruarekin harremanak izaten ikasteko, euren bide propioan aurrera egiteko eta dagoeneko parte diren gizarteari zer ekarpen egin diezaioketen jakiteko.

Aldundiak helburu partekatu batekin sustatu nahi ditu ekimen hauek: haurtzaroan eta nerabezaroan ikasitakoa pertsona bakoitzarengana zabaltzea eta Bizkaia lurralde parte-hartzaileagoa, kohesionatuagoa, berritzaileagoa eta etorkizuneko erronkei aurre egiteko prestatuagoa egiten laguntzea. Ahaldun Nagusiak azpimarratu du haurtzaroaz eta nerabezaroaz hitz egiteak babesaz eta zaintzaz hitz egitea esan nahi duela, baina baita konfiantzaz, parte-hartzeaz eta autonomiaz ere.

Zeharkako apustua

Bizkaian Hazi ekimenean aurkeztutako programek Bizkaiko Foru Aldundiak ume eta nerabeei laguntzeko egindako zeharkako apustu iraunkorra islatzen dute. Politika honen bidez babesa, autonomia eta konfiantza uztartu nahi dira.

Etxanobek azpimarratu duenez, parte-hartzea ez dela soilik legezko betebehar bat: “Parte hartzea ez da instituzioek hitz egiteko baimena ematea. Zuen eskubidea eta erantzukizuna da”. Era berean, gaineratu du zeregin hau ezin dela bakarrik erakundeen erantzukizuna izan, familia, ikastetxe, udal eta gizarte-, kultura- eta kirol-eragile guztien inplikazioa eskatzen baitu.

Parte hartzeko guneak

Bizkaian Haziren lehen blokeak umeen eta nerabeen parte-hartzea izan du ardatz. Bere esku-hartzean Ahaldun Nagusiak aurreratu du Foru Aldundia Haur eta Nerabeen Foru Kontseilu propio bat sortzen ari dela, erakundearen ahotsa politika publikoetan txertatzeko egitura egonkor gisa. Gaur egun lurraldeko 21 udalerrik dute Haur eta Nerabeen Tokiko Kontseilua (tartean Durango eta Zornotza), eta horietatik 16k Foru Aldundiaren laguntza jaso dute.

Bigarren blokeko protagonistak zientzia, teknologia, sormena eta ekintzailetza izan dira. Bertan, Egin eta Ekin (18.692 parte-hartzaile) eta TUMO Bilbao-Bizkaia (1.500 gazterentzat) bezalako proiektuak nabarmendu dituzte, beste hainbat foru-ekimenekin batera (AIC Academy, GreenPower, First Lego League, Zientzia Azoka edo Industria Erronka).

Hirugarren blokean esperientzia praktikoak partekatu dira: Udalekuak programa (40 urteko ibilbidea eta 1.500 plaza baino gehiago 2026an), Señeak Bizkaia Rock Kanpusa eta Eskola Kirola (aurten 46.000 neska-mutilek hartzen dute parte).

Ekitaldian zehar Eider Eibar ilustratzaileak mural bat egin du zuzenean, topaketako ideiak eta ahotsak biltzen dituen kontakizun bisuala osatuz.

The post Etxanobek autonomian eta babesean oinarritutako foru eredua aldarrikatu du first appeared on DOT Durangaldea.

BILBAO | Urte honen hasieran, Ertzaintzak ikerketa bat jarri zuen abian, Bilboko epaitegi batetik ofizio bat bidali ondoren, jasotako salaketa bat ikertzeko eskatuz. Biktimak, Espainiako nazionalitatea duen 21 urteko gazte batek, trafiko-isunak jasotzen ari zela adierazi zuen, nahiz eta gidabaimenik ez izan, inolako harremanik ez zuten ibilgailuetatik.

Egindako ikerketen ondorioz, salatzailea gutxienez hamar ibilgailurekin lotuta zegoela berretsi zen. Ibilgailu horietako batzuetan titularra zen, eta beste batzuetan, berriz, ibilgailu horiek gidari gisa erabiltzea egotzi zitzaion, zehapenetan eta zirkulazio-istripuetan.

Egindako gestioei esker, ibilgailuak salerosten zituen gizon bat identifikatu ahal izan zen, eta ibilgailuen titulartasuna bere gain hartu beharrean biktimaren izenean jartzen zuen. Ondoren, auto horiek hainbat delitutarako erabiltzen ziren (lapurretak, gasolindegietan ez ordaintzeak…), eta zirkulazio-istripuetan ere inplikatuta zeuden, eta trafikoko ehun arau-hauste inguru egin ziren, biktimari erantzukizuna egotziz. Ikusi ahal izan zenez, erabilitako dokumentazio faltsutua Bizkaiko bi gestoriatan izapidetu zen.

Hori guztia dela eta, salatzailearen nortasuna usurpatzeko ibilgailuak behin-behinean edo formalki erregistratzeko diseinatutako sare baten aurrean zeudela ondorioztatu zen.

Egoera horren aurrean, eta beharrezko egiaztapenak egin ondoren, 26 urteko gizon bat atxilotu dute, eta ikertutako eginbideak ireki dizkiete 61 eta 20 urte bitarteko beste bosti eta 47 urteko emakume bati. Guztiak espainiarrak dira. Berak eta ikertutako beste gizon batek hainbat aurrekari dituzte, eta aurretik behin eta bost aldiz atxilotu dituzte, hurrenez hurren.

Beharrezko eginbideak amaitu ondoren, atxilotua epailearen esku jarriko dute. Atxilotuak polizia-aurrekariak ditu, eta aurretik ere atxilotu dute.

The post Sare bat desegin dute Bilbon, gazte baten nortasuna usurpatuz trafiko-isunak egozteagatik first appeared on DOT Durangaldea.

BILBAO | Kategora Zorrotzaurre Development SLk eskatuta izapidetutako dokumentuaren helburua da Zorrotzaurreko Plan Berezian ezarritako eraikigarritasunak doitzea eta, horrela, eraikinaren eta haren ingurunearen hirigintza-antolamendua zehaztea.

Xehetasun-azterketak 2026ko martxoan jaso zuen hasierako onespena eta ondorengo jendaurreko informazio-aldian ez da alegaziorik jaso. Era berean, Itsasertz Mugartearen eta Ondare Batzordearen aldeko txostenak jaso ditu espedienteak, eremuaren eta higiezinaren beraren ezaugarriak kontuan hartuta.

Corominas Industrial eraikina higiezin babestua da eta hirugarren sektoreko erabilerari eusten dio; beraz, hirigintza-tresnak plangintzan aurreikusitako eraikigarritasun-baldintzak egokitzea ahalbidetzen du, izaera babestuari eta erabilerari eutsiz.

The post Zorrotzaurreko Corominas Industrial eraikinaren xehetasun-azterlana behin betiko onartuko da first appeared on DOT Durangaldea.