BERRIZ | TESTAREG proiektuak bere Kick-off Meeting edo abiarazte-bilera ofiziala egin du Berrizen, Urkiola Landa Garapenerako Elkartearen egoitzan. Topaketa honekin hasiera eman zaio nekazal test guneak indartzeko eta landa-eremuetan ekintzailetza eta errelebo generazionala sustatzeko mugaz gaindiko ekimen berri honi.

Proiektuak Europar Batasunaren kofinantzaketa du, Interreg VI-A Espainia-Frantzia-Andorra (POCTEFA 2021-2027) Programaren eta FEDER funtsen bidez. Bilera honetan, erakunde bazkideetako ordezkariek lehen lan-ildoak ezarri, kudeaketa-egitura balioztatu eta datozen bi urteetarako jardueren egutegia zehaztu dute.

Esperientziak partekatzea

TESTAREG proiektuaren helburu nagusia Katalunia, Euskadi eta Frantzia hegoaldeko nekazal test guneen arteko lankidetza sarea sendotzea da, ezagutza-trukea eta berrikuntza sustatuz. Topaketan zehar, parte-hartzaile bakoitzak bere esperientziak aurkeztu ditu, erronka komunei eta metodologia bateratuei erantzuteko oinarriak finkatuz.

Ekimenean erreferente diren hainbat erakundek hartzen dute parte:

• Euskal Herria: Lea Artibai Landa Garapenerako Elkartea, Urkiola Landa Garapenerako Elkartea, Trebatu test gunea (Iparralde) eta Institut Jean Errecart (Iparralde).

• Frantzia (Occitanie / Haute-Garonne): Le 100e Singe test gunea.

• Katalunia: BioPonent ekoizle ekologikoen elkartea (Lleida).

Horrez gain, proiektuak administrazio publikoen, ikerketa zentroen eta nekazaritzako elikagaien sektoreko erakundeen arteko foro lokalak eta sareak sortzea sustatuko du, nekazaritza-jardueran sartu nahi duten pertsona ekintzaileei laguntza hobea emateko.

Datozen urratsak

Abiarazte-bileraren ostean, proiektuaren lehen faseari emango zaio bidea: parte hartzen duten espazio testen diagnosi partekatua osatzea, praktika egokiak identifikatzea eta laguntza-tresna komunak diseinatzea.

Horrez gain, datorren udazkenean bilera teknikoak, ikasketa-bisitak eta jarduera bateratuak antolatuko dira test gune desberdinetan, lurraldeen arteko ezagutza-transferentzia errazteko eta mugaz gaindiko lankidetza sendotzeko.

The post TESTAREG proiektuak abiarazte-bilera egin du Berrizen first appeared on DOT Durangaldea.

DURANGALDEA | Berrizko Marino Lejarreta Belodromoaren etorkizuna borroka politikoaren esparru bihurtu da berriro ere Durangaldean. Mankomunitatearen osoko bilkura indartsu baten ostean, eskualdeko bi indar nagusiek erabateko zatiketa islatu zuten gurutzatutako bi mozioren bidez. Azpiegitura desblokeatu beharrean, proiektuaren kudeaketak sortzen duen distantzia agerian utzi dute. PNVk ezker abertzaleari txirrindularitzari “bizkarra ematea” leporatzen dion bitartean , EH Bilduk defendatzen du Mankomunitateak ezin duela bere gain hartu funtsezko zerbitzuak arriskuan jarriko lituzkeen zama ekonomikoa.

Eguna pistaren ondoan hasi zen. EAJ-PNVko ordezkariek, eskualdeko alkate, zinegotzi eta euskal txirrindularitzaren mito batzuekin batera —Marino Lejarreta bera edo Raúl Mena Rodríguez (Durangaldeko Belodromoko CDCko presidentea) kasu—, agerraldi publiko bat egin zuten instalazioaren narriadura progresiboari erantzun azkar bat eskatzeko.

Ordu batzuk geroago, presio hori Mankomunitatearen osoko bilkurara eraman zen talde jeltzalearen mozioaren bidez. PNVren ekimenak belodromoa “eskualdeko azpiegitura estrategiko” izendatzea zuen helburu, obren lehen fasearen bideragarritasuna bermatuz eta lizitazioa azkartuz, legegintzaldi hasieratik irauten duen blokeoarekin amaitzeko. Hala ere, proposamena atzera bota zen EH Bilduren kontrako botoekin. “Gaur EH Bilduk akatsa zuzentzeko eta erreferentziazko azpiegitura baten alde egiteko aukera zuen, baina legegintzaldi osoan zehar izandako blokeo berari eustea erabaki du”, salatu zuten gogor jeltzaleen lerroetatik , jada konprometituta zeuden aurrekontu-partidak galtzeko arrisku larriaz ohartaraziz.

Bestalde, Mankomunitateko gobernu taldeak, EH Bilduren eta Abadiño zein Garaiko Independenteen aldeko botoekin (eta PNVren aurkako botoarekin), goiko erakundeen inplikazio falta erdigunean jartzen duen itxaropen alternatibo bat atera zuen aurrera.

Onartutako testuan jasotako datu teknikoen arabera, belodromoa birgaitzeko eta estaltzeko kostu osoa 6,8 milioi eurokoa da. Zifra horren aurrean, Bizkaiko Foru Aldundiak joan den ekainaren 11n jakinarazi zuen bere ekarpena 1,5 milioi eurora mugatuko duela (lehen faserako bakarrik) eta instalazioaren ondorengo kudeaketa bere gain hartzeko “nula disposición” edo gogorik ez duela erakutsi du. Honi gehitu behar zaio Eusko Jaurlaritzak, momentuz, ez duela proiektuaren inguruan konpromiso ekonomiko errealik hartu.

Idoia Otaduy Mankomunitateko presidenteak defendatu du eskualdeko erakundeak gogor lan egin duela azken urteetan bideragarritasun formulak bilatzen, baina ohartarazi du gaur egun “ez dagoela nahikoa erakunde-adostasun”. Era berean, gogoratu du tokiko erakundeak ezin duela bere gain hartu horrelako belodromo baten zama ekonomiko eta operatiboa “oinarrizko gizarte-zerbitzuak edo hondakinen bilketa bezalako funtsezko zerbitzu publikoak arriskuan jarri gabe”.

Erreprocheak eta proiektuaren geldialdia agerikoak izan arren, Mankomunitateak azkenean onartutako mozioak eskualdeko txirrindularitzarekiko konpromisoa jasotzen du , baina edozein aurrerapen hiru aldeen arteko lan-mahai bat (Mankomunitatea, Foru Aldundia eta Eusko Jaurlaritza) berehala sortzeari baldintzatzen dio, proiektuaren gauzatzea eta etorkizuneko kudeaketa batera jorratu ahal izateko.

The post Berrizko Belodromoaren etorkizuna blokeo politikoan trabatu da first appeared on DOT Durangaldea.

BERRIZ | Eguazten honetan omenaldi hunkigarria egin zitzaion María Soledad Fernández Arroyo Alvearri, Berrizko Vera Cruz Merzedetako Misiolarien komentuan bizi den monjari, joan den apirilean bere 100 urtebetzea ospatu zuen eta.

Berrizko Udaleko ordezkariak komentura joan ziren bera pertsonalki zoriontzera eta harekin une atsegin bat partekatzera. Bisitan, oroitzapenezko plaka bat eta lore-sorta bat eman zizkioten, maitasunaren, aitortzaren eta esker onaren adierazgarri.

“Berrizko Udaletik gure zorionik beroenak helarazi nahi dizkiogu mendeurren berezi honengatik, eta osasuna eta ongizatea opa dizkiogu” azalu zuten udal ordezkariek.

Zorionak María Soledad!

The post María Soledad Fernández Alvearrek 100 urte bete ditu Berrizko komentuan first appeared on DOT Durangaldea.

BERRIZ | EAJ Durangaldeak agerraldia egin du gaur goizean Berrizko Marino Lejarreta belodromoan, instalazioa berritzeko eta estaltzeko obrak “guztiz geldituta” daudela salatzeko eta lanak berehala abiarazteko eskatzeko. Eskualdeko alkate eta kargu jeltzaleekin batera, txirrindularitzaren munduko aurpegi ezagunak egon dira babesa ematen, hala nola Marino Lejarreta bera, Iban Mayo eta Igor Antón txirrindulari ohiak, eta Raúl Mena Durangaldeko Belodromoko Kirol Klubeko presidentea.

Proiektuak hiru fase ditu eta 6,8 milioi euroko inbertsioa aurreikusten du guztira. Orlan Isoird Berrizko alkateak azaldu duenez, lehenengo fasea da premiazkoena (3,5 milioi eurokoa), egitura estali eta birgaitzea dakarrelako: “Behin hori eginda, gainontzeko lanei ekiteko sinergiak sortuko dira”.

Fase hori finantzatzeko 3 milioi euro bermatuta daude jada Mankomunitatearen eta Bizkaiko Foru Aldundiaren artean, eta jeltzaleek proposatu dute falta diren 500.000 euroak eskualdeko diru-geldikinarekin estaltzea. Bigarren eta hirugarren faseetan barruko guneak egokituko lirateke eta lehiaketa ofizialetarako egurrezko pista homologatua jarriko litzateke.

Mireia Elkoroiribe Durangoko alkateak adierazi du mozio bat defendatuko dutela gaur arratsaldean Durangaldeko Mankomunitateko osoko bilkuran, obren lizitazioa “lehenbailehen” abia dadin. EAJren ustez, EH Bilduk zuzentzen duen gobernu taldeak ez du egitasmoa bultzatu azken urteetan, eta jarrera horrek arrisku larrian jartzen du Aldundiak emandako 1,5 milioi euroko laguntza.

Ekitaldian, Raúl Menak instalazioa pairatzen ari den narriadura kezkagarria deitoratu du, eta Marino Lejarretak gogorarazi du neguko hilabeteetan entrenatzen jarraitu ahal izateko ezinbestekoa dela belodromo estali bat izatea.

The post EAJk Berrizko belodromoa estaltzeko lanak berehala lizitatzea eskatu du first appeared on DOT Durangaldea.

DURANGALDEA | EH Bilduk mozio bat erregistratuko du datorren osteguneko osoko bilkuran, Berrizko belodromoaren proiektua aurrera ateratzeko beharrezkoa den erakundeen arteko lankidetza eta finantzaketa bermatzeko asmoz. Ezkertiar koalizio subiranoaren ustez, “ezinbestekoa” da Bizkaiko Foru Aldundiak zein Eusko Jaurlaritzak euren ardura eta lidergoa bere gain hartzea, guztien artean irtenbide bat bilatzeko.

Ekimen hau joan den ekainaren 11n Durangoaldeko Mankomunitatearen eta Foru Aldundiaren artean egindako bileraren ostean burutu da. Koalizioak jakinarazi duenez, bilera horretan egiaztatu zen Aldundiak proiektuaren lehen fasearen zati bat besterik ez duela finantzatu nahi, eta ez duela bere gain hartu nahi ez jarduketa osoaren lidergoa, ezta etorkizuneko kudeaketaren konpromisoa ere. Bestalde, Eusko Jaurlaritzak ere ez du parte hartzeko borondaterik erakutsi.

EH Bilduren iritziz, erantzun hauek agerian uzten dute, gaur gaurkoz, belodromoaren proiektuak ez duela garapena bermatzeko beharrezko erakunde-konpromisorik. “Durangaldeko esparrua gainditzen duen proiektu baten aurrean gaude. Hori dela eta, ezin da erantzukizun osoa Mankomunitatearen gain geratu, eta are gutxiago horrek bere eskumenekoak diren oinarrizko zerbitzu publikoak ematea arriskuan jar balezake”, ohartarazi dute.

Lan-mahaia

Koalizioak gogorarazi du Mankomunitateak bere konpromisoa bete duela azken urteetan; izan ere, bideragarritasun-azterketa bat bultzatu du, eskualdeko alkateekin batera lan egin du eta harremanak izan ditu Foru Aldundiarekin proiektuari irtenbidea ematen saiatzeko. Horregatik, txirrindularitzarekin eta kirol-azpiegitura estrategikoekin “benetako konpromisoa” badago, erakundeek modu koordinatuan lan egin behar dutela defendatzen dute.

Plenoan aurkeztuko duen mozioaren bidez, EH Bilduk erakundeen arteko lan-mahai bat sortzea eskatuko die Bizkaiko Foru Aldundiari eta Eusko Jaurlaritzari. Gune horrek obraren exekuzioa zein belodromoaren ondorengo kudeaketa adosteko balio beharko luke, implikatutako erakunde guztien parte-hartzea eta konpromisoa bermatuz.

Azkenik, koalizioak azpimarratu du mozioaren helburua gai honen inguruan “erabateko gardentasuna” eskaintzea dela, proiektuaren benetako dimentsioa eta egungo egoera erakundetan argitzea, eta belodromoaren etorkizunari lankidetzatik, errealismotik eta epe luzerako bideragarritasunetik heltzea.

The post EH Bilduk mozio bat aurkeztuko du Berrizko belodromoaren proiektua salbatzeko first appeared on DOT Durangaldea.

BERRIZ – Bizkaiko txirrindularien kolektiboak ahotsa altxatu du gure lurraldean kirol honen etorkizunerako ezinbestekoa den proiektu bati bultzada emateko: Berrizko belodromoaren estalkia eraikitzea. Eskolek, klubek eta kirolariek “ezinbesteko azpiegutzat” jotzen dute lan hau, pistako txirrindularitza segurtasun osoz garatu eta praktikatu ahal izateko.

Kolektibotik gogorarazi dutenez, eguraldiaren menpe egoteak muga handia dakar, batez ere neguko hilabeteetan. Bizkaiko hotzak eta ohiko euriek modu erregularrean entrenatzea eta lehiatzea zaildu edo ezinezko bihurtzen dute. Belodromo estali batek, ordea, egoera hau zuzenduko luke, urte osoan zehar jarduera bermatuz eta entrenamendu zein lehiaketetarako baldintza egokiak eskainiz.

Prestakuntza eta kirol arloko arduradunek azpimarratu dute belaunaldi berrien etorkizuna jokoan dagoela. Gaur egungo beharretara egokitutako eta eguraldi txarretik babestutako azpiegiturarik gabe, oso zaila da beste lurralde batzuen mailan egotea eta pistako txirrindularitzan errelekua ziurtatzea.

“Belodromoaren estalkia ez da kapritxo bat, Bizkaiko kirolarientzat benetako premia bat baizik”, adierazi dute oharrean. Eskari honek, goi-mailako errendimendua laguntzeaz gain, tokiko txirrindularitza-eskoletan hasiberriak diren ume eta gazteentzat ingurune seguru bat eskaintzea du helburu.

Kirol arlotik harago, proiektua herritar guztien mesederako inbertsio estrategiko gisa defendatzen dute. Estalkiari esker, instalazioa erabilera anitzeko gune moderno bihurtuko litzateke. Horrela, txirrindularitza hartzeaz gain, kultura, gizarte edo bestelako kirol ekitaldiak antolatzeko gaitasuna izango luke, Durangaldeko eskualde osoarentzat balio handiko azpiegitura bilakatuz.

Dei zuzena Mankomunitateari

Kirolarien begirada guztiak tokiko administraziora zuzenduta daude. Eskari biltzaileek gogorarazi dutenez, pauso zehatzak ematea eta beharrezko konpromiso ekonomiko zein kudeaketakoak hartzea Durangaldeko Mankomunitatearen erantzukizuna da.

Hori dela eta, erakunde horri proiektua lehenbailehen bultzatzeko eta gauzatzeko eskatu diote indarrez, gure lurraldean hain erro sakonak dituen kirol honekin dagoen herri-zor historikoa behingoz kitatzeko.

The post Txirrindularitzak belodromoa “lehenbailehen” estaltzeko eskatu dio Mankomunitateari first appeared on DOT Durangaldea.

BERRIZ – Berrizko EAJ-PNVk aho batez aukeratu du Beñat Aguado Martinez 2027ko maiatzeko udal hauteskundeetarako alkategai. Erabaki honekin, alderdi jeltzaleak berrikuntzaren aldeko apustu garbia egin du herrian, etorkizunera begiratuko duen hautagaitza gaztea aurkeztuz, baina aldi berean, udal kudeaketan eskarmentua duena.

Izendapen honek inflexio-puntu politiko garrantzitsua dakar Berrizerako. Beñat Aguadok zerrendaburu izateko erronka hartuko du Orlan Isoird Refoyo egungo alkatearen agintaldi luzearen ostean. Isoirdek 2011ko ekainean eskuratu zuen herriko makila lehen aldiz (Jabier Azpitarte alderdikideari erreleboa hartuta).

Geroztik, lau legealdi jarraian daramatza udal gobernuaren buru (2011, 2015, 2019ko eta 2023ko hauteskundeak irabazi ostean). 2027rako aurreikusitako aldaketak Isoirden 16 urteko ibilbideari amaiera emango dio, udalerrian belaunaldi berri bati bidea zabalduz.

Gaur egun 29 urte dituen Beñat Aguadok gertutik ezagutzen ditu herriko gazteek eta familiek bizi dituzten erronkak. Berrizen jaio eta hazitakoa, herri-bizitzari eta elkartegintzari lotuta egon da beti —Berrizko Gaztedi Kultur Taldeko presidentea da gaur egun—, eta publikoki oso konprometitua dagoen familia batetik dator. Ikasketen aldetik, Automatizazio eta Robotika Industrialeko ikasketak amaitzen ari da, hainbat lanbidetan aritzearekin batera.

Hautagai gisa izendatua izan ondoren, Aguadok eskerrak eman dizkio Uri Batzarrari “emandako konfiantzagatik”, eta etapa berri honi “ilusioz eta arduraz” ekingo diola adierazi du. Bere lehentasunen artean bi ardatz nagusi azpimarratu ditu:

• Etxebizitza: Berrizko gazteei etxebizitza eskuragarria eta babestua bermatzeko neurriak bultzatzea, herrian euren bizi-proiektua garatu dezaten.

• Irisgarritasuna eta hirigintza: Herriko gunerik zaharrenak berritu eta egokitzea, Berriz irisgarriago, erakargarriago eta modernoago bat lortzeko.

Gaztea izan arren, alkategaiak ondo ezagutzen du udala barrutik. Egungo legealdian, Aguado Udaleko Antolakuntza Batzordeko burua da, Ogasun sailaren arduraduna izanda. Beraz, zuzen-zuzenean parte hartzen du udal aurrekontuen sorreran, ordenantzetan eta herriko kudeaketa ekonomikoan.

EAJ-PNVk nabarmendu duenez, hautagaitza honek “berrikuntza eta kudeaketa esperientzia” uztartzen ditu, herrigunearen eta auzo guztien (Andikona, Eitua, Murgoitio, Okango, Sallobente zein Sarria) errealitateari itsatsitako gobernu eredu hurbila defendatzeko konpromisoarekin.

Erreleboaren gakoak Berrizen:

• Hautagaia: Beñat Aguado Martinez (29 urte), egungo Ogasun batzordeburua udalean.

• Erreleboa: Orlan Isoird ordezkatu du zerrendaburu gisa, 2011tik herriko alkate dena.

• Programaren ardatzak: Gazteentzako etxebizitza babestua, auzoekiko lotura eta hirigintza irisgarria.

The post Beñat Aguado izango da EAJren alkategaia Berrizen 2027ko udal hauteskundeetan first appeared on DOT Durangaldea.

BERRIZ | Berrizburuko eremu berdean kokatutako espazio hau hirugarren urtez jarraian ireki da, eta adin ezberdinetako pertsonentzat diseinatutako hainbat ur-elementu ditu. Horien artean, honako hauek nabarmentzen dira: tamaina ezberdinetako ur-txorro bertikalak, helize formako bi ur-gortina espiralak eta “Water Jorney – Tide Pool” gunea, harrizko egiturekin erreka bat simulatzen duen ur-zirkuitua, txikien jolaserako pentsatua. Horrez gain, eremuak eguzkitakoekin, iturri batekin, bankuekin eta paperontziekin hornituta dagoen berdegune bat ere badu, baita espazioa mugatzen eta segurtasuna hobetzen duen egurrezko itxitura perimetrala ere. Solariuma maiatzaren 28an irekiko da.

Instalazioak egunero erabili ahal izango dira, astelehenetik igandera, 10:00etatik 20:00etara, eta urrira arte egongo dira zabalik. Sistemak sakagailu baten bidez funtzionatzen du, beraz, ura erabiltzen denean soilik aktibatzen da, erabilera arduratsua eta eraginkorra sustatuz.

Udalak instalazioen erabilera arduratsua egitearen garrantzia gogoratzen du, denboraldi osoan zehar guztien gozamena eta instalazioen egoera ona bermatzeko.

​

The post Berrizek berriro ireki du Berrizburuko ur-txorroen parkea first appeared on DOT Durangaldea.

BERRIZ | Eusko Jaurlaritzak bi trenbide-pasagune kenduko ditu Berrizen eta Bedian, Bilbo-Donostia linean trenbide-segurtasuna hobetzeko planaren barruan. Berrizen, Torretxoren jarduera lizitaziora atera da 2,3 milioi euroko aurrekontuarekin eta 12 hilabeteko egikaritze-epearekin. Berriztarren proiektuak bide berri bat eraikitzea aurreikusten du, trenbidearen azpiko pasagunea izango duena, egungo bidegurutzea ordezteko, obrak egin bitartean trenbide-pasagunea martxan mantenduz eta inguruko baserrietarako sarbidea bermatuz.

Bedian, Euskal Trenbide Sareak Sakarbiko trenbide-pasagunea kentzeko proiektuaren idazketa lizitatu du, 145.000 euroko aurrekontuarekin eta zortzi hilabeteko epearekin. Etorkizuneko jarduketak oinezkoentzako pasabide irisgarri bat aurreikusten du trenbidearen gainean, Asteitza eta Eroso-Ugarte auzoak lotzeko, trenbideak eta Ibaizabal ibaiak bereizita.

Jarduketa horiek ETSren politikaren parte dira, trafiko handiko trenbide-pasaguneak kentzeko eta trenbide-zerbitzuaren segurtasuna, erosotasuna eta kalitatea hobetzeko. 2020tik 2026ra bitartean, 20 trenbide-pasagune kendu dira, horietatik 12 Bizkaian.

The post Eusko Jaurlaritzak trenbide-pasaguneak kenduko ditu Berrizen eta Bedian first appeared on DOT Durangaldea.