DURANGO | Gaur, azaroak 25, Emakumeen Aurkako Indarkeria Desagerrarazteko Nazioarteko Egunean, Durangok bere ekitaldi instituzionala egin du Ambrosio Meabe plazan, indarkeria matxistak eraildako emakume guztiak gogoratzeko. 12:00etarako deitu dute hitzordua, eta adierazpen instituzionalaren irakurketan eta ondorengo lore eskaintzan parte hartu duten udal ordezkariak bildu dira; bai gobernu taldekoak, bai oposiziokoak.

Adierazpenean, Paule Sanchez Euskara eta Kultura zinegotziak oinarrizko eskubideak zalantzan jartzen dituzten diskurtso autoritarioen hazkundeaz ohartarazi du. “Indarkeria matxistari aurre egitea demokrazia defendatzea da”, adierazi du. Jesica Ruiz Berdintasun zinegotziak, berriz, Udalak herrian gertatzen diren indarkeria matxista kasuak argitaratzeko eta erasoen aurrean erantzun publikoa emateko protokolo berri bat egiteko borondatea duela iragarri du. EH Bildutik, Oihana Estibezek hurbiltasun sareak indartzearen eta indarkeria horiek hutsaltzen dituzten diskurtsoak indargabetzeko kanpainak sustatzearen garrantzia azpimarratu du.

Udal ordezkaritza duten beste talde batzuek ere hartu dute hitza. Herriaren Eskubideako Jorge Varelak tokiko komunitateak biktimak onbideratzen lagun dezakeela azpimarratu du, kaltea aitortuz eta indarkeria matxista publikoki salatuz, erasotako emakumeei eta haien ingurukoei elkartasuna adieraziz. Bestalde, Alderdi Popularreko Carlos Garcíak herritarren prebentzio-eginkizuna aipatu du, auzokideekiko eta eguneroko inguruneekiko hurbiltasunak indarkeria-egoerak goiz detektatzea erraztu dezakeela nabarmenduz. 

Horrekin guztiarekin, Udalak azpimarratu du A25 ez dela jardunaldi sinboliko batera mugatzen; aitzitik, Durangon eta mundu osoan emakumeen aurkako indarkeriarik gabeko bizitza bermatuko duten neurriak eta espazioak bultzatzen jarraitzeko konpromisoa ezartzen du.

The post Durangaldeak indarkeria matxistaren biktimak gogoratu ditu A25eko ekitaldian first appeared on DOT Durangaldea.

Andereak elkarteak feminizidioaren biktimei egingo die omenaldia larunbat honetan, 13:00etan, Andra Mari zubian. Urtero bezala, lazoak ipiniko dituzte biktimen izenekin, indarkeria matxistak utzitako arrastoa ikusgarri egiteko. Elkarteak ohartarazi du genero-indarkeria ukatzen dutenen kopurua handitzen ari dela, gizon gazteen %23k eta zortzi neskatik batek arazoa “asmakizun ideologikotzat” jotzen baitute. Hori dela eta, nabarmendu dute patriarkatuak “bizirik jarraitzen duela, oraindik ere zenbaitek bere krimenak ukatzen dituztelako”. Herritar guztiei parte hartzeko dei eginez, Andereak elkarteak gogorarazi du indarkeria matxistari aurre egitea “erantzukizun kolektiboa” dela, eta ez soilik esparru pribatura mugatutako arazoa.

Aldi berean, azaroaren 25eko manifestazio abolizistan parte hartzeko deia egin dute. Andereaken arabera, prostituzioa, pornografia bortitza eta emakumeak esplotatzen dituzten alokairuko sabelak “indarkeria matxistaren muturreko adierazpenak” dira, eta gogorarazi dute “ez dagoela askatasunik gorputzak erosten direnean, ez eta baimenik pobrezia eta ahultasuna muturrekoak direnean”. Horregatik, LOASP legearen onarpena eskatu dute, prostituzioan dauden emakumeei —gehienak salerosketa-egoeran— irteerak eta erreparazioa bermatzeko.

The post Durangok indarkeria matxistaren biktimak omenduko ditu Andra Mari zubian first appeared on DOT Durangaldea.

IURRETA | Udalak  hainbat ekintza antolatu ditu azaroaren 25a, Indarkeria Matxista Ezabatzeko Nazioarteko Eguna, ospatzeko. Programazioa azaroaren 18tik bertatik hasiko da, hausnarketa eta sentsibilizazioa jomugan dituen egitarauarekin.

Lehen hitzordua azaroaren 18an izango da Ibarretxe Kultur Etxean, 18:00etan, “Emakume nagusiak eta indarkeria” izeneko hitzaldiarekin. Saioa Arrate Ruiz-Oria Esparta osasun-psikologo eta indarkeria matxistaren adituak eskainiko du, adineko emakumeek bizi duten errealitatea eta arrisku faktoreak aztertuz.

Bigarren ekitaldia azaroaren 24an, baita Ibarretxen, 18:00etan, izango den zineforumak osatuko du. “Indarkeria zinema: identifikatu eta aurre egin” dinamikan, ikus-entzunezkoetan agertzen diren indarkeria matxistaren adierazpenak eta horiei aurre egiteko estrategiak aztertuko dituzte.

Egun nagusia, ordea, azaroaren 25a izango da. Egun horretan, Iurretak manifestazioa antolatuko du 18:00etan, Askondo gunean hasita. Ekitaldiak irakurketa instituzionala eta ibilbide aldarrikatzailea izango ditu, herritarrak indarkeria matxistaren aurka modu aktiboan mobilizatzera deituz.

Anderebide Elkartea eta Auskari sare feminista ere antolakuntzan parte hartu dute, sentsibilizazio lana herrigunean zabaltzeko helburuarekin. Udalak herritar guztiak gonbidatu ditu ekitaldietan parte hartzera, “indarkeria matxistarik gabeko Iurreta baten alde”.

The post A25 Iurretan: “Emakume nagusiak eta indarkeria” hitzaldia asteartean first appeared on DOT Durangaldea.

MALLABIA | Mallabiko Udalak bat egingo du Emakumeen aurkako Indarkeria dezagerrarazteko Nazioarteko Egunarekin, eta horren harira, hainbat jarduera antolatu ditu azaroaren 25aren inguruan, herritarren artean hausnarketa eta sentsibilizazioa sustatzeko helburuarekin. Ekimenak formatu ezberdinak izango ditu: tailerrak, film laburren proiekzioa, ikuskizunak eta kontzentrazio instituzionala, guztiak ere indarkeria matxistaren aurkako mezua zabaltzeko asmoz.

Ekintza nagusiak

Lehen jarduera azaroaren 8an izan zen, ongizate emozionalari buruzko tailerrarekin. Saioaren helburua emozioak kudeatzeko eta harreman osasuntsuak lantzeko tresnak eskaintzea izan da, ongizate pertsonala eta soziala indartuz. Tailer hau azaroaren 15ean, 22an eta 29an ere eskainiko da, herritar orori parte hartzeko aukera emateko eta lanketa modu jarraituan garatzeko.

Bestalde, azaroaren 14an, emakumeentzako autodefentsa feministaren hastapen tailerra egingo da Kontzejuzarrean, 16:00etatik 20:00etara. Saioa Esther Lopezek, SAFO eskolako kideak, gidatuko du, eta gaztelaniaz eskeiniko da.

Egun nagusia, azaroaren 25a izango da. Asteartean, 12:00etan, kontzentrazioa egingo da frontoiko aldapan, eta bertan eskolako umeek prestatutako leloak irakurriko dira. Amaieran, “Indarkeriaren kontrako abestia” abestuko dute, eta jarraian adierazpen instituzionalaren irakurketa egingo da. Ondoren, 19:00etan, “Hemen bai, borroka egiten da” film laburraren proiekzioa eta solasaldia egingo da Kontzejuzarrean.

Egitarauari amaiera emateko, azaroaren 30ean, igandean, 12:30ean, “Hace calor y somos nosotres” ikuskizuna eskainiko da Kontzejuzarrean. Saioa 16 urtetik gorakoentzat izango da eta gaztelaniaz izango da.

Mallabiko Udalak bat egiten du emakumeen aurkako indarkeriaren aurkako borrokarekin eta berdintasunaren aldeko konpromisoa guztiz berresten du. Udalak lanean jarraituko du errespetuan, berdintasunean eta askatasunean oinarritutako gizarte justuago bat eraikitzen, prebentzioan eta sentsibilizazioan sakonduz.

The post A25 Mallabian: Tailerrak, ikuskizunak, film laburrak eta elkarretaratzea first appeared on DOT Durangaldea.

AMOREBIETA-ETXANO | Azaroaren 25a, Emakumearen Aurkako Indarkeria Desagerrarazteko Nazioarteko Eguna dela eta, Amorebieta-Etxanoko Udalak ekintza-egitarau berezia eta anitza antolatu du emakumeen aurkako indarkeria ikusarazteko, salatzeko eta desagerrarazteko. Berdintasunarekiko eta justizia sozialarekiko konpromiso irmoaren oinarrian, herritar guztiei zuzendutako sentsibilizazio-jarduerak eskainiko dira, edozein motatako genero-indarkeriaren aurkako borrokan herritarren hausnarketa eta konpromisoa sustatuz.

Programazioa azaroaren 4an hasi zen, “Astearte Moreak” izeneko tailerrekin. Tailer horiek asteartero egingo dira azaroaren 25era bitarte, 17:00etatik 20:00etara, Ludotekan eta Gaztetxean. Tailer horiek indarkeria egoerak detektatzera eta horien aurrean erantzun egokiak emateko tresnak hartzera bideratuta egongo dira, Alazne Moralejaren gidaritzapean.

Azaroaren 19an, Zelaietako Auditorioak “Margaret Atwood: Neskamearen ipuina, testamentuak eta askoz gehiago” hitzaldia hartuko du. 18:30etik 20:30era, Josune Muñozek Margaret Atwood idazle kanadarraren lanari buruzko azterketa egingo du, eta arreta berezia jarriko die generoari eta botereari buruzko gaiei, esate baterako, El cuento de la criada eleberrian.

Azaroaren 22an, Haur Liburutegian, “Txanogorritxo Zientzialari” izeneko ipuin kontaketa egingo da. 12:00etatik aurrera, Maite Frankok txikienei zuzendutako jarduera hau eskainiko du, zientziaren eta emakumeek arlo honetan duten ikusgarritasunaren garrantziaz sentsibilizatzeko. Aldez aurretik izena eman beharko da Gazte Informazio Bulegoaren bidez.

Programazioak azaroaren 24an jarraituko du, “Invierte en ti: finanzas con perspectiva de género” izeneko hitzaldiarekin. Zelaietako Auditorioan egingo da, 18:30ean. Natalia de Santiagok informazio saio bat eskainiko du finantza pertsonaletan eta kudeaketa ekonomikoan genero ikuspegia nola txertatu azaltzeko.

Azaroaren 25ean, ospakizunaren egunean, ekitaldi instituzional bat egingo da 12:00etan udaletxean. Ekitaldi honetan, Udalak genero-indarkeriaren aurkako borrokarekin duen konpromisoa berretsiko du, herritarrak udalerriko elkarte feministek deitutako manifestazio eta ekitaldietan parte hartzera gonbidatuz.

Azaroaren 27an, Zelaietako Auditorioan, “Emakumeak Zientzian / Mujeres en la ciencia” izeneko mahai-ingurua egingo da. 18:30ean, Olatz Zuloagak, Maitane Olivaresek, Estibaliz Asuak eta Maider Sierrak zientzialari gisa izandako esperientziak partekatuko dituzte, emakumeak zientzian duen paperari buruzko eztabaidan lagunduz.

Horiez gain, azaroaren 17tik 30era “Indusen ibaibidea: krisi klimatikoa eta emakumeak Pakistanen” erakusketa egongo da ikusgai Zelaieta Zentroan. Erakusketa honek Pakistango krisi klimatikoa du ardatz, baita eskualde horretako emakumeei neurriz kanpo nola eragiten dien ere. Erakusketa laguntzeko, bisita gidatua egingo da azaroaren 17an, 18:30ean, Igone Mariezkurrenaren eskutik.

Era berean, liburutegiak “BERBA LAPIKO: Emakumeak zientzian” jarduera hartuko du azaroan zehar. Sentsibilizazio-proposamen horrek gonbita egiten die herritarrei gogoeta egin dezaten emakumeek esparru zientifikoan duten eginkizunari buruz eta ezagutzan aurrera egiteko egiten duten ekarpenari buruz.

Ekintza egitarau honekin, Amorebieta-Etxanoko Udalak herritar guztiak gonbidatzen ditu hausnarketan eta genero-indarkeriaren aurkako ekintzetan aktiboki parte hartzera. Programa honek batasunaren erakusgarri izan nahi du emakumeen aurkako edozein indarkeria motaren aurrean, udalerriak gizarte bidezkoagoa eta berdintasunezkoagoa eraikitzeko duen konpromisoa berretsiz.

The post Hitzaldia asteazken honetan Zelaietako auditorioan Zornotzako A25eko ekitaldiei hasiera emateko first appeared on DOT Durangaldea.

DURANGO | Emakumeen aurkako Indarkeria Ezabatzeko Nazioarteko Eguna dela eta, Durangoko Udalak hainbat jarduera antolatu ditu azaroan zehar, indarkeria matxista ikusarazteko, salatzeko eta desagerrarazteko helburuarekin. Berdintasunaren eta justizia sozialaren aldeko konpromisoarekin, programa honek herritar guztiarentzat izango diren sentsibilizazio, hausnarketa eta parte-hartze ekintzak jasotzen ditu, ikuspegi komunitario eta feminista batetik.

Programazioa azaroaren 17an hasiko da Carmen Ruiz Repullo soziologoaren hitzaldiarekin. “Espazio digitalak eta haien eragina nerabezaroan eta gaztaroan: ziberindarkeria matxistei aurre egitea” izenburupean, goizeko 11:00etan izango da saioa Andragunean (Lariz Dorrea, 2), profesionalei zuzenduta. Arratsaldean, 17:00etan, hitzaldia publiko orokorrarentzat zabalduko da Plateruena Kafe Antzokian.

Azaroaren 23an ospatuko da Landako atletismo-pistan Emakumeen VIII. Lasterketa, Durango Kirol Taldearen eskutik. Egun horretan bi lasterketa egingo dira: 10:30ean 1.600 metroko ibilbide laburra, kausa babestu nahi duen edonorentzat irekia, eta 11:00etan 4.800 metroko lasterketa, emakumeei soilik zuzendua. Jarduera honek elkartasuna eta kirola uztartuko ditu, berdintasunaren aldeko aldarria kaleetara ateraz.

Azaroaren 25a izango da egitarauaren egun nagusia. Goizeko 12:00etan, ekitaldi instituzionala egingo da Ambrosio Meabe plazan, indarkeria matxistaren ondorioz hildako emakumeen omenez. Ekitaldian adierazpen instituzionala eta lore-eskaintza egingo dira, oroimena eta konpromisoa uztartuz. Arratsaldeko 19:00etan, Durangoko Autodefentsa Feministaren Batzarrak (DAFA) deitutako mobilizazioa izango da Andra Mari plazan, herritarren parte-hartzea sustatzeko eta indarkeria matxistaren aurkako jarrera irmoa erakusteko.

Hurrengo egunean, azaroaren 26an, June Fernández kazetari feministak hitzaldi elebiduna eskainiko du Elkartegin (Landako etorbidea, 4), 17:30etik 19:00etara. “Komunikabideek eta sare sozialek indarkeria matxistaren erreparazioan duten papera” izeneko hitzaldian, komunikazioaren eta diskurtso publikoaren eraginaz hausnartzeko aukera eskainiko da.

“Azkenik, azaroaren 29an jardunaldi kulturala eta formaziorako eguna izango da, sentsibilizazioa eta hausnarketa kulturaren bidez sustatzeko. Goizeko 11:00etan, Zugaza zineman, “Custodia compartida” filma eskainiko da, sarrera librearekin. Ondoren, solasaldia egingo da Oihane Artetxeren gidaritzapean, Andereak elkartearen laguntzarekin. Arratsaldeko 19:00etan, San Agustin antzokian, El Mono Habitado konpainiaren “¡GUAPA!” antzezlana taularatuko da. Ikuskizun honek edertasunaren inguruko estereotipoei eta presioei buruzko gogoeta proposatzen du, umorea eta kritika uztartuz.

Ekintza hauei gehituko zaie Durangoko ikastetxeetako batxilergoko ikasleei zuzendutako zineforuma, “How to Have Sex” filmaren proiekzioarekin. Ekimena Sortzen aholkularitzaren dinamizaziopean egingo da. Halaber, aurkeztuko da emakumeen aurkako indarkeriari aurre egiteko Durangaldeko Erakunde arteko II. Protokoloa, hirugarren sektoreko elkarteentzako bereziki pentsatua eta EDE Fundazioaren koordinazioarekin landua.

Jesica Ruiz Berdintasun zinegotziak nabarmendu duenez, “azaroaren 25a ez da data sinbolikoa bakarrik; ekintza kolektiborako dei sendoa ere bada. Urtez urte, indarkeria matxistaren aurkako borrokan urrats berriak ematen jarraitu nahi dugu. Horregatik, anitza eta parte-hartzailea izango den programa bat osatu dugu, herritarren sentsibilizazioa, prebentzioa eta babesa ardatz izango dituena. Durango herri seguru eta berdinzaleagoa eraikitzeko, guztion inplikazioa ezinbestekoa da. Urrats bakoitzak badu bere garrantzia”.

The post Azaroaren 25eko egitaraua ziberindarkeria matxistei galga jartzen dien hitzaldi batekin hasiko da Durangon first appeared on DOT Durangaldea.

DURANGO | Ehunka lagun kalera atera dira Durangaldean azaroaren 25a, Emakumearen aurkako Indarkeria Ezabatzeko Nazioarteko Eguna, aldarrikatzeko. Lehen ordutik irakurketa instituzionalak egin dira, hala nola Durangon, Ambrosio Meabe plazan, eraildako emakume guztiak gogoratzen dituen monolitoaren ondoan. Arratsaldean jende askok alde zaharreko kaleak zeharkatu dituen manifestaziora joan nahi izan du, pankarta baten atzean: “Konponbidea ez bazarete, arazoa zarete. Lotsa bandoz aldatuko da».

The post «Konponbidea ez bazara, arazoa zara. Lotsa bandoz aldatuko da» first appeared on DOT Durangaldea.

DURANGO | Azaroaren 25ean, Emakumeenganako Indarkeria Ezabatzeko Nazioarteko Eguna dela eta, udalek gaitzespen irmoa adierazi dute indarkeria matxistaren adierazpen guztien aurrean, eta konpromisoa hartu dute beste erakunde batzuekin eta gizarte osoarekin koordinatuta lan egiten jarraitzeko, indarkeria matxista desagerrarazteko.

Aurten, arreta jarri da emakumeen aurkako indarkeria matxistaren diskurtso ukatzaileetan, ultraeskuinak aurrera egiteko Europako eta munduko testuinguru batek bultzatuta jaiotzen baitira. “Emakumeen eskubideetan izandako aurrerapenen aurrean erreakzio horrek hutsaldu egiten du emakumeen eta haien ingurunearen aurkako indarkeria. Eta are haratago doa, berdintasunaren eta indarkeria matxistaren aurkako borrokaren arloko lege-aldaketek gizonak biktimizatzen dituztelako ustea bultzatuz “, nabarmendu dute.

Nahiz eta gero eta sentsibilizazio eta kontzientzia kolektibo handiagoa dagoen emakumeen aurkako indarkeriarik gabeko gizarte baten alde – bai esparru legalean, politikoan, bai sozialean-, gaur egun joera neomachista gero eta handiagoa ari da nagusitzen, batez ere mutil eta gizon gazte eta adin ertainekoetan, eta arreta berezia jartzen dio eremu digitalari. “Manosfera izeneko espazioan, mezu misogino eta berdintasunaren aurkakoak ugari dira. Horrela, gazteek “indarkeriak ez duela generorik”, “asmakizun ideologikoa” edo berdintasun politikak “urrunegi” iritsi direla bezalako mezuak jasotzen ari dira, Duramgoko A25eko ekitaldian arduradun politikoek gaineratu dutenez.

Diskurtso horien aurrean, emakumeen aurkako indarkeria matxistaren datuek oraindik ere gogorarazten dute gizarteak egiturazko arazo bat dakarrela, emakumeen eta gizonen arteko desberdintasunean oinarritzen dena.

Negazionismoa arazo globala da, eta Nazio Batuek ere alarma piztu dute berdintasunarekiko mehatxu gero eta handiagoez eta misoginiaren normalizazioaz ohartarazteko, batez ere hedabide digitaletan.

Hori guztia kontuan hartuta, Durangoko Udala emakumeen aurkako indarkeria hutsaldu nahi duen edozein diskurtsoren aurka agertu da, eta konpromiso hauek hartu ditu:

● Euste-horma kolektiboa aktibatzea gure udalerrian emakumeen aurkako indarkeria ukatzen edo/eta hutsaltzen duen edozein erreakzio matxistaren aurrean. Tokiko eragile guztiekin lan eginez, mezu horiei aurre egingo dien iritzi-giroa sortzeko. Zurrumurru misoginoei eta mezu ukatzaileei, jarrera bateratuei eta erantzun publiko eta kolektiboko protokoloei aurre eginez.
● Gazteei zuzendutako sentsibilizazio-neurriak hartzea, egunero jasotzen dituzten mezu misoginoak, emakumeen aurkako mezu bortitzak eta berdintasunaren aurkakoak desaktibatzeko, batez ere bitarteko digitalen bidez.
● Hezkuntza- eta prestakuntza-prozesuak indartzea eskola-komunitateari zuzendutako espazio formal eta informaletan, indarkeria matxistaren aurrean mezu eta jarrera ukatzaile horiei aurre egiteko eta desaktibatzeko.
● Sentsibilizazio-programak hobetzea herritarrekin, eta, bereziki, gurasoekin, irakasleekin eta hezkuntza-komunitatearekin, genero-ikuspegidun kalitatezko sexu-hezkuntzaren beharrari buruz.
● Berdintasunaren eta indarkeria matxistaren arloko prestakuntza sustatzen jarraitzea udal-langileen artean.
● Herritarrei dei egiten diegu azaroaren 25ean Durangon emakumeen aurkako indarkeria ezabatzeko nazioarteko eguna dela eta deitutako mobilizazioekin bat egiteko.

The post “Indarkeria matxistaren diskurtso ukatzaileetan jartzen dugu arreta” first appeared on DOT Durangaldea.

IURRETA | Azaroaren 25ean ospatuko den Emakumeenganako Indarkeria Desagerrarazteko Nazioarteko Eguna dela eta, Iurretan azaroan zehar egingo diren ekitaldi eta tailerren egitarau zabala prestatu da, herritarrak genero-indarkeriaren problematikaren inguruan sentsibilizatzeko eta ikusarazteko.

Programazioa azaroaren 12an hasi zen, “Zaindu zure hormonak 40tik aurrera” hitzaldiarekin, eta 19an Autozainketa tailerrarekin jarraituko du, azaroaren 26an eta abenduaren 3an eta 10ean, 18:00etatik 20:00etara.

Azaroaren 20an Gurutze Gorriak eta Biltzen-Gizarteratzeko eta Kultura arteko Bizikidetzarako Euskal Zerbitzuak emango duten tailerra izango da, haurrak eta nerabeak babestearen inguruan sentsibilizatzeko.

Bestalde, azaroaren 21ean zine-foruma izango da Anderebide Emakumeen Elkartearen eskutik Carlos Sedes zuzendariaren “No estás Sola” filmaren proiekzioarekin. Ibarretxe Kultur Etxan izango da arratsaldeko 18:00etan.

Azaroaren 25ean, ohi denez, pegatinak eta puntu lilak banatuko dira. Liburutegian informazio-gune bat sortuko da azaroaren 25ean, eta 18:00etan adierazpen instituzionala irakurriko da, irakurketan parte hartu nahi duten elkarte eta norbanakoen parte-hartzearekin. Ondoren, manifestazio batek herriko kaleak zeharkatuko ditu.

Bestalde, azaroaren 29an, 19:00etan, ipuin kontaketa saio bat izango da Aurora Larrurekin, “Cuentos populares de Calvino y otras patrañas del Mediterráneo” izenekoa. Programazioa azaroaren 30ean amaituko da, lau orduko autodefentsa ikastaroarekin, 10:00etatik 14:00etara. Horretarako, beharrezkoa izango da izena ematea azaroaren 22a baino lehen, 946215372 telefonoaren bidez edo gizarte-ongizate@iurreta.eus helbide elektronikoaren bidez.

The post Iurretak bere burua zaintzeko tailerra antolatu du azaroaren 25eko programazioaren barruan first appeared on DOT Durangaldea.