ABADIÑO | Abadiñoko Udalak ‘Abadiño zaintzen duen herria’ egitasmoa jarri du abian, adinekoen arteko harreman sozialak indartzeko, bakardade eta isolamendu egoerak prebenitzeko eta udalerriko laguntza-sare komunitarioak sendotzeko.

Proiektua Abadiñoko adinekoen egoerari eta zaintzari buruz egindako diagnostikoan identifikatutako jarduera-ildo nagusietako batetik sortu da. Prozesu parte-hartzaile horretan udaleko teknikariek, ordezkari politikoek, herritarrek eta adinekoen ongizatearekin lotutako hainbat eragilek hartu zuten parte; besteak beste, adinekoen elkarteek, Mankomunitateko teknikariek, Osakidetzak eta Zainduz-ek.

Lan horren ondorioz, udalerri zaintzaileagoa eraikitzeko hainbat proposamen jasotzen dituen ekintza-plana osatu zen. Lehentasunen artean, harreman-sareak indartzea eta zaurgarritasun, isolamendu edo laguntza eta parte-hartze sozialaren beharrei lotutako egoerak garaiz hautematea zeuden.

Egitasmoa garatzeko, Udalak 15.000 eurotik beherako kontratua aurreikusi du. Gizarte-hezitzaile batek hartuko du parte, eta hamar hilabetez —2026ko ekainetik 2027ko martxora— lanaldiaren % 30 eskainiko dio proiektuari. Haren zeregina izango da adinekoengana eta udalerriko eragile nagusiengana hurbiltzea, harreman sozialen eta zaintza komunitarioaren garrantziaz sentsibilizatzea, parte-hartze soziala sustatzea eta komunitateko loturak indartzea.

Topaketa urriaren 28an

Datozen asteetan, ekimenaren arduradunak Abadiñoko adinekoekin harremanetan jarriko dira proiektua aurkezteko, haien interesak ezagutzeko eta kezkak zein beharrak jasotzeko. Horrez gain, udalerriko gizarte-, osasun- eta komunitate-baliabideekin koordinatuta lan egingo dute, arrisku-egoerak hobeto hautemateko eta beharrezko laguntzak eskuratzea errazteko.

Ekimenaren barruan, urriaren 28an topaketa egingo dute harreman sozialen, parte-hartzearen eta zaintza komunitarioaren garrantziaz hausnartzeko eta ideiak partekatzeko. Hitzordua 17:30ean izango da, Errota Kultur Etxean.

The post Abadiñoko Udalak ‘Abadiño zaintzen duen herria’ egitasmoa jarri du abian first appeared on DOT Durangaldea.

ABADIÑO | Abadiñoko Udalak hasi ditu Atxarteko harrobiaren inguruko errepidea berritzeko lanak, eta, horren ondorioz, harrobira iristeko 200 metroren faltan errepidea moztu da.

Horrenbestez, auzokideek eta baimendutakoek soilik igaro ahalko dute azken tramo horretatik.
Obraren helburua da bidearen egungo egoera hobetzea eta Atxarte ingurura gerturatzen diren oinezko zein ibilgailuentzat sarbide seguruagoa bermatzea. Lanek 384.996 euroko (BEZ barne) aurrekontua dute eta urte hasierarako burutzea aurreikusten da.

Proiektuak errepidearen hainbat puntutan esku hartzea aurreikusten du. Urte batzuk lehenago izandako luizi baten ondorioz, zoladurak eta ura husteko azpiegiturek kalteak izan zituzten, eta orain lanek arazo horiei irtenbide integrala emango diete. Horretarako, galtzada berrituko da, drainatze sistema egokituko da eta ezpondak egonkortzeko lanak egingo dira.

Lan hauen bitartez, errepidearen egoera hobetzeaz gain, etorkizunean luiziek eragin ditzaketen arriskuak gutxitzea eta euriteetan ura behar bezala bideratzea bilatzen da.

Horrek guztiak bidearen segurtasuna eta erabilgarritasuna handituko ditu.

Atxarte aisialdirako eta kirol jardueretarako ohiko helmuga da, eta errepide berean ibilgailuen eta oinezkoen joan etorriak bat egiten du. Hori dela eta, lanek arreta berezia jarriko dute erabiltzaileen segurtasunean eta espazioaren erabilera partekatua baldintza egokiagoetan egin ahal izatean.

The post Atxarteko harrobi ondoko errepidea itxita, hobekuntza lanak direla eta first appeared on DOT Durangaldea.

ABADIÑO | Abadiñoko Udalak Astolako kirol instalazioetako goiko futbol zelaiko berdegunea berritzeko lanak hasi ditu. Jarduketa honi esker, 15 urte baino gehiago dituen eta berritzeko beharra zuen egungo berdegunea ordezkatuko da.

Mondo Ibérica, S.A.U. enpresari esleitu zaizkio lanak, 281.930 euroan, eta 5.700 metro koadro inguruko azalera berrituko da. Zehazki, aste honetan hasi dira egungo berdegunea ordezkatzen, eta lursail berria irailaren 16tik aurrera instalatzen hastea espero da. Aurreikuspenen arabera, lanak urriaren 2an amaituko dira.

Proiektuaren alderdi berritzaileenetako bat ingurumen eskakizunetara egokitzea izan da: belar artifizial berriak harea erabiliko du kautxuaren ordez, instalaziorako irtenbide jasangarriagoa eskainiz.

“Abadiñoko futbol zelaia emakumezkoen zein gizonezkoen talde ugarik erabiltzen dute, eta denek behar dituzte entrenamenduak eta lehiaketak egiteko egoki prestatutako instalazioak. Hori dela eta, berritze lan honek herriko kirol jardueraren kalitatea eta jarraikortasuna bermatzea lortuko du”, adierazi dute Udaletik.

Berdegunea berritzearekin batera, Udala legegintzaldi hasieratik ari da Astolako kirol gunea eta haren ingurua hobetzeko lanean. Azken urteotan, hainbat hobekuntza lan egin dira, besteak beste, aldagela berriak sortu dira, gimnasioko makinak berritu dira, igerilekuetako arazketa sistema berritu da eta kalistenia parkea sortu da. Horrez gainera, hainbat hitzarmen sinatu dira herriko kirol klubekin, taldeekin harreman zuzenagoa izateko eta haien beharrizanei ahalik eta modu onenean erantzuteko asmoz

The post Hasi dira Astolako futbol zelaiko berdegunea berritzeko lanak first appeared on DOT Durangaldea.

ABADIÑO | Abadiñoko Udalak kirol eta kulturako gizarte bonuen oinarri arautzaileak aldatu ditu, herritarrei udal laguntza horiek eskuratzeko aukera errazteko eta zabaltzeko asmoz. Berrikuntza nagusia eskaera aurkezteko urteko epe itxia ezabatzea izan da; ondorioz, baldintzak betetzen dituzten pertsonek urte osoko edozein unetan eskatu ahal izango dute bonua.

Udaletik azpimarratu dutenez, gizarte laguntzek pertsonen zerbitzura egon behar dute oztopo administratiborik gabe: «Ez dugu nahi baldintzak betetzen dituen herritar bat udal laguntzarik gabe geratzea epea amaitu delako, aukera hori ezagutzen ez zuelako edo bere egoera aldatu delako. Administrazioak gertukoa eta malgua izan behar du».

Gizarte bonuen helburu nagusia baliabide ekonomiko gutxien dituzten pertsonei eta familiei kirol eta kultur jardueretaz gozatzeko aukera bermatzea da. Gaur egun, bonu honek Abadiñoko udal igerilekuetara eta modalitate hau duten kultur ekitaldietara sartzeko bidea ematen du.

• Nori zuzenduta dago: Abadiñon erroldatutako herritarrei, bizikidetza unitatearen pertsona kopuruaren araberako diru-sarreren muga eta oinarrietako baldintzak betetzen badituzte.

• Ezaugarriak: Bonua pertsonala eta besterenezina da, eta urtebeteko iraupena du. Interesdunek dokumentazioa aurkeztu eta baldintzak betetzen dituztela egiaztatu beharko dute.

Aldaketa honekin, Abadiñoko Udalak pertsonak erdigunean jartzen dituzten gizarte politiken aldeko konpromisoa sendotzen du, zerbitzu publikoak herritarren benetako beharretara egokituz.

The post Abadiñok gizarte bonuetarako sarbidea erraztu eta eskaera-epea urte osora zabaldu du first appeared on DOT Durangaldea.

ABADIÑO | Abadiñoko Udalbatzak, uztaileko Osoko Bilkuran, 216.268,71 euroko ezohiko diru-partida onartu du udalerriko segurtasuna, irisgarritasuna eta espazio publikoaren kalitatea hobetzeko helburuarekin. Inbertsio honek bi lan-ildo nagusi izango ditu: argiteria publikoa berritzea eta Solokoa 1-3 ingurunea urbanizatzea.

Alde batetik, 120.000 euro bideratuko dira Traña-Matienako Erezena eremuan eta Muntsaratzeko Kamiñopean LED teknologia duten argi berriak instalatzeko. Proiektu honen helburu nagusia oinezkoen segurtasuna indartzea eta eraginkortasun energetiko handiagoa lortzea da, azken urteotan Zelaietan, Gaztañodin ala Pino plazan egindako lan ebolutiboari jarraipena emanez. Lanak finantzatzeko, Udalak 56.000 euroko dirulaguntza jaso du Bizkaiko Foru Aldundiko Ingurune Naturala eta Nekazaritza Sustatzeko Sailetik.

Bestalde, Osoko Bilkurak 96.268,71 euroko plana onartu du Solokoa 1-3 ingurua urbanizatzeko. Jarduketa honen bidez, eremu horretako irisgarritasuna eta oinezkoen pasabideak hobetuko dira, herritarren joan-etorriak erraztuz eta gunea ingurune eroso eta seguruago bihurtuz.

Inbertsio berri hauekin, Abadiñoko Udalak herritarren egungo beharrei erantzuna ematen jarraitzen du, herriko espazio publikoak modernizatuz, segurtasuna kudeatuz eta udalerri irisgarri zein jasangarriago bat eraikiz.

The post Abadiñok 216.000 euro bideratuko ditu argiteria hobetzeko eta Solokoa urbanizatzeko first appeared on DOT Durangaldea.

The post Aldundiak Abadiñoko zainketen ekosistema bultzatzeko 22,5 milioi euroko inbertsio onartu du first appeared on DOT Durangaldea.

IRUÑEA / ABADIÑO.- Uztailaren 1ean eta 2an Iruñean egin den Materialen Zientzia eta Teknologiaren (MZT) VII. Kongresuak profesionalen babes zabala jaso ez ezik, une hunkigarri bat utzi du eskualdearentzat. Izan ere, batzorde zientifikoak Aita Gabriel Jauregi saria eman dio Idoia Urrutibeaskoa jatorriz eibartarra den eta Abadiñon bizi den ikertzaileari, zientzia eta teknologiaren arloan euskara ikertzen, irakasten eta normalizatzen egin duen ibilbide oparoagatik.

MZT kongresuak (mzt.eus) materialen zientziaren arloko ikertzaile akademikoak eta adituak biltzen ditu urtero, helburu argi batekin: euskarak teknologiaren esparruan duen indarra eta gaitasuna nabarmentzea. Hori dela eta, hitzaldi, galdera-saio eta irakasgai magistral guztiak euskara hutsean garatu dira.

Ekitaldi hunkigarria

Saria emateko ekitaldia oso hunkigarria izan zen bertaratutako guztien aurrean. Erakundeko kideek xehetasun osoz gogoratu eta goraipatu zuten Urrutibeaskoaren ibilbide zientifiko eta irakaskuntzakoa, arlo tekniko eta zientifikoan euskara sustatzeko erakutsi duen konpromiso sendoa bereziki azpimarratuz.

Idoia Urrutibeaskoarek oso hunkituta jaso zuen ohorezko makila. Bere hitzaldian, eskerrak eman zizkien antolatzaileei eta bertaratu zirenei, eta bi ezaugarri nagusi nabarmendu nahi izan zituen: aurkeztutako txosten zein posterren maila zientifiko altua, eta unibertsitateko eliteko gune batean euskara hainbesteko naturaltasunez erabiltzea.

The post Idoia Urrutibeaskoa abadiñarrak ‘Aita Gabriel Jauregi’ saria jaso du Iruñean first appeared on DOT Durangaldea.

ABADIÑO | Udal kudeaketaren balantzea Abadiñon. Udalak azken urteetako (2022, 2024 eta 2025) funtzionamendu datu nagusien azterketa xehea aurkeztu du. Emaitzek administrazio jardueraren hazkunde handia erakusten dute, herritarren izapide eskaeren gorakadak, sailak indartzeko langile gehiago kontratatzeak eta barne tresnak modernizatu izanak bultzatuta.

Lan bolumenaren biderkatze honi aurre egiteko, erakundeak antolaketa gaitasuna egokitu du eta 59 langile izatetik 64 langile izatera pasatu da 2025ean (bost profesional berri sartu dira plantillan), herritarren beharrei erantzun azkarragoa emateko.

Udal bulegoetako lanaren bilakaera argia da azken hiru urteotako balantzeari begiratuta:

• Herritarren eskaerak (Sarrerak): Herritarrek aurkeztutako izapideek %42 egin dute gora, 2022ko 8.617 sarreretatik 2025eko 12.208etara pasatuta.

• Udalaren komunikazioak (Irteerak): Udalak emandako erantzun eta jakinarazpenak %66 inguru igo dira (2.275etik 3.778ra).

• Kudeatutako espedienteak: Hau da gehien hazi den adierazlea, ia %80ko igoerarekin. 2025ean 4.425 prozedura administratibo bideratu dira; 2022an, berriz, 2.469 izan ziren.

• Dekretuak eta kontratuak: Alkatetzaren dekretuak 695etik 972ra pasa dira, argitaratutako lizitazioak 12tik 16ra igo dira eta kontratu txikiak 142tik 178ra.

Lan karga handi honi aurre egiteko, Udalak Legegintzaldi Agenda jarri du martxan agintaldi hasieran. Tresna honek 170 jarduketa biltzen ditu sail guztietan banatuta, helburuak finkatzea, jarraipen zehatzagoa egitea eta sailen arteko koordinazioa estutzea ahalbidetuz.

Era berean, langileen ordezkariekin adostuta, telelanerako eta ordutegi kontrolerako ordenantza berriak onartu dira. Horien bidez, barne antolaketa malgutu eta hobetu nahi da, kontziliazioan eta administrazioaren eraginkortasunean urratsak eginez. Azpikontratei dagokienez, eraikinen garbiketa zerbitzuko langileen baldintzak hobetzeko akordioa nabarmentzen da.

Jarraipen eta zaintza mekanismoak zerbitzu externalizatuetara ere zabaldu ditu Udalak. Azken kontratazio pleguetan kontrol klausula berriak sartu dira eta zigorrak ezarri dira baldintzak betetzen ez dituztenentzat. Kontrol zorrotzago horren erakusgarri da aurten bi espediente ireki behar izan direla kontratuetako baldintzak ez betetzeagatik.

Udal gobernuak positiboki baloratu du egokitzeko egindako ahalegina, baina argi utzi dute hobetzen jarraitu nahi dutela: “Administrazioa herritarrengandik gero eta gertuago egotea da gure helburua. Planifikazioa, jarraipena eta erantzuteko gaitasuna hobetzeko urrats garrantzitsuak egin ditugu, baina lanean jarraitu behar dugu administrazioa gero eta eraginkorragoa izan dadin eta herritarrei zerbitzu hobea eskain diezaien”.

The post Abadiñok administrazio jarduera nabarmen hazi du eta plantilla indartu du zerbitzua hobetzeko first appeared on DOT Durangaldea.

Visesa sozietate publikoak 715.500 euro bideratuko ditu lanen proiektua idaztera eta zuzentzera

ABADIÑO | Muntsaratzen alokairu babestuko 84 etxebizitza babestu (VPO) eraikitzeko egitasmoak aurrerapauso erabakigarria eman du. Eusko Jaurlaritzako Etxebizitza eta Hiri Agenda Sailari atxikitako Visesa sozietate publikoak ofizialki atera du lizitaziora eraikinaren proiektua idazteko eta obrak zuzendu zein ikuskatzeko kontratua, 715.500 euroko zenbatekoagatik (BEZik gabe).

Sektoreko enpresa interesatuek uztailaren 14ra arte izango dute euren eskaintzak aurkezteko epea. Kontratua esleitu ondoren, hautatutako talde teknikoak 20 asteko epea izango du arkitektura proiektua erabat zehaztu eta idazteko.

Etxebizitza publiko berri hauek Muntsaratzeko Gantza Zelaieta eremuko SR-3 eta SR-4 lursailetan eraikiko dira. Sustapen hau Abadiñoko Udalaren eta Eusko Jaurlaritzaren arteko hitzarmenari esker garatuko da; akordio hori urte honen azken hiruhilekoan sinatzea aurreikusten da.

Adostutakoaren arabera, Udalak SR-3 lursaila lagako dio Jaurlaritzari —SR-4 lursaila dagoeneko Euskal Autonomia Erkidegoko Administrazioaren jabetzakoa da—. Trukean, funtsezko baldintza bat bermatuko da: lehentasuna emango zaie Abadiñoko bizilagunei etxebizitza hauetan sartzeko. Eraikinak 13.000 metro koadro inguruko azalera eraikia izango du eta obrak egiteko aurrekontua 12,5 milioi eurokoa izango dela zenbatetsi du Visesak.

Plegu teknikoek prozedura xehatu bat ezartzen dute datozen urteetarako:

• 2027ko iraila: Etxebizitzen behin-behineko kalifikazioa lortzea.

• 2028ko martxoa: Eraikuntza lanen lizitazioa abiatzea.

• 2028ko azaroa: Replanteo akta sinatzea eta obren hasiera ofiziala.

• 2030eko azaroa: Lanen amaiera programatua, 32 hilabeteko exekuzio epearen ondoren.

Abadiñoko Udaletik gogorarazi dutenez, etxebizitza eskuratzea herritarren kezka nagusietako bat bihurtu da azkenaldian, agintaldi hasierako metabolismo demografikoaren diagnostikoak zein legealdi erdiko inkestak erakutsi dutenez.

Arazo honi erantzuteko, tokiko administrazioak hainbat neurri bultzatu ditu azken urteetan: lokalak etxebizitza bihurtzeko ordenantza, Hiri Antolamenduko Plan Orokor (HAPO) berrian baserriak lau etxebizitzatan banatzeko aukera, edota joan den urtarrilean abiatutako Abadiñoko lehen Etxebizitza Plana.

“Legegintzaldi hasieratik, Abadiñoko Udalak lehentasuntzat jo du etxebizitza. Alokairu publikoko etxebizitzak funtsezkoak izango dira helburu horretan aurrera egiteko eta udalerrian hautatutako behar garrantzitsuenetako bati erantzuteko”, nabarmendu dute udal iturriek.

The post Eusko Jaurlaritzak Muntsaratzen alokairuko 84 etxebizitza eraikitzeko proiektua lizitatu du first appeared on DOT Durangaldea.